Quickborn/Regenleed

1.
Regen, Regen drus’,
Wi sitt hier warm in Hus’!
De Vageln sitt in Bom to kurn,
De Köh de stat an Wall to schurn:
Regen, Regen drus’,
Wi sitt hier warm in Hus’!

2.
Regen, Regen rusch,
Wa rükt dat ut den Busch!
De Blöm de hangt so slapri dal,
De Böm de röhrt de Blæd ni mal:
Regen, Regen rusch,
Wa rükt dat ut den Busch!
  
3.
Regen, Regen sus’
Vun baben op uns Hus,
Vunt Dack hendal in striken Strom
Un lisen ut den Eschenbom:
Regen, Regen sus’
Vun baben op uns Hus.

4.
Regen, Regen rull,
Bet alle Gröben vull!
Denn lat de Wulken æwergan,
Lat de Sünn wedderkam’;
Regen, Regen rull,
Bet alle Gröben vull!