Sinceradad porta beadadad

by Gion Antoni Bühler

I.

Noss magnific Grischun cuntegna ina quantitad da las pli bellas valladas e cuntradas en sias muntognas giganticas; e betg ina da las ultimas da quellas è la fritgaivla spunda al grond Curvér che s’extenda da Salouf fin a Mut. Questa bella cuntrada, vieuta vers il sulegl naschint, cumpiglia principalmain il territori d alas duas pitschnas vischnancas da Mon e Stierva. Al pe da questa plaunca pittoresca ramuran la Gelgia e l’Alvra, ils quals dus flumins s’uneschan a Casti e cuntinueschan alura en cursa rapida lur via sut il num da l’Alvra vers il Rain, passond las terriblas taunas e chavorgias dal Meir. Questas duas pitschnas communitads gia numnadas, be circa ina mes’ura ina ord l’autra, èn circumdadas en lur proxima vischinanza da bels ers e stupenta prada e da bellas aclas cun lur edifizis necessaris; in pau pli ad aut sa chattan bleras e bellas aclas e pastgiras, e sisum, en la regiun alpina, sa derasan las pastgiras alpinas ed alps fin ad in’autezza da circa 8000 pes. Stond sin il fil da questa bella muntogna giaud’ins ina magnifica vista sin la bella Val Schons.

Er diversas parcellas da guaud èn repartidas qua e là sin quest territori, protegind las diversas culturas dals vents e promovend la fertilitad da la cuntrada. En ils ers bain cultivads creschan stupents ierdis e seghels; bels chonvs e champs da glin orneschan er la cultura da questas vischnancas e cumprovan che las masseras da Mon e Stierva san tge che fa da basegn en las chasas dals purs, entant ch’en bleras autras communitads dal Grischun la cultivaziun da chonv e glin vegn ubain negligida u quasi tralaschada dal tut, perquai che las dunnas chattan pli cumadaivel da cumprar fina taila estra da mangola. Uschia ston ils umens en blers lieus er filar e taisser – cun munaida, entant che lur dunnas e figlias s’occupan ils lungs envierns cun tramegls.

Cumbain ch’ils purs da questa cuntrada chapeschan fitg bain la necessitad da cultivar tut las impurtantas sorts da fritgs dal funs per sa far tant sco pussaivel independents dad autras cuntradas e da l’exteriur, n’emblidan els betg dad er prestar lur pli gronda attenziun a l’allevament da muvel e stattan en quest rapport a pèr als purs da las valladas vischinas, quai che cumprova ch’els n’èn betg dads sin il chau. Il muvel ha da furnir ina part substanziala dal nutriment ed er la munaida per cumprar bleras chaussas necessarias ch’il pur na po betg producir sez. Tras in’economia giudiziusa è la bainstanza da questa cuntrada generala, cumbain ch’ins na po betg snegar ch’ils ultims decennis han er qua tras lur temperatura extravaganta ed auras lunaticas periclità il bainstar da blers.

Ils abitants da questas communitads appartegnan a la vaira razza retoromana e discurra in sonor dialect da noss rumantsch che sa distingua favuraivlamain tras forza ed armonia. Da corp èn els gronds e ferms, vairs exemplars d’ina generaziun alpina. Els s’occupan quasi exclusivamain cun l’agricultura e cun l’allevament da muvel, èn però er amaturs da la chatscha ed han blers buns chatschaders cun bun egl e gnerva segira. En la cultura marschan els precautamain cun ils auters Grischuns e sa distinguan er tras in senn religius, tras sinceradad, diligenza e constanza e spezialmain er tras in senn econom. Per l’emigraziun en terras estras u schizunt en territoris d’ultramar ha questa populaziun pauc gust, e darar in che banduna sia vischnanca amada per tschertgar sia fortuna en terras estras. Quai vegn ad esser il motiv, pertge ch’ils vegls costums da questas vischnancas èn sa mantegnids fin il temp preschent.

A mesa via tranter Mon e Stierva sa chatta in pitschen aclaun ch’appartegna a Mon e che porta il num Sanagn. A l’entschatta dal 17avel tschientaner aveva quest aclaun trais chasas ed intgins clavads. Ina da questas chasas appartegneva a Peder Caleira, il qual aveva maridà l’onn 1592 la propra giuvna Gnagna, nata Giloin, oriunda da Del. Peder Caleira n’era betg in um ritg, possedeva però tant ch’el pudeva alimentar sia numerusa famiglia senza la laschar patir; ma el stueva esser activ da l’alva fin la saira tard, sch’el vuleva pudair subsister cun onur. Sia dunna Gnagna al assistiva cun grond zeli en tuttas lavurs e guardava daspera da la numerusa famiglia en tuts reguards cun diligenza exemplarica. Ella aveva quità e s’occupava da ses uffants cun la pli gronda pazienza ed als instruiva er en fatgs da religiun; ella als mussava er da sa depurtar bain e gentilmain e d’amar la nettezza. Ils uffants prosperavan fitg bain, cumbain che lur vivonda era dal tuttafatg simpla e frugala. Anno 1606 avevan ils dus conjugals gia 8 uffants, 5 figls e 3 figlias. Ils dus emprims uffants eran dus frestgs mats che pudevan gia sustegnair ils geniturs en tuttas lavurs champestras. Il terz figl ch’aveva apaina cumplenì ses 10avel onn fascheva gia il chavrer a Mon. Peder Caleira veseva cun plaschair che ses uffants avevan tanta premura da sustegnair tenor lur forzas la famiglia, ed el calculava gia co ch’el tras il bun agid da ses uffants pudess cun il temp engrondir ses funs.

Ina saira ha Peder ditg a sia dunna: «Mia chara Gnagna, noss Tgetg e l’Albert sa sviluppan excellentamain ed ans èn gia in grond agid; els èn omadus fitg diligents e chapeschan er fitg bain tuttas lavurs ch’els han da far. Ma er ils auters uffants creschan e vegnan a prender in bun exempel da lur fragliuns pli vegls. Ma tge lavur vulain nus alura dar en 3 fin 4 onns a tut noss uffants che vegnan alura ad esser abels da lavurar? Questa chaussa ma dat bler da pensar, e la finala è naschida en mai l’idea che nus duessan far emprender noss dus emprims mats in mastergn. Tge dis ti, chara Gnagna, da quai?»

A la buna dunna èn ils egls s’emplenids cun larmas, durant che ses um ha tegnì quest discurs. Ella ha alura respundì visiblamain attristada: «Char Peder, ti has tutta raschun da vulair procurar en questa maniera per noss uffants; er jau hai gia bleras giadas pensà vi da questa chaussa, ma jau stoss confessar che jau hai semper sentì in grond cordoli, cur che m’è vegnì endament che arrivia in di il mument da stuair laschar bandunar in u l’auter da noss uffants la chasa paterna en ina vegliadetgna anc uschè tenera.

Ma i n’ans vegn a restar nagut auter da far che da far emprender noss uffants inqual mastergn per als pudair segirar lur existenza futura. Ma jau hai anc pensà vi d’ina autra chaussa, la quala nus pudessan forsa er trair en consideraziun. Ti sas che las minieras d’aur al Piz Cotschen dattan bler gudogn als vischins da Lantsch. Il transport dals minerals dad aur dat bler occupaziun, e sche jau na ma sbagl betg, dovran ins er blers mats giuvens sco manischunzs. Tgi sa, sche noss Tgetg e l’Albert na chattassan betg tala lavur tras noss parent a Lantsch che s’occupa er cun chaussas da las minieras. Cur che noss figls fissan alura in pau pli gronds, chattassan els forsa lavur en las minieras, e la lavur en quellas saja er fitg lucrativa, sco ch’ins discurra qua e là. In giuven da Lantscha ch’ha apaina 20 onns, haja gia gudagnà l’onn passà 200 rentschs e mantegnia cun sia paja facilmain la mamma e tschintg auters fragliuns pli pitschens. Avessan er noss figls tala fortuna, sche arrivassan nus pli spert e pli facilmain a meglierar nossa situaziun preschenta. Ti pudessas tuttina ir ina giada a Lantscha a t’infurmar da quella chaussa.»

«Ma mia chara Gnagna», ha Peder respundì, «ti na dastgas betg emblidar che las lavurs en las minieras èn fitg grevas ed a medem temp er privlusas, essend che las chavas smanatschan savens d’ir en ruina. Gia blers miniers èn sa disgraziads en questa maniera, ed ina tala sort na vuless jau betg preparar a noss uffants.»

«Quai è vair, mes char Peder», ha respundì la buna dunna, «ma ins sto er fidar en il Segner, il qual po proteger in uman en ina maniera sco ch’el protegia da la disgrazia en ina chasa ferma. Las bleras da questas disgrazias capitan per mancanza da precauziun da vart dals lavurants sezs. Quantas disgrazias succedan cun ils purs sin la bella campagna, en il guaud ed er en ils clavads! Na, mes bun Peder, per la tema da disgrazias na vuless jau betg impedir noss figls da laschar tschertgar quels lur fortuna en las manieras, e sche ti reflecteschas questa chaussa pli madiramain, vegns ti sez a chattar che jau n’haja betg tort.»

Peder è la finala sa laschà persvader da sia dunna ch’i fiss avantagius da pudair plazzar ses dus figls a Lantscha tar il directur da las minieras ed ha empermess dad ir ina giada a Lantsch a guardar, sch’el pudess realisar quest plan che sia buna dunna al aveva recumandà. Per entant na fascheva la chaussa betg gist tanta prescha, avend el e sia famiglia da preschent lavur pli che avunda. El aveva surpiglià d’in vischin da pinar en il God dels Planets la laina per construir in clavà, e ses dus mats al pudevan assister en quella lavur cun sromar las plantas ch’el aveva terrà. A medem temp pudevan els far provisiun da laina per l’enviern proxim cun questa roma ch’il pur da Mon als aveva cedì. El aveva uss er da fanar ses prà a Sanagn sper sia chasa; el ed in dals mats segavan, l’auter mat e la mamma faschevan or chanvads, vulvevan il fain e sa gidavan da raschlar e purtar il fain en clavà. Insumma na mancava la lavur betg da preschent a Peder Caleira e sia famiglia. La mamma aveva er anc da zerclar ils ers da seghel e da rugalar l’iert davant chasa che furniva a la famiglia blers legums per il lung enviern.

Apaina che questas lavurs en la bassa èn stadas finidas, è arrivà il temp da fanar en las aclas, e Peder possedeva er ina tala si Darschapetta. El ha prendì si’entira famiglia cun sai ed è sa rendì da s. Luregn suenter mezdi en si’acla, nua ch’el faschava quint da star circa duas emnas. Essend l’aura daventada in pau pluviusa ed inconstanta, gieva be plaun cun in fanar; ma Peder n’è perquai betg restà inactiv; el gieva en il guaud vischin a far laina per l’enviern ed ha fatg ina bella provisiun. Cur ch’el è la finala returnà cun sia famiglia a Sanagn, ha el stuì sa preparar da meder sia granezza ed alura da far rasdiv. Uschia è il temp passà ch’el è apaina s’accurschì, ed avant ch’el pensia era gia arrivà l’atun ch’al ha purtà novas lavurs.

Durant quest lung temp avevan ils dus conjugals savens discurs da lur Tgetg ed Albert ed eran uss perina che Peder duaja ir in dals proxims dis a Lantsch per guardar sche lur dus figls vegnissan retschets da la direcziun da las minieras dal Piz Cotschen sco manischunzs. Ils manischunzs n’avevan betg dad ir cun lur manadiras fin las minieras, anzi be fin a l’ur sut da l’alp da Lantsch. Fin là tiravan umens robusts ils minerals sin schlieusas. Per manadiras avev’ins quasi be bovs che tiravan a corn. Ina tala manadira confidav’ins per ordinari a mats pli giuvens, essend sin l’entira via nagin privel. Umens eran be paucs tranter ils manischunzs; la gronda part da quels eran be mats da 15–16 onns ed er intginas mattas robustas. Perquai aveva Peder er speranza che la direcziun da las minieras acceptia ses dus figls ch’eran a proporziun da lur vegliadetgna fitg gronds e ferms.

Peder ha oramai piglià curaschi ed è ì in di a Lantsch per guardar sche ses dus mats chattassan là inqual servetsch. L’emprim ha el visità ses parent per s’infurmar in pau meglier da quella chaussa; ma il parent n’al ha betg da gronda speranza da chattar lavur per ses mats a Lantsch, schend ch’igl haja gia manischunzs avunda per las minieras e ch’ils miniers vegnian prest a stuair interrumper la lavur pervi da l’enviern che stettia davant porta. Peder però, essend uss a Lantsch, na vuleva betg returnar a chasa senza almain empruvar da plazzar ses mats en ina moda u l’autra. El è oramai ì tar il directur da las minieras ed ha supplitgà quel per in’audienza. Il directur al ha concedì l’audienza e dumandà cun tge ch’el possia servir. Il pauper Peder ha revieut e smuglià in mument ses chapè e na saveva betg co ch’el duaja cumenzar sia supplica; la finala ha el però pronunzià ses giavisch da pudair plazzar ses dus mats, essend el in um cun greva chasada ch’haja da basegn dal gudogn da ses uffants. El ha er raquintà al directur che ses dus figls sajan ferms per lur vegliadetgna e daspera adesters e diligents en la lavur.

«Mes bun um», ha il directur ditg, «avais Vus alura er ils bovs, sche Voss dus figls duain far ils manischunzs?»

Sin questa dumonda è Peder stà qua sco petrifitgà. El n’aveva betg pensà a questa chaussa; anzi el crajeva che las minieras possedian sezzas ils chars ed ils bovs e basegnian be ils manischunzs. El ha oramai confessà al directur ch’el saja in um pauper e na saja betg en il cas da sez pudair furnir las manadiras per ses figls, e schend quai al signur, pensava el da s’absentar, vesend ch’el na pudeva betg avair speranza che ses figls chattian qua paun e servetsch. Il directur, vesend l’embrugl, en il qual il bun Peder sa chattava, al ha ditg cun vusch amiaivla: «Mes bun ami, nossa societad n’ha nagins chars per in transport dals minerals; nus pajais als manischunzs ina tscherta schurnada ed als laschain sezs procurar per lur chars e bovs. I vegn oramai ad esser difficil per Vus da chattar manadiras per Voss mats, sche Vus sez n’avais betg talas. Ma sche Voss figls èn giuvens adesters, sco che Vus sincerais, als pudess jau forsa procurar in auter servetsch. Jau hai da preschent basegn d’in frestg e svelt giuven sco mess; jau hai savens da trametter ordras als capos en las minieras e stoss oramai avair in giuven adattà per quest servetsch. Sch’in tal servetsch cunvegna ad in da Voss figls, sche ma pudais Vus in dals proxims dis preschentar quel che Vus crajais il pli abel per quest servetsch. Sch’il giuven ma plascha, sche vi jau far ina prova cun el. Quai che concerna la paja, al vegn jau a dar quai ch’el merita.»

Peder è s’absentà, engraziond al signur directur per sia bainvulientscha ed ha empermess da sa preschentar cun omadus figls per ch’il signur directur possia tscherner quel ch’al plaschia il meglier. Arrivond a chasa cun questa novitad, è l’entira famiglia sa legrada dal success ch’il bab aveva gì a Lantsch. Ma en il cor da la mamma è prest sa fatga sentir ina reacziun, pensond ella da forsa en paucs dis perder in da ses uffants. O, quant tener è il cor da la mamma! Sche blers figls pensassan a questa sontga flomma, na l’offendessan els mai cun nauschs depurtaments. La mamma n’ha però betg vulì s’opponer a la voluntad dal bab, savend che quel veglia mo il meglier per ses uffants. Ella saveva er che la famiglia haja da basegn d’agid ed era persvasa che ses uffants sajan pronts da purtar in tal, sch’i sa preschentia ad els l’occasiun. Ella ha uss fatg quai ch’ella ha tegnì per il pli necessari; ella ha numnadamain fatg ils proxims dis in vestgì nov a ses dus figls per ch’els possian sa preschentar al signur directur a moda decenta. Quantas larmas ch’ella ha spons durant questa lavur, na sa nagin auter che Dieu en tschiel. Ils dus figls però, il Tgetg e l’Albert, pudevan apaina spetgar il di da lur preschentaziun, cumbain ch’els sentiva da l’autra vart gia ina tscherta encreschadetgna da bandunar chasa.

Finalmain è arrivà il di, cur ch’il bab vuleva preschentar ses dus figls al directur da las minieras. A la mamma èn curridas las larmas, cur che ses dus figls han bandunà la chasa patern; er ils dus mats avevan il cor plain; ma els han tegnì tschelada lur dolur per betg augmentar il cordoli da la chara mamma. Arrivads a Lantsch, ha il bab manà l’emprim ses figls en chasa da ses parent per anc discurrer cun quel, sch’el na fiss betg pront da prender en dunsena in da ses mats, per cas ch’il signur directur da las minieras acceptass in da quests sco ses mess. Il parent è sa mussà pront d’acceptar il pensiunari, sch’il directur na salvia betg il giuven en chasa sia. Rugalada questa fatschenta, ha Peder manà ses dus figls en chasa dal directur e chattà quel a chasa. El ha cun ina giada fatg entrar Peder Caleira cun ses mats en sia stanza. Avant che cumenzar il discurs cun Peder, ha il signur contemplà ils dus giuvens, e Peder ha immediat vis che ses figls avevan fatg ina bun’impressiun sin il directur; pertge che quel fascheva ina tschera seraina e bucca rienta. Alura ha il signur directur ditg a Peder: «Vus ma preschentais qua Voss dus figls, per ils quals Vus tschertgais occupaziun. Quai è endretg, ins sto cumenzar a bun’ura a far gudagnar il paun ils uffants.» Sa vulvend als dus mats, ha el ditg a quels: «Uss ma schai, co che Vus avais num!» Ils dus giuvens han numnà frestgamain lur nums, senza però mussar impertinenza. Questa franchezza dal giuven ha plaschì al directur. El ha anc discurrì in pèr pleds cun ils mats ed è alura sa vieut vers il bab da quels, schend ch’ils mats al plaschian e ch’el saja pront da far in’emprova cun il Tgetg. Il signur ha alura numnà la paja ch’el veglia dar al giuven ed ha er anc empermess d’auzar quella en curt temp, sch’il giuven sa mussia adattà per ses servetsch e fetschia ses duair per sia cuntentientscha.

Peder ha alura relatà al signur ch’el haja gia procurà per la dunsena a ses figl; el haja qua a Lantsch in parent ch’haja empermess da prender quel en chasa sia e d’avair quità dal giuven. Ma il signur directur ha respundì: «Na, na, Voss figl stat qua en chasa mia. La paja che jau hai destinà, sto la societad pajar per il servetsch da mess; ma il giuven ha alura anc peda avunda da far a mai il servitur en ses temp liber; e per ils servetschs ch’el fa a mai, al dun jau gugent la dunsena, ed inqual bunamaun n’al duaja betg mancar, sch’el ma serva a mia cuntentientscha. El vegn er anc ad avair tar mai la chaschun d’emprender insatge, sch’el vul. Durant il temp liber po el visitar la scola cun mes dus uffants; sch’el emprenda in pau da leger e far quints, forsa er anc da scriver, na vegn quai er betg a dar donn per sia vita futura. En mia famiglia discurrin nus talian, e Voss mat ha uschia er buna chaschun d’emprender questa lingua che n’è betg difficila per in Rumantsch. Sche Vus essas oramai cuntent cun mia offerta, sche po il mat entrar en trais dis en mes servetsch.»

Peder Caleira è stà fitg cuntent cun l’offerta dal signur, ha engrazià a quel per sia buntad e bainvulientscha e bandunà alura l’abitaziun dal directur. Sortind da chasa ha el anc ditg a quel ch’el al recumondia er anc ses segund figl Albert en cas ch’i s’offria ina plazza per quel. Il signur al ha empermess dad er pensar ad Albert, sch’el chattia pli tard in servetsch per quel. Alura ha il bab bandunà Lantsch cun ses dus figls ed è sa rendì per la pli curta via a Sanagn per purtar a sia dunna las legraivlas novas da lur fortuna odierna. Quella è s’allegrada cun ses um da la fortuna che lur Tgetg aveva chattà oz. La paja ch’il signur directur aveva empermess al giuven n’era betg gist in grond chapital; ma ella era tuttina d’engrà a la famiglia. Ils buns geniturs n’han betg manchentà da far far l’entira famiglia in’uraziun per engraziar a Dieu per ses agid.

Uss ha dunna Gnagna gì da far quests trais dis pli che avunda per procurar a ses char Tgetg tut quai ch’el aveva anc da basegn; ella ha gia fatg l’auter di bugada per lavar las paucas chamischas dal figl; ella ha er fatg pezzar ils chalzers e mesirar in pèr novs; pertge che sche Tgetg aveva mintgamai da far in viadi fin a las minieras, sche stueva el esser bain provedì cun chalzers. Anc avant ch’il terz di spluntia, era il pitschen fagot da Tgetg fatg, e prest è er arrivada l’ura da sia partenza. Quai era in mument serius per il pauper mat; il cor al batteva da mo guardar sin la mamma e sin ses chars fragliuns, cun ils quals el era adina vegnì bain perina. Cumbain che ses viadi n’era betg lung ed il lieu da sia destinaziun betg fitg lunsch davent da la chasa paterna, fascheva el tuttina vess da bandunar quella.

La finala è arrivà il mument da sia partenza; el ha dà il maun a tut ses fragliuns e bitschà la mamma cun larmas en ils egls. La mamma al ha strenschì al sain matern, cridond sc’in uffant; ella al ha anc accumpagnà uschè lontan sco ch’ella al ha pudì tscherner. Tgetg, avend superà la scena da cumià dolurusa, è ì frestgamain vinavant, ed en circa in’ura e mesa è el arrivà a Lantsch ed è ì directamain en chasa da ses patrun, il qual al ha retschet cun tutta cordialitad ed al ha immediat fatg mussar ses dormitori, per ch’el possia prender giu da dies ses pitschen fagot. Ma a Sanagn na pudeva la mamma betg sa quietar; la necessitad da stuair trametter in da ses uffants en in’uschè tenera vegliadetgna en in auter lieu tar esters la vuleva quasi far rumper il cor, ed igl ha durà dis fin ch’ella è stada sa quietada in pau. Gia suenter trais dis ha ella rugà ses um da vulair ir ina saira a Lantsch a guardar tge che fetschia il char Tgetg e sche quel saja cuntent cun il servetsch e cun il patrun. Ma Peder ha declerà ch’el n’haja per il mument betg peda dad ir a Lantsch, el haja memia blera lavur da far e saja la saira memia stanchel per anc da notg far in viadi da trais fin quatter uras. La buna dunna ha chapì quai fitg bain ed empruvà d’en in’autra maniera retschaiver novas da ses char figl; ella ha oramai tramess in di en absenza da l’um ses segund figl Albert cun in pitschen pachet che cuntegneva intginas chaussettas a Lantsch per tant pli prest retschaiver novas da ses char figl absent. Albert ha chattà ses frar saun e frestg e purtà la saira in cordial salids dal Tgetg als geniturs cun la remartga ch’el stettia fitg gugent en ses servetsch, essend il patrun e la patruna fitg buns ed amiaivels cun el e sia dunsena excellenta. Da questas novas èn bab e mamma s’allegrads, e dunna Gnagna ha la proxima notg per l’emprima giada pudì durmir quietamain.

Tgetg aveva pelvaira chattà buns patruns a Lantsch. Il signur directur Morin era in um che tegneva autra glieud betg sco chauns, na el era en tuts reguards fitg uman e bainvulent e na marterisava betg ses servients e lavurants. Perquai fiss Tgetg er gugent siglì tras in fieu per ses patrun e fascheva tut las cumissiuns da quel cun la pli gronda prontezza e sveltezza. In di ha el accumpagnà il patrun a las minieras al Piz Cotschen. Signur Morin na fascheva betg savens il viadi a las minieras, essend quella fitg stentusa ed el in um memia pesant per ascender muntognas. Ma cur che signur Morin visitava las minieras, parevan ils miniers d’avair festa. Apaina che signur Morin arrivava tar las chavas, sa preschentavan ils capos dals lavurers mintgamai per al salidar e dar rapport davart l’avanzament da las lavurs en las minas e la conduita dals lavurants. Signur Morin è sa mussà fitg cuntent cun las infurmaziuns retschavidas. El ha alura anc visità las chavas per guardar sche tut saja en bun urden. Sinaquai è el returnà tar las chamonas dals miniers che sa chattavan in toc sut las minieras ed ha prendì là in refrestg ensemen cun ils capos da las minas. El als ha er preschentà ses nov mess, il Tgetg Caleira, e dà il cumond ch’ins duaja mintga giada cur che quel arrivia a las minieras cun sias ordras dar al giuven in bun refrestg a cust da al direcziun. Signur Morin aveva raschun dad esser cuntent cun las prestaziuns dals lavurants. Las minas sa mussavan da preschent fitg redaivlas ed empermettevan in grond gudogn, quai che ha fatg buna luna al signur directur.

Tgetg ha fatg egls gross, vesend quel di tantas chaussas novas, da las qualas el n’aveva fin uss gnanc la minima idea. El era entrà en la chava gronda per guardar, tge ch’ils miniers fetschian. Fin uss s’imaginava el ch’ils miniers possian be pitgar da la grippa spir aur; ma uss ha el be observà crappa e na saveva betg chapir co ch’ins veglia far aur cun quest material grisch. El fiss gugent s’infurmà da bleras chaussas, ma el n’ha betg gì il curaschi e la giagliardia da dumandar dals miniers scleriment da questas chaussas, ed anc bler main da ses patrun ch’el na vuleva betg unfisar cun sias dumondas. Essend che la temperatura en las autezzas era fitg bassa, ha signur Morin fatg svelt da returnar a chasa per betg pigliar in dafraid en questas regiuns ch’eran gia fitg ferm cun in pe en l’enviern.

Ils proxims dis ha Tgetg stuì far diversas giadas la via a las minieras per purtar ordras als capos da quellas. El fascheva questa via stentusa en relativamain curt temp; pertge ch’el era svelt ed in bun pedun, disà da currer per las muntognas. Questa sveltezza plascheva fitg bain al patrun ed el al deva bainduras in bunamaun cur ch’el era da speziala buna luna. Questa munaida, retschavida uschè nunspetgadamain, ardeva en il satg dal pauper giuven; el l’avess fitg gugent remess a sia chara mamma. Ma co far quai? El ha prendì ina dumengia curaschi e dumandà ses patrun, sch’el na dastgia betg ir suenter mezdi a Sanagn a visitar ses geniturs. Il patrun al ha dà gugent il permiss, n’avend il giuven quel di nagut da far. Tgetg è immediat sa mess en viadi ed en damain ch’ina ura è el arrivà a Sanagn. El ha chattà be la mamma e ses fragliuns pli pitschens a chasa; il bab ed ils auters uffants eran ids a Mon a vespras. L’emprim mument ha la mamma piglià ina gronda tema, vesend ses char Tgetg ad entrar uschè nunspetgadamain en stiva. Ella al ha embratschà cun impetuusitad ed al ha bitschà cun gronda tenerezza, schend: «Tge ta manca, char Tgetg, che ti vegns uschè nunspetgadamain a chasa? Es malsaun?»

