Séng-gĭng/Cháung-sié Gé/11
Dâ̤ 11 Ciŏng
edit11:1 Dŏng-sì tiĕng-â nè̤ng kēu-ĭng siŏh-iông, uâ-ngṳ̄ siŏng-dùng.
11:2 Iù dĕ̤ng biĕng buăng kó̤ sì-hâiu, gáu Sê-nā dê-huŏng, ngê̤ṳ diŏh bàng dê, cêu lŏ̤h hŭ-uái dêu.
11:3 Gáuk-nè̤ng siŏng ngiê-lâung gōng: "Diŏh cà̤ lì có̤ ciŏng, sāi huōi siĕu hō̤." Ŏ̤h ciŏng-uâng, ô ciŏng, dáung có̤ siŏh, bô ô siŏh-iù, dáung có̤ huŏi.
11:4 Bô gōng ā: "Diŏh cà̤ lì kī siàng gâe̤ng ták, ták dīng diŏh gèng gáu tiĕng, sāi nguāi miàng diòng chók, miēng-dék nguāi-nè̤ng sáng kó̤ dê lā̤ gáuk-ché̤ṳ."
11:5 Ià-Huò-Huà gáung-lìng, ó̤i káng sié-găng nè̤ng sū kī gì siàng, gâe̤ng ták.
11:6 Ià-Huò-Huà cêu gōng: "Cé̤ṳng-nè̤ng có̤ siŏh-iông gì, báh-sáng uâ-ngṳ̄ iâ siŏng-dùng, dăng kī-chiū ciŏng-uâng có̤ lāu. Gáu ī-hâiu, ĭ sū ó̤i có̤ gì, mò̤ siŏh iông â̤ géng-cī dék ĭ.
11:7 Ngō̤-că̤ diŏh gáung-lìng, biéng luâng ĭ-gáuk-nè̤ng gì kēu-ĭng, sāi ĭ uâ-ngṳ̄ mâ̤ siŏng tŭng."
11:8 Ŏ̤h ciŏng-uâng, Ià-Huò-Huà cêu sāi ĭ iù hŭ-uái sáng kó̤ dê lā̤ gáuk-ché̤ṳ, kī siàng gì dâi cêu sák kó̤.
11:9 Ĭng Ià-Huò-Huà biéng luâng cé̤ṳng báh-sáng gì kēu-ĭng, sāi ĭ iù hŭ-uái sáng kó̤ dê lā̤ gáuk-ché̤ṳ, gó-chṳ̄ ciā siàng miàng giéu Bă-biĕk. (Bă-biĕk huăng-ĭk, cêu sê luâng.)
11:10 Siēng gì cŭk-puō gé diŏh â-dă̤. Hùng cūi hâiu lâng nièng, Siēng siŏh báh huói, săng Ā-huák-sák:
11:11 Siēng săng Ā-huák-sák hâiu, câi sié ngô báh niêng, bô sang ô nàng nṳ̄ giāng.
11:12 Ā-huák-sák săng-sĕk-ngô huói, săng Sák-lăk:
11:13 Ā-huák-sák săng Sák-lăk hâiu, câi sié sé báh lìng săng niêng, bô sang ô nàng nṳ̄ giāng.
11:14 Sák-lăk săng-sĕk huói săng Hĭ-báik:
11:15 Sák-lăk săng Hĭ-báik hâiu, câi sié sé báh lìng săng niêng, bô sang ô nàng nṳ̄ giāng.
11:16 Hĭ-báik săng-sĕk-sé huói, săng Huák-lĕk:
11:17 Hĭ-báik săng Huák-lĕk hâiu, câi sié sé báh săng-sék niêng, bô sang ô nàng nṳ̄ giāng.
11:18 Huák-lĕk săng-sĕk huói săng Lăk-gēu:
11:19 Huák-lĕk săng Lăk-gēu hâiu, câi sié lâng báh lìng gāu niêng, bô sang ô nàng nṳ̄ giāng.
| Information about this edition | |
|---|---|
| Contributor(s): | Michael Ly |
| Level of progress: | 
|