Vödem redaka, VpN 1951, Nüm: 2
Binos vo dinäds patik, kels ekodons, das ob pö bäldot vemo bäldik nu mutob calön as cifal Volapükanefa. Demü stad fikulik, kel ädareigon pos volakrig telid in Deutän, äbinos vemo vipabik, das cal cifala päbecalon fa no-Deutänan. Sekü kod at cifal telid: ‚Prof. Dr. Albert Sleumer‛ in ‚Bad Godesberg am Rhein‛ (Deutän) ejonädom kadämali: ‚Jakob Sprenger‛ in ‚Gams‛ (Jveizän) as fovan okik, ed elovegivom ome tü 1948 gustul 16 cifalami. Ko zil e lanäl cifal kilid eprimom vobodi okik, ab liedo no eknaom fiduinön oni. Maläd jeikik: paopläg äjedon omi sui malädabed ed ävedükon omi nefägiki ad jäfön fovo jäfediko. Mijenot at äkodon, das ma statuds cifalama kadämal: ‚J. G. M. Reynders Sr.‛ in ‚Den Haag‛ (Nedän) ämutom bitön dü maläd söla: ‚Sprenger‛ as vicifal Volapükanefa. Vüo in dom söla: ‚Sprenger‛ ye doküm no pidätöl pätuvon, sekü kel kadäman: ‚Johann Schmidt‛ in ‚Weiszkirchen am Taunus‛ (Deutän) päjonädom as fovan omik. Doküm at pedispenon fa söl: ‚Sprenger‛ tü 1950 yunul 8.
Bi Deutän nog ai pakoupon dub nämäds foginänik, e bolitastad kludo no ivotikon mödiko, äbinos nekludöfik de söl: ‚Sprenger‛ ad cälön Deutänani asä fovani okik, ifi söl: ‚Schmidt‛ dub skil, zil e lanäl oka pro Volapük binom pösod pötik ad bitikön as cifal. Pö ced at mutoy ye demön, das e söl: ‚Sprenger‛, kel äsenälom oki sauniki ä nämiki, äd älabom viläli vemik pro vobod okik, e söl: ‚Schmidt‛ no ispetoms, das loveikam cifalama özesüdon so suniko, efe büä stad in Deutän üvedon gönikum. Ven söl: ‚Schmidt‛ älasumom cifalami äklülädos kluo suno, das stad bolitik Deutäna nog äbinon tu negönik ad kanön jäfidön fruto demädü Volapük obsik. Pö atos äjenos zuo, das sekü famüladinäds söl: ‚Schmidt‛, plä bligs lönik okik as musigal, nog pätufledom dub vobod votik, sodas ün atim no äfägom ad bitön fuliko e fruto as cifal, e das kludo äbinos vipabik ad lovepolön nelaidüpiko votane cali at. Pro bligäd at evälom obi, asä Volapükani lanälik ä födani zilik Volapüka.
Löfo elüsumob cali cifala dü nelaidüp, e promob, das odedietob obi ma fäg bligäde obe pelovegivöle. Klülos, das ob soelik no ofägob ad jenöfükön diali, keli obs valik besteifobs. Yufidob kluo draniko valanis ad stütön e yufön obi mögiküno pö vobod veütik ä sublimik at oba.
Plakobs nog ai sekis teläla, kel edareigon büikumo in Volapükavol. Teläli at mödikans egebädoms ad jafön valemapükis nulik, spelölo ad kanön vikodön. Ab no bal steifas at esüadükon menis, ibä voto no datikoyöv ai dönu valemapükis nulik. Ad dämükön Volapüki igo no plafoy ad lesagön, das pük at binon deadik. Atos binon vo neletian, kel edämükon jenöfo vemo Volapükamufi. Sekü atos levüdob dialanis valik vola, kels senälons dranäli ad jenöfükön tikodi: valemapük bal pro vol lölik ad kobovobön nämöfiko, ed ad keyufön, alan ma fäg okik, ad jenöfükön spikedi de ‚Johann Martin Schleyer‛: Menefe bal, püki bal!
Vicifal Volapükanefa:
- ARIE DE JONG.
Volapükaklub valemik Nedänik: Doküms
Se Volapükagased pro Nedänapükans 1951, Nüm: 2, Pads: 5-6.