Testamento de Orsora Baranza
-Mezza Quaresima 1
- TESTAMENTO
- Ancuoi 24 marzo 1927
Ió contadina ORSORA BARANZA
Sana d'intendaccio e anche de panza
Al mè notaro i deto ra me ultima volontà
E voi che chel che ordeno see duto rispetà.
Son vecia, presto śuda
El mondo me refuda
Ra me ultima ora r'é ca, el sento,
Presto, sior bariza, scrié el me testamento.
De duto cuor ve lascio, anche se son poereta,
Sperando che azetade, ra poca me robeta,
Tegnìra par ricordo de 'na femena polito,
Che r'arà rigà storto, ma r'à rigà anche drito.
A chi de ra tassa dei nubiles no i lascio nuia
E se i s'in à par mal ch'i bete su puntuia.
Dute chi luchete distribuii a chera tales
Che de dute 's'à da dì drio ra spales.
A chera cuatro bules 'na preghiera
Ch'es no se varde inze specio da mane a sera.
A chi che à paura de dà guadagno ai Anpezane
I lascio ra scomunica, che i no n é degne de esse cristiane.
A chi doi che ogni sera bate el stradon
Ei fato una suplica al arario, che l i daghe ra pension.
A Zubiana, zentro de gran cura
Par ricordo lascio chera pì dura.
A Cobe gran spazacamin
Par ricordo lascio ra napa e anche el camin.
Al cazador Arturo, che no ghin é un egual
I lascio 'na scatora de piroles che tira su ra moral.
A Meto el gran decorator, par racomandazion
Ch'el no dore pì petrolio, ma oio de chel bon.
A Ico de Tano che 'l pense ai fate suoi
Ch'el lasce r'ostaria e ch'el pense pì ai so fioi.
A ra banda lascio un inporto fenomenal
Perché i sone meo, anche al me funeral.
Ai Bigontines, poerete tanto boi,
I lascio chel bel pra con duto l'outigoi.
A Cuto dei Codes i lascio par eredità
Chel inpare a fei 'na fre de carità.
A chi alcuante S.P.
I lascio el foglio de via
Parché i passe el Missisipi.
Una racomandazion ai scatolere lascio
De no fei pì de chi laore che s'in va in fracascio.
Ai Hockeysti, śà che i à vento,
I lascio par ricordo una da zento.
I lascio al Paor nos canpionato
Che 'l i regale al Sport l'ultimo me piato.
A chi alcuante śogadore, che su dal Caffè Sport
i va a śuià,
I lascio un calmante che i no rue de se pelà.
R'ultima snopes che éi inze chel bozon
I ra lascio a duta cheres che alza el comedon
E che con ra scusa de ra cioures
'Es no vade a sbrindolon.
A madama Corea i lascio el me galon
Parché el 'l à da esse deboto stufo de i servì da baston.
Ai esercentes i lascio ra me coscienza
Parcé che a chel che par i à da esse senza.
Ai albergatore i lascio el faral
Chi vede polito canche i à da lieśe i parzente del parsonal.
A ra Cassa Rurale i lascio el bon sentimento
De no lascià indrio el povero, par servì al rico da strumento.
A Piero fazendon poereto, tanto bon,
Ra sia i lascio ancora par contentà ra popolazion?
Ai Filodrammatici, purché i no s'in ebe a mal
I lascio mile lires che i se paghe ra canbial.
E a chera societas soreles
Par se bete via res critiches i lascio ra scarseles.
Al lachè dei morte i lascio el radaor
Che 'l se feje śo el pelo che 'l à sul cuor.
De zerta bona lanes, che sà ben da ra contà
Tolé un consilio, fioi, no stajede a ve fidà.
A chi che no n à fioi, el viaso franco in Gardena
E che là via i s'in conpre una bona mesena.
A chi che d'un pules i fesc un caval
I lascio un automobile
ch'i s'in vade in chera val.
Ai ostes da Cortina i lascio un bon padrin
Per ogni vota che 'l é da bateśà el vin.
A ra lateria i lascio un'armenta
Parché no viene el tenpo che de late i se ciapa senza.
A ra Magnifica i lascio sode in cuantità
Par fei l'Hotel Bon Aga che 'l é de gran nezessità.
Del Sport invernale beśen che me pense bonora
I lascio mile lires che 'l no s'in vade in malora.
Al Circolo Cittadino i lascio ra me boria
E un baril de vin che i pode fei baldoria.
Al sior Sciaffetti una bona
Porzion de rispeto da i mostrà a so Madona.
A chel Albergator un pei da zento
Parcé che 'l paghe i boles senza tanto stento.
Al Munizipio dei mile par comedà
'Na fre da cristian el nos porteà.
Al ciasol i lascio un radaor
Degno de conpete coi feres del Dottor.
Ai brandui come me, poeretes, ce desperazion,
I lascio ra corona, ch'es vade in portiscion.
I lascio a chera femenes, ch'es à i ciaei pestize
Ra me paruca vecia con dute i so biei rize.
A ra toses del paes, cheres da maridà,
I lascio ra me voia parché 'es ghin ebe da lourà.
A Zane Carter i lascio un chilo de farina
Ch'el se ciate i pestariei canche el rua da Cortina.
I lascio a Tone chel bulo el me piter de ruoses
Chel res dore a se afezionà ra toses.
Ai caligare i lascio corame de chel pì bon
A pato chi no dore mai pì carton.
A Maglia tabachina i lascio i me vestis fruade
Che ra i pode portà d'inverno e anche d'istade.
A alcuante anpezane i lascio 'na racomandazion:
"Varda che dapò el gaudio vien senpre ra passion".
E a chi de ra stazion, ch'i se calme ra desperazion,
Chi no n à podù in chel di tirà el canpanon.
Ai bechere, poerete, i crescio su el calmier
Parcé che i pode vive senza pensier.
A ra Cooperativa i lascio 'na zesta de pan
Da 'l destribuì ai soce a ra fin del an.
E a chi por ponpiere ch'i no n à pì un cru inze cassa
I lascio alcuante mile chi se salve ra carcassa.
E a zerted'une de chi i lascio ra mondura
Parcé che col fó i feje pì figura.
Parché el no desturbe i siore, a Bino de ra scora,
I racomando ch'el no sone l'Ave Maria cojì bonora.
El Dio del oro i lo lascio a chel poereto
Parcé ch'el no se ciame pì "Por Naneto"
E a dute chi mecaniche che se fesc concorenza
I racomando che de grobaria i no se ciape senza.
E a chel dei tre metre de taren i lascio che 'l no more
S'el perde ra causa e el ciapasse un colpo al cuore.
E a chel so parente par cuestion
I lascio par consilio che 'l no staghe a finì de se marzì in chel cason.
Al me brao Vetrinario, che 'l é tanto puntual,
lascio el me fastide, ma che no 'l se feje mal.
Una lode po i ra lascio al me spezier
Che 'l é senpre bonario e svelto come el pensier.
A chera compagnia de destrutore de ra me selvaggina
I lascio na fre de mira, ma che i no feje na rovina.
Ades po ió credo de no n aé pì nuia da ve lascià
No vorae che par ringraziamento assade da ve stizà.
Se però algo m'aesse desmenteà,
Fajé el piazer dajeilo a calched'un par carità.
Stajé però atente de no ve lagnà e parlà massa sora
E senò śì a risćio de vignì, anche pede, ridude fora.
A Mario del Corona po dijei
Che zerta robes v'es fajé senza "Gei"
E che el lasce 'l onor a chi che 'l à
Dapò ch'i à fato na fadia da crepà.
- La testatrice Orsora Baranza
- Il notaio Barizza