Séng-gĭng/Cháung-sié Gé/1
Dâ̤ 1 Ciŏng edit
1:1 Nguòng-sṳ̄ sì-hâiu, Siông-dá̤ cháung-cô̤ tiĕng dê.
1:2 Dê sê kĕ̤ng-hṳ̄ hông-dông, chĭng-iŏng siông sié ŭ-áng. Siông-dá̤ gì Sìng ông-dông lŏ̤h cūi méng.
1:3 Siông-dá̤ gōng: "Diŏh ô guŏng." Cêu ô guŏng.
1:4 Siông-dá̤ káng ciā guŏng sê hō̤. Siōng-dá̤ hŭng-biék guŏng gâe̤ng áng.
1:5 Ciā guŏng Siông-dá̤ giéu lō̤ Nĭk-dŏng, áng giéu lō̤ Màng-buŏ. Ô màng-buŏ, ô nĭk-dŏng, cuòi sê siŏh nĭk.
1:6 Siông-dá̤ gōng: "Cūi dṳ̆ng diŏh ô kĕ̤ng-ké, â̤ buŏng kŭi siông â gì cūi."
1:7 Siông-dá̤ cô̤ ciā kĕ̤ng-ké, lièng hŭng-biék siông â gì cūi. Cêu ô ciŏng-uâng.
1:8 Ciā kĕ̤ng-ké Siông-dá̤ giéu lō̤ Tiĕng. Ô màng-buŏ, ô nĭk-dŏng, cuòi sê dâ̤ nê nĭk.
1:9 Siông-dá̤ gōng: "Tiĕng â gì cūi diŏh cê̤ṳ siŏh ôi-ché̤ṳ, ciā dă tù iâ diŏh hiêng chók." Cêu ô ciŏng-uâng.
1:10 Ciā dă tù Siông-dá̤ giéu lō̤ Dê, cê̤ṳ siŏh-dŏi gì cūi giéu lō̤ Hāi. Siông-dá̤ káng ciŏng-uâng sê hō̤.
1:11 Siông-dá̤ gōng: "Dê diŏh săng chāu, lièng giék cī gì chái, gâe̤ng giék guōi-cī gì chéu, guōi-cī diē-sié ô hŏk, dŭ bìng ĭ cṳ̄ng-lôi lŏ̤h dê siông." Cêu ô ciŏng-uâng.
1:12 Dê cêu săng chāu gâe̤ng â̤ giék cī gì chái, lièng giék guōi-cī gì chéu, guōi-cī diē-sié ô hŏk, dŭ bìng ĭ cṳ̄ng-lôi. Siông-dá̤ káng ciŏng-uâng sê hō̤.
1:13 Ô màng-buŏ, ô nĭk-dŏng, cuòi sê dâ̤ săng nĭk.
1:14 Siông-dá̤ gōng: "Tiĕng siông diŏh ô săng guŏng hiêng chók, hŭng-biék nĭk-dŏng màng-buŏ, diâng sé̤ṳ sì, gé nièng nĭk.
1:15 Ciă guŏng diŏh tiĕng-dīng â̤ ciéu lŏ̤h dê lā̤." Cêu ô ciŏng-uâng.
1:16 Siông-dá̤ cô̤ lâng ciáh duâi guŏng: duâi gì guāng nĭk-dŏng, sá̤ gì guāng màng-buŏ; iâ cô̤ hṳ̄ sâ̤ gì sĭng.
1:17 Siông-dá̤ bà̤-buó ciă guŏng diŏh tiĕng siông, ciéu lŏ̤h dê lā̤.
1:18 Â̤ guāng-lī nĭk màng, hŭng-biék guŏng áng. Siông-dá̤ káng ciŏng-uâng sê hō̤.
1:19 Ô màng-buŏ, ô nĭk-dŏng, cuòi sê dâ̤ sé nĭk.
