Sulet

by Gian Fadri Caderas

[ 36 ]

Sulet.

Nun he ne duonna, ne infaunt,
Desert' ais ma chambretta!
Nun od üngün am dir: bainvgnaint!
Üngüna vusch diletta.

[ 37 ]

Üngün chaunet mieu clech am fo,
Intuorn, intuorn nu'm saglia.
Il vent cumpagn m'ais melprüvo,
Cur ferm dad our navaglia.

Allura od in la parait
Crider, con vusch pchadusa:
»Vainch ans sun uoss', in ün di fraid,
Morit ta chera spusa!«

»Tü l'hest smancheda e sulet
La vita uossa maina;
Tü hest volieu desert il tet;
Chalcho da pü d'na paina!«

»Tü la gürettast sench' amur
E l'hest poi bandoneda,
Usche la debla, zarta flur
In fossa gnit loveda!«

»Tü dist: nun he üngün acqui',
Desert' ais ma chambretta!
Be per ta cuolpa, bun amih,
Nun hest tü la duonnetta!«

Eau vögl respuonder, ma il vent
Dalöntsch fo ravaschia;
Del bun guaiteder od il chaunt
Clamer las duos sün via.

[ 38 ]

»Tü posast chera nel sunter'!
M'impais, t'he lönch smancheda!
Üngün non po pü brich m'amer,
T'aviand eau ingianneda!«

Ün sömmi nosch, zuond trid s-chodet
Ma povra fantasia;
Üngün al muond mê ingiannet!
E main te, dutsch' amia!