Tgetg, cun egls larmants d’allegrezza l’ha respundì: «Na, chara mamma, jau na sun betg malsaun, anzi jau stun fitg bain; ma jau As hai oz vulì far ina visita cun lubientscha dal patrun ed As port insatge.» E schend quests pleds ha el tratg da sia giaglioffa in palpiri ed al ha remess a la mamma cun bucca rienta. La buna mamma ha sfaudà il palpiri e fatg alura egls gross, vesend en quel in pugn plain bella munaida. «Ma mes char Tgetg, danunder has ti questa munaida?» Tgetg l’ha ditg ch’el haja retschet questa munaida en diversas occasiuns da ses buns patruns sco bunamaun e l’haja vulì purtar oz a la mamma, savend ch’ella possia duvrar fitg bain quella. In’egliada charina da vart da la mamma ha engrazià al bun figl per quest regal vegnì d’ina ura uschè opportuna. Prest suenter èn arrivads a chasa il bab ed ils auters uffants, e Tgetg ha uss stuì cumenzar a raquintar da sia vita a Lantsch. L’entira famiglia ha tadlà cun bucca averta il raquint dal giuven e tuts èn s’allegrads che Tgetg haja chattà uschè buns patruns. La mamma vuleva ir a cuschinar insatge al figl, ma quel ha declerà ch’el saja fitg cuntent, sche la mamma al dettia in pau paun ed ina buccada chaschiel. La mamma al ha purtà in toc paun e mess in bel quader chaschiel sin maisa. Tgetg ha laschà gustar il chaschiel da la mamma; ma quella na vuleva betg laschar partir da chasa ses char figl cun bucca sitga ed è ida per in cuppin latg, il qual al ha gustà fitg bain.

La finala è Tgetg stà si, declerond ch’el stoppia uss sa metter sin via, sch’el veglia anc arrivar da di a Lantsch. Albert ha dumandà ils geniturs da pudair accumpagnar in toc il frar, quai che quels al han lubì. Tgetg ha dà il maun a tut ils members da la famiglia, ha bitschà sia chara mamma e bandunà alura svelt la stiva per far ina fin andetga a la scena da cumià dolurusa. La mamma, cumbain che la partenza da ses char uffant la fascheva fitg mal, è sa mussada questa giada pli quieta, savend uss che ses char figl haja patruns umans che guardian fitg bain dal giuven. Tgetg aveva er empermess als geniturs da vegnir in’autra giada en visita, sch’ils patruns al permettian da pudair s’absentar per intginas uras. Albert ha accumpagnà il frar fin a Casti, pertge ch’el aveva bler da discurrer cun ses char Tgetg. La fortuna da quest ultim ha fatg nascher en el la brama, dad er el tschertgar in sumegliant servetsch sco quel dal frar ed el ha supplitgà Tgetg da far tut il pussaivel per tschertgar ad el ina tala plazza. Tgetg ha empermess ad Albert da cun buna occasiun discurrer ina giada cun ses patrun davart questa chaussa, ed Albert è sa cuntentà cun quest’empermischun; pertge ch’el saveva che Tgetg ch’al amava sco in vair frar vegnia a tegnair ses pled. A Casti èn ils dus frars sa separads ed mintgin è ì en tutta prescha per sia via. Arrivà a chasa, ha Albert raquintà als geniturs tge che Tgetg al haja empermess. Pir suenter la tschaina ha la mamma communitgà a la famiglia per tge motiv che Tgetg saja vegnì oz a Sanagn en visita, e tut la famiglia ha benedì il prudent giuven ch’aveva oz dà in’uschè bella prova da ses bun cor envers ses chars geniturs.

II.

Vers la fin da november è crudada ina starmentusa navaglia en las muntognas grischunas, ed ins udiva ch’i sajan idas bleras lavinas en diversas valladas. Er al Piz Cotschen aveva intgins privlus laviners, e la societad da las minieras ha concludì d’interrumper las lavur en las minas fin la proxima primavaira. Ils miniers èn vegnids relaschads, e scadin è ì a chasa sia cun il gudogn da la stad e da l’atun. L’entrada da las chavas è vegnida fermada cun aissas per che las cuflas che regian savens sin quellas autezzas cun ina starmentusa vehemenza n’empleneschian betg ils corridors sutterrans ed impedeschian la primavaira la cuntinuaziun da las lavurs. Signur Morin, il directur da las minieras, ch’era da Clavenna, aveva l’intenziun da far ina visita a sia citad natala e cun quell’occasiun render quint da si’administraziun a Plurs, nua ch’abitavan ils socis per propi da la societad. Essend la navada uschè gronda, n’ha el betg ristgà da prender cun sai sia famiglia sco ch’el aveva gì planisà; ma el ha communitgà in di a ses servient Tgetg Caleira che quel al stoppia accumpagnar sin ses viadi e ch’el possia ir la dumengia proxima a Sanagn tar ses geniturs per als far a savair ch’el fetschia cun il patrun quest viadi a Clavenna. Essend da quel temp la fradaglia fitg murdenta, ha Morin fatg far Tgetg la vestgadira d’enviern necessaria, per ch’il giuven possia supportar il fraid. Cur che Tgetg ha gì retschet sia nova mondura, è el ì ina saira cun la lubientscha dal patrun a chasa, nua ch’el ha pudì restar dus dis. Entrond Tgetg en la stiva dals geniturs il mument che la famiglia tschanava, n’ha nagin enconuschì el l’emprim mument en sia nova unifurma. Co èn ils geniturs e fragliuns sa smirvegliads che lur Tgetg fascheva la figura d’in bel signurin!

Tgetg è sa mess a raquintar las bleras novitads e co ch’el saja sin il precint da far in viadi a Clavenna cun ses patrun. La buna mamma ha piglià ina gronda tema, udind che ses char figl duaja far in viadi sur las autas muntognas d’ina tala fradaglia. Ella ha er pensà al privel da lavinas ed ha gia laschà currer las larmas. Ma Tgetg l’ha confortà, schend che ses patrun prendia cun sai ina schlieusa cun dus chavals e ch’il famegl ch’als mainia saja disà da passar la muntogna dal Set ed enconuschia er las lunas da l’aura. La mamma è sa quietada in pau, pensond ch’il signur patrun da ses Tgetg vegnia bain er ad avair in pau quità da si’atgna pel e na passia betg la muntogna dad uras privlusas. Passada l’emprima beneventaziun dal char figl, ha la mamma pensà a la tschaina da quel; ella è ida en cuschina ed al ha fatg ina buna schuppa, la quala il figl ha laschà plaschair. L’auter di ch’era ina dumengia, è Tgetg ì cun il bab ed ils auters fragliuns a messa a Mon. Quels da Mon èn sa smirvegliads da la cumparsa ch’il giuven Caleira fascheva; ses cumpogns da Mon avessan gì grondas quaidas da far ina lutga cun el per guardar, quant ferm ch’el saja daventà a Lantsch; ma Tgetg na vuleva savair nagut da ‹far a ventscher› cun ses vegls cumpogns. Suenter mezdi è el ì a Stierva a visitar ses padrin ch’era oriund da là. Er quel è sa smirveglià da vesair ses figliol en in uschè bun stadi ed al ha dà in rentsch sco regal. La saira ha la famiglia Caleira a Sanagn tegnì ina lunga conferenza cun il figl che dueva far en paucs dis in uschè lung viadi. Ils geniturs n’han betg manchentà da dar a lur figl admoniziuns salutaivlas e buns cussegls. La mamma al ha animà a la pietad e sinceradad ed al ha avertì da las nauschas cumpagnias che corrumpian las bunas isanzas e mainian a la fin l’uman a la perdiziun. Tgetg ha empermess a ses buns geniturs da sa depurtar bain e da far conscienziusamain ses servetsch ed acquistar la cuntentientscha da ses bun patrun.

L’autra saira è Tgetg sa rendì a Lantsch, e trais dis pli tard è el partì cun ses patrun per Clavenna. Ed igl èn passadas plirs emnas fin ch’els han finalmain retschas novas da la famiglia Morin a Lantsch ch’il signur e Tgetg sajan arrivads fortunadamain a Clavenna. Ils geniturs han engrazià a Dieu per questa legraivla nova.

La famiglia Caleira ha en il fratemp manà ina vita quieta a Sanagn. Lur provisiun da victualias l’ha laschà sperar da pudair passentar l’enviern rigurus senza stuair patir. Ma ils displaschair na la duevan betg restar spargnads. Lur vischin a Sanagn ch’ins numnava en l’entira regiun be il Giacum da salvonnas ha cumenzà a dar fastidi als Caleiras. Giacum da salvonnas abitava a Sanagn en ina chasa nauscha cun sia dunna Mengia. Giacum lavurava da tretscher; el fascheva tretschas e curegias (giunclas, salvonnas etc.) ch’el vendeva en las vischnancas vischinas; el gieva er a schurnada tar ils purs per lavurar sin ses mastergn. Funs possedeva el pauc; cun ses pavel pudeva el apaina envernar ina vatga nauscha ed in pèr chauras. La munaida ch’el gudagnava cun ses mastergn, spendeva el per gronda part per bavrondas alcoholicas, daventond cun il temp in bavader insupportabel che tschertgava adina dispita cun ils umans che vegnivan cun el en contact. La famiglia Caleira aveva bler da patir da quest schani rubiesti. Sia dunna Mengia era ils emprims onns da ses matrimoni stada ina brava dunna; ma en la cumpagnia da ses um e condemnada da passar la scola da la miseria quotidiana, è ella cun il temp er daventada in’autra, e dunna Gnagna Caleira aveva pitschen plaschair da sa conversar cun ina tala vischina. La Mengia da salvonnas, sco ch’ins la numnava er fitg savens, vegniva quais mintga di en chasa da Peder Caleira a far emprestar inqual chaussa, sco per exempel farina, latg, ovs, ina buccada chaschiel ed autras chaussas; ma da render ina chaussa emprestada na la vegnia mai endament. Dunna Gnagna Caleira fascheva gugent in servetsch ad ina vischina, ma en quella maniera sco che la vischina Mengia abusava sia buntad, na vuleva ella betg pli sa laschar plaschair. Vegnind in di Mengia en chasa dals Caleiras per far emprestar farina da cuschinar, l’ha dunna Gnagna declerà ch’ella na la dettia betg pli la minima chaussa, sch’ella na la rendia betg ina chaussa emprestada.

Mengia ha prendì la rauba ed ha bandunà sia buna vischina senza la salidar, è ida directamain a chasa ed ha raquintà a ses um quai che Gnagna l’aveva renfatschà. Il tretscher ha cumenzà a ramurar, e quai principalmain perquai che sia dunna n’aveva nagina farina en chasa ed el temeva da stuair restar oz senza gentar. El ha bandunà sia chasa nauscha e cumenzà davant sia porta a clamar da tuttas aviras vers la chasa da ses vischins. Gnagna ch’era en cuschina ha udì questa ramur ed er chapì intginas da questas tschantschas infamas dal nausch bavader; ma ella n’ha betg sa laschà vesair davant quel e n’ha betg fatg menziun a ses Peder da quella brutalitad da ses vischin per ch’i na naschia nagina dispita tranter ils dus umens. Ma il Giacum da salvonnas repetiva mintga di sias aviras, cur ch’el veseva u crajeva ch’insatgi da ses vischins saja insanua en vischinanza. Sortind in di Peder Caleira da sia stalla, ha el udì questas tschantschas dal vischin imprudent e sentì gronda quaida da respunder al vegl malizius; ma el ha supprimì sia ravgia, chapind ch’i saja meglier da betg cumenzar dispitas cun da questa nauscha glieud. El è oramai ì en sia chasa senza dar ureglia al nausch provocatur ed ha raquintà a sia buna dunna tge ch’el haja udì dal vischin davant chasa. Sia dunna al ha communitgà ch’ella haja bleras giadas udì a ramurar uschia il nausch Giacum, ma ella haja pli gugent taschì per ch’i na naschian betg dispitas cun quest nausch um.

Vulend evitar tuttas litas e rabantschas cun il nausch vischin, n’han Peder e sia brava consorta betg laschà accorscher ch’els hajan udì ils affrunts da quel ed evitavan scadin inscunter cun il vegl; ma quel tschertgava mintga di d’offender il Peder e quest ultim è la finala stà stuf da questas provocaziuns. In di cur ch’il vegl branclava e ramurava puspè davant sia chasa nauscha, ha Peder bandunà sia stalla ed è ì directamain vers ses adversari ed al ha dumandà tge motivs ch’el haja da tschertgar cuntinuadamain da vulair ingiurar ses vischins. El haja uss udì avunda questas tschantschas ed aviras e na saja betg intenziunà da sa laschar affruntar mintga di d’in tal subject sco ch’el saja; el haja materia avunda per far taschair in tal baterlunz sco ch’el saja. Insumma ha Peder mussà in pau ils dents al vegl imprudent ed al ha fatg chapir ch’el n’al temia betg.

Il vegl malizius n’è betg restà debitur la resposta, mabain ha cumenzà cun auta vusch ad ingiurar Peder pir che mai. Peder ha ditg ch’el al sfratgass, sch’el na fiss betg in miserabel subject senza credit; ma el al veglia fermar en autra maniera la bucca, e schend quai è el returnà en chasa sia senza dar bada a las calumnias dal vegl; ma l’auter di, ch’era ina dumengia, è el ì a Mon ed ha atgisà il vegl al mastral regent cun la supplica da vulair citar quel e dumandar, sch’el insistia sin sias titulaturas duvradas cunter ses vischin Peder Caleira. Il mastral ha empermess da citar l’imprudent Giacum, il qual el enconuscheva fitg bain per quai ch’el era. E pelvaira, dus dis pli tard è il Giacum da salvonnas vegnì cità tras il salter da cumparair davant il mastral per respunder ad ina atgisa da ses vischin Peder Caleira. Il pauper baterlunz ha piglià tema vesend che Peder vuleva prosequir sia smanatscha. Giacum era per tant pli en grond embrugl, essend ch’el, cun raschun, na saveva rinfatschar betg ina suletta chaussa blasmabla a Peder; anzi, el stueva, vuleva el dir la vardad, confessar che Peder Caleira al aveva fatg blers buns servetschs ed al sustegnì en blers dis da miserias. Sia dunna Mengia che cuiva pli u main ina lecziun a ses tiran, al ha fatg la tema anc pli gronda, al faschond endament tut las expressiuns calumniantas ch’el aveva duvrà vers ils vischins Caleiras.

Il di fixà è el cumparì davant il mastral e quel al ha retschet cun tschera seriusa. Il mastral al ha communitgà l’atgisa da Peder Caleira ed al ha dumandà sch’i saja vair ch’el haja duvrà talas e talas expressiuns ingiuriantas vers ses vischin Peder. Giacum n’ha betg snegà d’avair duvrà expressiuns in pau fermas cunter ses vischin, ma el n’haja betg gì l’intenziun d’ingiurar quel, ed el saja er pront da retrair tuttas expressiuns che pudessan cuntegnair u implitgar in’ingiuria u calumnia. Suenter questa decleranza al ha il mastral da ina ferma reprimanda ch’el sa laschia diriger da sias malas lunas; i fissi pli prudent sch’el imitassi en tuttas chaussas ses bun vischin Peder che saja in um che giaudia generala stima. El ha alura licenzià il vegl, al admonind da smetter cun questas tschantschas, uschiglio haja el l’autra giada da spetgar in rigurus chasti per sia groppadad. Giacum ha bandunà la chasa dal mastral, fitg cuntent d’esser scappà mo cun ina reprimanda. Avend però vis ch’il mastral n’aveva betg tractà questa chaussa sco ina bagatella, è el sa pertgirà da repeter sias ingiurias al vischin Peder.

L’entschatta schaner è crudada ina gronda navada en las muntognas ed er la fradaglia era fitg murdenta. Ils umens ch’avevan lur muaglia per part en las aclas, avevan mintga di da far vias stentusas. Peder Caleira aveva però ses muvel gia a Sanagn; el aveva uss vaira bellavita, essend ch’el sper il pavlar il muvel saveva far pauc auter che tagliar in pau laina. Avend oramai buna peda, è el ì in di a Lantsch per s’infurmar tar la dunna dal signur inspectur da las minieras, sch’el n’haja betg retschet novas da Clavenna, tge che ses figl Tgetg fetschia. La signura al ha communitgà che ses um e Tgetg sajan arrivads fortunadamain a Clavenna ed eran, cur ch’ella haja retschet las ultimas novas, tuts dus sauns. Ella speria che ses um returnia il pli tard en quatter emnas; sch’ella retschaivia però inqual nova impurtanta avant ses return, veglia ella trametter in mess a Sanagn. Peder ha engrazià a la signura ed è returnà cuntentamain a chasa sia. Sia buna dunna è uss er sa quietada, savend che ses figl saja almain arrivà fortunadamain al lieu da sia destinaziun.

Paucs dis pli tard è sa derasada la fama ch’igl existia en divers lieus da la terra la nauscha pesta u muria. La tema è daventada generala en tut las vischnancas, nua ch’ins aveva udì questa trista nova. E pelvaira ha la malsogna contagiusa cumenzà a sa derasar, qua e là cun gronda vehemenza; darar ch’in ch’aveva piglià questa sgarschaivla malsogna mitschava cun la vita. La derasaziun da questa sgarschaivla malsogna è s’extendida adina dapli e la finala è ella er arrivada en las cuntradas alpinas dal Grischun. Remedis per questa malsogna n’enconuschevan ins nagins, e tgi che la pigliava n’aveva nagina speranza da mitschar cun la vita. Er en las valladas da la Güglia e da l’Alvra era quest terribel mal cumparì ed aveva gia en curt temp chaschunà en las diversas vischnancas ina gronda mortalitad. Er a Sanagn aveva ella fatg ina visita e bittà en fossa l’enconuschent Giacum da salvonnas. Udind Peder Caleira e sia dunna che lur vischin haja la muria, han els fatg tut lur pussaivel per sustegnair lur vischina Mengia ch’era mez desperada, u pervi da la perdita da ses um u forsa er be per tema ch’ella sezza pudess pigliar questa nauscha malsogna. Ma a Sanagn n’è mort nagin auter ch’il Giacum e sia dunna timida è sa revegnida suenter intginas emnas da la tema da stuair perder sia pel. A Mon ed a Stierva aveva la malsogna decimà malamain la pitschna populaziun. Ma en questa cuntrada aveva ella durà be circa in mais, alura è ella svanida fin il proxim atun.

Vers la fin da schaner ha Peder retschet ina visita nunspetgada, numnadamain dal patrun da ses Tgetg. Peder e sia buna dunna han piglià ina gronda tema, supponind ch’i manchia insatge a lur char figl; ma il patrun purtava ina tschera seraina ed ha ditg cun bucca rienta: «Betg temai, voss figl è saun e frestg; ma jau al hai laschà a Plurs. Mes ami, il signur Fabian Gometti, l’emprim e pli ritg soci da nossas minieras a Lantsch m’ha supplitgà d’al ceder quest svelt servient; ed empermettend el a voss Tgetg ina paja per da bler pli gronda che quella che jau al poss dar, hai jau laschà a Tgetg la libra voluntad d’entrar en quest nov servetsch. En consideraziun da la gronda paja è Tgetg sa resolvì d’acceptar la nova plazza ch’al era vegnida offerta. Jau n’al hai betg cedì gugent a mes ami, ma per far a quel in plaschair, hai jau dà a Tgetg la permissiun da restar tar mes ami Gometti.» Durant quest discurs dal signur directur èn siglidas a dunna Gnagna las larmas; ma il signur directur l’ha ditg: «Na sajas betg trista ed afflicta, mia buna dunna, voss Tgetg è uss en in servetsch sco ch’ins chatta fitg darar. Signur Gometti è in um fitg ritg e fitg uman envers ses servients; er sia signura è ina dunna excellenta che porta il cor en maun. Jau sun persvas che voss bun figl vegn ad avair a Plurs in excellent servetsch. Sche jau n’avess betg savì quai da bell’entschatta, n’al avess jau betg cedì a mes bun ami. Jau sai er che vus avais basegn dal sustegniment da voss uffants, ed jau sun stà persvas che vus vegnias ad esser cuntents da laschar entrar voss figl en quest nov servetsch, essend ch’el gudogna en quel, senza trair en consideraziun ils frequents bunamauns cun ils quals mes ami è fitg liberal, trais giadas dapli che fin uss en mes servetsch. Jau as cussegl oramai d’approvar il pass da voss figl e d’al laschar cun tutta fidanza en quest nov servetsch.»

Udind questas expectoraziuns dal signur directur, èn Peder e sia consorta sa declerads cuntents da laschar lur Tgetg a Plurs en chasa dal signur Fabian Gometti ed han engrazià al signur directur per sia bainvulientscha envers lur figl. Ma il signur directur als ha ditg: «Voss figl è in brav giuven en tuts rapports ed jau al hai pers fitg navidas, e tgi sa sche jau n’al avess a la fin betg snegà a mes ami, sche jau n’avess betg savì che vus hajas anc in segund figl in pau pli giuven che pudess entrar en mes servetsch e che n’è er betg crudà lontan dal lain. Jau sun oramai vegnì oz a visitar vus per as relatar il pass da voss bun Tgetg, ma a medem temp per supplitgar da ma ceder voss Albert e da laschar entrar quel en mes servetsch sut las medemas cundiziuns sco il Tgetg. Jau sun persvas che Albert vegn er ad esser in bun giuven ed a far ses servetsch cun la medema exactezza sco ses frar. Ed uss as supplitgesch jau be anc da ma dar ina resposta affirmativa. Vus savais che voss Tgetg è stà fitg gugent en chasa mia ed jau as poss sincerar ch’el ha bandunà fitg navidas mes servetsch; vus pudais er esser persvas che jau vegn a tegnair voss segund figl Albert gist uschè bain en chasa mia sco il Tgetg.»

Dunna Gnagna è sa vieuta vers ses um ed ha ditg: «Ti sas, Peder, che noss Albert t’è in grond agid cur che ti has dad ir a pavlar, ed i vegn franc ad esser difficil per tai da far tuttas lavurs sulet.» Ma Peder ha respundì immediat a sia dunna ch’el possia er sa cuntentar cun l’agid d’in dals uffants pli pitschens, ed in na dettia oramai nagin motiv da tegnair Albert a chasa. Sch’ella saja oramai cuntenta da laschar ir Albert a Lantsch tar il signur directur, sche dettia el er gugent ses consentiment. Quest discurs tranter ils dus conjugals ha mussà cun ina giada al signur directur che la buna dunna Gnagna na perdeva betg gugent ses segund figl; el è sa vieut vers ella ed ha ditg: «Mia buna dunna, n’hajas nagina tema da laschar vegnir Voss figl en chasa mia; jau vi procurar per el sch’el fiss mes figl. Jau sun m’accurschì vi da Voss figl Tgetg che Vus avais dà ina fitg buna educaziun a Voss uffants; e gist perquai giavisch jau da prender er Voss segund figl en mes servetsch. Jau chattass giuvens pli che avunda ch’entrassan gugent en mes servetsch; ma jau vi esser segir da finar in giuven bain educà, dal qual ins po sa fidar en tuttas occasiuns. Uss savais Vus il motiv, per il qual jau giavisch Voss figl sco mes servient, ed jau sper che Vus m’al concedias. Vus savais er che Voss Tgetg era fitg gugent en chasa mia e Voss figl Albert vegn a vegnir tractà gist uschè bain sco ses frar.»

Dunna Gnagna è sa vieuta a ses consort schend: «Char Peder, fa oramai quai che ti vuls; sche ti ta priveschas da l’agid dad Albert, sche es ti quel che patescha il pli fitg. Fa oramai gist quai che ta plascha!» Peder n’ha betg fatg in lung studi; malgrà las larmas ch’el veseva a glischar en ils egls da sia chara consorta, ha el ditg al signur directur: «Jau sun cuntent da laschar entrar noss Albert en Voss servetsch, savend che Vus e Vossa signura avais tractà bainischem noss Tgetg, e nus sperain che Vus e Voss signura consorta hajas la medema tgira per noss segund figl sco per l’emprim. Ma gia damaun na pudessan nus betg trametter il mat a Lantsch; nus al avain anc da proveder cun diversas chaussas necessarias per al dastgar preschentar en ina chasa da signuria. Ma mia dunna vegn tschert a far tut ses pussaivel da prest vestgir il mat ed al proveder cun il pli necessari.» Gnagna ha affirmà quai che ses Peder aveva ditg, ed il signur directur ha alura respundì cun vusch amiaivla: «Mia buna dunna, Vus pudais far tut quai cun buna commoditad, igl è tuttina sch’il mat entra trais fin quatter dis pli baud ni pli tard. Jau sun fitg cuntent che Vus laschais entrar Voss figl en mes servetsch e vi gugent conceder ad el tut il temp necessari per al pudair revestgir e proveder cun il necessari. Ma jau avess uss anc in giavisch, numnadamain da vesair Voss Albert per pudair discurrer in pèr pleds cun el.»

Peder ha ditg al signur ch’el haja tramess Albert a Stierva cun in utensil, ma el stoppia franc prest arrivar. Apaina pronunziads quests pleds è l’isch da la stiva s’avert ed Albert è entrà en la stanza, ha però fatg egls gross vesend qua en stiva il directur da las minieras, il qual el enconuscheva, essend stà diversas giadas en chasa dal directur a Lantsch, cur ch’el aveva stuì purtar insatge al frar Tgetg. Albert era bain vestgì fitg simpel, ma la vestgadira ch’el purtava era netta; er sia fatscha e ses mauns eran bain lavads e nets, e quai ha fatg sin ses patrun futur ina bunischma impressiun. Il bab Peder ha ditg ad Albert ch’el duaja dar il maun al signur directur, ed il figl è s’avischinà cun tutta franchezza, ma cun decenta modestadad al signur ed al ha purschì ses maun ed al ha salidà e beneventà. Al signur directur ha quest sa cuntegnair dal mat plaschì, ed el al ha ditg: «Taidla, mes bun Albert, na vuls ti betg vegnir a Lantsch cun mai?» Albert ha fatg in enclin e ditg: «Sch’il frar Tgetg vul returnar a chasa, alura vi jau gugent vegnir a Lantsch e servir a Vus uschia che Vus vegnis ad esser cuntent cun mai.» Il bab Peder al ha uss communitgà ch’el possia entrar ils proxims dis en servetsch tar il signur directur, essend che Tgetg haja uss in auter servetsch a Plurs. Da quella novitad è Albert stà fitg surstà, n’avend el fin uss betg udì da ses geniturs che Tgetg haja l’intenziun da midar servetsch. La mamma al ha raquintà uss l’entira istorgia da Tgetg e co ch’il signur directur haja giavischà da prender el en servetsch ed il bab e la mamma sajan stads cuntents cun questa proposta dal signur, sche er el la veglia acceptar. Albert è immediat sa mussà pront dad ir a Lantsch. Alura è il signur directur s’absentà cuntent ed è returnà a chasa sia. Sis dis pli tard ha Peder accumpagnà ses segund figl a Lantsch ed al ha preschentà a ses patrun al admonind da far ses servetsch per cuntentientscha dal patrun e da la patruna.

