Ródnej rěči

nadpis	Ródnej rěči
awtor	Jakub Bart-Ćišinski
lěto
žórło	luzice.euweb.cz
licenca	public domain
nota	stary prawopis

    O klinč a brinč mi, ródna rěč,
    Kaž z njebjes lubosć wtebi dycha!
    Za njewjestu chcu tebje měć,
    Ty krasna mojich sonow pycha.

    Ty mojeju sy wušow wysk
    A hordosć jazyka sy moja.
    Hdyž ćěsni mje a spina stysk,
    Mi křidlo twoje zynki troja.

    Tak zynčo kaž dych nalětni
    A wonjejo mi w trunach hraješ.
    Móc słodka ze rta wěje ći,
    Hdyž do pjera mi kuzło tkaješ.

    Ty woheń mojich słowow sy
    A mojoh' mjena króna krasna.
    Hdyž wichori a hroža ćmy,
    Sy hwězda mojim myslam jasna.

    O hrěj nas, deb' nas a nam swěć,
    Ty wbohich Serbow złota pycha!
    Haj, klinć a brinč mi, ródna rěč,
    Wšak z njebjes lubosć w tebi dycha!