Ranje

nadpis	Ranje
awtor	Jakub Bart-Ćišinski
lěto
žórło	luzice.euweb.cz
licenca	public domain
nota	stary prawopis

(Sestina.)

    W mocy popušćuje křidło nocy;
    Měsac blědnje, wuhašeja hwězdy.
    Wot ranja so purpurowy woheń
    Lije z mocu do mróčelow; słónco
    Skhadźa; w złotym zabłysknu so błyšću
    Hory; zemju młode wita ranje.

    K žiwjenju a k swětłu młode ranje
    Woła ze spanja a ze ćmy nocy.
    Swoje zwónčki w womłodźenym błyšću
    Kwětki kolebaju. Rosne hwězdy
    Na trawje a keŕku kosi słónco.
    Nowej' palł lubosće so woheń.
    K kćěwej, k spěwej tutón hrěje woheń.

    Přez holu so šepta: Dobre ranje!
    Ptačkow spěw, wóń kwětkow bjerje słónco
    Za dar dźakny po přetratej nocy.
    K trunow hrě mje wabja złote hwezdy,
    Hdyž so ranje kupa w zbožu błyšću.

    Žiwjenje triumf we młodym błyšću
    Swjeći. Lubosće a mocy woheń
    Sapa w kóždym woku - Swěćće, hwězdy
    Zboža, Serbam tež! Njech čerstwe ranje
    Kće jim hač do časow skónčnej nocy!
    Lubosć wutrobow hrěj jim słónco!

    Rano, hdyž sej zemju budźi słónco,
    Stawa k žiwjenju wšo w nowym błyšću
    Ćmowe wottřasujo puta nocy.
    We wutrobach mócny hiba woheń
    So, hdyž k dźěłu zwoni čerstwe ranje
    Jasne do nutrinow sajo hwězdy.

    Ženje njehasńće, wy zlote hwězdy!
    Ludej serbskemu, kiž swětłe słónco
    Mojich pěsni je a spěwne ranje.
    Mojim spěwam swěćće w połnym błyšću
    Tež, zo hrěłe, swěćiłe kaž woheń
    Bychu do zymy a do ćmy nocy!

    Swěćće hwězdy, zboža, w złotym błyšću
    Do Serbow! Ćmu nocy zaćěŕ, słónco!
    Skutkow woheń zapal młode ranje!