Albert è sa mussà fitg adester, svelt e fidaivel en ses servetsch a Lantsch, uschia ch’il patrun e la patruna èn stads fitg cuntents cun el. Da quai èn ils geniturs a Sanagn s’allegrads fitg. Cur ch’è la finala arrivada la primavaira, han ils miniers da l’onn passà cumenzà a returnar a Lantsch, ed enturn mez avrigl han ins er cumenzà puspè cun las lavurs en las minieras. Quai ha uss dà nova vita a l’entira cuntrada. Blers umens e blers possessurs da manadiras han chattà nov gudogn. Gia vers la fin da matg han ins fatg en las minieras in chat da grond’impurtanza, scuvrind in’avaina dad aur fitg abundanta; quai ha dà nova vita en las minieras ed i circulavan en la cuntrada las tschantschas las pli extravagantas davart la fortuna dals miniers. Il zercladur han ins chattà en ina chava in’avaina da la grossezza da la chomma d’in um. Questa ritgezza d’aur extraordinaria ha fatg necessaria la pli gronda precauziun da vart da la direcziun e dals intendants, essend ch’ins temeva ch’i pudessan succeder enguladitschs e defraudaziuns da vart da singuls miniers che faschevan las grevas lavurs e stuevan la finala laschar la groma a quels ch’avevan gia las bursas plainas. Il directur a Lantsch stueva visitar mintga di las minieras per tegnair bun urden, e noss Albert Caleira stueva er adina accumpagnar il patrun sin la muntogna; i capitava schizunt ch’el stueva far questa via da Lantsch a las minas dal Piz Cotschen duas fin trais giadas a di, cur ch’il signur patrun aveva emblidà insatge a chasa ch’el stueva avair sin la muntogna. I succediva er ch’il directur stueva pernottar cun ses servient sin la muntogna, quai che signur Morin na fascheva betg tant gugent, essend ch’el na chattava betg gist gronda commoditad en ses dormitori sin la muntogna.

Durant quella stad aveva la societad da las minieras fatg grondas fatschentas e cur ch’è vegnida tegnida a Plurs ina radunanza generala dals commembers da l’entira societad, ha scadin da quels retschet ina gronda quota. Il directur Morin a Lantsch ch’era soci da la societad, aveva er retschet ina gronda quota, ed ultra da quai al aveva la societad concedì ina splendida gratificaziun per si’administraziun premurusa dals affars da la societad. Cur ch’i plova sin ils gronds, dagutti bainduras er sin ils pitschens. Morin era in um da bun cor e cuiva er gugent insatge ad auters, cur ch’i gieva bain cun el. El è sa regurdà en questa sia fortuna er da ses servients ed ha dà a scadin in bunamaun. Oravant tut ad Albert Caleira, a ses giuven servitur, aveva el fatg in ritg regal, il qual il bun giuven ha immediat purtà a ses chars geniturs.

Arrivond las burascas atunilas quest onn a bun’ura, han ins stuì serrar las minieras pli baud che per ordinari, cumbain che l’explotaziun da las chavas era anc fitg buna. Temend però ch’i pudessan succeder durant l’enviern defraudaziuns en las minieras, ha la societad concludì da laschar durant l’enviern dus guardians sin la muntogna. Ins ha reparà la chamona da la direcziun ed endrizzà en quella ina stiva ch’ins pudeva stgaudar; ins ha er fatg ina gronda provisiun da laina per ils dus guardians ed als ha provedì cun la vivonda necessaria; pertge che dad auta navada eri nunpussaivel als dus umens da vegnir sezs a val per prender victualias sin la muntogna. Avend fatg tut questas preparativas, han ins fermà las minieras sco ils onns precedents, ed ils miniers han bandunà la muntogna, laschond ils dus guardians sulets en lur abitaziun caduca. Paucs dis pli tard è vegnida ina segunda naiv, la quala ha fatg dal tuttafatg intransibla la muntogna, ed ils dus paupers guardians da las minieras eran totalmain isolads da tut il mund. Els eran però provedids cun badigls ed empruvavan mintga di da far e batter in toc via vers la val. Ma las lavurs ch’els faschevan durant il di, cuvrivan ils suffels da la notg cun auts cuflads, da maniera ch’i fiss stà absolutamain impussibel als dus umens da vegnir a val.

Vers la fin da november è la populaziun da la cuntrada danovamain vegnida alarmada tras las novas che la pesta haja en divers lieus danovamain cumenzà a furiar cun gronda vehemenza. La tema era general en l’entira terra, ma betg senza raschun; la malsogna era quella giada bler pli vehementa che l’ultima primavaira. Ils paucs medis n’enconuschevan absolutamain nagin remedi per quest mal, e tgi ch’al pigliava na pudeva far nagut auter che sa recumandar a la grazia dal tschiel e sa preparar sin la mort. Il pli remartgabel èsi stà che la malsogna n’è betg sa derasada en tut las chasas d’in vitg; ma en quellas chasas, en las qualas ella aveva tegnì si’entrada, stuevan tut ils members da la famiglia ceder, e be darar ch’in mitschava cun la vita. Ins udiva mintga mument a sunar ils curs da mort en las diversas vischnancas, e quai fascheva ina fitg trista impressiun sin la populaziun. En diversas vischnancas eran er ils spirituals morts da questa terribla malsogna, ed i fruntava ch’in plevon stueva proveder ils moribunds ed ils vivents da duas vischnancas. Ma tuts che sa suttamettevan gugent e cun grond zeli a questa lavur privlusa e stentusa. Per fortuna n’ha la perioda da la malsogna betg durà ditg; gia en circa otg emnas è la malsogna tschessada totalmain ed ha bandunà la cuntrada gist uschè rapidamain sco quai ch’ella era vegnida. En ina vischnanca raquintan ins anc oz ch’in um haja udì durant la notg in fracass sin via. El è siglì si dal letg, ha piglià las chautschas, mess ina chomma en la chautscha ed avert la fanestra. El ha vis a passar per la strada ina numerusa processiun funerala; l’ultim en la processiun era mo cun ina chomma en las chautschas, e quai era gist l’um che guardava da sia fanestra. Quel è alura stà l’ultima victima da la malsogna en questa vischnanca.

A Sanagn n’era la malsogna contagiusa betg arrivada questa giada; anzi steva la famiglia da Peder Caleira fitg bain e prosperava. Er a Lantsch n’aveva la malsogna betg fatg grondas devastaziuns questa giada; en questa communitad eran mortas be trais persunas da la pesta. Il signur directur Morin fiss gugent fugì cun sia famiglia a Clavenna, sch’el n’avess betg retschet novas che la muria saja là fitg nauscha. El è oramai restà a Lantsch; el tegneva però serrada sia chasa per betg vegnir en contact cun auters abitants dal lieu e cun ils passants. Ad Albert Caleira ch’aveva nagina tema da la malsogna parevi fitg lungurus da mai dastgar sortir da chasa. El ha perquai prendì permissiun dal patrun per intgins dis ed è ì a Sanagn. Ses geniturs e fragliuns han gì in grond plaschair da sia visita. Avend passentà circa in’emna a chasa, ha el stuì returnar a Lantsch tar ils patruns. Essend che la pesta era uss prest tschessada dal tut, ha signur Morin fatg cun sia dunna ch’aveva stuì restar l’onn passà a Lantsch in viadi a Clavenna per visitar ses parents. Essend però l’aura memia fraida, ha el stuì laschar ses uffants a Lantsch sut la vigilanza da la veglia cuschinunza e dad Albert ch’avess er fatg fitg gugent quest viadi cun ils patruns per vesair ses frar Tgetg a Plurs.

Signur Morin aveva procurà per ina buna instrucziun a ses uffants durant l’enviern; el aveva numnadamain supplitgà il reverendissim signur plevon da Lantsch ch’el dettia mintga di duas uras scola a quels, ed essend che Albert Calira stueva adina accumpagnar ils uffants, ha er el pudì sa profitar da quest’instrucziun. Avend el ina buna testa, ha el prest gì emprendì da leger; el ha er cumenzà cun il scriver e fatg er en quest art bels progress. Il signur plevon ha fatg tut ses pussaivel per che quel vegnia vinavant en il leger e scriver. Albert mussava gronda diligenza en scola, e cur ch’el vegniva suenter la scola a chasa cun ils uffants dal patrun, s’occupava el er anc durant l’autra part dal di cun sias scienzas da scola. Quai plascheva zunt fitg al bun instructur, e quel ha la finala er prendì curaschi d’instruir in pau ses discipel en l’aritmetica, da la quala Albert ha gì in spezial plaschair. En curt temp enconuscheva el andantamain las quatter spezias. Il progress dad Albert era bler pli grond che quel che faschevan ils uffants dal patrun, essend ch’el era pli vegl e pli giudizius che quels. La saira repetiva Albert cun ils uffants dal patrun las lecziuns ch’els avevan retschet durant il di dal signur plevon. En questa maniera faschevan er ils uffants vaira gronds progress, e lur instructur era fitg cuntent cun els.

Cur che signur Morin e sia dunna èn returnads da Clavenna, èn els sa mussads fitg cuntents cun ils progress che lur uffants avevan fatg durant lur absenza. Els han purtà fitg bels regals a la cuschinunza ed ad Albert per remunerar la buna tgira ch’els avevan gì dals uffants. Ma ad Albert plaschevan avant tut las bunas novas che ses patruns al han purtà da ses char frar Tgetg. Il patrun al ha relatà che Tgetg stettia fitg bain a Plurs, che ses patruns al laudian e sajan fitg cuntents cun el. Tgetg saja er creschì zunt fitg e fetschia uss quasi la cumpars d’in mat creschì. Il patrun ha er consegnà ad Albert in pachet che Tgetg al aveva tramess cun ils patruns ed al ha ditg ch’el possia ir l’auter di a Sanagn cun quest pachet ed al surdar a ses geniturs che vegnan alura segiramain ad esser cuntents cun lur figl a Plurs. Questas novas han allegrà il bun Albert, e l’autra damaun a bun’ura è el ì cun lubientscha dals patruns a Sanagn per purtar questas novas als chars geniturs. El ha chattà quels en buna sanadad ed als ha surdà il pachet dal frar. Avrind la mamma il pachet, ha ella chattà en quel per scadin da ses uffants in pitschen regal; ma amez il pachet ha ella chattà en in palpiri 50 rentschs en munaidas d’aur. Da quests utschels aveva ella anc vis paucs ed ella e ses um èn s’allegrads fitg dal sustegniment da lur bun figl. Albert ha passentà in fitg agreabel di en la chasa paterna ed è returnà pir vers saira a Lantsch tar ses patruns.

La famiglia Caleira pudeva duvrar fitg bain ils daners retschets dal figl a Plurs. Peder avess gia daditg ennà cumprà gugent ina vatga, ma la munaida al mancava; uss è el ì gia l’auter di ad Alvaschein, e la saira è el returnà a chasa cun ina bella vatgetta ch’el aveva cumprà per 16 rentschs. L’ulteriura munaida ch’el aveva retschet da Plurs ha el applitgà per pajar intgins daivets currents. Suenter avair fatg quests pajaments, al èn restads anc circa 20 rentschs en cassa per il temp futur. Quella summa è restada ditg temp intacta; pertge che da quel temp n’enconuschevan las famiglias da purs nagin luxus; ins n’aveva betg basegn da zutger e café e d’autras spezarias che consumeschan ozendi blers daners quasi en mintga chasa da purs. Ultra dal sal na cumpravan ils purs naginas chaussas estras. E per taila da mangola estra na spendevan els betg daners; lur dunnas diligentas filavan sezzas la launa ed il glin e faschevan lur vestgadira cun lur products. E gist dunna Gnagna Caleira era en quest rapport ina dunna economica ch’avess pudì server a bleras autras sco exempel.

Ina saira suenter avair urà il rusari ha dunna Gnagna mess a letg ses uffants sco per il solit. Returnada en stiva, ha ella ditg a ses um: «Mes bun Peder, ma di, co è quai pussaivel che noss Tgetg ans po trametter en in uschè curt temp ina summa da 50 rentschs. Qua tar nus dat ins tut il pli 10–12 rentschs pajaglia ad in famegl creschì che sa far tut las lavurs. Co èsi oramai pussaivel che noss figl ans po trametter suenter apaina in onn ina tala summa? Duess el forsa avair acquistà questa blera munaida en maniera ingista? Jau stoss confessar che questa dumonda m’ha occupà tut quests dis, ed jau na ma poss betg liberar d’ina tscherta tema che noss Tgetg saja sa midà en il decurs da quest onn e n’observia betg pli ils princips che nus al avevan mussà. O tge turment che quai ma fa di e notg!» Peder l’ha respundì: «Er jau hai gia pensà a quella chaussa e na sai mez betg chapir co ch’in mat da quindesch onns duess en il termin d’in onn pudair spargnar ina summa da 50 rentschs en qualitad d’in servitur. Jau hai bain confidenza en l’undraivladad da noss Tgetg; ma la chaussa m’è tuttina incredibla. Per far fin a tuts dubis inquietants hai jau l’intenziun dad ir in di a Lantsch a dumandar il signur inspectur Morin tge ch’el pensia da questa chaussa; el ma po franc dir, sche Tgetg ha pudì gudagnar tanta munaida a Plurs en in uschè curt temp.» Sia dunna è stada cuntenta cun quest plan ed al ha animà da prest al exequir, sinaquai ch’els possian prest recuperar lur tranquilitad.

La proxima dumengia è Peder davaira ì a Lantsch per consultar il signur Morin en quella chaussa che fascheva tant scrupel als conjugals Caleira. El ha chattà a chasa il signur directur e quel al ha retschet cun gronda curtaschia. El ha raquintà a Peder tge stupent giuven che Tgetg saja daventà a Plurs e co che quel al haja supplitgà da salidar ses chars geniturs e fragliuns. «Guardai, mes bun Peder Caleira», ha signur Morin ditg, «Vus n’enconuschessas betg pli Voss Tgetg. El è pelvaira in stupent giuven e fa ina bella cumparsa. L’entira famiglia da ses patruns al aman sco sch’el fiss in figl da la famiglia. Vus pudais esser fitg cuntent che Tgetg ha chattà in tal servetsch. Voss figl vegn tschertamain a far cun il temp sia fortuna a Plurs.»

Udind il laud da ses figl, steva Peder qua tut perplex; ils pleds da signur Morin faschevan bain a ses cor, ma uss al è vegnì endament il scopo da sia visita a Lantsch, ed el è vegnì inquiet e n’ha betg chattà il pled da cumenzar la dumonda, la quala el vuleva far a signur Morin. Quel ha observà questa timiditad dal bun um ed al ha ditg ch’el saja pront d’al dar anc dapli scleriment sch’el giavischia quai. Peder ha finalmain prendì curaschi e ditg: «Vus m’avais dà in bun rapport da mes figl; ma – ma jau As stoss tuttina communitgar ina chaussa che m’inquietescha. Vus avais gì la buntad d’ans purtar da Plurs in pachet da mes Tgetg. Avrind mia dunna quest pachet, ha ella chattà, ultra d’intgins regals per noss uffants, ina summa da 50 rentschs en munaidas d’aur. Questa blera munaida ans ha fatg grond quità; mia dunna ed jau, nus na savain betg chapir co che noss figl ha pudì spargnar tants daners en in curt onn, ed jau sun oz vegnida express a Lantsch tar Vus per As dumandar sche noss Tgetg ha pudì gudagnar ina tala summa en uschè curt temp.»

Signur Morin ha respundì cun emoziun: «Mes bun Peder, n’hajas nagina tema che Voss figl haja acquistà questa munaida en maniera ingista. Sche jau na sbagl betg, al dattan ses patruns uss ina paja da 20 rentschs. I na passa quai gnanc in di senza ch’el survegn in bel bunamaun. En chasa da ses patruns sa radunan savens grondas societads da signuria, ed ils signurs na bandunan mai la chasa ospitanta, senza dar in bunamaun als servients da la chasa. Jau sun persvas che Voss Tgetg vegn en in onn sin ina paja da 100 rentschs, sch’ins resguarda er quai ch’el retschaiva sco bunamaun. Na, na, mes bun ami, Voss Tgetg è in giuven fitg galant ed onest e na vegn mai a far tort a ses patruns. Ma Vus na stuais betg metter Plurs en cumparegliaziun cun las vischnancas da questa part dals munts. A Plurs sgola en in di dapli munaida che en ina da nossas vischnancas en in entir onn.»

Peder ha uss anc discurrì cun ses figl Albert e bandunà alura la chasa dal signur Morin, cuntent cun l’infurmaziun retschavida. Er sia dunna Gnagna è uss sa quietada, ma n’ha betg emblidà d’urar mintga di per ses figl absent. – Signur Morin ha raquintà a sia dunna il discurs ch’el ha tegnì cun Peder, e quella è sa smirvegliada cun el da l’undraivladad da quest simpel pur.

III.

La primavaira è arrivada quest onn in pau pli tard; ma la fin d’avrigl han ins cumenzà la lavur en la miniera al Piz Cotschen. Ils miniers esters eran gia arrivads otg dis avant ch’ins possia cumenzar las lavurs. Quests schanis robusts han purtà in pau vivacitad en la vischnanca da Lantsch, ed ils vischins da quella èn stads fitg leds, cur che quests umens han bandunà il lieu per sa render en las minieras. Las minieras e chavas avev’ins chattà intactas; tut era en urden, nagins laders avevan empruvà d’entrar en las chavas per engular aur. En circa 15 dis era tut puspè en moviment, e gia las emprimas lavurs fatgas en las chavas han laschà sperar che la societad vegnia er quest onn a far bunas fatschentas en las minieras. Il mais da matg ha la societad da Plurs tramess intgins da ses socis a Lantsch per laschar intercurir il stadi da las minieras ed examinar ils quints da l’administraziun da quellas. Tranter quests cummissaris sa chattava er il patrun da Tgetg Caleira, e Tgetg al aveva pudì accumpagnar. O, tge allegrezza ha sentì il bun giuven cur che ses patrun al aveva communitgà ch’el possia vegnir cun el sin quest viadi. Vers la fin da matg è questa societad da viadi arrivada a Lantsch, nua ch’ins aveva gia preparà in quartier per questa signuria. Tut quests signurs avevan fatg quest viadi a chaval, ed ils servients da quels, tranter quels er Tgetg Caleira, avevan stuì ir a pe tegnair pass cun ils signurs; pertge ch’els aveva da rugalar e pavlar ils chavals, cur che la societad sa fermava insanua. Las vias eran però uschè nauschas ch’in bun pedun pudeva facilmain suandar a quests chavaltgaders che n’eran betg disads da far gronds strapazs. Quest viadi na dueva betg passar senza in’aventura dischagreabla. En la pitgogna dal Crap tranter Cunter e Casti è il chaval da signur Gometti, il patrun da Tgetg, sa spaventà dal moviment d’ina chaglia, ha fatg in pèr terribels sigls e bittà per terra ses chavaltgader. Signur Gometti n’aveva betg pudì sa liberar da la staffa enten crudar ed è vegnì stratg per la via nauscha. Ma per fortuna era Tgetg in pèr pass avant ils chavaltgaders ed ha observà la disgrazia a temp; igl al è reussì da pigliar il chaval da ses patrun e da tegnair ferm quel. Ils auters chavaltgaders èn immediat descendids da lur chavals ed han liberà signur Gometti da sia situaziun critica.

Ins ha immediat intercurì las plajas dal disfortunà e constatà ch’el aveva survegnì ina ferma contusiun vi da la testa ed aveva schlugà in bratsch; er il pe ch’era restà en la staffa, al duleva ch’el pudeva apaina passar. La cumpagnia da viagiaturs era en grond embrugl e na saveva betg co far per transportar il disgrazià fin Casti. Essend che Tgetg enconuscheva questa cuntrada, al han ins immediat tramess a Casti per tschertgar umens che possian purtar il blessà fin là. Tgetg è currì sco da sgular fin en il vitg ed en circa duas uras èn arrivads quatter umens cun ina purtantina ed intginas cuvertas da launa. Uss han ins plazzà il blessà signur Gometti sin la purtantina, al enzuglià bain bain en las cuvertas ed al purtà alura cun tut quità a val vers Casti. Tgetg è suandà ils purtaders manond il chaval da ses signur vi dal frain. Arrivads a Casti, han ins immediat clamà in chirurg che sa chattava per fortuna dapi intgins dis en vischnanca, e quel ha prendì signur Gometti en cura. Suenter trais emnas ha il pazient pudì bandunar la stanza e far pitschnas spassegiadas en il conturn dal vitg, e l’emna suenter al han ins transportà a Lantsch en chasa dal signur directur Morin, nua ch’el vuleva restar fin ch’el haja recuperà la forza per far il viadi a chasa. Il segiurn da signur Gometti a Lantsch ha durà circa dus mais, e durant quest temp ha ses servitur Tgetg Caleira savens gì occasiun da visitar sia chasa paterna a Sanagn.

La nova che sajan arrivads a Lantsch signurs da Plurs ha prest fatg la runda tras las vischnancas vischinas ed è la finala er arrivada a Sanagn. Ma Peder Caleira e sia famiglia na savevan betg che lur char figl Tgetg saja arrivà cun questa cumpagnia. In di cur ch’el lavurava sin ses funs sper la chasa cun sia dunna e ses uffants, han els observà in chavaltgader che vegniva da Mon vers Sanagn. Peder e sia dunna han fatg da tuttas sorts supposiziuns, tgi che quest chavaltgader pudess esser e nua che quel veglia chavaltgar. Tranter Mon, Sanagn e Stierva n’era betg gist ina via commoda per chavaltgaders, ed els n’han betg pudì sa regurdar d’avair vis ina giada in chavaltgader sin questa via. Entant che Peder e sia dunna discurrivan dal chavaltgader, è quest ultim s’avischinà spertamain, ed arrivond el en la vischinanza dal funs da Peder, ha dunna Gnagna ditg a ses um: «Guarda, Peder, tge bel e frestg giuven che quest chavaltgader è!» Ma co èn omadus conjugals stads stuts, vesend ch’il chavaltgader ha man ses animal tras la porteglia che manava avant lur chasa. Arrivads fin la chasa, è il chavaltgader siglì dal chaval ed ha fermà quel vi d’in rintg sper l’isch-chasa; alura è el sa vieut ed è ì cun pass rapids vers la famiglia che lavurava. En distanza da circa otg pass ha el tratg ses chapè e dunna Gnagna ha clamà cun vusch vibranta: «Noss Tgetg, noss char Tgetg!» Il proxim mument èn mamma e figl s’embratschads cun in’immensa tenerezza e las larmas èn siglidas a la mamma ed al figl.

Passada l’emprima emoziun, ha la mamma dumandà Tgetg, avend quel dà il maun al bab ed als fragliuns: «Ma ma di, mes char Tgetg, danunder vegns ti ed alura anc a chaval?» Tgetg è sa mess a rir ed ha alura raquintà a ses geniturs il cas succedì cun ses patrun e ch’el sa chattia uss a Casti, nua ch’il patrun giaschia malsaun. Ils buns geniturs han deplorà la disfortuna che ses patrun aveva gì, ha però udì cun plaschair che lur char figl haja uss buna occasiun da visitar la chasa paterna. Ils buns geniturs han uss fatg entrar el en chasa, e l’entira famiglia è sa radunada a maisa per tadlar il rapport dal figl arrivà. Tgetg ha raquintà da Plurs, da ses buns patruns, dal bun tractament ch’el haja en quella chasa, co ch’el haja gia diversas giadas stuì accumpagnar il patrun en qualitad d’in servitur sin ses viadis a Clavenna ed a Como e tge remartgabladads ch’el haja vis en questas interessantas cuntradas e citads. O co è sa smirvegliada l’entira famiglia ch’il bun Tgetg, ch’aveva be 16 onns, aveva gia vis in’uschè gronda part dal mund! Ma tuttenina è la mamma siglida en pe ed ha ditg: «Nus stain tuts qua e tadlain las novitads da noss Tgetg ed emblidain d’al porscher in refrestg! Ma di, mes char Tgetg, tge ta poss jau porscher che ta plaschess? In cuppin cun latg forsa? Ni vul pli gugent in toc charn setga?»

Tgetg ha respundì a la mamma ch’el n’haja absolutamain basegn da nagut, el saja stà pauc dapli ch’ina mes’ura sin via e vegnia gist da la maisa. Insumma ha Tgetg declerà ch’el na veglia nagut e n’acceptia nagut; sch’el avessi fom u said, alura supplitgassi el per insatge, n’essend quai però betg il cas, sche na possia el betg acceptar ina chaussa. Vesend la mamma a discurrer ses figl tant datschert, n’ha ella betg insistì d’al vulair purtar in refrestg. Tgetg ha alura declerà als geniturs ch’el stoppia prest returnar a Casti, ma el speria ch’el possia uss savens visitar la chasa paterna, essend ch’el haja er da guardar dal chaval da ses patrun e stoppia mintga di chavaltgar enturn cun quel in pèr uras per ch’el na daventi betg memia selvadi cun adina star en stalla vi d’in bun parsepen. El ha alura dà il maun als geniturs ed a ses fragliuns, è muntà a chaval e s’absentà. Questa visita en chasa paterna ha el repetì diversas giadas entant che ses patrun era anc a Casti; ma cur che quel è alura ì a Lantsch, n’ha el betg pli gì tanta libertad e stueva mintga giada cur ch’el vuleva ir a Sanagn dumandar il patrun per il permiss da dastgar far ina visita a ses geniturs.

A Lantsch aveva Tgetg chattà ses frar Albert che fascheva uss er ina stupenta cumparsa. Albert ha gì ina grond’allegrezza da vesair ses bun frar absent. Quests dus frars s’amavan cun ina gronda tenerezza gia dal temp cur ch’els eran anc a chasa tar lur geniturs; quest’amur fraterna n’era betg sa diminuida durant l’absenza da Tgetg. Uss eran ils dus frars tut il di ensemen e faschevan communablamain lur lavurs e faschevan er plans per il temp futur. Albert giavischava er da cun il temp pudair ir en terras estras, ed ils raquints dal frar han anc augmentà dapli questa brama da tschertgar cun il temp sia fortuna a l’exteriur. Cur che Albert stueva mintgamai ir cun depeschas da ses patrun sin la muntogna tar las minieras, al accumpagnava Tgetg quasi adina ed aveva er in grond plaschair da pudair tegnair cumpagnia al frar.

Dal reminent aveva Tgetg anc da far autras cursas per ses patrun. In di ha el retschet da quel il cumond dad ir a Cuira cun ina brev. Il patrun al ha provedì cun la munaida necessaria e giavischà ch’il giuven fetschia quest viadi a chaval. Tgetg è sa vestgì uschè propriamain sco pussaivel, duend el visitar per l’emprima giada la chapitala grischuna. El è gia partì l’autra damaun a bun’ura. Ses chaval ch’aveva ruassà in pèr dis curriva sco in desperà per la via crappusa ed il giuven al vegniva apaina da retegnair e diriger. Malgrà la nauscha via è el arrivà en pauc pli che trais uras en la citad; el n’era sa fermà nagliur ed il chaval aveva uss er stgatschà ses ardiment sin questa via stentusa. En la citad ha el tschertgà l’ustaria, nua ch’el vuleva descender; ma quai n’era betg ina chaussa uschè facila sco quai ch’el aveva cret; el udiva qua a discurrer tudestg e na saveva gnanc in pled da questa lingua, e na scuntrond en la via nagina persuna che saveva discurrer rumantsch u talian, è el entrà da la porta sura e sortì da la porta sut senza avair chattà l’ustaria. El ha vieut ses chaval ed è returnà tras la citad per la medema via ed era gia daventà ina persuna interessanta per la giuventetgna da la citad, la quala al suandava e cumenzava a dar ad el da tuttas sorts titulaturas ch’el, per fortuna, na chapiva betg. La finala è arrivà in policist da la citad e Tgetg è sa drizzà a quel al dumandond, nua che sa chattia tala e tala ustaria. Chapind il policist in pau il rumantsch, ha el manà il giuven a chaval en l’ustaria numnada.

