Vpamuf in vol (6)

Kadem bevünetik volapüka. (Ladet dilekela: S. Peterburg, Rusän, Gr. Pushkarskaya 20.) Zülags 11, 12, 13. Dil govamik: Km esludom, dat vobs kanoms mostepö vifikumo: »Kmal alik sötom sedön dilekele vögodi okik dö säks kademik so suno äs binos mögik; dilekel labom giti, no kosidö vögodis pegetöl posumo ka dels 65 pos mosedam säkas tefik.« So dilekel no nedom valadö in zids mödik vögodis kmalas lemäik segun § 13 statuda, if bevü kmals 29, kmals 15 evögodoms ya sunumo dö säk sembal me si. Söl katan Emanuele Bertolini in Torino pevälom as kmal plo Talän, zu kmals Guigues, Krüger, Licherdopol, Morel Plum, Sprague e Wood peväloms denu as kmals plo läns tefik plo els 5 suköl beginü 1894, VIII, 20. Kmals Runström, Actis, de Ugarte e Roussey esetlidoms se km demü kods difik. Söl Bernardino Fraga, kmal plo Ägüpä, pedismitom segun § 19 statuda, bi no egepükom zülagis kma du yel bal.

Dil pükavik: Segun § 1 zülaga 12 stäms za 120, kelis km ecedom as bevünetikum, sikodo i pötikum, ka stäms vpk, pesludoms denu. In § 2 lised stämas anik sukom, kels no pelensumoms fa kmals valik. In § 5 stäms za 80 pesevik valemiko, a. s. program, panoram, paragraf, profesor, protokol, rekrut, rektor, rosmarin, salut, sistem, statut, seminar, ter, tron, tarif, tribut, trompet, telegraf... pamoboms denu pla stäms vpk kmales al xämam. § 1 zülaga 13 tölatom säki, va söton lensumön i stämis ladyekik nen lägivam finota kaladik, a. s. brav, brev, konkav, malad, negativ, pur, rar, total... § 2 ninom kedi säkas, bevü kels binoms veütikün: Finot sembal kaladik li sötom pagivön subsates valik - u no? spet. finot kiom? Li söton gebön as vöds stämis finöl me kosonats 2, a. s. barb, bark, basalt - u no?

Dilekel, jonöl al dinad, das sukü sluds jünuik kma, pük, kel obinom finasek vobas kma, no obinom leigik püke pedatuvöl fa Schleyer, monedom kmalis no paflunön dub foms vpk, al kels obs (vpans) ekösömobs obis, ab memöl, das voboms no plo obs vpels, ab plo menad, sükön in tef alik fomis pötikum e no dledön votamis, if votams binoms togo menodams in tef aikiom.

Vpaklub Hannover: glelasam ozitom balul 10. (Nunod dö fegonod lasama osukom in nüm suköl.)

Penom obes se Graz:

Vpaklub zenodik plo Stirän estitom XII^ul 10^id setopami maniföfik vpadinas yufü e medü konlets liegik kluba e sölas anik.

Liegöf milagik e leodam leplagik yegas pesetopöl esüpitoms visitelis valik. Valiks ejinoms binön pesuadöl dö velat lesaga vpanas: vp binom jeno med leplobik melaka bevünetik! Ekanobs spelön, das sek töbas obsik obinom gudik; ibo pösods mödik e se zilaks difikün - profesans, fizirs, tedans, studels e l. evisitoms setopami. Pefinom dub pükat dö vp söla Dr. Karl Ludwig. Ab melidi, keli vpaklub zenodik dub setopam at erivom tefü vp, dilsumom vemo söl L. Zamponi, kela zil e ledul emögoms plöpi setopama at jönik. Del nilikün pebeginom tidüp maniföfik in topöf zifajula sembal. I dub gevam julacema at pebefulom vip ofeno pesepüköl vpakluba. Jünu pösods 35 dilsumoms tidüpi, keli cifom söl Drd E. Kollar.

Vipobs klube zilik seki gudik in dunöf oka al pakam vaküdadöla! Binom soelik segun nol obas, kel pakom nog ko sek gudik vpi. Red.

Se Volapük: Gased al pakam Volapüka 1895, Nüm: 7, Pads: 3-5.