Reynke de Vos/Vorrede

Eyne vorrede ouer dyt boek van Reynken deme vosse

Hir bevoren in den olden yaren, eer der tyd, dat god vorlözede dat mynschlyke geslechte, eer vnse here Cristus, ware god vnde mynsche, leet in der mynscheyt den bytteren doet vnde stunt wedder vp van deme dode vnde stech vp bouen alle hemmele vnde wert wedder komende to deme rechten gherychte, vor desser tyd der ghebord Cristi vyndetmen, dat dar syn ghewest vele naturlyke wyse mans, de vthvorkören vnde leff hadden wyßheyt vnde kunste, de men nomede phylozophy, dat in vnser sprake so vele is ghesecht alze leffhebbers der wyßheyt vnde der kunst. Men heeth ok etlyke van en poeten, dat is dychters efte tohopesetters hystoryen vnde gheschychte efte ok bysproke efte fabelen. Etlyke van dessen lereden deme volke dögede vnde wyßheyt vnde setteden ere lere slycht in böke vnde in schrift. Etlyke andere syn ghewest, de hebben ere lere vns naghelaten vnde de ghesath in verse vnde in bysproke vnde in fabelen, vp dat men ere lere vnde ören vlyd des to beth dar by scholde beholden. Manckt dessen is eyn ghewest, de to nutte vnde lere der mynschen gheschreuen heft eyne hystorye vnde fabele van Reynken deme vosse, de seer ghenoechlik is to lesen vnde to horen, vnde is ok vul van wyßheyt vnde guder exempel vnde lere. Desses suluen poeten lere to lesen vnde nicht to vorstaen enbrochte neen nutte efte vromen. Hir vmme, dat men en moghe lesen vnde ok vorstaen, ick Hinrek van Alckmer, scholemester vnde tuchtlerer des eddelen, dogent ken vorsten vnde heren hertogen van Lotryngen, vmme bede wyllen mynes gnedyghen heren, hebbe dyt yeghenwerdyge boek vth walscher vnde franßösescher sprake ghesocht vnde vmmeghesath in dudesche sprake to dem loue vnde to der ere godes vnde to heylsamer lere der, de hir ynne lesen, vnde hebbe dyt sulue boek ghedeelet in veer part vnde hebbe by yslyk capittel ghesath eyne korte vthlegginge vnde meninge des sulffsten poeten, vmme to vorstaen den rechten syn des capittels.