Sess Patrisen
| Sess Patrisen. | |
|---|---|
| Author: | G. H. von Halem |
| Dialect: | [[Dialekt:Oostfrees|]] |
| Text type: | Gedicht |
| Comment: |
Breef an Kriegsraat Hegeler, den von Halem tohoop mit söss Rapphöhner oder Patrisen schickt hett from: Frühes plattdeutsches Kabinett, Hamborg 1938, S. 17-19
|
| : | |
Herr Vedder Kriegs-Rath Hegeler,
Dar kamen sess Patrisen her,
De will ick Jo verehren
Und seggen na min Sinn darbi,
Up wat för eenen Dag da Ji
Mit Schick se könt vertehren.
Wenn ’t Jo Mamas Geborts-Dag is,
(Den andernden December wis?),
Denn hebb Ji doch een Höge
Un nögen hör un andre mehr,
Denn mot d’r wat to Eten her
Na elk sien Mund un Möge.
In Soppen ett sick nüms nich satt,
Völ holden van Pasteten wat
Un elk luurt hast up Braden;
Drum plegt man wol to so een Schmus,
So völ man hebben kann in ’t Hus,
Van allen in to raden.
Wiel nu um disse Tied van ’t Jahr
Patrisen allna grade rar
Un mißlick sünt to scheten,
So dücht mi, dat sick ’t noch wol paßt,
Een jung Patrisken för een Gast
To Braden of Pasteten.
Drum bidd ick Jo dör dissen Breef,
Nehmt mit min Weinigkeit verleef,
’T kummt doch ut trowen Harten;
Ick hebb nicks beters rechtevoort
Un sün hier an een schraaen Oort
Mank Bohnen, Kohl un Arten.
Nu is min Böskupp all to End,
Man ’k mot doch över ’t Traktement
Un över ’t leve Eten
De Glückwünsk, de ick mit min Fro
To Jo Mamas Geborts-Dag doo,
Bi Live nich vergeten.
Wi wünsken hör van Hartens Grund,
De leeve Heer spaar hör gesund
Un will ut Gootheit geven,
Dat se noch dissen Freuden-Dag
Völ leeve lange Jahre mag
Mit Jo un uns beleven.
Noch eens. Ji moten ganz gewiß
Jo Selskupp unse Gröteniß
Un Kumpelment vermellen.
Wi willen hier bi een Glaß Wien
Up Jo Gesundheit lüstig sien.
Mehr hebb ’k nich to bestellen.