L’ustier che saveva discurrer rumantsch ha dà a Tgetg in famegl, il qual ins ha manà en la chasa, nua ch’el aveva da remetter la brev da ses patrun. Avend il signur, al qual la brev era scritta, legì in pèr pleds e la suttascripziun, è el sa vieut a Tgetg ed al ha dumandà, sch’el saja forsa il servient da signur Gometti, ed affirmond Tgetg quai, al ha il signur fatg entrar en la stanza da sia famiglia ed ha cumandà a sia glieud, da purtar al giuven ester da mangiar e da baiver. Tgetg ha fatg tutta onur a la charn ed al schambun da Cuira ed er laschà emplenir in pèr giadas ses bitger cun vin da Cuira, na savend betg che quel saja uschè ferm; ma suenter in’urella ha el sentì che quel cumenzava a dar en la testa e n’ha betg pli laschà emplenir ses bitger. Il signur è alura vegnì en stiva ed ha communitgà al giuven ch’i vegnian franc anc a passar duas uras, fin ch’el haja pront la resposta sin la brev da ses signur patrun. Sche quai al fetschia plaschair, sche possia el far ina spassegiada tras la citad e contemplar las remartgabladads da quella. Tgetg ha respundì ch’i al fetschia plaschair da chattar temp per in gir tras la citad ed è sortì da chasa per interprender si’inspecziun da la chapitala. Ma suenter curt temp ha el sentì ch’el n’era betg ferm en chomma, il ‹vin da la terra› ch’el n’aveva betg enconuschì, ha cumenzà a laschar sentir sia forza. La glieud che gieva per via cumenzava er gia a far attenziun da las curvas ch’il giuven fascheva, ed el sez sa turpegiava da sa chattar en quest stadi. El è ballantschà vers la porta da la citad per sortir da quella e tschertgar insanua in lieu, nua ch’el possia durmir in mument. Observond in aual ha el suandà la cursa da quel, ed essend lontan avunda da la citad e n’observond nagin en la vischinanza, ha el fatg bogn en l’aual, e l’aua frestga da quel ha alura prest allontanà si’aivrezza.

Avend el gia vis Como, ha el chattà a Cuira paucas chaussas ch’al fissan stadas remartgablas; perquai ha el fatg be in pitschen gir tras diversas vias da la citad ed er anc visità la curt episcopala e returnà alura en si’ustaria per guardar, sche ses chaval saja rugalà en urden. Prest suenter è il signur, al qual Tgetg aveva purtà la brev, cumparì en l’ustaria ed al ha remess la resposta ch’el aveva da purtar a ses patrun. Il signur al ha envidà da returnar cun el en sia chasa per prender in refrestg, ma Tgetg ha declerà ch’el n’haja betg da basegn d’in refrestg, el veglia uss sa metter sin via vers Lantsch per pudair arrivar là anc da cler. Il signur al ha recumandà da conservar bain la brev da resposta a ses signur, essend quella da gronda impurtanza. Alura ha Tgetg fatg sellar ses chaval ed è chavaltgà rapidamain vers la ‹collina da la furtga›, cumenzond ad ascender la muntogna. Il chavaltgar a munt n’era betg uschè stentus sco il chavaltgar a val, ed el ha incità ses animal d’ir in ferm pass; ma il chaval sentiva tuttina in pau il strapaz dad oz, e Tgetg ha chapì ch’el al stoppia laschar pusar a Churwalden. El è entrà en in’ustaria, ha prendì in quintin vin e fatg dar a ses animal in minal avaina; ma gia suenter ina mes’ura ha el cuntinuà ses viadi, essend che la saira era arrivada. El à passà Parpan en in ferm pass e paucas minutas pli tard è el arrivà a l’autezza da la planira da Lantsch. L’aura steva per sa midar ed il firmament era cuvert cun gross nivels pesants. Il cler dal di è svanì plaun a plaun, ed avant ch’il chavaltgader arrivia al lai episcopal, era la notg gia uschè stgira ch’il giuven veseva apaina la via. Per ses spavent hai cumenzà a tunar da lontan e gia il proxim mument ha in ferm chametg sclerì la cuntrada, al qual è suandada ina tunada cun ina tala squassada ch’il chaval ha piglià tema e fatg in grond sigl. Tgetg steva per cupitgar e crudar dal chaval, ha però anc pudì sa tegnair vi dal culiez da ses animal. Il chavaltgader ha pudì avanzar be plaunsieu e stueva semper temair da crudar dal chaval; pertge che quel sa spaventava quasi da mintga chamegiada, tegneva la testa ad aut, gizzava las ureglias ed era semper pront da prender la fugia. A Tgetg èsi vegnì endament da descender dal chaval e da manar l’animal vi dal frain; ma el temeva da betg esser ferm avunda per pudair tegnair ses animal e che quel pudess alura ir a frusta en quella cuntrada selvadia. Ma sia situaziun dueva daventar anc pli seriusa e privlusa. Sclerind ina nova chamegiada il terren da tala maniera ch’ins avess pudì tschertgar guglias dal plaun, ha Tgetg observà sut in pign gigant sper la via nauscha trais bandits cun barbunas, ed in da quels ha gia stendì ses maun per tschiffar il frain dal chaval; ma Tgetg ha auzà sia giaischla e l’ha laschà tschivlar da tala maniera sur la testa dal bandit che quel ha dà in sgarschaivel sbratg. Alura ha il giuven chavaltgader dà ils sparuns a ses animal e quel è ì vinavant en terribels sigls; Tgetg ha apaina pudì sa tegnair en sella; per sia fortuna è el arrivà en paucs muments sin il tschispet d’in prà ed ha alura laschà liber frain a ses animal. Per fortuna ha el prest puspè chattà la vi ch’era uss in pau pli passabla ed è spert vegnì vinavant vers Lantsch. Ina mes’ura pli tard è el arrivà a Lantsch e sa fermà avant la chasa, nua che ses patrun Gometti abitava. Ses frar Albert al aveva gia daditg spetgà ed è immediat vegnì natiers per gidar Tgetg da metter en stalla il chaval; vesend però che quel era bagnà fin la pel da la plievgia, ha Albert ditg ch’el veglia prender en tgira il chaval e Tgetg duaja ir en chasa.

Tgetg è entrà en chasa ed ha fatg annunziar a ses patrun ch’el saja arrivà e pront d’al render quint da ses viadi. Il patrun al ha immediat fatg entrar en sia stanza ed al ha retschet cun bainvulientscha. Tgetg ha fatg ses rapport e consegnà al patrun la brev da Cuira, la quala era bain in pau muscha da la plievgia ch’aveva penetrà la vestgadira dal giuven; ma signur Gometti l’ha pudì leger facilmain ed è sa mussà fitg cuntent cun ses servient adester ch’aveva fatg sia cumissiun a sia cumplaina satisfacziun. Tgetg ha retschet dal bun patrun in bel regal ed è alura vegnì relaschà. Avend ses frar Albert surpiglià la tgira dal chaval, è Tgetg ì cun ina giada a letg, essend fitg strac e stanchel da sia greva chavaltgada. La cuschiniera al aveva anc vulì preparar ina tschaina, ma Tgetg n’ha betg vulì tschanar, schend ch’el haja pli grond basegn da ruassar e durmir che da mangiar. Durant la notg ha el gì in sgarschaivel siemi, en il qual el aveva da cumbatter ils bandits ch’al avevan vulì attatgar durant il temporal sin la planira da Lantsch.

L’autra damaun è il signur s’infurmà pli detagliadamain dal viadi da ses servitur, e quel al ha alura raquintà ses inscunter cun quests bandits sin la planira da Lantsch e co ch’el saja sa liberà da quels tras in brav culp cun sia giaischla. Signur Gometti ha piglià gronda tema, udind questa aventura da ses fidaivel servitur; el ha chapì fitg bain che Tgetg era stà en grond privel da perder la vita ed il chaval. El ha lauda il curaschi e sia preschientscha da spiert e la prontezza, cun la quala el era sa liberà da ses grond privel. El ha augmentà il bunamaun dad ier saira cun anc quatter cruschuns per mussar ch’el apprezieschia la valurusadad da ses servient. El ha alura er anc dà il permiss a Tgetg dad ir a chasa en visita per dus dis, remartgond però che saja l’ultima visita ch’el possia far a ses geniturs, essend ch’els sa mettian en paucs dis en viadi per returnar a Plurs. Tgetg ha alura surdà per quels dus dis la tgira da ses chaval a ses frar Albert ed è partì vers la saira per Sanagn. El ha fatg questa visita a chasa tant pli gugent, pudend questa giada remetter a ses buns geniturs circa 20 rentschs ch’el aveva retschet l’ultim temp sco bunamaun per part da ses bun patrun, per part d’auters signurs, als quals el aveva stuì far inqual servetsch per cumond da ses patrun.

«Buna saira!», ha Tgetg clamà sin l’isch-cuschina a sia buna mamma che steva là per pinar la tschaina a la famiglia; «vus pudais er gist cuschinar per mai, chara mamma; pertge che jau hai il permiss da star dus dis cun vus avant mia partenza per Plurs.» La buna mamma ha respundì: «Tge, ti es gia pront da vulair partir per Plurs? I na fa betg gist tanta prescha da partir; vus pudais anc star ditg avunda a Plurs.» Tgetg è entrà en cuschina ed ha explitgà a sia mamma ch’il patrun veglia absolutamain partir vers chasa gia in dals proxims dis. Il patrun saja uss guarì uschia ch’el possia facilmain far il viadi a chasa; a Lantsch n’haja el naginas fatschentas pli ed el bramia er fitg da revair sia chara famiglia. La buna Gnagna ha vis ch’i na saja qua nagut da far per obtegnair in pli lung segiurn dal char figl en la chasa paterna. A Tgetg ardeva la munaida ch’el purtava cun sai per dar a ses geniturs en sia giaglioffa ed el l’ha mess en il maun da la mamma. Quella n’ha l’emprim mument betg savì tge che quest pachet cuntegnia; ma auzond quel, ha ella prest chapì ch’el cuntegnia munaida d’argient ed ha ditg a ses char figl: «O mes bun Tgetg, tge ma portas ti puspè?» – Il figl ha fatg avrir la mamma il pachet e quella ha chattà en quel sis bels cruschuns glischants. Ella ha piglià tema, vesend che ses figl era en in temp uschè curt vegnì en possess da tanta munaida ed ha contemplà ses figl cun ina trist’egliada. Ma Tgetg ha ditg a la mamma: «N’hajas nagin scrupel d’acceptar questa munaida, jau l’hai acquistà recliamain.» El ha raquintà a la buna mamma minuziusamain co ch’el saja vegnì en possess da quests bels cruschuns.

Mamma e figl èn alura entrads en stiva e Tgetg ha salidà ses fragliuns che sa chattavan en davos maisa, e paucs muments pli tard è arrivà il bab da famiglia en stiva ed ha salidà ses figl. Avend Peder pendì ses vestgì da pavlunz vi d’ina gutta, è l’entira famiglia sa messa a maisa e dunna Gnagna ha purtà da la cuschina la tschaina, ina brava buglia e duas cuppas cun latg, e l’ha mess a mesa maisa. Suenter il benedicite ha la famiglia tschanà cun bun appetit, ma senza far gronds discurs, e pir suenter l’agimus ha alura cumenzà la conversaziun tranter ils geniturs ed uffants. La persuna principala era questa saira il Tgetg, il qual aveva bler da raquintar, spezialmain da ses ultim viadi a Cuira. Tge tema han piglià ils bravs geniturs, cur che lur figl als ha raquintà da ses inscunter cun bandits sin la planira da Lantsch. Ils buns geniturs han avertì lur char figl d’adina esser precaut cur ch’el saja en viadi, surtut cur ch’el haja da passar cuntradas talianas.

Il di sequent è Tgetg ì a Mon a messa ed ha alura anc fatg ina visita a ses padrin, a sia madritscha ed ad intgins parents ed enconuschents. El aveva in presentiment, sco sch’el stuess bandunar per lung temp questa cuntrada. Suenter mezdi è el alura ì a Stierva per dir adia ad in’onda ch’el amava zunt fitg. L’auter di è el ascendì la muntogna ed è ì fin Ziteil. Essend il giuven in frestg pedun, è el arrivà a chasa gia vers mezdi; el vuleva anc restar in pèr uras en cumpagnia da ses chars geniturs e fragliuns; el saveva ch’el stueva anc arrivar quella saira a Lantsch, nua ch’il patrun al spetgava. Questas ultimas uras èn stadas grevas per il bun giuven; el veseva la mamma en larmas, il bab fascheva ina tschera trista e ses chars fragliuns avevan pers lur ilaritad. La finala ha il bab anc stuì ir ad acla; el ha strenschì il maun da ses char figl e bandunà en visibla tristezza la chasa. L’ura da la partenza è arrivada e Tgetg è s’auzà, ha tutgà il maun a ses fragliuns ch’eran preschents ed embratschà alura sia chara mamma cun impetuusitad, sentind ina gronda dolur da stuair bandunar chasa. La mamma era bagnada en larmas ed ha ditg cun vusch interrutta da singluts al char figl: «Navaira, mes char figl, ti ma restar semper sincer e pietus en terras estras! Pensa adina a tes duair e n’emblida betg las admoniziuns che tes geniturs t’han dà. Conserva en emprima lingia ina buna morala e na fa betg chatscha sin bains terresters a donn e cust da tia conscienza! Resta semper brav, mes char Tgetg, e ta regorda da nus!»

Tgetg è la finala sa fatg liber da l’embratschada da la chara mamma ed è sortì da chasa mez mort dal cordoli che questa scena da cumià al aveva fatg. El è ì cun pass rapids enavant, e paucas minutas pli tard era la chasa paterna svanida ord vista. El è arrivà pir da notg a Lantsch ed ha retschet anc quella saira da ses patrun il cumond da sa preparar sin la partenza il di proxim. Il giuven ha fatg anc quella saira si’inspecziun dals affects dal patrun ch’eran da prender a Plurs. Cur ch’el ha gì preparà tut per la partenza, è el anc ì a visitar ses frar Albert en chasa Morin. Ils dus giuvens han discurrì ditg da lur geniturs e fragliuns a Sanagn e fatg plans per l’avegnir. Albert ha externà il giavisch dad er vegnir a servir a Plurs u en in auter lieu en l’Italia; el crajeva che l’exteriur al portia fortuna. Er el era s’instruì fitg bain a Lantsch, avend er el, sco ch’aveva gì ses frar, l’occasiun da frequentar la scola cun ils uffants da ses patruns. Ed el era sa profità da questa bun’occasiun, acquistond tras sia diligenza e perseveranza bellas enconuschientschas en l’art da leger e scriver. El era uss avanzà en questas scienzas da maniera ch’el pudeva sa perfecziunar en quellas er senza l’agid d’in magister. Tgetg al ha animà dad er emprender in pau la lingua taliana, avend el occasiun da discurrer quella cun ses patruns e cun ils uffants da quels. Ma Albert ha mussà immediatamain al frar ch’el sappia questa lingua, discurrind in pau talian cun el. Tgetg ha vis ch’il frar aveva gia in bel fundament en questa lingua ed è er s’accurschì ch’el aveva ina buna pronunzia taliana.

Il di sequent è signur Gometti partì da Lantsch a chaval; ma avend acquistà tants effects novs durant ses segiurn a Lantsch che Tgetg n’als pudeva betg purtar, ha il patrun anc prendì cun sain in chaval da Lantsch ensemen cun il patrun da quel che dueva alura avair quità da l’entira bagascha dal viagiatur. Tgetg ha fatg l’entir viadi a pe, e quai al ha plaschì il meglier, essend el in excellent pedun. En trais dis è questa caravana arrivada saunamain a Plurs, nua ch’ella è vegnida retschavida cun grond plaschair. Ma paucs dis pli tard ha Tgetg stuì accumpagnar ses patrun fin Como, nua che quel ha fatg examinar in renumà medi, sche sia ruptura saja medegiada endretg; pertge che dal chirurg ch’al aveva tractà a Casti ed a Lantsch, n’aveva el betg ina tant gronda fiduzia. Ma per sia consolaziun ha il medi da Como declerà ch’il chirurg haja medegià la ruptura en urden tenor las reglas da la chirurgia. Da quai è il bun signur Gometti sa cuntentà e s’allegrà e returnà da buna veglia a Plurs cun ses servitur Tgetg Caleira.

A Plurs regiva da quel temp ina gronda vivacitad. Il grond gudogn fatg ils dus ultims onns en las minieras a Lantsch aveva dasdà in spiert da speculaziun tranter ils abitants, vulend quels render fritgaivels lur gronds chapitals che surpassavan ils basegns da l’agricultura da lur cuntrada. Divers signurs da Plurs eran en viadi tras la Lumbardia per tschertgar in affar cunvegnent e pudair metter en moviment lur munaida. Er il signur Gometti ch’era forsa il pli ritg citadin da Plurs è vegnì infectà da questa fevra e planisava dad ir a Bergamo a tschertgar ina chaschun da d’acquistar in negozi u affar tenor ses gust. El è però vegnì impedì ils dus emprims onns tras diversas fatschentas d’interprender il viadi projectà. Ma l’onn 1612 ha el prendì curaschi d’exequir ses plan, ed accumpagnà d’in da ses figls e da Tgetg è el partì la primavaira vers Milaun. Fin a Colico era el viagià cun si’atgna charrotscha; là è el s’embartgà per Como. En questa veglia citad n’ha el betg chattà quai ch’el tschertgava; ma quai al è stà tuttina, essend che la citad da Como n’al plascheva betg tant bain. El è ì vinavant suenter in pèr dis ed è arrivà en dus dis a Milaun; ma er en questa citad n’ha el betg chattà in affar ch’al avess plaschì. Avend giudì durant circa duas emnas ils plaschairs da questa citad pompusa, ha el bandunà Milaun ed è viagià a Bergamo. En questa citad ha el chattà suenter paucs dis enconuschents da la Bregaglia ch’avevan qua lur affars da saida flurints ch’han plaschì fitg bain a signur Gometti. El è sa persvas che quests affars rendian bain ed è s’associà cun in negoziant da saida ch’era in Talian, il qual ils enconuschents da signur Gometti tegnevan però in um sincer e galant. Tenor il contract stipulà stueva signur Gometti furnir al negozi in chapital da 80 000 rentschs. Ultra da quai dueva almain in member da la famiglia Gometti abitar a Bergamo e sa participar da la direcziun e surveglianza da l’affar. Il contract dueva entrar en vigur gia il proxim avust e Gometti è s’obligà da gia en in mais remetter al negozi 40 000 rentschs.

Avend fatg quest contract, è signur Gometti immediat sa preparà per returnar en sia patria a far liquidas las summas ch’el aveva da remetter a Bergamo sco soci da l’affar. El ha er destinà dalunga ses fidaivel servient Tgetg Caleira per il negozi ed ordinà che quel duaja gia uss restar a Bergamo fin ch’el ed il figl returnian a Plurs per prender las disposiziuns necessarias per il futur. Tgetg è sa declerà pront da correspunder al giavisch da ses bun patrun ed è oramai restà a Bergamo ch’al plascheva fitg. Immediat suenter la partenza dal patrun è el entrà sco assistent en il negozi dal patrun ed è sa dà tutta stenta d’emprender las bleras chaussas novas cun grond zeli e diligenza. Il Bergamasc, il soci da ses patrun, ha immediat observà che Tgetg era in giuven svelt ed adester ed aveva ses plaschair cun el. Perquai al ha el prendì en chasa sia, na vulend betg che l’excellent giuven vegnia forsa corrut innocentamain en nauschas cumpagnias, sco che quai daventa savens cun giuvens en terras estras, nua che la morala na stat betg adina sin fermas chommas. Tgetg è sa sentì fitg fortunà en chasa da signur Vertugli, sco che sa numnava il soci da ses patrun. Vertugli aveva er ina bella famiglia, dus figls scorts e trais bellas e propras figlias bain educadas. Tgetg chattava pia durant il temp liber adina ina buna ed agreabla recreaziun a chasa e na sortiva betg la saira per ir a tschertgar auters cumpogns. El ha er gì en questa chasa buna chaschun da sa perfecziunar en la lingua taliana; pertge che la famiglia Vertugli na discurriva betg il dialect bergamasc, mabain in talian correct. Er ha Tgetg chattà en questa chasa ina bella e buna biblioteca taliana ch’al steva a sia disposiziun tenor ses plaschair; ed el fascheva er bun diever da quella. El legeva e s’instruiva quasi mintga di, e ses gust per la lectura, cun la quala el era s’occupà pauc a Plurs, è creschì mais per mais. Ils dus figls da signur Vertugli, Giovanni e Pietro, eran circa da la medema vegliadetgna sco Tgetg ed avevan giudì bunas scolas; quests dus excellents giuvens avevan er lur plaschair cun il bel e bun giuven ester e l’assistivan en tuttas chaussas, en las qualas Tgetg aveva basegn d’agid. Cur che Tgetg ha chapiva betg insatge da la lectura, s’adressava el a ses dus amis Vertugli, e quels al decleravan tut ed al instruivan cun grond plaschair. Uschia è Tgetg sa sviluppà bainissim a Bergamo. Er en l’affar è el sa mussà fitg diligent ed adester. L’emprim al ha signur Vertugli fatg enconuschent cun la martganzia e cun tut ils artitgels dal negozi. Avend il giuven ina giada ina bun’idea da questas chaussas, al han ins occupà en biro u ‹lo studio› sco sche schevan ils Bergamascs, e qua ha Tgetg stuì percurrer tut las diversas lavurs d’administraziun. Quai al ha bain dà blera stenta e bler da studegiar, ma el n’ha betg ruassà fin ch’el ha gì superà tut las difficultads, ed en in temp relativamain fitg curt è el daventà in bun contorist a cumplaina satisfacziun dal directur.

Signur Gometti aveva punctualmain remess a l’affar a Bergamo si’emprima quota da 40 000 rentschs tras chasas da commerzi che stevan en correspundenza cun Bergamo. Il mais d’avust è el sez cumparì cun ses figl a Bergamo cun la segunda quota da 40 000 rentschs. Gometti n’aveva betg l’intenziun da star ditg a Bergamo; ma ses figl Cesare dueva restar là e daventar in negoziant. Er il giuven Gometti è sa mussà fitg adester en l’affar ed ha emprendì en curt temp las lavurs ch’ins pretendeva dad el. Vertugli ha exprimì envers il bab Gometti sia cumplaina cuntentientscha cun Tgetg. Suenter in mais è signur Gometti returnà a Plurs plain speranza d’avair fatg ina buna speculaziun s’associond cun signur Vertugli. Ses figl Cesare e Tgetg Caleira èn oramai restads a Bergamo ed han emprendì la perfetgamain las lavurs da negoziants. Suenter in mez onn als pudeva Vertugli confidar scadina lavur e saveva ch’el pudeva sa fidar dals dus giuvens. Il negozi fluriva excellentamain ed ils socis faschevan in fitg bun quint. Avend ils dus giuvens Cesare e Tgetg s’acquistà enconuschientschas da l’entir negozi, als ha signur Vertugli er laschà far viadis per il negozi; els gievan per la Lumbardia enturn cumprond ils cocons da saida dals divers purs che s’occupavan da la cultura da saida. En questa maniera han els prest emprendì a conuscher la terra ed ils abitants da quella. Spezialmain Tgetg sa deva gronda fadia da studegiar endretg tut ils avantatgs da ses commerzi e da vegnir enconuschent cun tut la glieud. El ha chapì fitg bain che ses patrun e signur Vertugli stoppian far grondiusas fatschentas. Sin ses viadis ha el er anc emprendì a conuscher auters affars en questa terra fritgaivla, ed el fascheva er gia plans da sez fundar in u l’auter affar per pudair lavurar ad agen quint, realisond el fitg bain ch’el na possia mai arrivar a bainstanza en qualitad d’in impiegà. Dentant era la fundaziun d’in affar colliada cun grondas difficultads. El n’era betg en possess da blers daners, perquai ch’el remetteva sia paja quasi adina a ses buns geniturs ch’avevan basegn da ses sustegn. Ma ina chaussa era el fermamain intenziunà da far, numnadamain dad er procurar ina plazza a ses frar Albert en l’Italia. Dapi ch’el era vegnì a Bergamo, aveva signur Gometti prendì Albert a Plurs, nua ch’el steva fitg bain e gugent. Tgetg aveva animà ses frar da sa profitar da la scola ch’el aveva gì chaschun da frequentar a Lantsch cun ils uffants dal patrun Morin. Ed Albert ha obedì gugent al cussegl da ses char frar; el aveva plaschair da s’instruir ed ha impundì tutta diligenza per s’acquistar las enconuschientschas ed abilitads ch’èn necessarias per la vita. Er a Plurs ha el cuntinuà da s’instruir, avend qua anc meglra chaschun da sa perfecziunar en las scienzas da scola. Tgetg scriveva bainduras ina brev ad Albert, ed en tut quellas brevs al animava el da cuntinuar en il studi. Ed Albert ch’aveva er fitg buns talents fascheva tut ses pussaivel per cuntentar ses char frar. El respundeva a Tgetg e quest ultim sa persvadeva tras las brevs dal frar che sias incitaziuns na sajan betg stadas invanas.

Cur che signur Gometti è vegnì l’onn proxim en visita a Bergamo, ha Tgetg prendì curaschi e supplitgà ses patrun dad er laschar vegnir ses frar Albert a Bergamo per emprender en il negozi. Signur Gometti al ha respundì: «Jau perd navidas tes frar Albert, essend quel in giuven stupent, dal qual ins po sa fidar en tuttas chaussas. Ma per ta far in plaschair, vi jau trametter Albert a Bergamo uschespert che jau hai chattà in auter servient per mia chasa che ma plascha e cunvegna. Jau sai bain ch’ins po duvrar Albert per insatge meglier che mo sco servient da chasa; el ha talent, è spert ed adester e sa er scriver e leger bain per in giuven ch’ha fatg be uschè paucas scolas. Jau vi er discurrer cun il signur Vertugli ch’el duaja impiegar tes frar en noss affar, ed jau sun persvas ch’el fa quai fitg gugent, enconuschent tai sco giuven da vaglia.»

Tgetg è sa cuntentà cun la resposta retschavida, savend che ses patrun era in um che tegneva pled. E pelvaira, in quart onn pli tard è Albert cumparì nunspetgadamain a Bergamo per grond plaschair da ses bun frar Tgetg. El ha purtà cun sai ina recumandaziun da ses signur patrun Gometti a signur Vertugli, e quest ultim ha impiegà il giuven cun plaschair, avend gist basegn da novas forzas en l’affar. Quai che Tgetg aveva desiderà uschè vivamain era uss s’accumplì; el aveva ses char frar Albert sper sai a Bergamo, ed el era uss plain speranza da cun il temp forsa vegnir patrun d’in agen affar cun agid dal frar. Albert è sa mussà fitg adester e diligent en l’affar, uschia ch’el è stà abel entaifer in onn da far tge lavur ch’i saja tant en il negozi sco er en il biro. Tgetg al aveva instruì cun la pli gronda premura en tut ils roms dal negozi, ed Albert aveva er plaschair e zeli d’emprender tut sias lavurs en urden. Er el è vegnì retschet en la famiglia Vertugli sco in figl da la chasa ed era fitg cuntent cun il tractament en questa chasa.

