Ra toses de ades
Ra toses de ades
Uh! ce beles sta tosetes,
che 'l é ades par el paes:
somea tanta de scioretes,
bel vestides da testa ai pes.
Poches porta el ciameśoto,
ades de moda 'l é 'l abitin,
e par incaprizià canche śoanoto,
'es se bete el ciapelin!
De jachetes no s'in parla,
roba vecia da desfei...
palegrès pì no s'in varda,
s'i dora solo par guarnà i porziei!
Petenadures che par cejes,
duto un rizo de ca e de là...
inze 'l mus, s' 'es vede meses,
'es farà par no se vargognà.
'Es se sporca de sbeleto,
no s' 'es pó gnanche vardà,
e e 'es tofa de mugheto,
che vien fin da starnudà!
Ca in Anpezo 'es no usaa
tante lusse e vestis noe
's ea pì sćetes e 'es no portaa
vestis curte fin ai śenoe!
Vardà pura canche 'es camina!
Braes, coscì se mena el cu!
Strenśé ancora chera bustina,
finche risćià de bicià su.
Digo a cheres vestides da sciora
che 'es crede de esse ci sà ci...
e a tanta outres ancora
che 'es no sà pì ce modo śì.
Stupido! Me par che 'es dighe,
sfazadon! Lasciame in pasc!
Ma io me volto in là a ride,
a sentì ce ogetes da panegasc.
E se no me podé pì vede,
ades che v'éi tanto desprojià...
No stajede po tanto a crede...
Ghin ciato ancora da me fei slecà.
Ma par fenì na fre sul serio,
chesta paroles stajé a sentì:
"Manco lusse e pì criterio"
Aeo sentù? Se voré capì!