Sanıka Thüye
Vatene ra gore, thüye veyvıka de zaf rındeke biya. Usar, waxtê waru-şiyene biyo. Warey gılê kowunê berzu ra, zaf ki düri biyê. Raya waru cêr wertê bırru ra, dere u derxulu ra, cor wertê kemer u kuçu ra, tırr u gavanu ra vêrena ra, sona. O waxt dêştunê waru 4-5 sati piya (eve lıngu) şiyêne waru.
Rozê oncia cêniyê dewe sodır fejir ra ustê ra, mal u mulê xo veto tever ke berê ware. Vısturiya veyvıke, veyvıke sonde temey kerda, vato; “Tı ki rew rawurze niaz poze, veyvıkunê dewe de bê ware.”
Veyvıke sodır hewn de menda. Veyvıkê dewe biyê top, amê verê çêveri, venga cı do. Veyvıke vato; “Destê mı nıka mir dero, vınderê piya some!” Veyvıku vato; “Ma some hêni sero to pime” Kutê´ra raye, şiyê. Şiyê hêni sero egle nêbiyê.
Veyvıke karê xo qedêno, niazê xo gureto vejiya tever. Vato; “Yi nıka na dot hêni de mı sero vınetê, ez hervina dıma kuyi, şêri cı reşi.” Teyna kuna ´ra cêniyu dıma, sona. Xeylê ke sona, Hêni sero kêşi nêvênena. Raya waru ki nêzonena. Beno tari, xof gıneno pıro, xof ra fırra çhokunê xo şikina.
Xo-xode vana; “Qusır qusır, ala tezel u taliyê mı de niade, ezo cıra vışiyu! Va mırê şia biyêne, ez mekuyêne raye...”
Veyvıke zaf tersena, niazê xo uza nana ro, cêrena ve Heqi vero, vana; “Heqo, dilegê mı ke to ra esto, ez theyr bi, daru beri ra nişi, na kowu ra xo rê sondane bıwani!”
Hetê Heqi ra dilegê xo qewul beno. Awa-nawa eke bi sonde nisena gılê daru ra, wanena:
- - “Thuu thuu!
- - Biyo tari su!
- - Cêni şi waru!
- - Ez cıra vış'u!“
_________________________________________________________________________________________________________________________________________
- Vatoğe: Najni Heyderıze
- Arêker: Hawar Tornêcengi