Entant ch’ils dus frars Caleira prosperavan e flurivan, fascheva Cesare Gometti ina trista figura. Ils dus emprims onns da ses segiurn a Bergamo era el stà in cumpogn fidaivel da Tgetg e dals dus figls da la chasa, Giovanni e Pietro. Quests quatter giuvens e las trais figlias da la chasa, stupentas figlias bain educadas, furmavan ina bella societad da dis libers, da festas e dumengias. Tuttenina ha Cesare però cumenzà a bandunar pli savens la chasa la saira ed a frequentar autras societads. El è alura daventà plaun a plaun bler pli indifferent en la lavur, era savens distract e fascheva bainduras tut il cuntrari da quai ch’el aveva da far. Tgetg ha observà quai ed al ha admonì cun tutta discreziun, ma senza success; anzi è Cesare sa mussà plitost indignà ch’in impiegà da ses bab prendia la libertad d’al vulair curreger ed admonir. El ha evità tant sco pussaivel la cumpagnia da Tgetg ed è ì sias atgnas vias. A Tgetg displascheva quest sa cuntegnair da Cesare, ed el è sa sentì obligà da dar part al bab Gometti che ses figl Cesare saja sa midà totalmain. El ha la finala scrit ina brev a signur Gometti, en la quala el ha descrit il sa cuntegnair da ses figl; el al ha er relatà che quest midament da Cesare stettia probablamain en connex cun las cumpagnias e societads las qualas el frequentia savens. Il bab Gometti è arrivà in mais pli tard a Bergamo, chapind fitg bain ch’el na vegnia betg ad esser en cas da curreger ses figl mo tras brevs. El ha tschiffà team, vesend la figura che fascheva ses figl ch’era stà uschè flurint, cur ch’el aveva bandunà la chasa paterna. El al ha immediat prendì en examen per cumenzar la cura cun el; ma Cesare è sa cuntegnì uschè indifferent envers las admoniziuns dal bab che quest ultim ha prendì la resoluziun da prender a Plurs il giuven per en questa maniera al allontanar dals privels ch’al smanatschavan. Be navidas ha Cesare accumpagnà ses bab a Plurs, nua ch’el dueva far penetienza per ils excess commess a Bergamo. Cun Tgetg e ses frar Albert è signur Gometti sa mussà fitg cuntent, avend ses soci Vertugli dà a quels in fitg bun attestat, tant per lur conduita exemplarica, sco er en rapport a lur diligenza e capacitad en il negozi.

Ils dus frars Caleira èn stads fitg leds che lur cumpogn Cesare è vegnì repatrià; els avevan gì be displaschairs cun quel l’ultim temp; gea els sa turpegiavan da lur giuven patrun da Plurs, perquai ch’el na sa depurtava betg pli sco in giuven decent gnanc en chasa dal signur Vertugli. El aveva fatg divers affrunts envers las signurinas Vertugli, da maniera che quellas al evitavan cur che quai las era pussaivel. Tant pli grond respect avevan ellas però per Tgetg ed Albert, ils quals mussavan sper lur lavurusadad, capacitad e diligenza ina conduita exemplarica. Ils dus frars Caleira eran dus giuvens sco ch’ins vesa darar tals a Bergamo, ils quals n’èn però betg daventads superbis pervi da lur preferenzas, mabain eran ed èn adina restads modests e gentils. Quai plascheva a l’entira famiglia Vertugli, spezialmain er a las figlias che n’eran betg indifferentas per ils excellents giuvens. Las relaziuns per ils Caleiras eran oramai fitg agreablas en chasa Vertugli, ed els èn er adina sa mussads degns da l’affecziun ch’ins als demussava en questa bella famiglia.

IV.

Tras l’agid dals dus figls a Bergamo era la famiglia Caleira a Sanagn er daventada in pau pli pussanta. La munaida ch’ils figls avevan tramess a lur chars geniturs, n’avevan quests ultims betg sfarlattà, mabain applitgà per cumprar funs. A Mon era morta ina vaiva ch’era stada oriunda da la Surselva, ed ils parents da quella avevan vendì tut ils bains giaschents da l’onda. Peder Caleira era da quel temp en possess d’ina discreta summetta e l’ha applitgà per la cumpra da quest funs venal. El aveva cun questa chaschun cumprà intgins prads e dus ers ed ina pitschna acla giaschenta sin il territori da Stierva. L’augmentaziun da sia champagna ha fatg necessari d’er engrondir il muvel; ma avend applitgà tut la munaida per l’acquist dals bains, mancava la munaida a Peder Caleira, e na vulend el betg far debits ha el stuì spetgar fin che ses figls tramettian ina nova summa da daners. Peder aveva uss lavur pli che avunda cun si’economia, n’essend sia famiglia betg pli uschè gronda. Ses terz figl creschì cun num Paul e la figlia Mengia ch’era la veglia da sias figlias sa chattavan a Lantsch en servetsch; il quart figl e las duas figlias pli giuvnas eran bain anc a chasa; ma quests trais uffants eran anc d’ina vegliadetgna tant tenera ch’els na pudevan betg substituir ils geniturs en tut las lavurs. Els gidavan però lur geniturs nua ch’els savevan e pudevan per als levgiar lur stentusa vita. Paul e Mengia servivan tuts dus a Lantsch en chasa dal signur Morin e gudagnavan er in pau munaida. Avend quests dus fragliuns udì da la cumpra che lur bab aveva fatg, han els chapì fitg bain ch’il bab haja basegn da munaida per cumprar muaglia, e retschavend els in tempet pli tard lur pajaglias, èn els sa cussegliads d’immediatamain purtar lur munaida als geniturs. Paul ha engrondì questa summetta, unind cun quella tut la munaida ch’el aveva retschet ina giada u l’auter sco bunamaun. En questa maniera avevan ils dus fragliuns purtà ensemen la summa da 24 rentschs, la quala Paul ha purtà ina saira a Sanagn a ses chars geniturs. Peder e Gnagna han engrazià a lur buns uffants per quest bel sustegn, e Peder ha ditg a ses figl Paul: «Tut quai che vus spargnais e remettais a voss geniturs, vegnis vus a chattar in di en furma d’in fond ch’as vegn ad esser util per voss avegnir.»

Cun questa summetta ha Peder pudì cumprar ina vatga ed ina sterla e cumplettà uschia ses muvel per dus chaus. Sinaquai ha el augmentà onn per onn il dumber da ses muvel e suenter paucs onns possedeva Peder Caleira otg bellas vatgas, intginas trimas, blera sterlamenta, chauras e nursas. El era, sco ch’ins di, in um fatg ed ha er cumenzà ad avair inqual influenza tar ses convischins. La primavaira proxima han ins vulì metter Peter en il magistrat; ma Peder n’ha acceptà nagins uffizis; el saveva bain avunda che questa favur valeva dapli a ses muvel che a sia persuna. El aveva sez vis ed anc dapli udì co ch’ins metta en bleras vischnancas ed en divers circuls sin il tron l’ignoranza, perquai ch’ella è ritga, ed ignorescha savens la prudientscha e las abilitads, perquai che quellas han in nausch chapè.

L’onn 1618 era arrivà e dueva purtar divers eveniments da sgarschur. En diversas cuntradas è danovamain sa mussada la pesta cun in fitg nausch caracter; tgi che la pigliava era pers; ma per fortuna n’è ella betg sa derasada fitg. Er en intginas valladas grischunas era ella sa mussada, ma pareva dad esser be sporadica. Dentant era il pievel dapertut en gronda tema ed implorava da Dieu misericordia cun urar e far bunas ovras. Da quel temp passavan er da tuttas sorts vagants tras nossas valladas e vischnancas, parlers, mulets, zagrenders ed autra glieud. Questa schenta aveva spezialmain er per disa da frequentar chasas isoladas e pitschens aclauns, nua ch’ins temeva fitg talas bandas. Tut questa razza vaganta viveva a donn e cust da la terra, u cun rugar l’almosna u cun engular ed engianar ils purs. Da la Tumleastga è ina tala banda da vagants passada il Crap s. Gian e Mut ed è arrivada ina saira fin Sanagn ed ha champà là en las ruinas da duas chasas arsas. Peder Caleira n’ha betg gì grond plaschair da quests nauschs giasts ed è sa resolvì da star alerta per che la banda n’al engolia betg insatge u chaschunia forsa inqual donn a ses edifizis. La banda consistiva dad umens e dunnas e dad uffants quasi dal tut nivs. Intgins da quests bandits eran er vegnids en il serrar notg en chasa da Peder a rugar per diversas chaussas. Peder als ha dà ina bella almosna per sa deliberar da quests schanis che faschevan tscheras fitg suspectusas. Apaina che questa schenta è stada sortida da sia chasa, ha el fermà l’isch-chasa ed è ì en sia stalla per guardar, sche quella brajada haja forsa l’intenziun da pernottar en ses clavà. Essend arrivada la notg ch’era fitg stgira han ils vagants fatg in fieu e cumenzà a sunar e sautar tranter pèr da tala maniera ch’ins avess pudì crair ch’i saja questa notg barlot a Sanagn. Daspera banchettavan e mangiavan e bavevan ils vagants sco sch’els avessan da celebrar ina perdunanza.

Essend Peter returnà da la stalla en chasa, n’è el betg sa svestgì per ir a letg, mabain ha veglià en sia stiva sper ina fanestra, da la quala el pudeva vesair ils gieus da la banda. La festivitad dals bandita ha durà fin la damaun cur ch’il di ha cumenzà a spluntar. La finala han ils vagants fatg in nov fieu sper ina chaglia e Peder na saveva betg declerar, tge che quests schanis hajan l’intenziun da far; ma el ha prest pudì cuntentar sias mirveglias. Duas dunnas èn s’avischinadas al fieu, l’ina cun ina gronda padella, l’autra cun ina gronda cuppa emplenida cun pasta. La padella è vegnida messa sur il fieu sin in fier-chazzetta e cuntegneva in grond toc grass; apaina ch’il grass è stà chaud e liquid, ha l’autra dunna mess la pasta rara en la padella per cuschinar in tatsch. Dus umens han alura piglià las chaglias sturschiblas sper il fieu e las han tegnì en la pasta da la padella, truschond anc cun quellas la pasta. Suenter in’urella han els laschà liber las chaglias e quellas èn, pervi da lur elasticitad, siglidas ad aut cun il tatsch vi da lur frastgas. Uss hai dà ina risada frenetica tranter ils vagants ed els siglivan, sautavan e ballavan enturn la chaglia sco sch’els fissan or da senn. Ma immediat han els alura fatg lur fagot e bandunà il lieu da lur sulaz, chaminond e givlond e chantond vers Mon.

Essend la banda in brav toc davent da Sanagn, è Peder Caleira ì tar la chaglia per vesair meglier, tge spergaments che quests bandits hajan fatg enturn quella. El ha vis a pender qua in bel e grass tatsch vi da las frastgas e la figlia da la chaglia ed ha er chapì fitg bain che quella banda haja cun quest excess vulì far beffas cun purs, dals quals els avevan rugà u engulà la materia da far quest gieu impertinent. Raquintond alura d’ensolver a sia famiglia tge che saja succedì questa notg a Sanagn e tge diever che quests vagants hajan fatg da las almosnas retschavidas d’umans benefizients, na vuleva dunna Gnagna betg crair ch’i existian talas bestias tranter ils umans; ma Peder l’ha manà ensemen cun ses uffants tar la chaglia, e Gnagna ha vis che ses um n’aveva betg raquintà mo fantasias. Ella ha alura tramess ina da las figlias en sia cuschina per ina sadella ed ha fatg metter la pastrigliada en quella per paschentar cun quella ses glimaris da chasa.

Cur che Peder Caleira ha raquintà la dumengia proxima a Mon da quests excess dals vagants, n’al vulev’ins l’emprim betg crair; ma in um vegl da Mon ha ditg ch’i sajan gia avant blers onns succedids sumegliants excess da vart da questas bandas da vagants, e ch’ils purs d’ina vischnanca hajan ina giada piglià ina tala banda e bastunà umens e dunnas tenor merit per avair fatg ina tala scroccaria. Curt temp pli tard è sa derasada la fama ch’i saja arsa ina chasa a Murmarera e che quest incendi saja probablamain vegnì chaschunà tras excess d’ina banda da vagants ch’avevan champà là ina notg e fatg da tuttas sorts extravaganzas.

Las lavurs champestras gievan quel onn be plaunsieu vinavant; l’aura era cuntinuadamain umida e favuraivla per la creschientscha dals fritgs dal funs, ma per fanar e racoltar era ella nauschissima, e perquai na vegnivan ins mai a la fin cun las lavurs champestras. Quest onn aveva Peder Caleira pudì ir pir ils 20 d’avust en si’acla a fanar, oramai circa diesch dis pli tard che auters onns. El aveva bandunà Sanagn ed era ì cun si’entira famiglia sin la muntogna, sco ch’el aveva per disa da far quai mintg’onn. Gia ils 25 d’avust è cumparì in din in bel signur giuven a Sanagn. El è s’avischinà cun cor battent a la chasa da Peder, e chattond quella serrada, ha el spluntà, sperond ch’insatgi al avria. Ma tut spluntar è stà invan; il signur è ì en la stalla vischina per guardar sch’el chattia là insatgi da la famiglia; ma er la stalla era vida. Quest signur però n’era nagin auter che Tgetg Caleira, il figl da Peder. Igl al ha displaschì fitg da betg chattar ses geniturs e fragliuns a chasa; ma suenter avair reflectà in mument, al è vegnì endament che ses geniturs sajan forsa anc occupads cun fanar si d’acla. El è oramai sa resolvì d’ascender la muntogna per ir a tschertgar ils geniturs, ed el è sa mess immediat sin via. Enconuschent el anc mintga trutg che manava en las aclas, è el arrivà en circa 40 minutas tar l’acla da ses bab. El ha observà gia en intgina distanza diversas persunas che raschlavan il fain e faschevan runas e panuglias. El è s’avischina adascusamain a la saiv da l’acla ed è anc sa zuppà in mument davos ina chaglia per spiunar tgi che lavuria en l’acla; el ha immediat enconuschì il bab ed il frar; ma sias duas soras ch’eran stadas be pitschnas avant otg onns cur ch’el aveva bandunà la chasa paterna, n’enconuscheva el betg pli. La mamma n’ha el betg observà en l’acla ed el ha supponì che lezza saja probablamain en tegia per preparar ina marenda als fanaders. El è sa retira in pèr pass ed è ì per il trutg che manava da l’autra vart da la tegia senza vegnir observà dals lavurants en l’acla. Arrivà en la tegia da vart sura, ha el sentì in pitschen fracass en tegia. El è s’avischinà tut adascusamain a l’isch da la tegia ed al ha avert, ma na chattà nagin en tegia; ma l’isch dal tschaler era avert. El è entrà en tegia. En quest mument è dunna Gnagna cumparida a la porta dal tschaler ed è stada surstada da vesair en tegia in signur ester. Ma Tgetg n’ha betg gì il cor da giugar la rolla d’in ester cun sia chara mamma, ed el ha clamà: «Mamma, mia chara mamma! Na m’enconuschais betg pli?» Nus na vulain betg descriver questa scena commoventa dal revair tranter la mamma ed il figl. A la mamma currivan las larmas d’allegria ed il figl tegneva embratschada la chara mamma sco sch’el temess da la perder, sch’el la laschass libra.

Passada l’emprima emoziun, ha la mamma dumandà Tgetg, sch’el haja gia salidà il bab ed ils fragliuns en l’acla, e schend Tgetg ch’el haja l’emprim vulì salidar sia mamma e saja s’avischinà adascusamain a la tegia senza vegnir observà dals fanaders, ha la mamma ditg ch’ella clomia uss il bab ed ils uffants a marenda. La mamma ha alura immediat avert l’isch da la tegia e clamà a sia famiglia: «Ve, Peder, e vegni vus chars uffants a marenda, la quala vegn segir a plaschair oz extra bain!» Ils lavurants han pusà lur rastels e furtgas cunter las runas ed han immediat obedì a l’invit da la mamma. L’emprim èn entradas las duas mattettas en tegia e suenter ellas il figl. Quests trais fragliuns han fatg egls gross, vesend in signur ester en tegia sper la mamma; ma quella als ha ditg: «Vus n’enconuschais, sco ch’i para, betg quest giuven e tuttina è el voss parent. Engiavinai tgi ch’el è!» Il mat e las duas mattettas han contemplà cun grond’attenziun il giast ester, ma n’al han betg enconuschì. Alura als ha Tgetg ditg: «Vegni, jau sun voss frar, voss Tgetg ch’è stà uschè ditg absent en terras estras!» El ha sinaquai embratschà ses fragliuns ed als ha charsina cun la tenerezza d’in vair frar. En quest mument è alura er Peder entrà en tegia ed ha observà questa scena da beneventaziun. El ha immediat enconuschì ses bun figl ed al ha beneventà cordialmain. Tgetg ha alura stuì sa participar da la marenda, quai ch’el ha fatg fitg gugent, essend ch’el aveva quel di anc mangià quasi nagut. O co ch’al ha gustà il latg buglì che la buna mamma ha servì a la famiglia!

Suenter la marenda ha Tgetg declerà a ses geniturs ch’el stoppia returnar questa saira a Casti, essend ch’el haja laschà là ses fagot. Ils geniturs han ditg ch’els sperian da finir l’auter di cun il fanar e possian returnar la saira a Sanagn. Tgetg ha declerà ch’el veglia restar questa notg a Casti e far alura damaun ina visita a signur Morin, ses emprim patrun a Lantsch ed a ses fragliuns Paul e Mengia; la saira veglia el alura returnar a Sanagn. El ha uss dà cumià als geniturs e fragliuns, vulend anc arrivar da di a Casti. L’autra damaun suenter ensolver è el oramai ì a Lantsch. Ses vegl patrun e sia famiglia sco er il frar Paul e la sora Mengia n’han a l’entschatta betg enconuschì lur giast, e Tgetg ha sez stuì sa preschentar a l’entira famiglia. Tuts han gì in grond plaschair da questa visita e Tgetg è vegnì retschet en chasa Morin sco in member da famiglia; el ha purtà a signur Morin blers salids da Clavenna e da Plurs e la legraivla nova che signur Gometti da Plurs haja l’intenziun da far il proxim atun a Lantsch ina visita. Tgetg ha alura er stuì raquintar da Bergamo e spezialmain da l’affar da saida, en il qual el era activ. Tut questas novas han interessà zunt fitg signur Morin. Er el ha raquintà a Tgetg da las fatschentas da las minieras al Piz Cotschen, e co che la societad fetschia quest onn buns affars, essend che las minieras sajan quest onn pli redaivlas che mai. Morin ha alura envidà Tgetg da vulair vegnir suenter mezdi cun el tar las minieras; ma Tgetg è sa stgisà schend ch’el haja empermess a ses geniturs da vegnir questa saira a Sanagn. Signur Morin è sa mussà fitg malcuntent che Tgetg veglia bandunar gia oz Lantsch ed al ha supplitgà instantamain da returnar in auter di a Lantsch per ina visita pli lunga. Tgetg ha empermess quai, e suenter avair passentà in agreabel di a Lantsch cun la famiglia Morin e ses fragliuns è el returnà a Casti per anc quella saira ir a Sanagn.

Cur che Tgetg è arrivà quella saira a chasa, ha el chattà ils geniturs e fragliuns a chasa, avend quels uss finì da fanar lur acla. La valisch ch’el purtava cun sai pareva dad esser fitg pesanta. E pelvaira cuntegneva quella bleras ed impurtantas chaussas. A la chara mamma ha el mess en il scussal ina bella bursa emplenida cun munaidas d’aur, schend: «Quai è per vus, chars geniturs, ed jau sper che vus possias applitgar bain questa munaida en voss’economia. Albert ed jau l’avain spargnà per pudair sustegnair noss chars geniturs, als quals nus avain d’engraziar tant dal bun. Sche noss affar a Bergamo prosperescha vinavant sco fin uss, alura sperain nus da mintg’onn pudair as remetter ina bella summetta, essend che nus essan salarisads bain en nossas plazzas; nus sperain schizunt da cun il temp forsa pudair fundar in agen affar cun noss gudogn e cun sustegn da buns amis.» Cun larmas en ils egls han bab e mamma engrazià a lur bun figl per il bun agid ch’el als aveva gia purtà avant e per il bel regal ch’els aveva fatg oz; ma Tgetg als ha ditg ch’el ed il frar Albert n’hajan betg fatg auter che lur duair cun remetter a lur buns geniturs ils fritgs da lur lavur. E sa vulvend vers ses fragliuns pli pitschens ch’eran preschents a questa bella scena, ha el ditg ch’el speria ch’er els vegnian in di, cur che lur forzas sajan creschidas, ad empruvar da sustegnair ils chars geniturs e da preparar a quels ina bella saira da lur dis. El ha alura prendì da la valisch per scadin da ses fragliuns in regal ch’als ha fatg gronda allegrezza.

Quant divers è savens il cumportament da la giuventetgna dal temp preschent da quel dals frars Caleira. Quants giuvens e quantas giuvnas applitgeschan ozendi lur gudogn da grevas uras be per divertiments mundans e per s’ornar cun tailas estras da pauca valur. Ils giuvens curran per las ustarias, sa participeschan a tramagls luxurius senza pensar a lur geniturs che ston savens patir da la miseria! E co daventan nossas figlias savens damas! Han ellas acquistà intgina munaida, applitgeschan ellas tut per sa vestgir a la moda, entant che lur geniturs èn savens vestgids en sdratscha. Cun questa vanitad da sa vestgir a la gronda s’unescha alura anc savens l’aversiun vers la lavur, ed ellas daventan estras en las lavurs fin uss usitadas en l’economia e ch’eran l’ornament da las mammas. Sch’ina tala demananza vegn pli generalmain en moda tar la posteritad, alura vegni a dar cun il temp ina curiusa generaziun en nossas muntognas. Il mund modern cun sia legiun da vizis ch’èn semtgads da tschiffar la giuventetgna fa absolutamain necessaria als uffants ina buna educaziun morala sper ina disciplina rigurusa. Il stadi e las vischnancas han er in grond interess che la simplicitad regia en nossas valladas e ch’i vegnia mess terms a la sfranadadad che chatta uschia facilmain ses discipels en tuttas classas da la societad umana.

Tgetg Caleira ha sustegnì ils proxims dis ses geniturs en las lavurs champestras sco sch’el na fiss mai stà en terras estras, ed el saveva anc tut las manipulaziuns cun ils utensils da champagna uschè bain sco mintga famegl. Ils geniturs n’al vulevan betg laschar lavurar, essend ch’el na saja betg pli disà a talas lavurs, ma il bun figl n’ha betg sa laschà starmentar da sa stanclentar cun questas lavurs; pertge ch’el n’appartegneva betg a quella classa da giuvens che guardan, cun la cigara en bucca, co che lur povers geniturs ston sa stentar per che lur figls ozius possian far ils signurs.

Ils purs da Mon e Stierva che vesevan co che Tgetg sa stentava da gidar ses geniturs avevan in grond respect da l’excellent giuven. La dumengia proxima ha el frequentà il servetsch divin a Mon ed er fatg il suentermezdi ina visita a Stierva. Tut che sa smirvegliava da la grondiusa cumparsa dal bel e brav giuven; ins saveva er che Tgetg aveva gia tramess blera munaida a ses geniturs e che quels avevan d’engraziar a lur bun figl lur bainstanza preschenta, e quai ha anc engrondì il respect per il giuven. Ils cumpogns da Tgetg a Mon e Stierva han medemamain fatg egliuns, vesend quel en in uschè bun stadi e vestgì uschè proper sco in signur da la chapitala, ed er na mancavan las mattas betg ch’avessan gì lur egl per in tal spus; ma Tgetg è bain sa mussà gentil vers tut quels ch’al beneventavan, senza però mussar l’inclinaziun da vulair far enconuschientschas pli intimas.

L’auter di ha Tgetg communitgà a ses geniturs ch’el veglia ir oz a Lantsch e ch’el restia probablamain per trais fin quatter dis, essend vegnì envidà da signur Morin dad er passentar intgins dis a Lantsch en sia cumpagnia. El ha prendì quella giada ina pli lunga via per ir a Lantsch, el è numnadamain ì l’emprim a Vaz per far ina cumissiun als geniturs d’in cumpatriot che sa chattava er a Bergamo en plazza. Ils geniturs da quel abitavan a Madulain, ed el als ha chattà fortunadamain a chasa. El ha fatg conscienziusamain sia cumissiun e remess als dus paupers vegls in pitschen pachet cun munaida ch’il figl a Bergamo aveva tramess cun Tgetg. Ils buns vegls vulevan servir a Tgetg da tuttas sorts chaussas per mussar lur engraziaivladad e lur plaschair da sia visita; ma Tgetg n’ha betg acceptà auter ch’in pau latg, n’avend betg da basegn da mangiar. El ha alura communitgà als vegls ch’el returnia prest a Bergamo e ch’el saja pront d’exequir in’eventuala cumissiun a lur figl, sch’els al veglian dar ina tala. Alura è il bab da chasa sa mess a raquintar tut questas chaussas che Tgetg duaja relatar a ses figl; e cur ch’il bab fascheva ina pausa, chattava la mamma immediat in nov chavazzin per cuntinuar il discurs. Passa in’ura aveva Tgetg stuì tadlar il discurs dals vegls ed i vuleva ina buna memoria per tegnair endament tut quai che quests geniturs vulevan far communitgar a lur figl. Avend la finala finì questa fatschenta, è Tgetg partì per Lantsch, nua ch’el è anc arrivà ad uras per pudair gentar cun signur Morin e sia famiglia.

