Serbska wieska

nadpis	Serbska wieska
awtor	Jakub Bart-Ćišinski
lěto
žórło	http://texty.citanka.cz/
licenca	public domain
nota	stary prawopis, Formy

    Tam w dólčku we kwětkatym
    So k hórcy tuli mała wjeska,
    A žołmička přez wjesku pleska
    Po žłobju kamuškatym.
    Tam rjenje, rjenje je;
    Tam so mi chce!

    W srjedź wsy so wowcki pasu
    A dźěći z nimi maju hraje,
    Pod lipu wowka bajki baje
    Jim wjecor w lětnim času.
    Tam ćicho, ćicho je;
    Tam so mi chce!

    Hólc spěwa sej do kosy,
    Serp pěseń zynčo holčo wodźi;
    Pót žnjeński lóšt a lubosć płodźi
    A dźěło radosć nosy.
    Tam zbože, zbože kće;
    Tam so mi chce!

    Hdyž dźěło dokónčene,
    Mać, nana, dźěći, dźěda, wowku
    A wotročka a cuzu dźowku
    Tam blido syći jene.
    Tam lubosć, lubosć kće;
    Tam so mi chce.