Vpamuf in vol (7)
Vpaklub nolümelopik. Se zülags lepenädana s. Hutchin s datü 1895 balul 1., petiädöl »Annual greetings«, logobs liedo, das muf gönü vp in Nolümelop binom »slipöl«. Söl Huebsch emutom finön du yel sukü nelet dub vobs jäfik votik e sukü yuf nesätik finanik pübami fovoik nogana calik kluba »Volaspodel«. Lepenädan mekom senitik kopanales mufi gönü stitam vpagaseda gletik e suflagom yufö beginoti at. Fino pöfüds püka bevünetik plo menad panunoms e kopanals pabegoms, blibön fiedik klube i du yel at.
Vpaklub valemik nedänik. Äs nüm 12 de »Nuns blefik se vpavol« jonom, kopanalamöd pelunom ko 40, sodas klub numom in yel at kopanalis te nog 129, efe 111 in Nedän, 1 in Belgän, 6 in Lenidän nedänik, kopanalis spodöl 10 e stimakopanali 1 efe dat. vpa, s. J. M. Schleyer. Cifef osegivom i in yel at yelabuki, bisä ogetom yufi sätik e kovobami fa vpans nin- e selänik.
Vpaklub zenodik plo Stirän in Graz. Yelalasam kluba, ezitöl telul 11, pemanifom fa cif, s. plof. K. Zetter, ko beglidam kopanalas ikömöl numiko e lotas. Penädan s. E. Kollar ebililadom täno yelanunodi, kel jonom dunöfi zilik kluba valiko e pato sevälefa. Söl L. Zamponi egivom nunodi dö stad käda, kela dugam samik peläsevom vemo fa kädarevidels. Pötü väl nu suköl peväloms söls plof. Karl Zetter as cif (me lüvok), fovo me vögodazöts Ernst Kollar as penädan, Karl Pestemer as kädel, Ludwig Zamponi as bukakonletel e güfel, vl. Mary Reimoser, söls Josef Vaczulik, Dl. Johann Klasinc, Julius Frankl e Felx v. Gasteiger as läsiedels e as kädarevidels dl. Rudolf Bischoff e Franz Schwarzl. Du välam cif enunom beglidamapenodis, ekömol[1] numiko fa klubs e vpans dabalik. Poso du musam dlinapets anik dilo vpo pednoms, somo al vp e datuvel vpa, al klub de Graz, cif e sevälef, al läds kluba. Pelasamöls ebliboms kobo nog lonedo in musam gälodik.
Nunod dö klubayel kilid 1894 panindilom in nunods dabalik dö klubadunöf linedik e sevedik, dö stad käda, dö bukakonlet e güf, ninom fovo nog suvoki al kopanals kluba e vpans valik al pakam zilik vpa nuik e fino lisedi kopanalas leodik, yuföl e spodöl 75 (in äyel 71) e stimakopanalas (2). Du yel 1894 tidüp kilid ebeginöl 1893, XI, 8id, pefinom e tidüp nulik pebeginom XII, 11id denu cifü söl Kollar. Setopot vpadinas in kluböp ebügolom tidüpe at. Zu cif kluba epükatom gönü vp in banöp Karlsbad 1894, VIIul 28id in klub stenogafelas usik. Komotakonsälef zifa Graz egevom kluba julacemi as tidöpi in Franz-Josef jul, nak lub ibegom atosi telna vanliko.
Vpaklub Hannover: Lasam valemik kluba, balul 10, pemanifom pladalü cif fa kädel, söl K. Göritz, kel ebililadom yelanunodi pesedöl fa cif, s. Max Wahren, se kel sezükobs sukölo veütikünosi: «Dö mösteps patik vpa du yel efegolöl nos kanos liedo panunön». Kods, kels evolekoms gestepi vpa in yels lätik binoms: Pükavans ti valik elüvoms vpi e sukü atos i publüg efinom, cedön vpi as dini fefik e spelön, das ovedom vapük. Timü pak gletikün vikod vpa ekanom ba pavaladön. Ibo tiemo betikäl e vitimäl gletik esibinom, vapükasits votik no nog ipuboms e kosteifam omsik no enedom klu padledön, ye döfs e fibs vpa, pato vödasbuka, kels ekodedoms feitis dö menodam vpa, kel emutom ye palesevön fino as nemögik, no nog pininlogoms säto. Zu dil gletik vpanas cedom i nu nog jäfami vpa te as spoti u pledeni e no binom löbik, blinön mufe vitimis semkimik, pato materik gönü vpagaseds, nen kels vpamuf mutom depubön löliko. Leigo vpaklubs mödikün nog sibinöl binoms gledilo musamaklubs, dünöl te gälode kopanalas, ab no studes fefik vapükik. Sukü atos konfid vpanas it mödikün al vp pelunom vemo. Klu votam stada at o kanom paspelön, do datuvel vpa e züpels omik jinoms labön ainog lanimi gudik, bi plepadom sägo segivoti lulid vödasbuka gletik omik, dub kel