Wikisource

Wikisource:Paggena prencepale/Voce 'n vetrina

Jennaro

edit


Divina Commedia, è n'opera traducit'â fatica 'e Dante Alighieri pe Dummeneco Jaccarino e pubbrecata 'o 1870:

 
Ntra na boscaglia scura (Gustave Doré, 1857)

A meza strata de la vita mia
Io mme trovai ntra na boscaglia scura,
Ch'avea sperduta la deritta via.
Ah! quanto a dì comm'era è cosa addura
Sta voscaglia sarvaggia, e aspra, e forte,
Che mme torna a la mente la paura!
È tanto amara che pò dirse morte;
Ma lo bene pe dì che nce trovaje,
Dirraggio cose che non songo storte.
Non saccio manco dì comme passaje,
Tanto comm'a stonato m'addormette,
Quanno la vera strata io llà lassaje.
Ma pò ch'io na collina llà vedette,
Addò chella campagna se feneva,
Che 'ncore la paura me mettette;
Guardaie pe l'aria, e arreto llà vedeva
Li ragge de lo luceto chianeta,
Che dritte fa sorcà li figlie d'Eva.
La paura no poco fuje coieta
Che dinto a chisto core era durata
La notte ch'io passaie tanto scoieta.
Canto I


Frevaro

edit

'O Cantastorie, è n’opera ’e Ferdinando Russo e pubbrecata ’o 1895:

 
Triatro d'ê pupi

I.

— Ecco Linardo in campo! Il palatino!
’O palatino ’e Francia cchiù pputente!
Teneva nu cavallo, Vigliantino,
ca se magnava pe grammegna ’a gente!

Comme veveva, neh! Na votta ’e vino,
na votta sana, ’un le faceva niente!
Nu surzo sulo, nu varrilo chino!...
E se magnava ’e zzeppole, vullente!

Po’ teneva na spata, Durlindana!
Uh ffiglio ’e Ddio, e che poco ’ammuina!
Se sape! ’A manïava chella mana!


Marzo

edit

’O Nievo, è n’opera ’e Rocco Galdieri, pubbrecata int’’o 1919:

 


’O carcerato parla a ’o carceriere

– No, nun dicite ca i’ so’ comme a ll’ate,
pecchè i’ nun dico ca songo ’nnucente...
io ve dico: si stongo carcerate,
nun ve credite ca so’ malamente.
erite: si tenesse ’a penna ’e mmane,
i’ screvesse ’nu libbro ’e tutto ’o fatto...
Che vo’ di’ ch’aggio acciso ’o Nase ’e cane?
Isso s’ ’o ’mmeretava e i’ ’nce aggiu fatto!
’è?... Vuie scappate?... Ve fa ’mpressione
a sentì ca ’sti mmane hannu luvate
’n’ommo d’ ’o munno?... Embè... sentite bbuone
che ve dico... Sentite e.... nu’ scappate.


Abbrile

edit

Storia vecchia, è n’opera ’e Carlo Netti, pubbrecata int’’o 1913:

 

Pascalino

E mm’ ’o vuò dà a me? Ma me pozzo scurdà io ’e st’ammore?! Te può scurdà, tu?! Ah, Margarì… ’O iuorno ca t’avesse ’a perdere, io m’accido! E comme putarria campá cchiù luntano ’a Margaretella mia?! Siente a me; doppo tutto s’acconcia… S’à d’accuncià pe forza!

Margarita

Ma chello ca vuò fà tu è peccato, Pascalì; è nu peccato gruosso assaie!

Pascalino

(levandosi ribelle, minaccioso) No, nun è peccato! E si pure è peccato nun è d’ ’o nuosto… Nun simmo nuie! (vede venire Cuncetta, si allontana)


Majo

edit

Cucina teorico-pratica, è n’opera ’e Ippolito Cavalcanti, pubbrecata int’’o 1839:

 
Regola primma
De tutto chello che nce vò pe la cucina.

Doje caudare, una chiù grossa, e n'auta chiù peccerella.
Doje marmitte, una appriess'a l'auta.
Quatto cazzarole de ramma co lo copierchio pure de ramma.
Doje tortiere de ramma co lo tiesto porzì.

No pozonetto de ramma.
Na tiella de ramma a doje maneche co lo tiesto.
Na tiella de fierro co la maneca longa pe friere.
Na dozzana de bocchinotti de ramma
Na scummarola.
No passa brodo.

Doje caccavelle de creta, una chiù grossa de l'aota.
Doje pignate comm'a le caccavelle, e doje chiù peccerelle.
Quatto tiane, doje chiù grosse, e doje chiù peccerelle.
Doje stufarole.
.....


Giùgno

edit

Carduccianelle, è n’opera ’e Giovanni Capurro, pubbrecata int’’o 1907:

 
A IETTATURA..

Nun sulo ’e ffemmene pe’ niente attaccano
’nu priggiurizio, facenno chiacchiere;
siente: ’a bella Mbriana,
’o Munaciello, ’o cancaro;
     e ’i figlie crescono ciucciune, stupete,
pecche lle mparano tutte ’sti storie;
’o suonno è bona nova,
e ll’uoglio è mal’aurio;
     ’o vino è grazia, ll’uva so’ lacreme,
’o ddoce è tuosseco, veleno ’o zuccaro,
seh, seh: iate, parlate,
e mo se perzuaresceno!
     Ma, ca se roseca sulo p’ ’e femmene;
è beninutele: vide ciert’uommene
ca teneno talento,
ca so’ perzone ’e sturio;
     teneno ’o leggere, teneno 'o scrivere,
eppure crereno, se ncapunisceno
ch’esiste 'a iettatura!
Guardate si è pussibbele!
.....


Luglio

edit


 
Francesca Bertini. Dint' 'o film muto d' 'o stesso nomme.

