Volapükaflenes
Pub vpagaseda nulik oplidom zelado Volapükaflenes valik, bi, pläs blöfön födami paisetenöl Vpa e flolami Vpakluba pemotöl bletimo, opakom aiumo väpüki Schleyerik, e omanifom feli nulik Vpanes skilik ai sepetön e bepükön dölis okas, e begineles al plägön püki. Zu obinom med nulik al lujafön züpelis yege menadik.
No nolob va Dilekel, pevälöl fa Konsälef dilekik Kluba at, oplidom leigo. Ni nolob va Konsälef, emeköl välami at, epölom umo, ud ob epölob umo lensumöl oti, du älesevob obi löliko nefägik. Deno elensumob komiti fikulik, ed osteifob al befulön omi so gudiko äs okanob. Elensumob omi löfü Vp., e diseinöl pato gönön e konsefön balami e flenügi bevü Vpans tälik e selänik netas alik.
Ates valik dabegob yüfi dub kevobam e konsäls, e spelob das no podenesioms obe, nag uplösenob plogami e diseini gaseda at.
Popübom balna a mul e ko mafs mükik, ünä yüfü kevobels e bonedels odalom papübön ofenumo e umo pesetenöl.
Olesävom spadi vidik plo nuns löpöfik, ponünöls fa Sekretef Pakamakluba Zenodik Vpa. Okulivom literati vpk, poblünöl fa laltügs rigik so äs fa lovepolots. Spodam netik e selänik, teföl vpafödi, popübom ai e nitediko. Ni posekikom bepükam tefü glamat, vödasbuk e stül väpüka nulik, ven omelidom konsidi. Sod ployegs e studs, oteföls pakami püka ot u gebami ota gönü ted, dustods e nols; bi väpük desänom pato gebami at.
Al nitedön liladelis obsik ut, kelis Vp nitedom te as seplänamed bevü pük netik e seläniks, laltügs dö nols, teats, tävs, südods netas difik poninsädoms, alikna spad ogevom osi; ni cogikos posekikos se bled obsik.
Tadilo te bolit e bepükams relik poisekikoms. Balug e födam väpüka Schleyerik obinoms zeil, keli gased at odesänom lepato.
Se Nunal 1889, Nüm: 1, Pads: 1-2.