Volapükans li binoms fopans?
Nog aisibinoms mens, sägo vemo pekulivöls, kels klödoms, das döl väpüka binom fopen gletik e das te dölodans nelisälik kanoms betikälön okis plo fopen somik.
Kod, das niludots pökik somik nog aisibinoms, binom das mens; kels so krütoms dö vp. e vpans, no laboms sevi sembal tefü väpük obas e pak gletik, keli erivom in dils alik tala.
No binos fikulik blöfön, das mens at pökoms e das vpans leno binoms fopans, äso klödoms mens at de krüt nedibik.
Vp. ya sibinom yelis balsetel. In tüp at balions mödikum penedas e spodakadas päpenoms, mens netas e pükas difikün äbinoms ed aibinoms in fetan me vp. e legudiko kapälomsok balvotiko.
Ob a.s. espodob du yels bals dö dins difikün ko Bodugänans, Deutänans, Fransänans, Grikänans, Nelijänans, Norgänans, Nugänans, Polänans, Rusänans, Spänänans, Talänans ed eikapälobs obis lefulniko.
Atos binon jenod, keli nek kanom denonön.
Kisi blöfom jenod at?
Blöfom, das vp. velato binom pük sovemo lefulik, das me om mens netas e pükas difikün ekapäloms okis lefulniko du yels plu ka bals.
Jenod at sibinom ed oisibinom jü fin menada. Sikodo vp. no binom fopen, sod pük velatik äso nelijapük, deutapük e. l., e no plu binos mögik denonön velati at.
Ab, sagoms dotälans et, vp. nevelo pulensumom fa mens valik tala e sikodo nevelo obinom väpük velatik.
Atosi gesagob.
Ven Kristus änotom gospeli oka, no älabom postalis plu ka balsetel; ed in timag oma no nog äsibinoms ped, gaseds, pot, stemavabs, stemanafs, telegaf, telefon e dins votik mödiks, kels binoms vemo flukik in pakön velati nulik; deno kritub edalopom voli.
Ab obs atimo labobs vätopo pedis, gasedis, poti, stemavabis, stemanafis, telegafi e telefoni e binobs postals vpa. plu ka balions tel, kels predoms e pakoms gospeli okas ko betikäl e ko düfug gletikün e so aimödom num vpanas de del al del äs blöfom gased alik vpa. Liko binos-li mögik dotön, das i vp. odalopom voli?
No-li labols logis e lilis o dotalans al logön e lilön atosi, kelos jenos in del alik? Lesi binols bleinik e sudik, bi vilols binön osi; ab obs, o menils! ailedulobsöd in pakön vpi. magifik obas, e volajen onotom cilaciles obas das vpans balid no äbinoms fopans, sod mens lisälik, kels ekapäloms timagi e nedi timaga okas. No plu sibinom dot, vp. odalöpom voli.
- Beyrouth.
Se Kosmopolan 1892, Nüm: 6, Pads: 89-90.