Ils proxims dis ha Tgetg fatg cun signur Morin e ses frar Paul diversas excursiuns en la cuntrada; els han visità Parpan ed in pèr giadas las minieras al Piz Cotschen. Ils dis èn passads fitg agreablamain al giuven, ma per ses displaschair gievan ils dis da ses congedi uss prest a la fin ed el discurriva gia cun l’inspectur Morin da sia partenza. Nunspetgadamain è arrivada ina saira ina sgarschaivla nova a Lantsch, numnadamain la fama che Plurs saja destruì totalmain d’ina bova. En chasa Morin tut ch’ha piglià gronda tema da quella nova; ma ins na vuleva betg crair questa chaussa, e signur Morin, passada l’emprima impressiun da questa fama, ha declerà che quai saja be ina tschantscha da buccas bletschas, el na savessi betg danunder ch’avess duì vegnir ina tala bova per pudair cuvrir questa gronda communitad. Ma dus dis pli tard ha el retschet d’in parent a Clavenna ina brev, la quala al ha fatg enconuschent cun la terribla disgrazia. Quest parent al ha scrit:

«Char cusrin! La citadina da Plurs n’exista betg pli. Ina sgarschaivla e spaventusa catastrofa è succedida en la vischinanza da Clavenna, in eveniment che fa tema ed orrur en l’entira regiun. Nus avain gì en nossa vallada l’ultim temp in’aura fitg bletscha. Dals 25 fin ils 30 d’avust hai pluvì cuntinuadamain; quel di è l’aura alura sa serenada ed ins aveva speranza ch’i vegnia uss in’aura favuraivla; ma gia lezza notg è la burasca returnada pir che mai ed ha durà fin la damaun dals 3 da settember. Mardi ils 4 da settember era in bel di serain. Il suentermezdi però han cumenzà a rudlar dal munt Conti en in lieu, nua ch’ins aveva avant temp chavà plattas da pignas, crappa e glera ch’han fatg grond donn a las vignas che giaschan da vart da Clavenna. Ma ils abitants da Plurs n’han betg fatg attenziun da quai, perquai che quest lieu è in toc sut Plurs, ed er perquai che talas bovas vegnivan qua savens. Dentant han intgins purs da Roncaglia avertì ils abitants da Plurs da bandunar lur citadina, essend ch’i saja da prevesair ina disgrazia. Dal temp cur ch’igl ha tutgà la saira d’Ave Maria, eran ils catolics sa radunads en la baselgia da s. Cassian a l’uraziun, e circa 40 persunas refurmada ch’abitavan er a Plurs eran er radunadas en ina chasa cun il medem intent. Il tschiel era serain e sclerì magnific da la mesaglina, e nagin na presumava insatge dal mal; ma tut andetgamain è sa precipità il munt Conti en in mument cun terribla forza ed in sgarschaivel sfratg en la vallada. Questa terribla sfratgada ed il tunar avain nus udì a Clavenna ed igl ha tunà sumegliant a l’explosiun da blers chanuns. Schilano ch’aveva 78 chasas e la citadina da Plurs cun 125 chasas e 930 persunas èn totalmain cuverts da la starmentusa bova. La forza da la bova era stada uschè gronda che la tur da la baselgia da Sancta Maria, en la quala ils refurmads tegnevan lur servetsch divin, è vegnida bittada dal vent a la riva dretga dal flum. Da quest curt rapport pos ti cumprender quant terribla ch’è stada questa catastrofa. Jau n’hai betg vulì mancar da ta dar rapport uschè spert sco pussaivel da questa terribla disgrazia, savend che blers signurs da Plurs èn socis da las minieras a Lantsch che stattan sut tia direcziun. Jau suppon che quest eveniment vegnia bain a far necessaria tia preschientscha en nossa vallada, e cun la speranza da prest ta revair, rest jau cun salid, tes cusrin Giovanni Ramello.»

Signur Morin ha piglià ina gronda tema, legend questa brev da ses cusrin. Suenter avair reflectà in di entir, tge consequenzas che questa disgrazia pudess avair per las minieras al Piz Cotschen, essend la gronda part dals socis da Plurs, è el sa resolvì da far in viadi a Clavenna per s’infurmar meglier da questa chaussa. El ha communitgà a Tgetg Caleira in cuntegn da la trista brev retschavida ed al ha envidà da far cun el quest viadi per er pudair s’infurmar da la sort da ses patrun Gometti. Tgetg è immediat sa mussà pront d’accumpagnar signur Morin e quai tant pli che ses congedi era quasi finì. Els èn sa cunvegnids da partir en trais dis e da s’entupar lezza damaun a bun’ura a Casti. Tgetg ha prendì cumià da la famiglia Morin e da ses fragliuns ed è ì cun pass rapids a Sanagn. Arrivond a chasa, ha el raquintà a ses geniturs da la terribla catastrofa da Plurs e communitgà als ses ch’el stoppia partir puschmaun da chasa. Quai ha attristà zunt fitg la famiglia; ma la chaussa n’era betg da midar ed els han stuì sa remetter a la voluntad da Dieu. La damaun marvegl dal terz di ha Tgetg prendì cumià da ses geniturs e fragliuns ed è ì a Casti per spetgar signur Morin; quel è arrivà là prest suenter il giuven ed els han immediat cuntinuà lur viadi a pe, e vulend els pernottar quella saira a Casaccia, han els stuì festinar per arrivar anc a temp en quest lieu. Per Tgetg n’era quai nagin strapaz, ma signur Morin ch’era in pau vegl e latiers anc pesant n’era in tal viadi nagina bagatella. Dentant èn ils dus viagiaturs arrivads fortunadamain al lieu nua ch’els vulevan pernottar.

Arrivond l’auter di en la vischinanza dal lieu, nua che steva la bella citadina da Plurs, han els piglià ina gronda tema, vesend la terribla devastaziun che quella bova aveva fatg. Plurs era svanì. Sin la bova sa chattavan umens e lavurants che chavavan en la ruina, u per tschertgar tresors u per forsa anc pudair liberar inqual abitant sutterrà. Avend contemplà in’urella quest lieu da la disgrazia e na vesend qua tranter quests umens che lavuravan nagins enconuschents per pudair s’infurmar da las persunas ch’hajan forsa pudì sa salvar, han els cuntinuà lur viadi ed èn arrivads avant la notg a Clavenna. Signur Morin è ì directamain tar ses parents, e Tgetg ha prendì albiert en l’emprima ustaria da la citad. Dapertut discurriva la glieud be da la disgrazia da Plurs e la consternaziun dals abitants da Clavenna era generala. Blers citadins da Clavenna avevan parents a Plurs ch’avevan pers lur vita; percunter eran intgins abitants da Plurs stads quel di absents da chasa ed eran en questa maniera mitschads cun la vita. Tgetg ch’enconuscheva tut ils abitants da Plurs ha chattà anc quella saira in um da Plurs ch’era stà absent da chasa il di da la disgrazia. El al ha dumandà sch’el n’enconuschia betg la sort da la famiglia dal signur Fabian Gometti. L’um al ha relatà che l’entira famiglia Gometti saja sepulida sut la bova, cun excepziun da la figlia Adelina che sa chattava il di da la disgrazia en visita tar in’amia a Clavenna. Ed ella duaja anc sa chattar qua, ma mez morta da l’afflicziun e dal cordoli sur la perdita da ses geniturs, fragliuns, parents ed enconuschents. Savend quest um da Plurs er dir en tge chasa che sa chattia Adelina qua a Clavenna, è Tgetg sa resolvì da la visitar l’auter di.

L’autra damaun suenter ensolver è Tgetg ì l’emprim a tschertgar signur Morin per al communitgar quai ch’el aveva udì da l’um da Plurs davart la famiglia Gometti, ma signur Morin aveva er gia udì da la sort dals Gomettis e che Adelina sa chattia qua a Clavenna en anguscha e mesa desperaziun. El ha cusseglià a Tgetg dad ir a visitar la giuvna; forsa ch’el, sco quasi in member da la famiglia Gometti, la possia confortar in pau. Tgetg è alura ì directamain en la chasa, nua che sa chattava la giuvna disfortunada, ed è sa fatg annunziar a quella. El ha immediat pudì entrar en la stanza da suffrientscha da la signurina abandunada, la quala al ha retschet cun larmas en ils egls. El ha empruvà da confortar la giuvna uschè bain sco ch’el saveva, e pelvaira è ella daventada in pau pli quieta, enconuschent ella il giuven Caleira per in um galant che vegniva stimà da l’entira famiglia Gometti. Tgetg l’ha cusseglià da restar a Clavenna fin ch’ils fatgs e las fatschentas da sia famiglia sajan rugaladas; ma sch’ella veglia forsa vegnir cun el a Bergamo, sche saja el persvas ch’il signur Vertugli la concedia tschert e fitg gugent in asil fin ch’ella saja sa decidida, nua ch’ella veglia prender sia dimora per il futur. La giuvna ha ditg ch’ella preferiss propi d’ir a Bergamo fin ch’ella haja surmuntà in pau la resignaziun per pudair purtar sia gronda disgrazia. Tgetg è s’offert da la manar a Bergamo, ma en cas ch’ella veglia vegnir cun el, stuessi ella prest sa decider e sa far pronta per il viadi, damai ch’el stoppia far tant pli prest da returnar en sia plazza, essend gia passà il temp da sia permissiun.

Bandunond questa chasa, è Tgetg passà per la via principala per ir en in’ustaria, nua ch’el dueva s’entupar cun in enconuschent, cun il qual el aveva da far ina fatschenta. El era apaina trenta pass davent da la chasa, da la quala el era sortì, ch’el ha entupà – ses frar Albert. Ils dus frars èn sa salidads e Tgetg ha ditg: «Ma danunder vegns ti, char Albert, che jau ta chat amez Clavenna, entant che jau ta supponiva a Bergamo?» Ma Albert ha respundì che la disgrazia da Plurs saja er vegnida enconuschenta a Bergamo e signur Vertugli al haja alura immediat tramess a Clavenna per ch’el s’infurmeschia da la sort da la famiglia Gometti a Plurs. El saja arrivà qua avant in’urella ed haja l’intenziun dad ir tar la ruina da Plurs per s’infurmar da quella chaussa. Ma Tgetg al ha ditg: «Quai n’è betg necessari, jau enconusch gia la sort da noss bun patrun. L’entira famiglia è sepulida sut la sgarschaivla bova, cun excepziun da la signuria Adelina ch’è per fortuna stada en visita qua a Clavenna dal temp da la disgrazia. Ella sa chatta anc qua ed jau vegn gist d’ina visita che jau l’hai fatg. Ma er ti, char frar, la stos visitar; la paupra giuvna è en in’immensa anguscha ed ha da basegn da confiert. Ve in mument cun mai en l’ustaria ed jau ta main alura pli tard tar la chasa da la disfortunada Adelina.»

Albert ha sinaquai accumpagnà ses char frar Tgetg en l’ustaria menziunada, ed ils dus frars èn sa cussegliads là tge ch’els veglian far a favur ed en avantatg da lur giuvna patruna. Els èn vegnids perina da sa render suenter gentar tar las ruinas da Plurs per guardar sch’i fiss forsa pussaivel da far in’exchavaziun per chattar la chasa da lur patrun. Suenter avair prendì in refrestg, ha Tgetg manà ses frar Albert tar lur giuvna patruna Adelina. Quella ha sentì in grond levgiament, vesend ils dus fidaivels emploiads da ses bab pronts da la sustegnair en ses abandun. Ella è oramai sa decidida da viagiar a Bergamo, sperond che signur Vertugli l’acceptia ad interim en sia famiglia, fin ch’ella saja sa quietada ed abla da pensar a sia dimora futura; ella è sa mussada pronta da partir gia en dus di per Bergamo. Ils dus frars han sinaquai bandunà la signurina disfortunada per sa preparar sin l’execuziun da lur plan per il suentermezdi. Els han gentà a bun’ura ed èn alura immediat sa mess sin via vers Plurs. En ina buna mes’ura èn els arrivads tar la starmentusa bova ed èn alura ids a spiunond, nua che pudess esser stada la chasa da lur bun patrun Gometti; ma els n’han chattà nagins fastizs da quella e n’han betg pudì scuvrir il lieu, nua che quella era stada. Vesend l’immensa autezza da la bova, han els chapì fitg bain ch’els na possian interprender nagut per tschertgar la chasa e pudair salvar la ritgezza sepulida en quella; perquai èn els immediat returnads a Clavenna ed han rapportà a lur giuvna patruna ch’ins na possia ad interim interprender nagut per scuvrir la chasa da ses chars geniturs. Albert ha supplitgà sia patruna e ses frar Tgetg d’al lubir da far ina visita a ses buns geniturs a Sanagn; el n’haja betg vulì dumandar signur Vertugli per il permiss da far quest viadi, essend ch’el n’haja betg savì ch’el vegnia ad inscuntrar ses frar qua a Clavenna; uss però ch’il frar returnia a Bergamo cun las novas da Plurs, na saja ses return betg uschè preschant, ed el saja persvas che signur Vertugli al concediss da returnar en patria per intgins dis. Adelina e Tgetg èn sa mussads pronts da laschar far Albert ina visita a ses geniturs e da prender sin els la responsabladad per quest permiss visavi signur Vertugli. Albert è alura gia partì quella saira per anc arrivar en Bregaglia e l’autra saira pudair esser a chasa tar ses buns geniturs.

Albert è arrivà la segunda saira a Sanagn per grond plaschair da ses buns geniturs e fragliuns. Il giuven fascheva ina cumparsa stupenta, ed ils abitants da Mon e Stierva cumenzavan gia a dir: «Noss Peder Caleira a Sanagn ha ils pli bels aspects da daventar in grond signur, sche ses dus figls sa refan da tala maniera en terras estras.» Quests pleds, pronunziads cun ina tscherta ironia, mussavan ch’era gia sa svegliada ina tscherta scuidanza tar la glieud areguard la fortuna che fluriva a Sanagn, cumbain che la buna famiglia Caleira era adina sa mussada umilitaivla. I dat savens tranter ils umans glieud che scuescha ad auters umans la fortuna; ma quai è vairamain ina nauscha qualitad che mussa in bass spiert ed in’educaziun insuffizienta.

Albert ha fatg durant quests trais dis ch’el era a chasa intginas visitas a Mon e Stierva, ed in di è el ì a Lantsch per visitar la famiglia da ses emprim patrun Morin, quai ch’el aveva gì empermess a quel, avend discurrì cun el il di da sia partenza da Clavenna. El avess er anc gugent fatg ina cursa fin las minieras dal Piz Cotschen, ma el n’ha quella giada betg gì temp e peda da far quest’excursiun; pertge ch’el na vuleva betg restar memia ditg absent da Bergamo per motiv che signur Vertugli na saveva betg insatge da ses viadi a chasa sia. Gia il quart di suenter ses arriv a Sanagn è el partì da chasa, prendend cun sai la benedicziun da ses buns geniturs e las bunas e cordialas admoniziuns da sia chara mamma Gnagna.

Entant che Albert sa chattava a chasa tar ses geniturs, è Tgetg sa profità dals dus dis ch’el ha stuì spetgar a Clavenna fin che la signurina è sa fatga pronta dad ir a Bergamo per esser activ en favur da sia giuvna patruna. El saveva anc dal temp ch’el era stà a Plurs che ses signur Gometti aveva intgins chapitals considerabels a Clavenna ed enconuscheva er ils debiturs, essend el avant temp stà diversas giadas per cumissiuns dal patrun en lur chasa. El ha communitgà quella chaussa a sia giuvna patruna ed è s’offert da far la tentativa, sche quests chapitals fissan da pudair incassar. La giuvna saveva er sezza che ses geniturs avevan chapitals a Clavenna ed en Bregaglia, ma n’enconuscheva betg ils debiturs ni lur relaziuns economicas; ed ella è sa mussada fitg cuntenta che Tgetg veglia far in’emprova d’incassar quests posts. Ma la chaussa aveva sias grondas difficultads, essend che las obligaziuns per quests chapitals giaschevan sut la bova da Plurs e na pudevan oramai betg esser preschentads als debiturs; ma sche quels eran umens sincers e da caracter, devi ina pussaivladad d’emprestar la munaida emprestada u almain ina nova obligaziun per ils chapitals. Tgetg è ì anc quel di en la chasa d’in da quests debiturs ed ha communitgà a quel ch’el saja vegnì tramess da la signurina Adelina Gometti per incassar il chapital da la famiglia Gometti, avend la figlia uss da basegn da questa summa. Il debiturs, in um integher e galant, ha declerà ch’el na saja betg en il cas en quest mument da restituir l’entira summa, ma la mesadad da quella veglia el pajar il di sequent. Tgetg è sa mussà cuntent cun questa offerta ed ha relatà la chaussa a la patruna. L’auter di è alura la signurina Adelina Gometti ida en cumpagnia da Tgetg en la chasa dal debitura menziunà, e quel aveva pelvaira gia pinà ina summa da 4000 rentschs ed ha fatg per il rest dals auters 4000 rentschs ina nova obligaziun sut la cundiziun che sia creditura annulleschia l’obligaziun sepulida sut la ruina da Plurs. Tgetg ha immediat concepì ina decleranza respectiva, Adelina Gometti l’ha firmà cun sia suttascripziun e la fatschenta è stada rugalada a cumplaina cuntentientscha da la creditura. D’in negoziant da Clavenna che debitava 6000 rentschs a signur Gometti, han els er retschet 1000 rentschs e la renovaziun da l’obligaziun per il rest da 5000 rentschs. D’in terz debiturs han els retschet almain la renovaziun da l’obligaziun ed èn sa cuntentads cun quella, n’avend da preschent betg basegn da dapli munaida. En questa maniera aveva Tgetg salvà a sia giuvna patruna in chapital da 15 000 rentschs.

L’auter di è signurina Adelina Gometti partida en cumpagnia da Tgetg Caleira vers Bergamo, nua ch’els èn arrivads gia l’auter di a bun’ura. Signur Vertugli e sia famiglia han retschet cun grond plaschair la figlia dal soci da lur affar, ed Adelina era cuntenta d’esser vegnida acceptada en in’uschè bella e buna famiglia ch’era respectada en l’entira citad. Raquintond Tgetg a signur Vertugli, co ch’el haja chattà ses frar Albert a Clavenna e co che la giuvna patruna ed el hajan concedì a quel da far ina curts visita als geniturs, ha signur Vertugli approvà questa permissiun. Avant che saja passada l’emna, è Albert arrivà a Bergamo per plaschair dal patrun e dal frar. El ha relatà al frar ch’ins haja fatg ils dus ultims dis provas a Plurs da scuvrir tras exchavaziuns intginas chasas, ma ch’i na saja betg reussì da vegnir bass avunda, essend che la bova saja anc memia umida e smanatschavi da sutterrar ils lavurants. Ins saja uss intenziunà da desister ad interim d’ulteriuras exchavaziuns, sperond però che pli tard, cur che la bova saja sa tschentada pli ferm, ins possia forsa far provas cun meglier success.

Ils proxims dis è la giuvna Gometti sa cussegliada cun signur Vertugli e Tgetg davart il reglament dals quints da ses bab. Ella saveva che ses bab aveva divers chapitals en Bregaglia ed a Cuira, ma n’enconuscheva betg ils nums dals debiturs; a Cuira, pretendeva la giuvna, haja il bab ina chasa per ipoteca, uschia haja ella udì diversas giadas a discurrer il bab en famiglia, ma ella na sappia betg tge chasa che saja ipotecada e n’enconuschia betg il num dal debitur. Suenter avair ponderà quella chaussa madiramain, è vegnì concludì che Tgetg duaja returnar ils proxims dis en Bregaglia per far l’emprova sch’el pudess scuvrir ils debiturs dal patrun Gometti. A Cuira aveva signur Vertugli in agent da l’affar, dal qual el pudeva sa fidar; el è s’offert da scriver a quel e da far investigar quel secretamain, tgi che pudess esser quest debitur, quala chasa che saja ipotecada e per tge summa. Sa mussond Adelina cuntenta cun quest plan, ha signur Vertugli scrit anc quel di a ses agent a Cuira, e l’emna proxima è Tgetg partì per la Bregaglia per far la tentativa, sch’el pudess chattar ils debiturs da ses patrun. Ed el è pelvaira stà fortunà en sia fatschenta. Suenter duas emnas è el returnà a Bergamo senza munaida, ma cun trais novas obligaziuns en l’import da circa 7000 rentschs. Quindesch dis pli tard ha er signur Vertugli retschet novas da ses agent a Cuira; quel aveva chattà il debitur da la famiglia Gometti ed er la chasa ch’era ipotecada per 6000 rentschs. Il debitur, essend er quel in um galant, aveva renovà l’obligaziun. En questa maniera eran las fatschentas d’interess da la signurina Gometti regladas a sia cumplaina satisfacziun. Signur Gometti pudeva bain anc avair plirs auters debiturs; ma na savend ni la figlia ni Tgetg dad auters, è la giuvna sa cuntentada cun quai ch’ella aveva pudì salvar da la facultad da ses buns geniturs.

V.

Adelina Gometti era sa fatga amia da las trais figlias da signur Vertugli, e quellas faschevan tut lur pussaivel per far a la giuvna plaschaivla la vita a Bergamo. Essend las soras Vertugli idas pli ditg a scola ed avend giudì ina meglra furmaziun che lur amia Gometti, ha quest’ultima gì occasiun da sa perfecziunar en bleras chaussas, en lavurs manualas, en la litteratura ed en bleras autras chaussas nizzaivlas. Essend semper occupada ed en ina cumpagnia agreabla, èn ses cordoli e si’immensa dolur pervi da la trista sort da ses geniturs e fragliuns sa mitigiads ed ella è plaun a plaun daventada pli susceptibla per las allegrezzas da la vita. Ella è vegnida preschentada al circul d’enconuschents dals Vertuglis e n’ha betg pli chattà tanta peda da pensar a sia disgrazia che l’aveva deprimì e mortifitgà l’emprim temp. Apaina passà in mez onn, è ella sa sentida sco da chasa a Bergamo ed en la famiglia Vertugli. Ma avant tut ils auters respectava ed amava la giuvna ils dus frars Caleira, Tgetg ed Albert, sco sch’els fissan ses agens frars. A Tgetg ha ella surdà l’administraziun da ses affars; el la stueva represchentar sco soci en l’affar a Bergamo ed er visavi ses debiturs, cun ils quals ella stueva star en correspundenza. Tgetg ha fatg fitg gugent tut questas lavurs; el aveva in grond plaschair cur ch’el pudeva prestar in servetsch a la buna giuvna.

Dus uschè bels, scorts e prudents giuvens sco ils dus frars Tgetg ed Albert Caleira na chattav’ins betg a Bergamo. Els vegnivan er considerads sco dus members da la famiglia Vertugli e stuevan sa participar da tuttas recreaziuns che vegnivan arranschadas bainduras en chasa. Principalmain las sairas da las dumengias sa radunavan en chasa Vertugli entiras societads da parents ed enconuschents per passentar en cumpagnia ina saira agreabla. Er ils dus frars da Sanagn stuevan prender part da questas societads, ed els chapivan er fitg bain da sa conversar cun auters senza sa mussar immodests e mulestus. Els eran spezialmain bainvis da las giuvnas che sa chattavan en questas societads. In ritg negoziant cun num Paolo Fumagalli visitava er savens cun sia dunna e sias duas figlias la famiglia Vertugli; el era in spezial ami da signur Vertugli e bainvis en chasa da quel. Las figlias da signur Fumagalli na frequentavan naginas societads pli gugent che quellas en chasa Vertugli; spezialmain la figlia veglia cun num Pelagia visitava bainduras er durant il di las soras Vertugli sut in u l’auter pretext. Questas visitas aveva ella cumenzà spezialmain l’ultim temp. Il motiv da questas visitas frequentas n’enconuscheva nagin; mo l’Adelina Gometti ha tuttenina cumenzà a far suspects, pertge che la signurina Pelagia haja ina tala predilecziun per la chasa Vertugli. Ella aveva observà diversas giadas tge egliadas languintas che la giuvna deva, cur che Tgetg discurriva, e co ch’ella empruvava da far attent sin sasezza cun al respunder en ina maniera agreabla e cun vusch loma. Avend fatg diversas giadas questas observaziuns, è Adelina vegnida a la persvasiun che l’amia Pelagia na saja betg indifferenta per il giuven Tgetg, anzi ch’i spluntia en il cor da quella l’aurora d’ina amur ardenta. Ma da quella scuverta ha Adelina piglià gronda tema e sentì en ses cor ina profunda dolur. Ella è s’occupada tut il di cun quest pensier ed è daventada fitg trista e taciturna. Questa tristezza è s’augmentada e creschida da tala maniera che l’entira famiglia Vertugli l’ha accorschi; er ils frars Caleira, spezialmain Tgetg, aveva fatg quest’observaziun, ma na pudeva betg chapir danunder che questa melanconia derivia. Tut sias observaziuns spezialas ch’el fascheva uss per scuvrir quest misteri, èn restadas senza success.

La primavaira era arrivada cun in’aura magnifica; la glieud da la citad cumenzava a far spassegiadas sin las numerusas campagnas che circumdavan quella. Er la famiglia Vertugli aveva in bel funs en la vischinanza da la citad, e la mamma e las figlias visitavan quasi mintga di la campagna per passentar là intginas uras en la sumbriva da bella pumera che steva gia en fluriziun. Ellas avevan er bainduras visitas da dunnas e figlias da famiglias or dal circul da lur enconuschents ordaifer la citad. La famiglia ha concludì da tegnair ina pitschna festivitad sin lur campagna la dumengia proxima, e las figlias e la dunna han er envidà intginas parentas, enconuschentas ed amias a questa recreaziun champestra. Tranter las envidadas sa chattavan la dunna e las figlias Fumagalli. Avend gentà e passada la pli gronda chalira, ch’era uss a Bergamo gia sensibla, è la famiglia Vertugli sa rendida, accumpagnada dals figls e dals frars Caleira, sin la campagna ch’era apaina in quart d’ura davent da la citad. La finala era sa rimnada là ina bella societad, e tranter ils members da quella sa chattava er la famiglia Fumagalli. Las figlias da questa famiglia eran oz ornadas cun in’eleganza extraordinaria e faschevan gronda parada. Las giuvnas ed ils giuvens han arranschà divers tramagls e gieus da la giuventetgna per passentar il temp tant pli agreablamain. Tar quest’occasiun ha Tgetg observà duas chaussas che n’al han betg plaschì, prim che la signurina Pelagia al s’avischinava savens e cun ina famigliaritad memia surprendenta; e secundo aveva el l’impressiun d’observar ch’il Vertugli pli giuven demussava ina speziala attenziun ad Adelina Gometti, la quala pareva però d’esser trista e d’avair pers si’ilaritad ordinaria. El è oramai stà tut il di alerta per scuvrir il motiv da la melanconia da la signurina Gometti, e finalmain crajeva el d’avair chattà ina decleranza da quest cuntegnair dad Adelina; el ha numnadamain observà diversas giadas che lezza vulveva dad el ils egls, cur ch’el discurriva cun la giuvna Pelagia. El ha er observà che quest’ultima sa deva tutta stenta d’al s’avischinar uschè savens sco pussaivel, e ch’ella metteva en sia vusch ina tenerezza languinta cur ch’ella discurriva insatge cun el. Quai al ha avert ils egls ed el ha cumenzà ad evitar tant sco pussaivel si’admiratura.

Tgetg era daventà taciturn e na sa participava betg pli uschè vivamain als gieus sco avant, ed i pareva sco sche sia moda reservada avess fatg perder la signurina Pelagia l’umor. Tgetg n’era betg in giuven, al qual ins stueva dar cun ina pertga per al far chapir ina chaussa, ed el è la finala, cumbain ch’el sa chattava en ina societad allegra, daventà dal tuttafatg taciturn e serius. Cur che la famiglia Vertugli è sa messa la saira a maisa per tschanar, mancava Tgetg, e la fantschella che serviva a maisa ha relatà che Tgetg haja bandunà la chasa e l’haja incumbensà da dir a la signuria ch’el na possia betg returnar a tschaina, avend anc da far ina pitschna fatschenta; ins na duaja oramai betg spetgar fin ch’el returnia. Quai ha parì curius a l’entira famiglia, essend che Tgetg n’aveva fin uss mai mancà ina giada a maisa, auter che cur ch’el era insacura absent en fatschentas da l’affar. Nagin da la famiglia na fascheva dentant suspects ch’il brav giuven avess forsa sa laschà surmanar dad ir en in lieu che na fiss betg stà decent u forsa schizunt privlus. Ma ad Adelina avevan quests pleds da la servienta fatg impressiun, ed ella ha pensà en ses intern: «O Pelagia, ti m’al rubeschas er anc da la maisa!» Ella ha fingì d’esser in pau indisposta ed ha bandunà la sala da mangiar per sa retrair en sia stanza e daventar la preda dals turments da ses cor battent. Apaina arrivada en sia stanza, ha ella serrà l’isch, è sa messa a la maisa, pusond la testa dulenta en ils mauns ed ha laschà currer las larmas tut a fila. Ses cordoli e sia melanconia èn creschids adina dapli e pli tard la saira, cur ch’ella ha udì la vusch da Tgetg a discurrer cun la servienta sin il corridor, è ella sa quietada in pau ed è alura sa messa a letg per passentar ina notg inquieta che l’ha purtà siemis turmentants.

