Sull'insensibilità nei confronti delle donne
Se malarà, per moeud de dì ona vacca,
on manzett, on vedell, ona buscina;
se corr in pressa a toeu de la triacca,
se va a Saronn a toeugh la medesina;
ma, se l'è on omm, no ghe n'importa on'acca,
anca ch'el vaga in l'ultema ruina!
«Costen sossenn i besti (disen lor)
e i omen nassen senza spend on bor!»
Se hin poeu donn che se mala, pover donn!
La pu part hin trattaa pesg che ne i cagn!...
Ch'in contra tucc, non ghen fan mai de bonn;
e, se patissen, l'è domà sò dagn!
Nè el speziee, nè el medegh de Saronn
ghe troeuven mai pu el cunt de fa guadagn;
nissun ghe va a trovaj, nissun s'insogna
de fagh la servitù che ghe bisogna!
E zert resgiò (canaja marcadetta!)
se no basta d'avègh minga de cura
e de no fa quij coss che ghe s'aspetta
per obblegh de giustizia e de natura,
i tègnen lì talment a la dietta,
che queighedunn van in la sepoltura
fors pussée per la famm, de quell che se sia
per iffett de tutt' altra malattia.
Tutta la sova cura la consist
in dagh quei gott de broeud amalastant
quand veden che no poden pù resist,
e che ghe manca el fiaa de tant in tant,
quand el curat el ghe consegna el Crist,
e che ‘l ghe dà el bondì con l'oli sant;
quand, in sostanza, per spiegamm pu prest,
hin pu de l'olter mond che nè de quest!
Pover donn disgraziaa! Cossa gh'è vars
el sò dovrà la zappa, el sò struziass,
se per la paga di sudor ch'han spars,
in ultem se redusen a sti pass!
Che el mangià che ghe dan l'è talment scars
che no ghe n'han assée de sostentass,
e no gh’han nanca on dì prima che moeuren,
de podè sagollass fina che voeuren!