Su determinu

by Paolo Mossa

Già chi m'odias a tortu,1
Bella dea de amore,
Suffri nessi chi t'addore
Senza isperare

Suffri chi t’ame costante,2
Afflittu e fora ë sè;
Suffri chi morza pro te,
No amadu essende amante
Già chi, dura, ad ogni istante
Mi dàs tragos dae nou;
Già chi de s'affettu tou
Non ne so meressidore!
Suffri nessi chi t'addore...

Non merito pro te sia3
Dulche a su coro un'iscancu;
Ma non merito nemmancu
Tanta ingrata tirannia…
In dit'est sa culpa mia?
Cales sunu sas affrentas?
Ahimè, chi mi turmentas
Ca t'amo cun tantu ardore!
Suffri nessi chi t'addore...

C'hapo in t'amare insistidu,4
Affliggis tantu un'afflittu?
Si su t'amare est delittu,
S'est culpa su t'esser fìdu,
Chie mai non t’hat bidu
Reputa solu innozente,
Pro chi accisas veramente,
Cun su risu incantadore.
Suffri nessi chi t'addore…

Ses in sos risos grasciosa,5
Attraes cantu no crês,
Ses bella, giovana ses,
Ses frisca che una rosa,
Est impossibile cosa,
Su t’ïder e non t'amare:
Deves edducas pensare,
Ch'a tortu m'usas rigore.
Suffri nessi chi t'addore...

A tortu m'odias forte,6
Contr'a rejone m'offendes;
Ahimè, forsi pretendes
Ch'amore a tie non porte?
Persighimi puru a morte,
Faghemi tiros in russu...
Non lassu mancu pro cussu,
De t’esser veru amadore.
Suffri nessi chi t'addore...

Non ti lasso pro chi attèra7
Non ch'ha che tue dechida;
Non ti lasso essende in vida,
Ca ses pro me vida vera;
Non ti lasso si suffrera
Sos turmentos de s'inferru;
Giuto unu coro de ferru
Chi no connoschet timore.
Suffri nessi chi t'addore...

Timire? non l'hapo a usu,8
Ca tropp'isco ite sun penas…
Cantu piùs m'avvelenas,
Tantu amada ses piusu.
Podet bene a punt'in susu
Currer s'abba de sos rios,
Però sos affettos mios,
Non cambiana tenore.
Suffri nessi chi t'addore...

Finis, azzertada resta9
Ch'immudabile eo so,
S'ispannet pro me o no
Custa orribile tempesta!
Tue intantu faghe festa,
Passa sas dies beatas,
Ma pensa chi sas ingratas
No han su Chelu in favore.

Suffri nessi chi t’addore
Senza isperare cunfortu,
Già chi m'odias a tortu!