Tönobsös, kelosi erivobs ya! (1)
Fölam flaga at, kelosi esepükobs ya in nüm balid, binom no te vemo veütik, so i levemo zesüdik anu, kelüp dinads in vpavol jinoms binön vemo kofudik, ze lügik e nog nemödo spelafulik. Kel labom lovelogami dö vpamuf in vol lölik, mutom läsevön vödis at as velätik. (Koefobs maniföfiko atosi, ibo no cedobs as velätik e pöfüdik, luglorön tefü pakam aigletobidik vpa e num gletik vpanas... [do tadil zitos], äs jenos liedo fa vpans teldik. Lugloram somik, ä feseilam jenas negönik e kodas, dub kels pekodedoms, no pöfüdoms, sod dämoms te dini. Ibo dub seivam kodas binosöv mögik, jafön sunüno menodi e deyufi.)
Lebalüdo lüvokobs-la vödis löpik utes valik, kels klödoms mutön devön paki vapükadöla e klödoms biselogön ya fini mufa lölik gönü vapük, bi elogoms du yels lätik ti valöpo pla mostepi te gestepi mufa vpk. E deno niludam at binom nog leno pegitöl. Ebinos vemo natik, das num vpanas pelunom. Ibo vemo mödiks, kels elenadoms begino ko zil e betikäl gletikün vpi, ifi sotimo luvelato te nedibäliko, ecedoms kanön volekön in lägleip balid lensumami vpa as pük bevünetik, ab emutoms ninlogön suno, das vob nefenik e ledul, vitims ainulik tima, mona e töba ebinoms zesüdik i fovo, al rivön mostepi te nevifik volapükadöla. Sikod uts, kels no elaboms leduli e vitimäli zesüdik ä uts, kels ilenadoms vpi demü kods e niteds votik dilo pösodik, bi ispeloms getön pöfüdis semkimik me vp, no ejäfoms fovo omi. So gestep mutom dilo paseplänön, kel esukom zesüdiko betikälame balid, flitäle gletobidik balid, ab te dilo; ibo dido kods e zits votik, dö kels epükobs ya in nüm balid, elükömoms, dub kels geflap evedom nog stenüdikum e meköfikum.
Deno no devobs plöpi finik vapükadöla. Sis desnobam säka, va vapük binom mögik u no, dub datuv volapüka, kel binom melid nedeilik söla Schleyer, efegoloms tö yels za 14. Vapükamuf binom nog vemo yunik e, ifi valikos jinos nog in kofud gletikün, no dotobs, das velätikos potuvos suno e poläsevos fino fa valikans. Bevüno blibodsöd fiedik vapükadöle, ab i fiedik volapüke nuik de Schleyer, bi binom bälamamed bevünetik bevü vpazüpels in vol.
Blibölsöd fiedik vpe nuik, mutobs lüvokön i utes, kels vipoms segivoti lulid nulik vödasbuka vpa, bi oninlabom segun ced omsik vödis mödik pemenodöl u pevotöl leo u dilo, i vödis penulofomöl fa datuvel vpa. Ailiko ced alima binom tefü vots... pemeköl, deno no dalobs vipön anu pübami vödasbuka nulik flanü dat. vpa. Ibo uts valik, kels no kanoms cedön plunumi votas pemeköl as menodis, no ogeboms omis spet. vödabuki nulik. Klu vpans paletas difik, kels pekokipoms jünu nog dub pük ot, no okanoms fovo kosadön ko balvotik demü möd votas, kels omekoms nemögik kapälnami fovik: Slit e teil vpanas obinom täno lölik e laik. Kod nog veütikum, demü kel no dalobs vipön anu pübami segivota nulik vödasbuka vpa, binom, das segivot deuto-volapükik no polovepolom luvelato in netapük sembal demü num pülik vpanas in läns dabalik. Ya folid pelovepolom te in netapüks nemödik (dido ebinom läbiko no vemo difik de kilid, so das kofud no ezitom). Ifi binos lügik, mutön koefön atosi, getobs deno se atos tlodi e speli fümik, das jen pidik at omütom fino vpanis valik al balam sunik, kels känüdiko vipoms - no deuli lölik, sod denu mostepi nulik e vifik vapükamufa. I söl Schleyer no okanom tasteifön lonedumo valüde mütöl jenas, voto elesevom fino it ab tu lato, das enosom vobädi lönik oka e emekom dämi gletikün oke it, kel ekösekom lifi lölik oka vapükadöle. Sikod monedobs nogna:
Se Volapük: Gased al pakam Volapüka 1894, Nüm: 2, Pads: 1-2.