Ma Tgetg n’era betg stà quella saira en chasa Fumagalli e n’aveva betg tschanà cun signurina Pelagia, na, el aveva bandunà la citad per far sulet ina spassegiada en la libra natira; el era questa saira tant fatschentà cun sasez e cun las observaziuns fatgas oz en la champagna da signur Vertugli ch’el ha fatg stim ni da pumera ni da flurs ed anc bler damain da la glieud ch’el entupava. El, in giuven d’in natiral uschè quiet e temprà, gieva oz sco in desperà per sia via, da maniera ch’ils passants cumenzavan a guardar, tge sturn ch’ins haja oz mess per l’emprima giada en libertad suenter ina pli lunga retenziun. La finala è el arrivà tar in banc sut in chastagner gigant che derasava gia ina spessa sumbriva ed è sa fermà. El è sa mess sin il banc ed ha cumenzà a meditar tut quai ch’el aveva oz vis ed experimentà. El n’aveva betg da far lungs studis, ses intern al scheva: «La buna Adelina t’ama, ed ella è er quella ch’ha observà l’adulaziun che signurina Pelagia m’ha demussà dapi intgin temp; ma uss sai jau, tge che jau hai da far.» E pelvaira, Tgetg è sa midà fitg durant il proxim temp. El era in giuven ch’era losch da savair e pudair lavurer e gudagnar uschia ses paun da mintgadi ed anc sustegnair ses geniturs. El era tut il di activ a favur da l’affar, al qual el serviva, e mai n’al era fin uss vegnì endament da tschertgar ina ritga dunna per pudair far il signur e pultrun a cust d’ina dunna, sco che fan ozendi blers giuvens, cur ch’els chattan insanua ils fastizs d’ina ritga ertavla, la quala els persequiteschan cun lur adulaziun e cun ina lingua svelta, cun la quala els san dir diesch manzegnas per secunda. Na, Tgetg n’appartegneva betg a la classa da quests aventuriers, essend el da tut in’autra morala. Supponind el uss però ch’el na saja betg indifferent a la buna Adelina, senza ch’el avess insacura mussà a quella sentiments d’amur per la trair en ses latschs, ha el prendì la resoluziun da cun l’emprima buna occasiun dumandar la giuvna, tge che la manchia ch’ella pari uschè trista ed er uschè reservada envers el; el na sa regordia betg d’avair fatg ina chaussa che l’avess pudì displaschair u schizunt offender. Avend ponderà ditg questa chaussa, è el daventà in pau pli quiet, oravant tut per motiv ch’el sa sentiva dal tuttafatg nunculpant da scadina chaussa ch’avess forsa pudì avair fatg disgust a la buna giuvna.

Ma sco ch’i va per ordinari, èn passads divers dis dal plan fin l’execuziun. Tgetg na vuleva betg dumandar Adelina in’audienza en sia stanza, mabain spetgar il mument cur ch’el la chattas casualmain insanua suletta. Stuend el in di ir en la citad, ha el bandunà il Borgo s. Antonio, nua che la famiglia Vertugli aveva la chasa ed il negozi, ha el observà in toc davant sai ina signurina che passava il borgo cun pass lev; el n’ha a l’entschatta betg enconuschì la persuna, essend la distanza memia gronda. La finala ha la giuvna entupà ina dama enconuschenta e tar questa chaschun ha ella anc vieut in pau enavos la testa per dir l’ultim «adio» a la signurina. En quel mument ha Tgetg dalunga enconuschì che questa signurina na saja nagin’autra che Adelina Gometti, cun la quala el avess uschè gugent discurrì in pèr pleds senza testimonis. La giuvna al stueva er avair gì observà, pertge ch’ella ha accelerà ses pass, sco sch’ella temess d’esser persequitada. Ma Tgetg na l’ha betg pers ord vista, ed accelerond er el ses pass, è el vegnì pli e pli datiers a la giuvna. Accurschend quella ch’i na la saja betg pussaivel da mitschar dal giuven, ha ella spetgà in mument sin quel e Tgetg l’ha salidà cun tutta cordialitad, schend: «Nua vas, Adelina, ed anc uschè svelt ch’ins na ta po strusch suenter? Jau sun uschiglio in bun pedun, ma t’hai strusch pudì suatar. Vas forsa er en citad?» – «Gea», ha Adelina respundì cun vusch debla, in pau vibranta. Tgetg l’ha ditg: «Taidla, mia buna Adelina, e ma di, pertge che ti es stada questa dumengia en la champagna dals Vertuglis uschè trista! Jau t’hai observà bleras giadas che ti faschevas ina tschera sco sche ti stessas curt avant cridar; ma di, Adelina, tgi ni tge t’ha offais?» Dond il giuven en quest mument in’egliada sin la signurina, ha el observà ch’ils egls da la giuvna eran bletschs e ch’il cridar era orasum. El ha piglià tema e na saveva betg co ch’el duaja cuntinuar ses discurs, sche gia quests pleds l’avevan commovì en tala maniera. Ma la giuvna è sa revegnida in pau ed ha ditg a Tgetg: «Ma dà tes bratsch, sche jau ta stoss avrir mes cor, sche na duai quai betg daventar sin vias da la citad; nus vulain sortir da las portas e spassegiar in pau en la libra natira.» Tgetg è stà cuntent cun questa proposta ed il pèr è sa cunvegnì da l’emprim ir en citad a far las fatschentas che mintgin aveva da far, las qualas n’eran per fortuna betg grondas ni lungas, e da s’entupar alura sin plazza gronda. En diesch minutas ha Tgetg gia chattà la giuvna sin la plazza, l’ha dà il bratsch e manà tar ina porta, da la quala ils pli paucs peduns sortivan.

Apaina sortids da la porta, ha Adelina ditg a Tgetg: «Ti m’has dumandà, pertge che jau saja stada trista quella dumengia sin la champagna. N’has ti zunt nagin presentiment, tge che sto esser stà il motiv da mi’immensa dolur, da mes vehement cordoli che ruieva vi da mes cor? O, ina persuna, cun la quala ti es ta fatschentà cun tanta predilecziun quel di disfortunà, ha chaschunà las dolurs da mes cor. O Tgetg, ti sas, tgi che questa persuna è che m’ha alienà da mes frar, il giuven, senza il qual la vita ma para mort, e la mort liberaziun.»

Tgetg, commuventà a l’extrem, ha retegnì la giuvna, e la guardond en fatscha cun in’expressiun da surpraisa, ma er da beadientscha, l’ha ditg cun vusch debla: «Duess jau forsa esser quel ch’ha fatg impressiun sin tai, o respunda, Adelina!»

«Tgi auter duess quel esser che ti, Tgetg? Has ti forsa vis che jau avess insacura dà chaschun en ina maniera u l’autra ad in giuven da s’avischinar a mai auter ch’en la pli gronda decenza? Has ti vis, Tgetg, che jau hai dà ureglia a l’adulaziun da giuvens? Na, Tgetg, jau sun pura da scadina sumbriva d’ina amur per umens che jau n’enconusch betg e na vi betg enconuscher. Na, il maletg che jau port gia divers onns inclus en mes cor, duai restar pur fin mia fossa.»

«Ma, mia chara Adelina», ha Tgetg respundì, «jau cumenz uss a chapir pli u main tes discurs. Ma en emprima lingia stoss jau punctuar che jau na sun sin la champagna Vertugli mai m’occupà cun in’autra persuna dapli che quai ch’ha dumandà la cunvegnientscha. Igl è vair che signurina Pelagia m’ha savens occupà quel di, ma betg per ma plaschair, mabain per ma daventar mulestus ed importuna.»

Avend Tgetg pronunzià quests pleds, ha Adelina strenschì ses maun e ses frunt è sa serenà. «Duess jau esser m’engianada?», ha ella ditg; «o quant gugent vi jau ta dumandar per perdun! Ti ma prendas ina gronda paisa da mes cor.»

Il lectur bainvulent po engiavinar facilmain il resultat da quest dialog tranter Tgetg ed Adelina. En ina mes’ura èn els returnads tar la chasa Vertugli, tuts dus cuntents e beads ed emplenids cun sentiments dultschs. Lur cors eran sa chattads. Tgetg aveva adina onurà, amà e stimà sia giuvna patruna, essend quella en tuts rapports ina giuvna da valur, ina giuvna d’in caracter nobel ed elevà; ma da vulair s’avischinar a questa ritga signurina cun lusingias d’amur, quai n’al era mai vegnì endament; d’ina tala bassezza n’avess el mai pudì sa far culpabel. Ma uss, uss che la giuvna sezza aveva fatg l’emprim pass d’avischinaziun, n’ha el gì nagin scrupel pli d’acceptar il maun da la buna giuvna. La tschertezza da s’acquistar questa buna, nobla giuvna per sia dunna aveva però tuttina mess Tgetg en ina tscherta agitaziun extraordinaria ed el stueva dar bain adatg ch’el na sa laschia betg surmanar ad ina u l’autra negligientscha en l’affar. El ha tegnì per il pli opportun da prest spusar si’amanta, ed Adelina, a la quala el aveva communitgà quest’idea tar ina bun’occasiun, era cumplainamain d’accord cun el. Ma Tgetg na vuleva betg far nozzas avant ch’el haja discurrì cun ses geniturs e retschet da quests il permess per ses matrimoni. El ha proponì er ad Adelina da celebrar las nozzas a Mon en preschientscha da ses chars geniturs e fragliuns e d’alura er gist abitar in fin dus mais suenter las nozzas a Sanagn en chasa paterna. Er cun questa proposta è Adelina sa mussada fitg cuntenta, avend ella in viv desideri d’emprender a conuscher ils dus conjugals Caleira a Sanagn ch’avevan dus uschè bravs figls sco Tgetg ed Albert.

Tgetg ha scrit a ses buns geniturs, tge ch’el intenziuneschia da far, sch’els al dettian lur consentiment. El als ha er tramess tras ina chasa da commerzi 400 rentschs cun la supplica d’al vulair laschar preparar la stiva sura en la chasa paterna per ch’el dastgia offrir l’abitaziun a sia giuvna dunna durant in pèr mais da vacanza. La brev per ils geniturs era arrivada inclusa en ina brev dal plevon da Mon, al qual Tgetg aveva er scrit tut quai ch’el era intenziunà da far. Vegnind Peder Caleira la dumengia proxima a Mon per assister al servetsch divin, al ha il plevon fatg clamar en chasa-pravenda, al ha surdà la brev da Tgetg ed al ha er communitgà quai che Tgetg al aveva scrit, spezialmain ch’el abitass gugent in pitschen temp en la chasa paterna cun sia dunna. Vegnind Peder da mezdi a chasa cun la brev da Tgetg e cun las novitads dal signur plevon, è l’entira famiglia sa smirvegliada da quai; ma ils geniturs han gugent dà a Tgetg il permess da maridar. Gnagna ha gì in plaschair particular che Tgetg vuleva far sias nozzas a chasa ed er abitar in curt temp en la chasa paterna, cun la quala chaschun ella pudeva emprender a conuscher sia brit e forsa dar a quella in u l’auter bun cussegl per la vita. Avend il reverendissim signur plevon declerà a Peder ch’el scrivia oz anc a Tgetg ina resposta, è Peder returnà il suentermezdi en chasa pravenda ed ha supplitgà il signur plevon d’er vulair scriver a Tgetg en ses num ed en num da sia dunna ch’ils geniturs sajan fitg cuntents da laschar maridar Tgetg e ch’i als fetschia in grondissim plaschair, sch’el fetschia las nozzas a chasa e veglia alura er anc abitar cun els per intgin temp. Il signur plevon ha empermess dad immediat scriver la brev ed ha ditg ch’el speria che Tgetg la retschaivia il pli tard en otg dis. Peder ha er anc discurrì quel di cun in mastergnant da Casti che sa chattava casualmain a Mon, pervi da la reparatura da sia chasa, ed il mastergnant è vegnì gia quel di cun Peder a Sanagn per guardar che reparaturas che sajan necessarias vi da la stiva sura, per la metter en in stadi che plaschia a Peder. Ils dus umens èn sa cunvegnids immediat areguard il pretsch, ed il mastergnant che n’aveva da preschent betg da far bler, ha empermess da cumenzar immediat cun la lavur. Peder ha preparà gia il di sequent il material ch’il mastergnant aveva considerà sco necessari per far la reparatura projectada. La dumengia proxima ha il mastral regent da Mon laschà clamar Peder en chasa sia ed al ha surdà ils 400 rentschs che Tgetg aveva tramess a Cuira ad ina chasa da commerzi e ch’il mastral aveva retschet per surdar a Peder Caleira.

Entant era arrivà il mais da matg, e Tgetg ed Adelina èn sa decidids da communitgar a signur Vertugli lur spusalizi e d’al dir ch’els veglian returnar en in mais en patria per celebrar lur nozzas en preschientscha da lur parents. Signur Vertugli ha bain fatg in pau egls gross; pertge ch’el avess fitg gugent cuì la buna e ritga Adelina a ses figl Giovanni; ma el era prudent avunda da vesair ch’i na saja betg pli da midar qua insatge ed ha er dà fitg gugent a Tgetg in congedi da trais mais per ch’el possia far il viadi planisà a chasa cun sia spusa. Tgetg aveva er pir quel di communitgà a ses frar Albert tge ch’el intenziuneschia da far. Quel ha sentì ina gronda allegrezza che ses bun frar dueva far ina uschè buna fortuna. La dumengia proxima ha signur Vertugli fatg preparar en chasa sia in extra past da festa a sia famiglia ed anc ad intgins buns enconuschents ed amis da Tgetg, e cun quest’occasiun ha el alura communitgà a l’entira maisada il spusalizi da Tgetg cun signurina Adelina Gometti. Ils spus empermess han retschet las gratulaziuns da tuts preschents, ils quals eran per l’auter stads surprais da questa novitad, n’avend fin uss gì zunt nagins indizis che Tgetg ed Adelina pudessan daventar uschè nunspetgadamain in pèr.

Vers la fin dal mais da matg ha Tgetg prendì congedi per trais mais per pudair returnar en patria e celebrar sias nozzas a chasa sia. El aveva retschet ina resposta e la gratulaziun da ses buns geniturs e sentiva in grond desideri da revair ses geniturs e fragliuns e preschentar a chasa sia spusa. Enturn ils 20 da matg è el partì da Bergamo e viagià l’emprim a Milaun cun sia spusa. Avend considerà in pèr dis questa chapitala da la Lumbardia, èn ils viagiaturs partids per Como. Là èn els sa fermads be in mez di ed èn alura viagiads en bartga a Colico e da là en char a Clavenna. En questa citadina han els ruassà dus dis ed èn alura passads la muntogna dal Spleia cun l’intenziun da sa render l’emprim a Cuira. En trais dis èn els finalmain arrivads suenter in viadi fitg stentus en la chapitala grischuna, nua ch’els vulevan er ruassar in pèr dis. A Cuira aveva Tgetg da far inqual fatschenta da commerzi e negozi, e quellas ha el fatg gia l’emprim di suenter ses arriv en la citad. Il quart di è Tgetg sa rendì cun sia spusa a Lantsch ed ha fatg anc quel di a signur Morin ed a sia famiglia ina visita cun sia Adelina. El ha er preschentà a sia spusa charina ses dus fragliuns, Paul e Mengia; quests dus han beneventà lur frar e lur quinada in spe a moda fitg cordiala ed han gì in grond plaschair da pudair far l’enconuschientscha da la spusa da lur frar. L’auter di ha Tgetg chattà a bun’ura a Casti las duas truccas ch’el aveva tramess fin qua cun l’expediziun ordinaria da lur negozi a Bergamo. El las ha fatg transportar anc quella saira fin Sanagn en la chasa da ses geniturs. El e sia spusa èn vegnids pir l’auter di a Sanagn. Vesend Gnagna a s’avischinar in pèr a la chasa a Sanagn, ha ella immediat pensà che quai pudess esser il char Tgetg cun sia spusa, ed ella è ida in pèr pass encunter als arrivads. La mamma ha avert la bratscha e strenschì ses char figl al sain matern fidaivel, spundend larmas d’allegrezza. Ma Tgetg ha alura ditg a la mamma: «O chara mamma, qua ta preschent jau ina nova figlia cun il pli ardent giavisch che ti la veglias er inserar en tes lartg cor d’amur sco tes auters uffants!» La mamma ha embratschà cun larmas en ils egls la bella, ma modesta giuvna e l’ha dà sin il frunt il bitsch matern. Adelina era commuventada fin las larmas, vesend ad agir la simpla pura cun tala affecziun, ed ella ha strenschì sia sira futura cun impetuusitad vi da ses sain. La mamma ha manà Tgetg e sia spusa en chasa ed als ha immediat mussà il local, il qual Peder aveva laschà pinar per lur avdanza durant lur segiurn a Sanagn. Tgetg ed Adelina èn sa mussads fitg satisfatgs da questa pitschna abitaziun. In’urella pli tard èn ils fragliuns da Tgetg arrivads a chasa da la lavur ed èn sa depurtads visavi la quinada futura uschia che Tgetg ed Adelina èn stads cumplainamain cuntents cun els. Adelina aveva cun ina giada prendì da la bella stivetta e laschà purtar las duas truccas ch’eran gia arrivads da Casti en quest local.

La mamma Gnagna aveva dalunga vulì cuschinar insatge a Tgetg ed a sia spusa; ma quels han declerà ch’els n’hajan absolutamain betg da basegn da mangiar, els spetgian gugent fin la saira da tschaina. Tgetg e sia spusa avevan uss in’autra lavur; els eran occupads cun svidar lur truccas che cuntegnevan divers bels regals per ils geniturs e fragliuns da Tgetg. Avend finì questa lavur, han els clamà la mamma Gnagna en lur stanzetta e l’han mussà tut quai ch’els avevan preparà per reparter als geniturs e fragliuns. Talas raubas finas n’aveva Gnagna anc mai vis ed ella ha fatg reproschas a Tgetg ch’el e sia spusa hajan fatg tantas expensas per regals; ma Tgetg ha ditg a la buna mamma ch’ella avessi merità anc bler pli prezius regals; ma el na veglia mai emblidar. Tgetg è alura ì a clamar ses fragliuns ed als ha fatg vegnir en stanza sura. Quels han fatg egls, vesend qua questas bellas chaussas novas, sco ch’els n’avevan mai vis talas. Tgetg ed Adelina han repartì tut questas bellas chaussas tranter ils members da la famiglia, resalvond la part dals dus fragliuns Paul e Mengia a Lantsch.

L’autra damaun, cur che Peder è arrivà da l’acla, per la quala el aveva gia stuì partir ier avant che Tgetg arrivia cun sia spusa, hai dà ina nova scena da beneventaziun tranter bab e figl e la giuvna brit. Tgetg ha relatà uss als geniturs tut quai ch’el intenziunava da far e cura e co ch’el veglia celebrar sias nozzas. Il past vuleva el tegnair en chasa paterna, ed el ha remess gia oz ina bella summa a la mamma per che quella possia cumprar en abundanza tut las chaussas che faschevan da basegn, vaschella, pusada, mantins, bavrondas, charn e da quellas chaussas. Tgetg na vuleva betg gist far nozzas sco in prinzi, ma plaschaivlas duevan sias nozzas tuttina esser. Suenter ensolver ha Tgetg fatg cun sia spusa ina pitschna spassegiada en il conturn da Sanagn e l’ha mussà la cuntrada e las vischnancas ch’ins pudeva vesair. O co plaschevan ad Adelina questas muntognas giganticas cun lur frestgas pastgiras verdas! Ella ha declerà a Tgetg ch’ella abitass fitg gugent qua en questa bella cuntrada, ed ella speria da pudair vegnir savens ils proxims onns en visita a Sanagn. Tgetg ha gì gugent che Sanagn, malgrà sia gronda quietezza, ha plaschì a sia spusa, ed el l’ha ditg ch’ella possia vegnir mintga stad a Sanagn sch’ella veglia. Suenter gentar ha Tgetg manà sia spusa charina a Mon per far cun ella ina visita al signur plevon, cun il qual el aveva anc da discurrer davart sias nozzas. Il signur plevon ha retschet Tgetg e sia spusa cun curtaschia exquisita, e savend el er in pau talian, ha er Adelina pudì sa participar al discurs dals dus umens. Las nozzas èn vegnidas fixadas per la proxima dumengia en otg dis, ed il signur plevon ha empermess da proclamar e publitgar quellas gia la dumengia proxima. Tgetg ha surdà er al plevon ina bella summetta, destinada per ils paupers da la vischnanca, ed ha communitgà a medem temp al plevon ch’el intenziuneschia da far ina pli gronda donaziun a favur dal fond da povers.

L’auter di ha Tgetg manà sia Adelina a Stierva, nua ch’el vuleva far ina vista a parents ed enconuschents. Er al plevon da Stierva ha el surdà la summa da tschient rentschs, saja per reparter gia uss als povers ubain per integrar en il fond. Avend passentà a Stierva in fitg agreabel di, è el returnà a Sanagn cun la resoluziun da far l’auter di, sche l’aura saja favuraivla, ina visita al pelegrinadi da Ziteil. Mussond la saira tuts aspects da bell’aura, ha Gnagna preparà l’autra damaun gia a las quatter in ensolver e clamà Tgetg. Ma savend Gnagna che sia brit futura na possia betg far il viadi a Ziteil ed enavos en in mez di, aveva ella preparà per Tgetg in fasch pesant cun ina marenda che consistiva da charn criva, andutgels, schambun, ovs, paintg, paun, petta e diversas sorts veschlas ed in pèr buttiglias da vin. Ils dus viagiaturs èn sa mess cun curaschi en viadi; ma l’ir a munt pareva tuttina in pau stentus ad Adelina che n’era betg disada da far talas spassegiadas per las muntognas; dentant èn els tuttina arrivads en relativamain curt temp fin a Ziteil. La damaun era magnifica e la vista sin la natira, sur las valladas, munts e pizza grondiusa; Adelina n’è betg vegnida unfisa da contemplar questa stupenta cuntrada ed è s sentida fortunada e loscha dad er daventar ina figlia da questa terra. Lur emprima visita han els fatg a la baselgia; els han chattà en quella ina rotscha pelegrins da la Surselva, ils quals avevan pernottà en il pelegrinadi. Tgetg ed Adelina han assistì a tut las funcziuns en baselgia, e pir suenter ch’ils pelegrins esters eran partids e la baselgia era serrada, han els fatg excursiuns en la vischinanza dal pelegrinadi. Tgetg vuleva ascender il Curvèr, ma sia spusa n’ha betg gì il curaschi d’interprender questa ascensiun difficultusa; els èn però ids pli vers nord ed èn alura arrivads sin in fil, dal qual els han pudì giudair ina bella vista sur la vallada da Schons ed en la Surselva. Il pli remartgabel ha parì ad Adelina ch’els dus han anc pudì ir grondas tendas sur naiv e samada. Adelina aveva en si’entira vita vis pauca naiv, e qua, en la patria da ses spus, pudevan els anc ir durant la stads sur entiras tendas a samada. Adelina n’è betg vegnida unfisa da contemplar las magnificas chadainas da muntognas dal fil, nua ch’els sa chattavan. La finala han els stuì sa metter sin via vers chasa; ma Tgetg ha stuì empermetter a sia spusa da far anc pliras da questas excursiuns durant ch’els sajan a Sanagn. Els èn arrivads in pau tard a chasa, e Gnagna discurriva gia da far ir ses figl giuven a tschertgar ils spassegiaders da Ziteil.

Ils proxims dis n’ha Tgetg betg gì buna peda far spassegiadas cun sia spusa; pertge ch’il di da nozzas s’avischinava uss rapidamain. Tenor l’usit da la cuntrada na vuleva el betg far nozzas ina dumengia, mabain il mardi. Essend l’aura magnifica, n’ha Tgetg betg vulì tegnair il past da festa en stiva, mabain davant la chasa en la sumbriva d’intgins tschareschers ch’ornavan il conturn da quella. N’avend betg maisas avunda e na vulend betg ir a far emprestar talas, han Tgetg e ses bab Peder sezs fatg maisas cun aissas che Peder aveva en abundanza en clavà. Els han chatschà pals en il terratsch e tschentà e fermà alura aissas sin quels. En questa maniera avevan els construì maisas per passa 40 persunas sin ina bella plazza planiva davant la chasa. Peder scurlattava bain in pau la testa, n’avend anc mai vis in past festiv sut tschel avert; ma Tgetg al ha declerà la chaussa en tala moda ch’el ha la finala sa laschà persvader ch’ins possia la finala er mangiar en il liber. Tgetg ha per procurà per tut la vaschella che mancava; el ha dà munaida a la mamma e quella ha alura supplitgà Peder dad ir a Casti a cumprar tut quellas chaussas ch’eran absolutamain necessarias. Peder ha fatg quai ed è arrivà la saira grevamain chargià a Sanagn ed ha l’auter di anc stuì far in segund viadi a Casti per pudair cuntentar cumplainamain sia buna consorta. Tgetg ha alura er procurà tut la vivonda, charns e farina ed il vin necessari per la festa. Essend uss tut pinà per il past che dueva esser uschè splendid sco pussaivel, ha el uss anc gì in’autra lavur da far, numnadamain dad ir ad envidar las persunas che duevan sa participar da sias nozzas. L’emprim di è el ì cun sia spusa a Lantsch per envidar signur Morin, tut sia famiglia e ses frar Paul e la sora Mengia. Sia spusa Adelina al aveva accumpagnà sin questa spassegiada, ed els avevan passentà in fitg agreabel di a Lantscha en cumpagnia da signur Morin e sia bella famiglia.

Ils dus proxims dis è Tgetg ì a far las invitaziuns a Mon ed a Stierva. En intginas chasas era Adelina er stada cun ses spus, ed ella sa smirvegliava fitg, tge nettezza ch’ella aveva chattà dapertut en questas chasas da purs che parevan dad esser vairs signurs en cumparegliaziun cun ils purs talians che mangian mal, sa vestgeschan mal ed abiteschan en miserablas speluncas. Finalmain eran fatgas tuttas preparativas per il di da nozzas e damaun duevan quellas vegnir celebradas en la baselgia a Mon, gea en baselgia, pertge che da quel temp n’era anc betg vegnì endament ad insatgi da snegar al matrimoni il caracter sacramentar e da laschar exercitar in tal act tras umens civils, tras uffizials che n’han betg la dretg’idea da quai ch’els fan.

Il mardi da nozzas è arrivà. Gia vers las otg da la damaun è signur Morin cumparì a Sanagn cun sia famiglia e cun ils fragliuns da Tgetg, ed er ils giasts da Stierva eran gia preschents là, vulend er els sa participar dal til festiv a Mon. La finala è l’entira societad sa messa sin via vers Mon. A Sanagn èn restadas be duas cuschinieras ed ina giuvna che las gidava en lur greva e difficultusa lavur. Arrivond la societad da nozzas a l’entrada da Mon, è ella vegnida retschavida d’ina salva da schluppets; pertge ch’ils paucs mats da Mon vulevan far onur a lur convischin Tgetg Caleira ed a sia parentella. La societad ha uss dalunga furmà ina processiun. A la testa da quella èn sa mess ils mats che purtavan schluppets; alura è suandada la giuventetgna, las mattas cun scussal e faziel alv; amez il tir sa chattavan il spus e la spusa ed a quels suandavan ils geniturs da Tgetg e sinaquai ils auters maridads tranter ils giasts da nozzas. Las funcziuns han cumenzà dalunga, l’emprim cun la s. messa, alura è suandada la communiun dal spus e da la spusa e finalmain la copulaziun. Il reverendissim signur plevon ha er anc tegnì in curt discurs davant l’altar, en il qual el ha dilucidà cun bels pleds l’impurtanza dal matrimoni ed er fatg attent ses auditurs sin l’instabilitad da la fortuna en quest mund, co che las empernaivladads da la vita bandunan savens l’uman, ch’el duaja oramai er dis d’allegrezza moderar sias aspectativas, sinaquai che la realitad da la vita n’al chattia betg nunpreparà al cumbat.

