toki soweli tan jan Beatrix Potter/soweli Pita

by Beatrix Potter

[ 6 ]

soweli Pita

 

 

tan jan Beatrix Potter

ante pi toki pona tan jan Ke Tami

 

 

[ 7 ]

soweli Pita

 

 

 

[ 8 ]

soweli Pita

tan jan Beatrix Potter
ante pi toki pona tan jan Ke Tami

 

 

 

[ 9 ]

 

[ 10 ]tenpo wan la, soweli lili tu tu pi kute suli li lon. ona li—

soweli Lawako, li soweli Sikeko, li soweli Monsiko, li soweli Pita.

tomo ona li nena pi ko ma lon anpa pi kasi suli.

 

[ 11 ]tenpo suno open wan la, mama ona li toki e ni: "suwi mi o, sina ken tawa ma pan. sina ken tawa nasin. taso o tawa ala ma kili pi jan Mekeke. mama mije sina li kama pakala lon ma ni. jan meli Mekeke li insa e ona lon pan."

 

[ 12 ]

 

[ 13 ]

 

[ 14 ]"o tawa. o ike ala. mi tawa weka."

 

[ 15 ]soweli mama li poka e poki, e ilo selo pi telo weka. ona li tawa ma kasi, li tawa tomo pan. ona li esun e pan suli, e pan tu tu wan pi kili lili.

 

[ 16 ]

 

[ 17 ]

 

[ 18 ]soweli Lawako en soweli Sikeko en soweli Monsiko li soweli lili pona. ona li tawa nasin, li poki e kili pimeja.

 

[ 19 ]taso soweli Pita li pona ala. kepeken tenpo ala la, ona li tawa ma kili pi jan Mekeke. lupa pi ma kili li pini la, ona li tawa anpa lupa, li tawa insa ma!

 

[ 20 ]

 

[ 21 ]

 

[ 22 ]open la, ona li moku e kili lipu laso, e kili pi palisa laso lili. ante la, ona li moku e kili loje pi anpa ma.

 

[ 23 ]ni la, ona li pilin jaki. ona li wile alasa e kasi namako.

 

[ 24 ]

 

[ 25 ]

 

[ 26 ]taso ona li kama lon sinpin pi kili palisa laso la, seme li lon? jan mije Mekeke a!

 

[ 27 ]jan Mekeke li anpa lon luka ona, li ma e kili sin. taso ona li tawa sewi, li tawa soweli Pita, li tawa e ilo ma lon luka, li kalama e ni: "o pini, soweli ike pi kili mi o!"

 

[ 28 ]

 

[ 29 ]

 

[ 30 ]soweli Pita li pilin wawa ike a. ona li sona ala e nasin weka la, ona li tawa lon ale pi ma kili.

len noka ona wan li kama weka lon kili lipu. len noka ona ante li kama weka lon kili pan.

 

[ 31 ]ni la, ona li tawa kepeken luka, kepeken noka. tawa ni li tawa wawa la, ona li ken weka - taso ona li tawa insa pi len awen kili. kiwen awen li lon len laso sijelo pi soweli Pita la, len li awen e kiwen jelo suno ni, li pini e weka pi soweli Pita.

 

[ 32 ]

 

[ 33 ]

 

[ 34 ]soweli Pita li pilin ike tan moli kama, li pana e telo mute tan lukin; taso waso li kute e kalama ona pi pilin ike. waso li tawa ona, li wile e pona tawa ona, li wile e tawa weka wawa tan ona.

 

[ 35 ]jan Mekeke li kama, li jo e ilo poki len, li wile poki e soweli Pita kepeken ilo. taso soweli Pita li kama tawa, li kama weka lon tenpo sama. len laso ona li awen lon ma.

 

[ 36 ]

 

[ 37 ]

 

[ 38 ]ona li tawa tomo lili ilo, li tawa insa pi poki kiwen. telo ala li lon poki ni la, poki ni li pona, taso telo li lon.

 

[ 39 ]jan Mekeke li pilin wawa e ni: soweli Pita li lon tomo ilo. ken la, ona li lon poki kasi. jan li tawa e poki ale, li lukin e ale.

tenpo ni la, soweli Pita li weka wawa e kon tan uta a—"mu!" jan Mekeke li tawa ona kepeken wawa.