Assunta Spina, è n'opera 'e triato scritta 'a Salvatore Di Giacomo pubbrecata 'o 1909:

Federigo: Volete?
Assunta: (c. s.) E che ce vo?... Che v'aggia dà?

(Il dialogo segue rapido e basso. Torelli, di volta in volta presta orecchio, lasciando di scrivere).

Federigo: Niente.
Assunta: (sorpresa, incredula) Comme? Niente? (Un silenzio) Ce vonno 'e denare, 'o ssaccio... (risoluta) Ma io mme mpigno ll'oro, mme mpigno 'e rusette, faccio nu debbeto... Nun ce penzate!... Dicite!... Quanto ce vo? (lo afferra pel braccio).
Federigo: (dolcemente) Vi ho detto che non occorre.

(Campanello dalla 5.ª Sezione. La folla vi accorre, entra o si ferma davanti alla porta).

Assunta: (a Federigo, quasi tremante, sottovoce) Sentite... E dicite!... Parlate!... Nun ce vonno 'e mezze?... (Federigo fa spallucce) No?... E vuie mm' 'o facite pe senza niente?


Aùsto

edit


 
Peruonto, 'e Franz von Bayros (1909)

Lo cunto de li cunte, è n'opera 'e Giambattista Basile pubbrecata 'o 1788:

Peruonto

Non se perdette maje lo fare bene: chi semmena cortesie, mete beneficio, e cchi chianta amorevolezze, recoglie amorosanze: lo piacere, che se fa ad anemo grato, non fu maje sterele, ma ’ncrina gratetudene e figlia premmie; se ne vedeno sprementate ne li continue fatte dell’uommene, e ne vedarrite esempio une nne lo cunto, ch’aggio mpizzo de fareve sentire.

Aveva na magna femmena de Casoria, chiammata Ceccarella, no figlio nommenato Peruonto; lo quale era lo chiù scuro cuorpo, lo chiù granne sarchiopio, e lo chiù ssollenne sarchiapone, c’avesse crejato la natura. Pe la quale cosa la scura mamma nne steva co lo core chiù nigro de na mappina e ghiastemmava mille vote lo juorno chillo denucchio, che spaparanzaje la porta a sto scellavattolo, che no era buono pe no quaglio de cane: pocca poteva gridare la sfortunata, aprire la canna, ca lo mantrone non se moveva da cacare pe ffarele no mmarditto servizio...


Settiembre

edit


Miseria e nobiltà, è n'opera 'e triato scritta 'a Eduardo Scarpetta pubbrecata 'o 1887:

 
Raffaele Viviani in Miseria e nobiltà, 1939.
Luis. Se capisce che me ne vaco, ma haje da vedè primme che te faccio!
Fel. Che me faie, che me faie? Me vulisse vattere.... di' la verità?
Luis. E che ne saccio, mo' vedimmo!
Conc. Lassatela, lassatela, si no chest ve fa jì ngalera!
Pasc. Statte zitta tu, si no te piglio a schiaffe!
Conc. Uh! me piglie a schiaffe a me!
Pasc. Sì, a te, a te!
Pup. Papà! papà!
Fel. Va bene, nun l'avisse maie ditto sta parola, voglio vedè che faie!
Luis. E po' lu bide!
Conc. Haje ditto che me piglie a schiaffe, a me! Te l'aggia fa annuzzà ncanna sta parola!
Pasc. E mo' vedimmo! (scambio d'ingiurie e d'invettive, a soggetto e volontà dell'attore.


Ottovre

edit


Chiacchiareata seconna nfra lu Cuorpo de Napole e lu Sebeto, è nu saggio scritto 'a Giovanni Fiorilli pubbrecato dint' 'o 1820:

 
'O Cuorpo 'e Napule dint' 'e chiacchiariate appriesso

C. de N. Bonni, Compà Sebè: Eccome ccà de retuorno tunno, frisco, e allerio cchiù de chello nche me partette da Napole.

Seb. Bemmenuto Comparone mio. E comme? me dice, ca te ne vaie pe tre o quatto juorne, e pò te sì stato fora cchiù de no mese? Addò te sì nfrociuto tutto stò tiempo?

C. de N. E chi te lo bbò conta? Aggio gerato la Lecca e la Mecca comme se dice. Aggio mesurato a parmo a parmo tutte le Provencie de lo Regno; e mme sò addecriato trovanno pe tutto na coietutene, no ntosiasmo, n’aunione ch’è no Paraviso. Pe le strade, a le Chiazze, e la campagna, int’a le Taverne, mmiez’a le Chiesie auto non stente ca benneziune a lo Rrè nuosto, a lo Prencepe, e a la Costetozione.

Seb. Addonca nProvencia non nce sò partite, non nce sò mbruoglie?

C. de N. Tu quà mbruoglie, e quà partite, vaie contanno? là nna partita schitto se joca da tutte, e non se canoscono aute carte ca chelle de la Costetuzione.


Nuvembre

edit


 

'Int''o canciello, è n'opera 'e triato scritta 'a Menotti Bianchi pubbrecata 'o 1911 int'a na raccolta:

Aniello solo


(Dopo un lungo silenzio, guarda attorno; s'alza e va all'inferriata per vedere se vede sua madre. Ritorna a sedere sul tavolato) Nisciuno!...

Canto a figliola (d. d)


Anielle, anielle!
A uno a uno tirete 'e capille!
Ietta lacreme 'e sanghe 'int''e cancelle!

Arena, arena!
Cerca perduono a mammeta luntana, e strafochete po' cu 'sta catena!...


Retrieved from "https://wikisource.org/w/index.php?title=Wikisource:Paggena_prencepale/Voce_%27n_vetrina&oldid=733727"