Tops klilik e dagik su talaglöp, kelis logon se lutabalun
atimo: „lutatävel“ dänik, büo: julatidel.
Binos fluküp. Vien lukanitom; bimableds yelibik defaloms; böds moflitoms al sulüd fagik. Eko, liko gans foätik fovoms tävi osksik lonedik; lilö, lilö! - gans nefoätik su smalak luvokoms, ven ets flitoms ovü kaps omsik. Maupassant! kapälol obi, ven sevokob äs gan nefoätik: „tävön, tävön! fagü, lefagü Dän smalik“; hu! binos kalodik is. Tävön? Ab julatidel pöfik, kel evobom töbiko du yels tels in julacem smalik, liko kanom tuvön vegi? liko ogetom moni plo täv? Takedö julatidel! Memolöd, das blud melanik e poedelik gonom in veins olik; melan no li kanom tuvön vegi? Poedel no li kanom monitön su „pegasus“ okik? - No, no, binos tu vönik; if vilon fanön läbi in tim obsik datuvik, müton datuvön nulikosi anik; ab kis mütos binön? Nu nolob osi; vilob tävön in lutabälun; ni poedel ni julatidel sembal ebüfom atosi. Ab liko getön bäluni? A! binos nefikulik: omekob somi de satinaspul tika obik, kel binom leitik säto, e ofulob bäluni me gasin fäna obik; sölob lefulniko gasini at, sodas okanob ksänön e disön ma plid obik. Du lutatävam vilob loegön menis, fums tala, kels bumoms tümis de „Babel“ e de „Eifel“ e fäloms omis al denubumön. As tävel openob delabuki al konön vole löli, kelosi olilob e ologob. - Ab liedö! - kim okapälom motapüki obik plö Dän? Pük dänik binom te tof smalik in popasean püköl. Kisi dunÖn? Pükolöd deutänapüki! No, no; binos denu vönik; ab nu edatikob döli legudik: otelefonob al söl pädel Schleyer in Konstanz, e osäkob omi, va jison omik balsebalyelik, nemü „Jivolapük“, binof domo, e va mütof tävön ko ob.
Jivolapük pükof pükis valik; vilob binön „Moses“, mütof binön „Aron“ obik. If no tuvob ofi in Konstanz, otelefonob al Paris. Liladel löfik, mütob sagön ole kläniko, das söl plofed Kerckhoffs elensumom Jivolapük as käläb, bi klerel no mütom labön cilis; binos ta „ritus“. No ogolob al telefonön. Valadolös jü ogekömob ko gepük. Adyö so lonedo.
Se Volapük: Popabled e ninsadabled 1890, Nüm: 6, Pad: 23.