Sedanun bödila
Ofpul sembal vöno na idagalof gödelo älogedof len lok okik ed ädalogof das äbinof vemo lejönik. Logs okik äbinoms blägik äs bäad e däspagoms nidiko me fil lanik bevü logahels lonedik äsif lut dusik gödela ijemom omis dubü kids petiföl. Köl lipas ofik äsümoms celis madik, e ven äsmülof, keds tel tutas, vietik äs flog nitatimik äjonoms okis. Äbinof jafäd vonik, loged logas kela äfanomöv ladi mana ledüfugikün; deno no äbinof läbik.
Älogedof denu len len lok e äseifof glifiko. "Liedö!" äsagof oke, "mans löfoms vomis demü jön; pos yels nemödik fil yuna in logs e köl cigas ofegoloms, täno man nelaidöfik ofögetom lepömetis okik e osükom lugodis nulik."
Du äpükof atosi bödil äflitom su litöpatlel cema ofik e äbeginom kanitön psami gödelik oka. Musig melodik äjinom äsliko kanit de kor sülik e vilgin pälegälof dubü benoton sofik. Ven kanit pifinom, böd äfeflitom, ab pos minuts nemödik du läd ästanof meditöfiko, böd äflitom denu löpu litöp.
Äpolom bevü tipamuds okik stöfi semik me kel bumön smabedi plo lom füdik oka. Vien äbladom, defalapöp smalik äfalom de tipamud bödila, äzigonom e fino äveksänom su litöpamön cema vilgina. Läd äsärolinof blekadili at - e kisi tikol äbinom pepenöl len atos? Eko:
"Tim, el tifel, blufom dinis valik, ab gud lada voma kanom denetipön leyebaneifi omik."
Läd äliladof vödis at, äsmülof gälodiko e äpladof blekadili len blötazenod okik.
Sagon das pos yels luls läd at binof nogo jönik. Ämatof poedali sembal in pag fatänik oka, e lifs oksik ebinoms dül neperopöl.
Litöp in kel bödil äkanitom pajonom sägo tudelo täveles äs blöf velatöfa konila at.
JOHN J. DAVIES.
Se Kosmopolan 1891, Nüm: 3, Pads: 56-57.