Vüd al bonedam

Atimo feit e dikod binom valöpo in vpavol, sodas suno no nolon, kis binos vp. velätik, kodü votamamobs mödik; sikodo äkanosöv jinön gudikün no lepakön püki obsik nepefinöl, büfü pükasevels egivoms ome fomi fimik e finik. Ab mütobs memön, das obs, kels vobobs plo vp., e kels te dubü spel kanobs konsefön nitedi obsik, nedobs stigami at, keli lepakam (agitation) läbik givom; e bi lepakam at te leseledo plöpom bevü nolels, mütobs golön al nenolels, demü kels i vpa-din lölik sibinom. I de kods votik mütobs pato lepakön bevü ats e mekön omis lenadön vpi; ibo te dubü tidön somes e senitön, li fikulik u li nefikulik vp. binom plo oms, kanobs plakön, va vp. binom säto gudik, u döfis kiom labom. Ibo al kis pöfüdos, das „Amoretti“ sembal kanom lenadön vpi du düps telsefol u studel sembal du dels anik, ven mens ut, plo kels vp. ebo pemekom, uts, kels no laboms timi u moni al lenadön pükis netik fikulik, mütoms studön vpi du yels mödikum nen lenadön deno penön omi kapälniko?

Ab kis pamekos atimo plo lepakam at? Pükats e tidüps popik pastitoms ba in tops anik, ab dübü literat te vemo nemödikos pamekos plo nenolels. Mödiküns de vpableds nuik ninoms laltügis so nolavik e geboms stüli so kompligik e fikulik, das mens, kels no binoms pekulivik pükaviko, no kanoms kapälön onis^[1]; (dido, äs vp. stadom anu, vpableds nolavik binoms veütikün, ab popikos i no mütos paneletön); zu binoms ofenüno so delidik, das no kanon bonedön, if no labon moni lemödik.

Lönäts at binoms lebadik plo bled popik; obs oblüfobs vitön onis.

Jü anu epübobs bledi at te plo läns nolüdänik al pakön us sevi e nitedi vpa bevü nevpels e beginels; sikodo pelautom dänapüko, e eninom a. s. glamati lölik ko liladaplägs e vöds. Ab nu glamat at efinom, sodas bonedels obsik nuik mütoms binön säto skilik al liladön vödemi vpk., e sikodo olautobs sis anu bledi at vpo. Ab täno i vpels selänik okanoms liladön omi, e kodü atos lofobs anu omi vpavole lölik. Äs büo vobobs pato plo nenolels, mens, kels no pekulivoms glamatiko u pükaviko, e plo kels binos ze fikulik lenadön vpi; e sikodo glezeil obsik binom penön vpi so nefikulik, das sägo vpels ze neskilik okanoms liladön omi. Ven binos mögik, ogebobs te vödis valemikün, e ovitobs fomis fikulik glamatik a. s. mögabid, putüp, stuks ladyekabidik e l.; zu openobs stüli klülik ko sets blefik e nekompligik. Nedobs ba töbo sagön, das obs, äs dänels valik, binobs fiedik kademe, sodas a. s. no gebobs püboti 4^id vödabuka de Schleyer.

Nin no obinom nolavik u nolelik, ab popik e nitedik plo valiks (cogikos de bid difik se lif jenik, nüns e laltügils tefü vp., lovepols de literat gudik, e sis nüm 7 personalia: bepenams liflik de vpels pesevik ko konils kaladik se lif omsik dolik).

Fino bled obsik obinom so nedelidik äs mögik; plo bonedels nulik yelÜp nulik beginom ko nüm at (plo bonedels büfik yelüp 1^id pafovom; sikodo: nüm 6, no: nüm 1): e yelüp at nulik oninom nÜmis 10, kels opuboms vifiko u nevifiko ma num bonedelas nulik, deno no vifikumo ka du yel bal.

Nüms at 10 kostoms fran 1,75 (mak 1,45 doab 0,35) sedam glatik; ab disein binom, das mödiks in top ot obonedoms kobo, e täno rabat so legletik pagivom, das suäm a nüm no ovedom gletikum ka ut delabledas valemik (log. suämalised in flan 4^id). SIkodo valiks, kels balamoms ko obs tefü plisips obsik, e kels vipoms liladön stüli nefikulik, knaoms i bonedön; e pato suflagobs cifefis klubas mekön klubis oksik lölik bonedön dubü sagön kopanales, li nedelidik bled at binom, li nitedik, li nefikulik liladön, li pöfüdik plo vpadin lölik.

Fino begobs liladelis obsik potön obes laltügis e l. de bid ot äs nin nüma at u votikosi anik, ven te binos nitedik u musamik.

Atoso komedobs obis liladeles flenik.

Plo redak
Ernst Lund

NOETS.

1. A. s. in klub obsik is in Köbenhavn lemödiks no kanoms sägo kapälön kopanalabledi oksik „Timapenäd vpk“, e otos zitos zelado i in läns votik.

Se Volapük: Popabled e ninsadabled 1890, Nüm: 6, Pad: 21.