Señaldades

by Juan Menéndez Pidal

Señaldades  (1925)  by Juan Menéndez Pidal

¡Maruxina, Maruxina,
Nial de miós pensamientos
Que esnalando, y esnalando,
Como paxarinos tienros
Fartucos d' andar p' el mundu,
Sin topar n' el mundu fuelgu,
Ván nochase los probinos
De tó memoria 'n el ñeru !
Hoy lloñi de tí, mialma,
Hoy lloñi de tí flaquezco,
Y quiero tar xunto á ti
Siquiera co 'I pensamientu:
Ende van mis señaldades
Como paxarinos tienros;
Ende van los miós amores
So les aliquines dellos.
Cuando alleguen cabo á tí,
Co los tos brazos abiertos
Aguardalos, Maruxina;
Sal, mió neña, escontra dellos;
En regozos de to saya
Fay que se posen d' un vuelu,
Y afalágalos, mió vida,
Calécelos en to pecho
Non sía qu' á morrer vayan
Tarrecidos por el xelu:
Failes ñeru en tos manines;
Y, como yes madre dellos,
Su piquín en la tu boca,
Dayos tu misma limentu
Qu' ansina, por tí cebados,
Vevirán los miós recuerdos.
¡ Paxarinos del amor !
Paxaretinos parleros
Qu' alegran mió triste vida
Cantando en mió pensamientu,
Enguedeyados los probes,
Enguedeyados y presos
En 'os bardiales d' escayos
De miós llaceries sin cuentu;
En sin ver la lluz del sol,
Que siempre enfoscan mió cielo
Neblinas de señaldá
Y el orbayu de miós güeyos:
Cuando alleguen xunto á tí,
En sin alendar y secos,
N' fonte de tus amores
Dayos de beber, mió cielu,
Que van ardiendo de sede,
Por to querencia morriendo.
Cúidamelos, Maruxina;
Non niegues agua al sedientu,
Y Dios te lo pagará
Como han pagátelo ellos
Amorosinos cantando,
Cantando sones melgueros
Al pié de la tó quintana
En los árboles del güertu:
T' arrollarán al dormite
Como una madre al so neñu;
Por la nuichi, cuando dormias,
Oiraslos cantar en sueños;
Oiraslos al ser de día
Cuando seliquín el vientu
Ximielgue les verdes fueyes,
Pinte la lluz los peñedos,
Y aún el llucerín del alba
Pestañe solu ' nel cielo.
Y si quiciabes morrieres,
Dios non me premita vellu;
Non se escaecerán de tí
Que en el mismu cementeriu
Quexaríanse, esnalando
Sobre to defunto cuerpo;
Maruxina, Maruxina,
Nial de miós pensamientos.