stad valemik vpa pobadumom te nog. Sikod mutobs finön speli, das vp polensumom as vapük u luüno pakam somik vapükadöla porivom me om, das volekam döla no knaom fovo pastopön, do no dotobs geböfi vpa luüno plo diseins kösömik melaka bevünetik, kelos peblöfos säto. Ab dub stud nelucödätik vapükasitas votik, pato nulikün i obs, äs vapükaklubs de S.l Peterburg, Kopenhagen, Wien, Leitmeritz, Stuttgart, Hamburg, Königsberg, Paris . . . ekapälobs das pük te ut polensumom as melakapük bevünetik, kel pesubumom lepato se vödadiv bevünetik. Te pük at, dö kel kanon sagön, das sibinom jeno ya in volavöds son., melidom nemi: pük bevünetik (lingue internazional). Jafam püka at binom sugiv kadema bevünetik vpa e ifi vob pedunöl jünu binom nog vemo pülik visü podunölos nog e vobamod nevifik mutom pato pablamön, kopef at melidom deno yufami e födami nämikün, bi binom anu soelik, kel binom fefiko dunik al lüod at. Ye spel no binom nepegitöl, das vapükamuf, kel no kanom nu fovo pacedön ot äs vpamuf, ogetom denu mostepi gletik e vifikum me fünam pedesänöl vapükagaseda gletik nedeslopik e latumo ba kluba bevünetik, kela nogan gased et vedomöv«.
Nunod at peläsevom vemo fa klub. Pötü cifefaväl peväloms söls: Max Wahren as cif, K. Göritz as blacif, Fr. Wolf as penädan, Ludwig Wahren as kädan, vis: Marie Hogrefe as jibukakonletan e Anna Bültermann as jiläsiedel.
Vpaklub Königsberg: Segun yelabled lätik (dätü balsul 1894, keli egetobs te nu) num kopanalas kluba pemödom jü 115 dub nitlid kopanalas nulik 17. Tidüp nulik ibeginom zenodü balsul. Dil votik niom lisedi limalas kadema bevünetik vpa e yufelas omik, fovo konilis anik vpk.
Kadem bevünetik vpa. Zülag No. 14. Dil pükavik ninom plä ked stämas pesludöl, pesevik valemiko, kelas anikis enömodobs in nüm 7 gaseda at, sludis suköl veütik: 1) Stäm ut binom gudikün, kel patuvom as vöd netik u as foginavöd in glepüks yulopik mödikün. 2) stäms kelas glemalam binom ladyekik, sötoms pagebön as ladyeks nen lägivam finota kaladik, a. s. beat (beatik), rar (seledik), total (lölik). 3) Binos pedalöl, gebön vödis, finöl me kosonats 2, a. s. barb, bark, basalt. Zu ladyeks stämik 24 ya pemoböl valiks pelensumoms. Bi segun slud 1 i stäms, beginöl ko vokals, sötoms pamobön, bi stäms mödik somik sibinoms in glepüks yulopik, ab säk at labom kolagi nilik ko foms glamatik, dilekel nunom, das desänom bisiadön kmales ployegi lefulnik glamata, kel oninom nomis e fomis valik, i bisilabis e posilabis, ladvelibis veütikün stämik e pefomöl, pönopis, konyunis, numavödis e. l. Ma ced dilekela dölod püka bevünetik sötom labön lönügis somik, das 1) men alik pekulivöl nutima kanom kapälön )(u luüno rätön) vödemi pepenöl in pük at - nen lenadam patik püka, kelos binos lefulno nemögik in vp, e 2) penam segun oms glamata oma e yufü vödasbuk no sötom binön fikulikum ka penam vödema vpk. Te pük vemo nilik al dölod at kanom spelön, palensümön fa vol as pük bevünetik, e sugiv kma binom, jafön püki somik. - Ko glamat jünuik no binos mögik, stukön püki ko lönugs löpnik.
Dil govamik ninom kädanunodi plo 1894, fovi lisedi yufelas kma e lisedi kademalas it, anu 24. Kmals Krüger e Lederer egivoms dismiti demü eletams calik votik. A. Actis pamobom denu as kmal plo Talän.
Komedobs vpanes valik, kels no nog ebonedoms zülagis, dunön atosi, dat lesevoms it piano pos xamam takedik e nelucödätik, liko vapük füdik mutom binön e vedön. Ladet kädela kma binom Oscar Serck in S. Peterburg, Rüsän, al kel ninpelonös ruabi bal (plo yelüp bal; zülags puboms nu in yelüp telid). Bi potakomits no sibinoms al Rusän, redakel bleda at binom i vilöfik, lensumön e medön bonedis (ruab 1 = m. 2,30).
NOETS. (Vükifonät)
- ↑ Bükapök; pla: ekömöl.
Se Volapük: Gased al pakam Volapüka 1895, Nüm: 8, Pads: 3-6.