L’entira festivitad en baselgia aveva durà circa in’ura e mez ed uss è la nozza sa messa sin via vers Sanagn. Er il signur plevon da Mon ch’era medemamain envidà a nozzas, ha prendì part da quest tir a Sanagn, nua che quel è arrivà en bun urden a las indesch. Essend il past prest pinà, ha dunna Gnagna cumenzà a plazzar ils giasts; ma fin che quels èn sa mess a maisa, vulain nus far ina visita a la cuschina. En quella ardeva dus fieus e sa chattavan bleras padellas sin ed enturn la platta; tuttas fimavan sco charvuneras e faschevan ina chalira en cuschina sco en l’enfiern. Davos la chasa sa chattava ina bella chaldera emplenida cun da tuttas sorts charns. Gnagna ha alura fatg inspecziun en cuschina ed ordinà co che las tratgas haja da vegnir servidas. Uss èn ils giasts vegnids plazzads a maisa; a la maisa principala avev’ins postà il signur plevon; da vart dretga da quel han il spus e la spusa prendì plaz e visavi quels sesevan ils geniturs; alura èn vegnids parents e fragliuns, amis ed enconuschents tenor usit da la cuntrada. Nunspetgadamain è anc cumparì in nov giast, il qual nagin n’aveva spetgà per quel di, numnadamain – Albert Caleira, il figl da la chasa. El aveva obtegnì da signur Vertugli il permiss da returnar en patria per intgins dis per pudair prender part da las nozzas da ses char frar. Pervi d’ina ferma burasca sin il Lai da Lecco era el s’entardà per in mez di e n’aveva betg pudì arrivar a temp a Mon, cumbain ch’el era passà per Salouf e Del per anc pudair arrivar a la copulaziun. Albert è vegnì beneventà da tut la famiglia e dals giasts preschents cun gronda curtaschia ed ha immediat stuì sa metter a maisa sper sia giuvna quinada Adelina ch’ha gì in’allegrezza particulara che ses quinà era vegnì uschè da lunsch per sa participar da l’entira festa da la famiglia.

Il past ha prendì uss si’entschatta, ed ils giast han fatg tutta onur a las plattas servidas. Nus na vulain betg descriver tut las tratgas ch’èn cumparidas sin maisa, cumbain che l’entir gentar era fitg solid e sa distingueva favuraivlamain da blers pasts da festa dal temp modern, ils quals fan dapli parada cun vaschella custaivla che cun quai che quella cuntegn. A tuttas quatter maisas regiva in’ilaritad plaschaivla, libra da tutta canera indecenta e sfranadadad. Il padrin da Tgetg ha pli tard purtà in bel toast a la nozza, en il qual el ha engrazià al spus ed a la spusa en num da tut ils giats per la curtaschia ch’ils novs conjugals hajan gì d’envidar tut ils preschents ad ina festivitad uschè plaschaivla. Tut ils nozzadurs han intunà frestgamain il viva ch’il padrin aveva proponì e purtà. Suenter ina curt’urella è s’auzà il plevon ed ha tegnì in pitschen discurs. El ha cumenzà: «Mes buns giasts da nozzas! Nus avain celebrà oz in fitg impurtant di. Noss bun Tgetg è oz s’allià per sia vita entira cun sia fitg stimada ed onurada spusa Adelina Gometti. Il pass en il matrimoni è adina in mument da grond’impurtanza en la vita da l’uman. Tenor la lescha divina na datti en il matrimoni nagina separaziun, nagin divorzi. Ils conjugals èn obligads da sa tegnair ensemen en dis d’allegrezza ed en dis da tristezza e disfortuna. Ils dis da cumbat na restan mai spargnads als matrimonis. En blers da quels auza suenter paucs onns la miseria sia testa e mida ils dis d’allegrezza en dis da cordoli. En auters matrimonis na gartegian ils figls e las figlias betg, u per negligientscha dals geniturs u tras l’influenza da nauschas cumpagnias, da las qualas ins na po betg adina pertgirar la giuventetgna. Disgrazias da malsognas, perdita en la substanza pon fitg savens render amara la vita dals conjugals. Insumma passan ils dis da matrimoni darar en allegrezza sco il di da las nozzas; perquai hai num da passar cun egls averts en quest impurtant stadi. Ils pli fortunads vegnan ad esser en il matrimoni quels conjugals che fan adina lur duair, sa regordan adina da quai ch’els han empermess al spiritual a l’altar e vivan tenor la lescha divina. Noss Tgetg e sia dunna onurada èn tuts dus educads uschia ch’els enconuschan lur obligaziuns envers Dieu, vers auters umans sco er lur duais matrimonials e nus pudain sperar ch’els n’emblidan mai quels, anzi ch’els dettian adina curaschi in a l’auter da tegnair lur empermischuns. Els na vegnan mai ad emblidar che la vaira fortuna e beadientscha n’èn betg da chattar auter che en Dieu, ed a Dieu vulain nus recumandar noss Tgetg e sia spusa!»

Suenter quest discurs dal plevon ha la societad da nozzas fatg ina pausa. I pudeva esser circa las trais; la giuventetgna, mats e mattas, ch’eran a nozzas, èn sa divertids uss in’urella cun gieus e tramagls; ins è schizunt ì en clavà ed ha empruvà da ballar in pau sin l’iral en il ritmus da las melodias d’ina tiba. Ils giats pli vegls sesevan a maisa e discurrivan dal temp passà e da las novitads da la terra. Albert è sa profità da questa pausa per discurrer cun ses geniturs e fragliuns, cun ils quals el aveva pudì discurrer be pauc durant il past, essend ch’el seseva sper sia quinada Adelina e l’aveva da raquintar bleras novitads da Bergamo. Discurrind talian cun quella, aveva el pudì confidar ad ella a maisa diversas novitads, senza che quels che sesevan datiers, avessan chapì il cuntegn da lur discurs. Ma Adelina ha fatg egls gross, udind da questas chaussas da ses quinà. I sa tractava numnadamain da nagut main che d’ina segunda maridaglia, numnadamain d’in matrimoni dad Albert Caleira cun la signurina Catharina Vertugli, figlia da signur Vertugli, soci da Tgetg. Albert crajeva d’avair scuvert a sia quinada Adelina ina chaussa absolutamain nova; ma Adelina ha confessà ad Albert che Catharina l’haja confidà gia avant blers mais ch’ella amia Albert e ch’ella speria che quel na saja betg insensibel per ses sentiments d’amur. Vesend Albert che sia giuvna quinada enconuscheva gia la part essenziala da quest’istorgia, ha el raquintà tut e spezialmain er ch’el saja vegnì questa giada a chasa per dumandar da ses chars geniturs il permiss da pudair spusar Catharina. Signur Vertugli saja cuntent d’al dar sia figlia e d’er procurar per ses avegnir a sia cumplaina cuntentezza. Adelina ha approvà quai che Albert vuleva far, sincerond che Catharina Vertugli saja en mintga cas ina giuvna sco ch’ins chattia darar ina tala. Ella saja prudenta, diligenta, adestra e scorta ed er oravant tut religiusa e d’ina morala exemplarica. Albert è s’allegrà dals pleds da sia quinada, sperond che quella sustegnia sia supplica als geniturs, sche quels na fissan betg pronts d’al dar il permiss da spusar si’amanta.

Albert è uss ì durant questa pausa en chasa a tschertgar la mamma; el l’ha chattà en cuschina, nua ch’ella preparava cun agid da las cuschinunzas las ultimas tratgas. Avend uss rugalà e preparà tut per la fin dal past, è ella ida cun Albert en stiva, nua che mamma e figl eran bel sulets. Albert ha rapportà tut las novitads da Bergamo e da ses viadi. El aveva diversas giadas avert la bucca per cumenzar in nov discurs davart ina chaussa che pareva d’al squitschar il cor. Finalmain ha el piglià curaschi e raquintà a la mamma dal turment da ses cor e dals plans ch’el aveva fatg da spusar Catharina Vertugli ed ha alura supplitgà la mamma per ses consentiment e per l’intercessiun tar il bab a sia favur. La mamma ha replitgà che questa chaussa dependia il pli fitg da Tgetg e da sia consorta Adelina; quels enconuschian la famiglia Vertugli e sias relaziuns, sco er las qualitads da la giuvna ch’el veglia spusar. Sche Tgetg ed Adelina possian recumandar quest matrimoni, sche sajan ella ed il bab franc cuntents da dar lur consentiment per quest matrimoni. Albert è stà cuntentissim cun questa resposta ed ha embratschà cun impetuusitad sia chara mamma ch’aveva discurrì cun tanta raschun e giudizi.

Entant avevan las cuschinunzas e la matta da cuschina pinà danovamain las maisas cun novas delicatessas, cun groma, veschlas e fuatschas da tuttas sorts, ed ellas han uss clamà natiers ils giasts che sa divertivan per part en il clavà, per part en la sumbriva davos la chasa. Tut ils giats èn danovamain s’approximads a las maisas ed han occupà lur plazzas d’avant. Anc in’ura circa ha durà il legher past da festa, alura han ils giasts bandunà en diversas gruppas Sanagn, ils ins per ir a Stierva, ils auters per sa render a Mon ed a Del. Tgetg ed Albert han anc accumpagnà il signur Morin e sia famiglia fin Casti ed èn returnads pauc avant la notg a Sanagn. Essend uss tut ils nozzadurs absents, è la famiglia Caleira sa messa a maisa en stiva per anc discurrer en famiglia. Scadin ha gì da raquintar insatge da la festa dad oz. Ma Albert ha uss er anc stuì rapportar da Bergamo e da ses viadi a Sanagn. Pir tard è entrà questa saira il ruaus nocturn en la chasa da Sanagn, ed ils geniturs, Peder e Gnagna, n’han anc betg chattà il ruaus, avend Gnagna uss anc da relatar a ses bun consort la fatschenta dad Albert. Peder ha fatg egls gross, udind che er ses figl Albert veglia maridar; ma sia dunna Gnagna al ha pudì calmar, al descrivend la buna partida che Albert duaja far. Peder è sa laschà persvader ch’el duaja dar ses consentiment a quest nov matrimoni.

L’auter di è Albert cumparì sez davant ses geniturs ed als ha supplitgà da vulair approvar si’intenziun da maridar la signurina Catharina Vertugli, sincerond che quella saja en tuts rapports ina giuvna da vaglia, quai ch’era il frar Tgetg e la quinada Adelina stoppian attestar. Tgetg e sia giuvna dunna eran gist quest mument returnads d’ina spassegiada, ed udind da tge ch’i sa tractia, han tuts dus confermà la buna opiniun che Albert aveva da la giuvna, la quala el vuleva spusar. Ils geniturs, udind quest laud general da la giuvna, èn sa declerads cuntents cun quest matrimoni da lur segund figl. Cura che quest matrimoni duaja vegnir conclus, n’è betg anc vegnì precisà, essend che Albert ha declerà ch’el stoppia en mintga cas far sias nozzas a Bergamo pervi da la famiglia da sia spusa. Peder e Gnagna avessan preferì che Albert fetschia sias nozzas a chasa, han però chapì fitg bain che lur char figl stoppia pli u main prender resguard da la famiglia Vertugli; percunter ha Albert empermess dad immediat suenter sias nozzas far ina visita a Sanagn, per che ses buns geniturs emprendian er d’enconuscher sia dunna. Uschia aveva Albert uss conquistà da ses chars geniturs quai ch’el aveva giavischà, ed el ha declerà ch’el stoppia gia returnar en trais dis a Bergamo, essend ch’el saja là en absenza da Tgetg, absolutamain necessari en l’affar. E propi, il terz di suenter las nozzas da Tgetg è Albert partì per Bergamo, accumpagnà dals auguris dals buns geniturs e fragliuns. Tgetg e sia dunna però, a la quala la cordiala simplicitad dal sir e da la sira e dals fragliuns da Tgetg plascheva uschè bain, han concludì da restar anc dus mais a Sanagn. Cur ch’è arrivà il temp da fanar, gieva Tgetg a segar cun ses bab Peder, sco sch’el fiss in famegl da la chasa; er Adelina empruvava da sa far utila a Sanagn. Ella gieva cun sias duas quinadas giuvnas a far or chanvads ed a raschlar e sa sentiva fitg bain d’esser uschia en moviment. Tgetg fascheva alura er spassegiadas cun sia giuvna dunna en la muntogna, e la buna aria alpina aveva dà ad Adelina ina parita e tschera da muntagnarda, ed ella sa sentiva bler pli ferma e robusta ch’ils onns precedents.

En la segunda mesadad da l’avust ha Tgetg tuttina stuì pensar a ses return a Bergamo. Il di da la partenza è arrivà. L’entira famiglia da Sanagn era trista, e betg main tristas eran las duas persunas che duevan partir. Adelina ch’aveva chattà a Sanagn buns e chars geniturs ed ina nova patria, spundeva gia la saira avant la partenza grossas larmas da stuair bandunar quest lieu, nua ch’ella era danovamain daventada il member amà d’ina famiglia simpla, ma buna e fitg respectabla. Ella ha empermess a sia buna sira da returnar in’autra giada a Sanagn, uschè prest sco che quai la saja pussaivel. Il mument dal cumià dolurus ha Adelina strenschì sia buna sira vi da ses sain e l’ha surdà in pachet cun la supplica da vulair retschaiver dad ella questa chaussetta. Gnagna tegneva anc brancada sia chara brit e guardava en sia fatscha cun in’egliada uschè charina ed amuraivla che Adelina ha be cun il pli grond sforz pudì far ina fin a questa scena. La finala ha Gnagna ditg: «Dieu vul en quest mument nossa separaziun; ma nus vulain avair speranza ch’El ans dettia in bel revair! Giai uss oramai, mes chars uffants! Dieu as protegia en terras estras ed as dettia la forza da pudair viver adina en sia grazia.»

Tgetg ed Adelina èn sa mess uss sin via, accumpagnads dal frar da Tgetg ch’aveva da purtar in pachet dals dus viagiaturs. A Casti aveva el gia il di avant empustà dus chavals, cun ils quals el vuleva viagiar fin en Bregaglia. Ses viadi era stà fitg agreabel; be passond la bova da Plurs han ils dus viagiaturs sentì immensas dolurs, cur ch’els han vis la terribla fossa che tegneva sepulida l’entira famiglia Gometti. Arrivads a Bergamo è Tgetg restà sco avant ses matrimoni activ en l’affar sco soci da signur Vertugli. L’affar ha flurì adina dapli e fascheva grondissimas fatschentas, da maniera che la facultad da Tgetg s’engrondiva d’in onn a l’auter. Suenter in mez onn ha Albert fatg nozzas cun la signurina Catharia Vertugli. Il sir al ha mess a disposiziun ina dota da 50 000 rentschs, cun ils quals el pudeva operar a ses plaschair. Essend Albert ina testa speculativa, ha el pensà da fundar insanua in agen affar. Stuend far en curt temp in viadi per l’affar da Bergamo, è el vegnì sin quest viadi er a Verona, nua ch’el ha gì chaschun d’eriger in agen affar. La proxima primavaira vuleva el sa collocar a Verona e cumenzar cun ses nov negozi. Ma anc avant vuleva el far ina visita a Sanagn cun sia giuvna dunna. Igl era vers la fin d’avrigl, cur ch’el è ina saira arrivà nunspetgadamain a Sanagn cun sia Catharina. La famiglia Caleira ha retschet er quests dus uffants cun allegrezza, ed Albert e sia dunna han passentà quindesch dis fitg agreabels en la famiglia dals geniturs. Gnagna aveva in dun particular d’immediat enconuscher la valur da las persunas, cun las qualas ella aveva chaschun da sa conversar. Ella è immediat s’accurschida che sia nova brit era ina dunna da gronda pietad e d’in excellent caracter ed è s’allegrada da quai. Ils dis da questa visita èn passads fitg agreablamain ad Albert ed a sia dunna e pir memia prest han els stuì pensar a lur partenza da Sanagn. Ils parents han empermess da returnar in’autra giada a Sanagn, uschè prest sco che quai als saja pussaivel.

Il pachet che Adelina, la dunna da Tgetg, aveva surdà a sia sir Gnagna il di da sia partenza, aveva cuntegnì 500 rentschs en pezzas d’aur. Quai era in regal che Adelina vuleva far a sia buna sir, per la quala ella aveva piglià ina profunda affecziun ed amur. Ils custs che la famiglia aveva gì cun Tgetg e sia dunna durant il temp da lur visita a Sanagn, aveva Tgetg bunifitgà per dapli ch’il dubel. Gnagna ha gì in pau scrupels da salvar questa bella summa; ma la finala l’è vegnida ina bun’idea. Ella ha proponì a ses um Peder da reparar l’abitaziun en l’auzada sura da lur chasa, uschia che Tgetg e sia Adelina hajan in’autra giada, cur ch’els vegnian en visita a Sanagn, pli gronda commoditad ed in alloschament pli agreabel. Peder è stà cuntent da far quai, chapind fitg bain ch’ina reparaziun da l’edifizi saja er avantagius per la famiglia. Quest plan è alura er vegnì exequì durant l’enviern e l’entschatta da la proxima primavaira. Els avevan engrondì l’abitaziun sura per duas stanzettas ed embellì las stanzas vedras. Cun il rest da la munaida regalada dad Adelina, ha Peder gì chaschun da cumprar in bel funs en la vischinanza da sia possessiun da Sanagn. Peder valeva uss sco in dals pli ritgs purs da Mon e Stierva ed ins respectava la famiglia da Sanagn en omaduas vischnancas. Ma spezialmain la famiglia da Sanagn era oravant tut respectada ed amada dals paupers, ils quals chattavan adina succurs ed agid tar la buna dunna Gnagna. Questa beneficenza ha er purtà fortuna en chasa; Peder Caleira era semper fortunà cun ses muvel, aveva onn per onn in’excellenta rendita dal muvel e da sia champagna ed ha engrondì uschia mintg’onn sia facultad. Ma cun la sanadad da Peder Caleira na stevi betg il meglier. Las bleras e stentusas lavur ch’el aveva da far durant quests blers onns da si’atgna economia al avevan la finala spussà da tala maniera ch’el pudeva apaina lavurar pli ses grond e bel funs. Per quest motiv ha el stuì far vegnir a chasa ses figl che serviva a signur Morin a Lantsch. Cun agid da ses dus figls giuvens e da sias duas figlias pli giuvnas ch’eran adina restadas a chasa, al èsi reussì da manar vinavant si’economia senza agid da forzas estras.

* * *

Trais onns eran gia passads dapi che Tgetg ed Albert avevan bandunà l’ultima giada la chasa paterna ed els n’avevan anc mai pudì visitar lur buns geniturs a Sanagn. Albert era sa stabilì a Verona e l’erecziun da ses nov affar al aveva purtà bleras stentas e blers quitads. El è vegnì sustegnì generusamain da ses frar Tgetg, il qual al aveva emprestà ina bella summa per ch’el possia cun forza metter en moviment ses affar. L’emprim onn n’era Albert betg segir dal tut che si’interpresa reusseschia; ma cun il segund onn ha sia fatschenta prendì in fitg cuntentaivel andament, da maniera ch’el aveva ils megliers aspects da far en il futur fitg bunas fatschentas. Ina chaussa al mancava, numnadamain ils servients ed impiegads dals quals el avess pudì sa fidar en tuttas situaziuns. El aveva numnadamain fatg tristas experientschas cun dus giuvens talians ch’el aveva emploià en ses affar. Quels eran stads infidels ed al avevan chaschunà in donn considerabel; perquai pensava el da far vegnir ses frar Paul a Verona ed anc in giuven parent da Mon, il qual el enconuscheva sco giuven talentus e giudizius. El ha manà correspundenza davart quella chaussa cun ses frar Tgetg a Bergamo, e quel ha approvà ses plan ed è s’offert da stimular ils geniturs a Sanagn ch’els laschian vegnir il frar Paul a Verona. Quella chaussa era però in pau difficultusa, essend ch’ils geniturs avevan fitg da basegn da Paul a chasa. Ma nunspetgadamain è quella chaussa sa midada per da bler. La sora Mengia ch’era stada fin uss a Lantsch tar la famiglia Morin era returnada l’ultim atun a chasa a Sanagn, essend intenziunada da maridar. Ses spus era in prudent giuven da Lantsch cun num Giusep Tragn. A quels na plascheva il giuven Tragn betg mal, essend ch’el giudeva ina buna reputaziun ed era, sche betg ritg, sche tuttina en possess d’ina bufatga facultad. Il giuven dueva sa preschentar ils proxims dis a Sanagn per dumandar dals geniturs il maun da Mengia.

La saira, cur ch’ils uffants eran gia a letg, han Peder e Gnagna tegnì cussegl tge che saja dar far en quella chaussa. Na chattond Peder betg in chantun per metter en urden questa fatschenta, ha Gnagna ditg: «Taidla, mes bun Peder, tge ch’è mia opiniun. Nus pudain dar nossa Mengia a Giusep Tragn; el è in giuven da vaglia. Nus pudessan alura forsa surdar noss’entira economia al Tragn sut cundiziuns favuraivlas, e nus pudessa viver da la discreta entrada che noss bains ans purtassan. Noss figls, Tgetg ed Albert, èn s’offerts d’ans mantegnair bain a lur custs, senza che nus stoppian lavurar sco galiots. Jau sun persvasa che noss dus figls n’han betg fatg ina tala offerta mo per sa far da gronds Noss Paul po alura ir a Verona tar Albert e forsa che er noss figl il pli giuven chatta ina plazza tar Albert u tar Tgetg. Ti ed jau e nossas duas figlias giuvnas avain lartg avunda en noss’abitaziun sura, e lavur vegni bain er ad esser pussaivel da procurar a nossas figlias. Ed uss, tge dis ti, mes char Peder, da quest plan?»

Peder, disà d’adina metter sia confidenza en l’agir da sia buna dunna, è sa mussà fitg cuntent cun quest plan ed ha empermess da discurrer en quest senn cun ses schender vegnint. Vegnind quel la proxima dumengia a Sanagn en visita, ha el dumandà dals geniturs Mengia per sia spusa e Peder al ha declerà ch’el e sia dunna Gnagna sajan cuntents d’al dar lur figlia. El ha alura er fatg menziun ch’el e la dunna fissan disposts d’al surdar l’entira possessiun a Sanagn sut fitg bunas cundiziuns. Tragn è immediat sa mussà pront da far in contract en chaussa. Gia quel di èn els vegnids perina davart las cundiziuns principalas. Dus dis pli tard è Tragn returnà a Sanagn per far perfetg quest contract. Els han fatg ina taxaziun da tut il muvel e dals auters animals da chasa, e Tragn è s’obligà da surdar, cur ch’il contract duess vegnir schlià, a ses sir animals per il medem import. Insumma eran Peder e Tragn sa cunvegnids uschia che tuts dus eran e savevan esser cuntents da lur convenziun. In mais pli tard han Tragn e Mengia fatg nozzas e Peder ha dalunga surdà a ses schender si’entira economia. Paucas emnas pli tard è Paul partì per l’Italia per ir a Verona tar Albert.

La primavaira ch’era stada bellissima quest onn gieva gia vers la fin; ma ella aveva purtà tristezza a la famiglia da Sanagn. Peder è daventà vers la fin da matg seriusamain malsaun. Gnagna aveva immediat fatg annunziar quai a ses figls en l’Italia, e Tgetg, retschavend questa brev da la mamma, è sa decidì dad ir dalunga en visita a Sanagn. Communitgond Tgetg si’intenziun a sia chara dunna, al ha quella rugà e supplitgà ch’el la duaja er prender cun sai ensemen cun lur poppin. Tgetg è bain sa starmentà da far in uschè lung viadi cun in uffant d’ina vegliadetgna uschè tenera; ma el n’ha betg pudì resister a la supplica da sia buna dunna. La gronda part dal viadi han els pudì far en char e cun la nav, e davent da Clavenna ha el prendì dus chavals ed els èn arrivads cun stenta a Bivio. Il quart di è Tgetg alura arrivà a Sanagn paucas uras avant ch’il bab Peder moria. L’entira famiglia era en gronda tristezza; spezialmain inconsolabla era la buna dunna Gnagna ch’aveva vivì tants onns en in’armonia e concordia exemplarica cun ses um paschaivel. Tgetg e sia dunna abitavan durant ils dis da lur visita a Casti, na vulend betg chaschunar incommoditad a Sanagn. Suenter la sepultura ha Tgetg discurrì cun la mamma e la vuleva animar da vegnir cun el e sia dunna a Bergamo; ma Gnagna na vuleva betg far quai, schend ch’ella na possia betg bandunar Sanagn, nua ch’ella saja stada uschè fortunada cun ses um. Vesend Tgetg ch’el na possia betg stimular la chara mamma da bandunar dal tut Sanagn, l’ha el rugà da vegnir almain en visita a Bergamo; el veglia spetgar a Casti fin che sajan passadas tut las funcziuns funeralas e las s. messas per il bab. Cun ditg rugar ha el la finala obtegnì da la mamma il pled ch’ella veglia vegnir per in curt temp a Bergamo. Tgetg e sia dunna Adelina han gì ina grondissima allegrezza che la mamma als vuleva accumpagnar a Bergamo. Tgetg ha prendì tut las disposiziuns necessarias per far il viadi a la mamma uschè facil sco pussaivel.

Lur viadi era bain stà in pau stentus, ma per l’auter fitg agreabel. La buna Gnagna è sa smirvegliada da las bleras bellas chaussas novas ch’ella ha vis sin ses viadi, ma anc bler dapli da la pumpa ch’ella ha chattà a Bergamo ed en l’abitaziun da ses char Tgetg. Durant il temp ch’ella è restada a Bergamo, è ella s’occupada per il pli cun ses biadi Peder. Tgetg aveva dà part als frars Albert e Paul che la mamma sa chattia tar el en visita. Paucs dis pli tard è Albert cumparì nunspetgadamain a Bergamo cun l’intenziun da prender la mamma, almain per intgins dis, cun sai a Verona, uschia ch’ella emprendia er d’enconuscher sia famiglia. Avend fatg questa visita a Verona per cuntentar Albert, è ella returnada a Bergamo ed è alura vegnida accumpagnada a chasa, fin a Sanagn, da Tgetg. Ils figls avevan empermess a la mamma da savens far visitas durant la stad a la mamma ed els èn er stads da pled. Quasi mintg’onn vegniva in u l’auter dals frars cun lur dunnas ed er cun uffants a Sanagn, e Gnagna ha gì, sco ch’ella aveva merità, ina bella saira da sia vita.

Indicaziuns bibliograficas

Transposiziun da la versiun en ‹romontsch fusionau› cumparida en: Annalas 6, 1891, p. 201–280.

Licenza