Säk veütik

Disü tiäd at »vpagased valemik« blinon sezüki se pened, ninöl mobi al fünam vpagaseda gletik pla bleds nuik smalik, kels sötoms finön täno sibinami okas. Ployeg at jinom obes anu vemo timoik, kelüp muton liedo dledön, das bleds i nu nog sibinöl odepuboms finü yel at u suköl. Ye if no vipobs logön suno fini vpamufa lölik, mutobs labön nogani, kel yufom pakami döla püka bevünetik, kel betidom e nunom züpelis valik volapükadöla dö mostep ota, dö blüfs nulik, pemeköl gönü volekam oma... Al mekön mögik liladanes obsik cödäti dö ployeg penömodöl begino, debükobs is büfuiko lonamis veütikün:

Segun nilud, das gased jölflanik de glet Timapenäda u Volaspodela (kela fomät binom i ut gaseda obsik. R.) e puböl vavigo u begino luüno telna a mul okanom papelön fa bonedels 2000, fünam gaseda somik pamobom ko stips za suköl: Gased postabomöd as lakifakopanöm nen lakifs. Posöds 1000 balid epelöl frans 10.- u maks 8.- e. l. ponemoms fünels, pösods 1000 suköl: lakifels. Bonedals 2000 balid pelomsöd pötü bonedam balid frans 10.- e täno: fünels du yels 4, lakifels du yels 9 suköl, bonedasuämi pelonöl fa cifef puvälöl, ye no lovöl frans 10.- a yel. Fünels e lakifels edafulöl bligis oksik du tüp pelonöl getomsöd omi du lifatim lemänik okas glato. Nogan pubomöd in vp peläsevöl fa kadem, e na ut ufinom vobi okik, o. b. ustukom püki bevünetik, tuvöl läsevi flanü mödanum züpelas döla püka bevünetik, in pük bevünetik kadema. Laltügs netapükik no daloms pübön in om. Redakels vpagasedas puböl atimo (Schleyer, Kniele, Huebsch, Bayer, Bateman, Wahren...) pacedomsöd as redakels pevälöl »eo ipso«, if oklemoms pübami bledas oksik, udafulöl bligis okas visü bonedels epelöl yelüpi puböl nu... Begino noganam e volekam döla at no okolkömom neletübis mödik, ab if döl at palensumom, onedobs militemi lölik, al kipön valikosi in leod, bi redakel cötifik omutom kösekön noe livüpi, sod timi lölik oka yege, e sikodo omutom papelön e pianiko onedom büri gletik yufelas pepelöl al dugön yegi lölik. Niludob, das ünü yels lul gased otuvom bonedelis sätik al mesedön redakefi e calelis votik, köseköl timi oksik gönü om e al papotön füneles glato u ba plo suäm güvöl potamoni e smalelidis, sagobsöd frans 3, keli täno pos yels lul suköl i lakifels omutoms pelön...

Gased lönomöd begino füneles e lakifeles in tef et, das na udafuloms bligis oksik du tüp pelonöl, getomsöd omi plo suäm nedelidikum, poso pacedomöd as lön kadema bevünetik vpa spetivo stita löpikün jäföl döli püka bevünetik ko kel redakef sötom steifön blibön in kolag flenik. Sosus datuvel vpa oklemom pübami »Vpableda lezenodik« e komedom bonedeles ata, bonedön gasedi nulik, getomöd 10% bonedasuäma, jüs at urivom suami de frans 5000 a yel, du lifatim oma. Pömetöl bonedeles 2000 balid plivilegi, spleob, das gased ogetom sunüno bonedelis sätik, al kanön pafünön, ko spel vedön lifafägik. Me gased bal puböl vavigo nited plo döl obsik oglofom sunumo, ka me gaseds mödik puböl te balna a mul u a muls 2, 3... Dub leodam yega gasedik in mod pemoböl niludob, das nek du tim nilik oriskom pübami bleda nulik, bi okapälom, das fünels e lakifels gaseda vavigik no obonedoms gasedili nulik.«

Finü laltüg säks dido vemo veütik padunoms, kiöp bonedels 2000 sibinoms e telido, va pübels gasedas anuik, e pato söl datuvel obalamoms. Tefü säk lätik oyufobs viliko e ma näms ployegi et e ofinobsöv pübami bleda smalik obas finü yel at u suköl, bi valadobs de volekam ota fluni gönikün, sägo mostepi nulik plo vapükamuf. Sikod spelobs, das i redakels vpabledas votik obaivögoms obes e okovoboms pöfüdü e gönü döl gletik, keli mekön jeni cedobs as sugivi obas.

Tefü delids gaseda somik, puböl vavigo u büfuiko vamulo telna, bonedels 1000 osätoms luvelato ya, al sefön sibini omik. Klödobs, das num so gletik vpanas vitimälik osibinom nog, kels opeloms luüno du yels balid suami de maks 8 u fr. 10, kel no binom gletikum ka bonedasuam, potamon... kel mutom papelön ya plo vpableds nuik 2-4. Ye al getön lovelogami dö num baik bonedelas e al panunön e konletön cedis vpanas dö ployeg at, obinos gudik, danemön komitefi, dat beginot at paplepadom gudiküno e miplöp alik pasekikom des begin. Züpel nonik velatik döla obsik kanom blibön lindifik visü säk veütik at!

Se Volapük: Gased al pakam Volapüka 1894, Nüm: 5, Pads: 1-3.