1:20 Siông-dá̤ gōng: "Cūi diŏh săng cêng sâ̤ ô uăk-miâng â̤ dêng-dâe̤ng gì nó̤h, iâ diŏh ô cēu buŏi lŏ̤h tiĕng dŏng kĕ̤ng-ké lā̤."
1:21 Siông-dá̤ cêu cháung-cô̤ duâi ngṳ̀, lièng cūi diē sū săng gáuk cṳ̄ng â̤ dêng-dâe̤ng uăk gì nó̤h, dŭ bìng ĭ cṳ̄ng-lôi, gâe̤ng gáuk cṳ̄ng buŏi cēu iâ bìng ĭ cṳ̄ng-lôi. Siông-dá̤ káng ciŏng-uâng sê hō̤.
1:22 Siông-dá̤ cé̤ṳk-hók ĭ, gōng: "Diŏh sĕng-ṳ̆k cêng sâ̤, chṳ̆ng-muāng lŏ̤h gáuk hāi hṳ̄ diē, cēu iâ diŏh sĕng-ṳ̆k cêng sâ̤ lŏ̤h dê lā̤."
1:23 Ô màng-buŏ, ô nĭk-dŏng, cuòi sê dâ̤ ngô nĭk.
1:24 Siông-dá̤ gōng: "Dê diŏh săng cṳ̆ iông uăk gì nó̤h, dŭ bìng ĭ cṳ̄ng-lôi, tàu-săng, tè̤ng-ngiê, iā-séu, dŭ bìng ĭ cṳ̄ng-lôi." Cêu ô ciŏng-uâng.
1:25 Siông-dá̤ cêu cô̤ dê siông gì iā-séu, tàu-săng, gáuk-cṳ̄ng tè̤ng-ngiê, dŭ bìng ĭ cṳ̄ng lôi. Siông-dá̤ káng ciŏng-uâng sê hō̤.
1:26 Siông-dá̤ gōng: "Dăng diŏh cô̤ nè̤ng bìng Ngō̤-că̤ gì iông-sék, sāi ĭ guāng hāi lā̤ gì ngṳ̀, tiĕng lā̤ gì cēu, tàu-săng, gâe̤ng dê siông gáuk cṳ̄ng tè̤ng-ngiê, lièng guāng ciòng dê."
1:27 Siông-dá̤ cêu bìng buōng-sĭng gì iông-sék cháung-cô̤ nè̤ng, cháung-cô̤ ĭ cêu sê ciéu Siông-dá̤ gì iông-sék, cháung-cô̤ lā nàng gâe̤ng nṳ̄.
1:28 Siông-dá̤ cé̤ṳk-hók ĭ, gâe̤ng ĭ gōng: "Diŏh sĕng-ṳ̆k cêng sâ̤, piéng muāng lŏ̤h ciā dê, sāi dê hŭk nṳ̄ guāng-â, lièng guāng hāi lā̤ gì ngṳ̀, tiĕng lā̤ gì cēu, gâe̤ng dê siông gáuk cṳ̄ng ô uăk-miâng â̤ dêng-dâe̤ng gì nó̤h."
1:29 Siông-dá̤ gōng: "Dê siông sé̤ṳ-ché̤ṳ gáuk cṳ̄ng giék cī gì chái, gâe̤ng gáuk cṳ̄ng ô hŏh guōi-cī gì chéu, Nguāi dŭ sé̤ṳ nṳ̄ có̤ kēu-liòng.
1:30 Nâ gáuk cṳ̄ng gì iā-séu, tiĕng lā̤ gì cēu, gâe̤ng bà dê-dău gáuk cṳ̄ng uăk gì nó̤h, Nguāi dŭ sé̤ṳ chăng-chāu ké̤ṳk ĭ siăh." Cêu ô ciŏng-uâng.
1:31 Siông-dá̤ káng sū có̤ gì, dŭ sê cêng hō̤. Ô màng-buŏ, ô nĭk-dŏng, cuòi sê dâ̤ lĕ̤k nĭk.
| Information about this edition | |
|---|---|
| Contributor(s): | GnuDoyng |
| Level of progress: | 
|