Villotta
Peder Zeser Largh (XVII sec.-1755)
Villotta
Degià che sont chignova in su la strava
e voo passand ol temp senza dormiro
mi te vuj fà sentì se vœutt sentiro
ol mè amor, on sgrizzin de serenava.
Soo ben che te saree lì inscì soleccia;
ritiraa in cà a firà la toa stoppenna,
e che te faree forsi la pissenna
inscì da pos al lecc in te la streccia.
O che te ponciaret ol to collaro,
e te ghe taccaree on pizzin galènto,
per far ol to moroso tutto quènto
andar in brodo, e farlo desperaro.
Cara, tratt fœu chignò, lasset vedero,
no stà a pientamm chilò come on fustono
consóleme on pò ol fidego e ol polmono
no me lassar chilò comè on galbero.
Famm vedè cara tì quij bej oggitti
che m'innamoren tènt che nol soo diro,
che me fèn stà tanc nott senza dormiro,
e pϝ me leven anca l'appetitti.
I to oggitti me pèren dò bej stelli,
che hin pu lusurient de la lusnava,
e quij to ganassitt ch'hin de sgioncava
e hin inscì svernighenti e tanto belli.
Famm vedè cara tì quij to bocchini
tanto streccitt che pèren facc col fuso,
che fan ol pover Togn deslenguà in giuso,
e van disend a tucc: Femm di basini.
Senti che tucc i pols fan ticch e tocco
quand che voo sbarloggiend la toa peltrera,
e me senti andà giò tutta l'overa,
e pœù resti lì mutt come on liffrocco.
Quand saral mò quell dì tanti fortunati
che te consolaree ol mè fœugh ardento,
che tiro e mi se tiraremm arento
con tucc i man dol noster sciur curati?
E pettaremmo lì di bej fancitti
se te me zettaree per to consorto,
che te giuri d'ess to fina a la morto,
e la sbavazzaremm e tiro e mitti.
Sonènd ol calisson men vuj partiro,
e vuj lassatt chilò la bona notto;
soo ben che anch tì te faree inscì de botto
e la sbavazzaremm e tiro e miro.