Vödem redaka, VpN 1949, Nüm: 2

VOLAPÜK.

Tü mäzul 31 ayela yels 70 upasetikons, das Volapúk pedatikon fa ‚Johann Martin Schleyer‛. To lobül gretik, keli pük at etuvon tio valöpo in vol lölik ün degyels balid dabina okik, proged ona no elaidälon. Obs valik sevobs kodis atosa. Feits mifätik, e pato i slit in Volapükavol, edavedöls pos kongred kilid in ‚Paris‛, elüblinons dine sublimik obsik dämi mu vemiki. If läükoy lä atos, das valemapüks mödik edavedons pos pub Volapüka, das aniks pükas at igo tikdoükons, das Volapük efinikon as valemapük, tän okanoy suemön, das obinos nog vemo fikulik ad vobädön, das pük obsik olabülon dönu pladi, keli digädon demü patöfs veütik oka. Tü gustul 16 yela: 1948 cifalam Volapüka eloveikon de söl: ‚Prof. Dr. Albert Sleumer‛ lü söl: ‚Jakob Sprenger‛. Spelobsös, das Volapük dü dug nämöfik cifala ovedonös suniko pük, kel in dakosäd bevünetik pogebon dönu as valemapük balik! E kevobobsös i obs valik, das disein at podagetonös! Dialimans valemapükas votik betikonsös, das vo no zesüdos, das län alik labon näi Volapük nog valemapüki lönik oka!

REDAK.

Volapükaklub valemik Nedänik: Doküms

Se Volapükagased pro Nedänapükans 1949, Nüm: 2, Pad: 5.