Se statud

Se statuds „Pakamakluba zenodik Volapüka“.

II. Fünam Kluba.

Bagaf 3.^id - Klub, al güvön fünasegivis balid, segivom Bligatis de fr. 10 a bal no veilöl fleni, kelas aniks pogegivoms väyelo dub loteram, segun sluds Lasama.

Bligats zigonöl no okanoms lovestepön nümi 400.

Segivom i Lakifis no pogegivöl de fr. 5 a bal. Nüm atas binom nepemiedik.

III. Tefü Kopanals - Gits e bligs.

Bagaf 4.^id - Kopanals padistinoms in:

Kopanals	bestimik
»	lepemelidik
»	fünöl
»	jenik
»	spodöl

Bagaf 5.^id - Kopanal alik polensumom sukü codät Konsälefa dilekik. Nomam pötik onomom lasumami.

Bagaf 7.^id - Pomoboms Stimakopanals uts kels udünoms legudiko Klubi, ud uyüfoms vobadiko Vpayegi. Pesevam otas pomekom fa Lasam.

Bagaf 8.^id - Lepemelidakopanals binoms kels penapömetoms Bligatis u Lakifis luüno 3. Kanoms i pavälön fa Lasam Lepemelidakopanals, nedämü gits omas, kopanals jenik ut, kels uyüfoms setenami Kluba dub vob vobadik omsik du yels kil suköl.

Bagaf 9.^id - Nems Stimakopanalas e Lepemelidakopanals pomaniföfoms dub gased. Kluba e posetopoms dub pänod stimik in säls Kluba. Aikanoms dilidön Komitefis, ailaboms giti bevütlidöna al tidüps maniföfik, geböna Bukakonleti e dilidöna Lasamis ko vogod^[1] konsälöl tefü bepükam e belobam yelakala pesegivölosa e danemam Klubacifela.

Bagaf 11.^id - Kopanals jenik sötoms labön lifayelis 18 e kodü lasumadabeg oksik aisötoms dilidön Klubi luüno du yel bal des Balul I.^id u Velul I.^id pos lasumam okas. Ven viloms setlidön, sötoms notön Konsäli penädo dö atos muls tel büfü fin tana oksik, voto potanoms du yel suköl.

Peloms läpoli kilamulik suämöl fr. 2 e lasumatlipi suämöl fr. 5. - PEnapömetöl Lakifis plu ka bal, u Bligatis plu ka tel no opelom lasumatlipi.

Bagaf 12.^id - Kopanals jenik ailaboms giti, fölamü büedam pötik:

a) Ningolöna ma plid libik okas in säls e geböna Bukakonleti;

b) Kosadöna glato tidüpis, kokömis, pükatis maniföfik;

c) Bonedöna glato gasedi povälöl fa Lasam as nogan Kluba;

d) Bevütlidöna in Lasams valik ko vögod bekonsälöl, välöna Cifeli Kluba e pavälöna in ot aif obinoms Kopanals sis muls 6, ed olaboms demanubis zesüdik;

e) Juitöna pöfüdis kelis Konsälef dilekik osteifom dagetön fa Klubs sümik tälik u selänik, oloföl rezipi otes;

f) Juitöna pöfüdis votik valik, podagetöl baiko fa Konsälef plo Kopanals kluba.

Bagaf 13.^id - Kopanals spodöl binoms kels, nesteböl in Milano, oibligomsok bisepelön franis 4 a yel. No opeloms lasumatlipi ed oijuitoms pöfüdis pagevöl Kopanales jenik, sesümü pejenöls in bagaf 12.^id bagafil d).

Gased poipotom Kopanales nesteböl in Milano, sukü gegivam potasegivas gletikum (Zims 50 pluo a yel).

NOETS. (Vükifonät)

1. Bükapök; pla: vögod.

Se Nunal 1889, Nüm: 1, Pads: 4-5.