Serbskim křižerjam

nadpis	Serbskim křižerjam
awtor	Jakub Bart-Ćišinski
lěto
žórło	luzice.euweb.cz
licenca	public domain
nota	stary prawopis

    Kajke radosćiwe klinča hłosy
    Wot Kamjenca hač do Budyšina?
    Što jusk z wotrowskich so horow nosy
    A hač za Kulow so dele pina?

    Wuběžał čas ćicheho je posta -
    Z cyrkwjow jutrowna so radosć zwoni;
    Khrystus stanył je, a w rowje wosta
    Drasta jeno! Jandźeł z njebjes hroni.

    Serbscy křižerjo ze wšitkich dworow
    Na jutrownyoh konjach wujězdźuja.
    Z khorhowjemi w ćahach pyšnych porow
    Zanošuja z hłosom haleluja. -

    Konje w kóstkatym a złotym gratu
    Hriwy zběhaju hač wyše wuši
    Kudźerjawe, njesu zmahowatu
    Bantow pychu spjatu do wopuši.

    Konje zesedłaue na šabraku
    Z jehnjećom so błyskotaju jasnje.
    Pyšnje młodźenc sedźi na břunaku,
    Šědźiwc za wuzdu tež hišće masnje.

    Konje rjehoceja w pyše z horda,
    Zwony jutrowny jusk roznošuja,
    Z nimi zaćahuje do akorda
    Křižerjow so serbskich haleluja..

    Z tajkej pychu Serbja jutry swjeća -
    Jusk jich dołho konikej do wucha
    Klinči hišće, křižerjej do dźeća,
    A do honow haleluja bucha. -

    Takle z Boha dale jutry swjećće!
    Wotcow wašnje hajće s'ej a česćće!
    Konjom wopuše a hriwy plećće!
    Haleluja přez kraj serbski njesće!

    Doniž kóń so budźe we kudźerjach
    Gratować a zadźiwane šmrěki
    Budźa šeptać sebi wo křižerjach,
    Serbja, Serbja wostanu na wěki!