Tuvaböd

< Märs popa deutik

Blods Grimm

Äbinos sembalna fotel. Ägolom in fot al yagön, e ven äkömom in fot, älilom luvokön, äsif äbinos-la cil smalik. Äsukom luvokes e äkömom fino al bim geilik, e löpop cil smalik äsiedom. Mot cila islipof dis bim e lapinaböd ilogom cili in vüm ofa; iflitom usi, imosumom cili me tipamud e isiadom omi su bim geilik.

Fotel äxänom suso, äsumom cili diso e ätikom: „Osumob cili domo e odadukob omi kobo ko Lenchen obik“. Äblinom omi sikodo domo e cils at bofik äglofoms kobo. Ab pul pänemom Tuvaböd, bi pituvom su bim, e pipolom isi fa böd. Tuvaböd e Lenchen älöfoms balvoto, efe so vemo, das äbinoms lügik, ven no älogoms balvoto.

Ab fotel älabom jikukeli bäledik; atof äsumof sembalna vendelo vatagefis tel e äbeginof polön töbo vati, efe ägolof seo no balna, sod mödikna. Lenchem älogof osi e äpükof: „Sagolöd, Sanne bäledik, kikod deblinol vati so mödik?“ „If pömetol, das no otlätol osi mene ek, osagob osi ole.“ Lenchen äsagof, das no otlätof osi mene ek, e jikukel äpükof: „Model gödelo, ven fotel oyagom, okükob vati, e ven okukom in caf, ojedob Tuvabödi ino e okükob omi in at“.

In gödel nilikün fotel äsustanom vemo göliko e ägolom yagön, e ven imogolom, cils äseistom nog in bed. Lenchen äsagof nu al Tuvaböd: „If no olüvol obi, i ob no olüvob oli“. Lenchen äpükof nu: „Lilolöd; Sanne bäledik äpolof töbo ävendelo vati me gefs vemo mödik in dom, e sukü atos äsäkob ofi, kikod dunof atosi, e tän äsagof, if no osagob osi mene ek, osagof osi obe, e tän äsagob, das zelado no osagob osi mene ek, e tän äsagof, das okükof modelo vati at valik in caf e ojedof oli ino e okükof oli. Ab sustanobsös, klotobsös obis e mogolobsös kobo“.

Cils bofik äsustanoms nu, äklotoms vifo okis e ämogoloms. Ven vat äkukom in caf, jikukel ägolof in slipacem e ävilof deblinön Tuvabödi e jedön omi in caf. Ab ven äkömof ini e ätlidof bifü beds, cils bofik ämobinoms: e nu ävedof vemo tlepik e ätikof: „Kisi osagob, ven fotel ukömom domo e ologom, das cils mobinoms? Mutob sedön vifo dünanis po oms, dat ogetobs denu omis.“

Jikukel äsedof dünanis kil po oms; ats äsötoms gonön e geblinön cilis. Ab cils äsiedoms bifü fot, e ven älogoms gonön dünanis kil in fag, Lenchen äsagof al Tuvaböd: „If no olùvol obi, i ob no olùvob oli“. Tuvaböd äsagom: „Negelo olüvob oli“. Lenchen äsagof nu: „Vedolöd lolajöb, ob ovedob lolil su om.“ Ven dünans et kil äkömoms bifü fot, nos äbinos us ka lolajöb e lolil bal löpo, ab cils äbinons negeo. Sikod äsagoms: „Ekömobs vanliko isi“, ägoloms domo e äsagoms jikukele, das elogoms te lolajöbi smalik e lolili löpo. Jikukel bäledik äblamof: „O stupikels! isötols diköton lolajöbi e deblekön lolili e blinön omis domo; vifö, dunolsöd atosi nu!“

Ämutoms nu golön denu in fot e sükön. Ab cils älogoms omis kömön in fag gletik, e Lenchen äsagof: „Tuvaböd, if no olüvol obi, i ob no olüvob oli“. Tuvaböd äsagom: „Negelo olüvob oli“. Lenchen äsagof: „Vedolöd glüg e ob ovedob klon in om“. Ven dünans kil äkömoms usi, ätuvoms te glügi e in om kloni. So äsagoms al balvoto: „Kisi sötobs dunön nu? Ogolobs domo“. Ven äkömoms domo, jikukel äsäkof, va no etuvoms bosi, e ägepükoms: „No, etuvobs te glügi e in om kloni“. „O fops“, jikukel äblamof, „kikod no ädiblekols glügi e äblinols kloni domo?“

Nu jikukel bäledik it ägolof ko dünans at kil al deblinön cilis. Ab cils älogoms dünanis kil in fag gletik e jikukel älumufof oki po oms. Lenchen äpükof: „Tuvaböd, if no olüvol obi, i ob no olüvob oli“. Tuvaböd ägepükom: „Negelo olüvob oli“. Lenchen äsagof nu: „Vedolöd lulak, ob ovedob dök su om.“ Jikukel äkömof nu nilo e ven älogof lulaki, äseitof oki ovü om e ävilof sedlinön omi. Ab dök äsvimof spido al of, äsumof ofi me tipamud len kap e äzugof ofi in vat. Jimagügel bäledik ämutof nu vatadeilön. Cils ägoloms nu kobo domo, e äbinoms vemo yofik - e if no edeiloms, lifoms nog nu.