 

[ 40 ]

 

[ 41 ]

 

[ 42 ]ona li wile noka e soweli Pita. soweli Pita li tawa lupa lukin, li pakala e kasi tu wan. lupa lukin li lili tawa jan la, jan Mekeke li ken ala tawa ona. kin la, wawa ona li kama lili tan alasa soweli. ona li kama sin tawa pali ona.

 

[ 43 ]soweli Pita li anpa e monsi tawa lape lili. wawa pi kon ona li lili. sijelo ona li tawa mute tan pilin ike. ona li sona ala e nasin pona. kin la, ona li telo tan telo pi insa poki.

tenpo li tawa la, ona li open sin e tawa, li tawa lili, li tawa lili, li kepeken ala wawa, li lukin.

 

[ 44 ]

 

[ 45 ]

 

[ 46 ]lukin la, lupa li lon sinpin; taso ona li pini. soweli sama soweli Pita la, lupa lili li lon ala.

soweli pi lili mute li tawa insa lupa, li kama tan lupa, li jo e kili lili, li wile pana e kili tawa kulupu ona. soweli Pita li toki tawa ona, li wile sona e nasin weka. taso kili suli li lon uta pi soweli lili la, ona li ken ala toki. ona li tawa e lawa ona tan poka tawa poka. soweli Pita li kama e telo tan lukin.

 

[ 47 ]ona li lukin sona e nasin weka la, ona li tawa poka ma ante. taso ona li ken ala sona, li nasa kin e lawa ona. tenpo ni la, ona li kama lon telo. telo ni la, jan Mekeke li ken insa e telo lon poki telo.

 

[ 48 ]telo la, soweli walo pi kalama noka ala li lukin e kala loje, li tawa ala a, li tawa e linja monsi ona taso lon tenpo. soweli Pita li sona e soweli pi kalama noka ala tan soweli sama ona Penjamin la, ona li wile ala toki tawa soweli alasa ni, li wile tawa weka.

 

[ 49 ]

 

[ 50 ]

 

[ 51 ]ona li kama sin lon tomo ilo, taso kalama li lon poka ona a: ilo ma li ka-la-ma, li kalama, li kalama. soweli Pita li weka tawa noka kasi. ijo ala li ante la, ona li weka tan kasi, li kama lon ilo poki tawa, li lukin lon sewi pi ilo ni. lukin a la, jan Mekeke li ilo e kili pi selo mute. monsi jan li tawa soweli Pita. suli la, lupa pi nasin weka li lon weka pi poka ante ona a!

 

[ 52 ]soweli Pita li anpa tan ilo poki kepeken kalama lili, li tawa kepeken wawa mute, li tawa lon monsi pi kasi pi kili pimeja lili.

jan Mekeke li lukin e ona lon pini, taso ni li suli ala tawa soweli Pita. ona li tawa anpa lupa, li pona awen lon ma kasi, lon weka pi ma kili.

 

[ 53 ]

 

[ 54 ]

 

[ 55 ]jan Mekeke li kepeken len laso lili ona, li kepeken len noka lili ona la, jan li pali e ilo pi sama jan. ilo ni la, jan li wile weka e waso pi alasa kili.

 

[ 56 ]soweli Pita li pini ala e tawa, li lukin ala tawa monsi. ona li kama lon tomo ona lon kasi kiwen suli la, ona li pini taso e tawa.

ona li pilin lape mute la, ona li kama supa lon ko ma lon anpa lon lupa tomo ona, li pini e lukin ona. mama ona li pali e moku. mama li wile sona e ni: soweli Pita li weka e len ona tan pali seme? ona li weka e len ante kin lon tenpo pini.

 

[ 57 ]

 

[ 58 ]ike la, soweli Pita li pilin pona ala lon pini pi tenpo suno.

mama ona li lape e ona lon supa lape, li pali e telo kasi. mama li pana e wan telo tawa soweli Pita!

 

[ 59 ]"o moku e ona wan kepeken ilo moku wan lon tenpo lape."

 

[ 60 ]

 

[ 61 ]

 

[ 62 ]taso soweli Lawako en soweli Sikeko en soweli Monsiko li ken moku e pan e telo walo e kili pimeja lon pini pi tenpo suno.

 

pini