Séng-gĭng/Mā-tái Hók Ĭng/2
2:1 Dŏng Hĭ-lŭk uòng sì-hâiu, Ià-sŭ ī-gĭng chók-sié diŏh Iù-tái gì Báik-lé-hèng, ô báuk-sê̤ṳ gūi ciáh cê̤ṳ dĕ̤ng huŏng lì Ià-lô-sák-lēng,
2:2 muóng gong, Ô lā săng-chók-sié có̤ Iù-tái nè̤ng gì Uòng, Ĭ diŏh dĕ̤ng-nē̤ nĭ? íng nguāi-nè̤ng diŏh dĕ̤ng huŏng ô káng-giéng Ĭ gì-sĭng, gó-chṳ̄ lì bái Ĭ.
2:3 Hĭ-lŭk uòng tiăng-giéng cêu giăng, tŭng Ià-lô-sák-lēng gì nè̤ng iâ giăng.
2:4 Cêu diêu cé̤ṳng cié-sĭ-diōng gâe̤ng mìng-găng tĕ̤k-cṳ̆ nè̤ng, muóng ĭ gōng, Gĭ-dók éng-găi diŏh diê-ôi-ché̤ṳ chók-sié.
2:5 Gáuk nè̤ng éng gōng, Éng-găi diŏh Iù-tái gì Báik-lé-hèng: ĭng ô lā siĕng-dĭ gé gōng,
2:6 Iù-tái dê gì Báik-lé-hèng ā, Nṳ̄ diŏh Iù-tái hū gâing dṳ̆ng-găng ng sê dīng sá̤: Ĭ ciŏng-lài ô gŭng-uòng chók diŏh nṳ̄ dê-huŏng, Mŭk-iōng nguāi Ī-sáik-liĕk báh-sáng.
2:7 Hĭ-lŭk uòng cêu buôi dê diêu báuk-sê̤ṳ, siòng-sá̤ muóng sāi ĭ sĭng chók gì sì-hâiu.
2:8 Cêu sāi ĭ kó̤ Báik-lé-hèng hŭng-hó ĭ gōng, Nṳ̄ kó̤ sá̤ că ciā niê-giāng; ngê̤ṳ diŏh cêu lì bó̤ gâe̤ng nguāi gōng, ké̤ṳk nguāi iâ kó̤ bái Ĭ.
2:9 Báuk-sê̤ṳ hông uòng gì mêng cêu kó̤; kī sĕng diŏh dĕ̤ng huŏng sū káng-giéng gì sing, lŏ̤h ĭ sèng-dāu īng-diô, dĭk-tàu gáu ciā niê-giāng gì ôi-ché̤ṳ, cêu hiók siông sié.
2:10 Báuk-sê̤ṳ káng-giéng ciā sĭng cêng huăng-hī.
2:11 Gáu diē chió káng-giéng ciā niê-giāng gâe̤ng Ĭ nŏng-nā̤ Mā-lé-ā; cêu gôi lā̤ bái ciā niê-giāng; kŭi kī bō̤ ăk, dò̤ chók uòng-gĭng, ṳ̄-hiŏng, mŭk-iŏh, cī gūi iông lā̤-ŭk hióng Ĭ.
2:12 Báuk-sê̤ṳ kó̤ có̤ máe̤ng dṳ̆ng-găng dáik Siông-Dá̤ mĕk-sê mêng ĭ mŏ̤h huòi tàu kó̤ giéng Hĭ-lŭk, cêu téng bĕk diô doing kó̤ buōng dê-huŏng.
2:13 Báuk-sê̤ṳ kó̤ ī-hâiu, Ciō gì tiĕng-sé̤ṳ táuk máe̤ng gâe̤ng Iók-sáik gōng, Nṳ̄ kī-lì dái niê-giāng gâe̤ng Ĭ nòng-nā̤, cāu kó̤ Aĭ-gĭk, hiók hŭ-uái dīng nguāi cī-diēng nṳ̄ : ĭng Hĭ-lŭk buóh sing ciā niê-giāng ó̤i tài Ĭ.
2:14 Iók-sáik cêu kī lì táu màng dái niê-giāng gâe̤ng Ĭ nòng-nā̤, kó̤ Aĭ-gĭk;
2:15 hiók hŭ-uái gáu Hĭ-lŭk sī kó̤: ciā dâi éng-ngiêng Ciō táuk siĕng-dĭ sū gōng gì uâ, Nguāi báik-cèng ô diêu Nguāi giāng chók Aĭ-gĭk.
2:16 Dŏng-sì Hĭ-lŭk hiēu-dék ké̤ṳk báuk-sé̤ṳ piéng, dīng sāi-sáng, cêu sāi nè̤ng kó̤ Báik-lé-hèng, ciŏng siàng-diē lièng sé̤ṳ gīng sū iū gì dòng-buŏ-giāng, bìng ĭ siòng-sá̤ muóng báuk-sê̤ṳ gì sì hâiu sáung kī, huàng cê̤ṳ lâng huói ī hâ, cêng hèng tài kó̤.
2:17 Ŏ̤h-ciŏng-uâng éng-ngiêng siĕng-dĭ Ià-lé-mī sū gōng gì uâ,
2:18 Ĭ gōng, Diŏh Lăk-mā tiăng-giéng ô siŏng-sĭng tiè-mà, Dīng chă̤-chāng gì siăng-ĭng, Cêu sê Lăk-giék Sê tiè giāng; Ĭng giāng mò̤ kó̤ ng kīng sêu ăng-ói.
2:19 Gáu Hĭ-lŭk sī kó̤, Iók-sáik diŏh Aĭ-gĭk, Ciō gì tiĕng-sé̤ṳ lŏ̤h máe̤ng dṳ̆ng-găng hiēng-hiêng, gâe̤ng ĭ gōng,
2:20 Nṳ̄ kī-lì dái niê-giāng gâe̤ng Ĭ nòng-nā̤, kó̤ Ī-sáik-liĕk dê-huŏng: ĭng ó̤i niê-giāng, ciā nè̤ng sī kó̤ lāu.
2:21 Iók-sáik cêu kī-lì dái gâe̤ng Ĭ nòng-nā̤, lì Ī-sáik-liĕk dê-huŏng.
2:22 Tiăng-giéng Ā-gĭ-lō̤ diŏh Iù-tái, ciék ĭ nòng-mâ Hĭ-lŭk gì ôi có̤ guók uòng, cêu giăng, mò̤ gāng kó̤ hŭ-uái; bô có̤ máe̤ng dṳ̆ng-găng dáik diŏh cī-diēng, gó-chṳ̄ kó̤ Gă-lé-lé gīng nô̤i,
2:23 gáu siŏh cô̤ siàng, miàng giéu Nā-sák-lĕk, cêu gṳ̆-cê̤ṳ hŭ-uái: ī-dé éng-ngiêng siĕng-dĭ sū gōng gì uâ, Nè̤ng buóh chĭng Ĭ sê Nā-sák-lĕk nè̤ng.
| Information about this edition | |
|---|---|
| Contributor(s): | Michael Ly |
| Level of progress: | 
|