Séng-gĭng/Mā-tái Hók Ĭng/4

1Ià-Sŭ géng-siăh, sêu mò̤-gūi ché. 11Mò̤-gūi lié kó̤ tiĕng-sé̤ṳ hŭk-sé̤ṳ Ià-sŭ; 13Ià-Sŭ gṳ̆-cê̤ṳ Giă-báik-nùng; 17Kī-chiū diòng Hók-ĭng; 18Diêu Bī-dáik gâe̤ng Ăng-dáik-liĕk có̤ sé̤ṳ-dù; Diêu Ngā-gáuk gâe̤ng Iók-háng có̤ sé̤ṳ-dù; 21Muŏk cêng sâ̤ bang nè̤ng.

4:1 Dŏng sì Séng-Sìng īng Ià-Sŭ gáu kuōng-iā ké̤ṳk mò̤-gūi ché Ĭ.
4:2 Ià-Sŭ mò̤ siăh sé-sĕk nĭk sé-sĕk buŏ, ī-hâiu bók-lō̤ gŭi.
4:3 Mò̤-guī cêu lì gâe̤ng Ĭ gōng, Nṳ̄ nâ sê Siông-Dá̤ Cṳ̄, cêu mêng ciā siŏh biéng có̤ biāng.
4:4 Ià-Sŭ éng gōng, Séng-Gĭng ô gōng. Nè̤ng â̤ uăk, bók-cī nâ ciâ lā biāng, gó diŏh ciâ Siông-Dá̤ ék-chiék sū gōng gì uâ.
4:5 Mò̤-gūi cêu īng Ià-Sŭ gáu séng gĭng; sāi Ĭ kiê diŏh dâing cék dīng,
4:6 gâe̤ng Ĭ gōng, Nṳ̄ nâ sê Siông-Dá̤ Cṳ̄, cêu tiéu lŏ̤h kó̤: ĭng Séng-Gĭng ô gōng, Ciō dék-dék mêng Ĭ tiĕng-sé̤ṳ bō̤-hô Nṳ̄: Ĭ buóh ê̤ṳng chiū hô Nṳ̄, Miēng-dék Nṳ̄ kă ték siŏh lā̤.
4:7 Ià-Sŭ gōng, Séng-Gĭng [uâ?] ô gōng, Ng-tĕ̤ng ché Ciō nṳ̄ gì Siông-Dá̤.
4:8 Mò-gūi bô īng Ià-Sŭ gáu dīng gèng gì săng, ciŏng tiĕng-â gáuk-guók gâe̤ng gáuk-guók gì ìng-iêu cī ké̤ṳk Ĭ káng:
4:9 gâe̤ng Ĭ gōng, Nṳ̄ nâ gôi lā̤ bái nguāi, nguāi cêu ciŏng cī sâ̤ nó̤h dŭ sé̤ṳ Nṳ̄.
4:10 Ià-Sŭ cêu éng ĭ gōng, Sák-dáng tó̤i kó̤: ĭng Séng-Gĭng ô gōng, Éng-dŏng bái Ciō nṳ̄ gì Siông-Dá̤, dŭk-dŭk hông-sê̤ṳ Ĭ.
4:11 Mò̤-gūi cêu liê Ià-Sŭ kó̤; tiĕng-sé̤ṳ cêu lì hŭk-sê̤ṳ Ĭ.
4:12 Ià-Sŭ tiăng-giéng Iók-hâng guŏng diŏh găng-diē, cêu kó̤ Gă-lé-lé;
4:13 liê Nā-sák-lĕk, lì Giă-báik-nùng dêu, ciā dê-huŏng pâung hāi [?], sê diŏh Să̤-buó-lùng, Năk-dâi-lé dê-gái:
4:14 cuòi sê éng-ngiêng siĕng-dĭ Ĭ-suói-ā sū gōng gì uâ, gōng,
4:15 Să̤-buó-lùng, Năk-dâi-lé gì dê-huŏng, Ék-dái pâung hāi sê Iók-dáng ò̤ ngiê-dāu, Bĕk-guók nè̤ng gì Gă-lé-lé,
4:16 Báh-sáng dêu diŏh áng gì ôi-ché̤ṳ Ī-gĭng káng-giéng duâi guŏng, Nè̤ng dêu diŏh sī dê, háik-áng gì dê-huŏng, Iâ ô guŏng ciéu ĭ.
4:17 Cê̤ṳ ciā sì-hâiu Ià-Sŭ kī chiū diòng dô̤ gōng, Tiĕng-guók gê̤ṳng lāu; nṳ̄-nè̤ng găi-dŏng huói cô̤i gāi guó.
4:18 Ià-Sŭ téng Gă-lé-lé hāi biĕng giàng guó, káng-giéng lâng ciáh hiăng-diê, cêu sê Să̤-muòng, bô chĭng Bī-dáik, gâe̤ng ĭ hiăng-diê Ăng-dáik-liĕk, pă mâe̤ng lŏ̤h hāi; ĭng ĭ sê tō̤ ngṳ̀ gì nè̤ng.
4:19 Ià-Sŭ gâe̤ng ĭ gōng, Lì gṳ̆ng Nguāi, Nguāi buóh sāi nṳ̄ kó̤ tō̤ nè̤ng gâe̤ng tō̤ ngṳ̀ siŏh iông.
4:20 Ĭ cêu ké kó̤ ciā mâe̤ng, gṳ̆ng Ià-Sŭ.
4:21 Cái giàng guó bô káng-giéng lâng ciáh hiăng-diê, sê Să̤-bī-tái gì giāng Ngā-gáuk, lièng ĭ hiăng-diê Iók-hâng, gâe̤ng ĭ nòng-mâ Să̤-bī-tái, diŏh sung lā̤ buō mâe̤ng; Ià-Sŭ diêu ĭ lì.
4:22 Ĭ cêu biĕk ĭ nòng-mâ, liê sùng, lì gṳ̆ng Ià-Sŭ.
4:23 Ià-Sŭ giàng Gă-lé-lé sé̤ṳ-ché̤ṳ, lŏ̤h gáuk huôi-dòng gá-hóng, diòng tiĕng-guók hók-ĭng gì dô̤-lī, lièng muŏk báh-sáng gáuk cṳ̄ng gì cĭk gâe̤ng bang-tiáng.
4:24 Ĭ miàng-săng iòng-diòng Sê̤ṳ-lé-ā gáuk dê-huŏng: ô nè̤ng dáik bang huâng cṳ̆ céng gáuk cĭk, huâng gūi, diĕng-gáng, hŭng-niōng, dŭ iĕu ĭ lì Ià-Sŭ lā̤; Ià-Sŭ dŭ tá̤ ĭ muŏk.
4:25 Cê̤ṳ Gă-lé-lé, Dă̤-gă-pŏ̤-lé, Ià-lô-sák-lēng, Iù-tái, Iók-dáng ò̤ ngiê-dāu, ô cêng sâ̤ nè̤ng gṳ̆ng Ià-Sŭ.

Sèng 1 ciŏng · Â 1 ciŏng · Diōng kó̤ «Mā-tái Hók Ĭng» mŭk-liŏh
Information about this edition
Edition:
Source:
Contributor(s): Michael Ly
Level of progress:
Notes:
Proofreaders: