Wusese
| nadpis | Wusese |
|---|---|
| awtor | Mato Kósyk |
| lěto | ? |
| žrědło | https://archive.org/details/PetsJanasnimskiRolandMartienglishAndGeraldStoneenglish.2003 |
| licenca | public domain |
| nota | stary pšawopis |
Zernko, lažyš wusese,
z milnej zemju pokšyte.
Stawaś buźoš kšasnje zas;
zbuźijo śi godny cas,
z tebu lažy naźeja.
Wětšy pśidu šcipate,
kenž śi zemju wopšosće.
Spij we běłym łožyśćku,
zymje pśejźo nad tebu,
žednje njespi naźeja.
Słyńco swěsi z lubosću,
wubuźijo setwu wšu.
>>Wono buźi<< zaznějo,
njedrěmaj wěc zerncycko,
k naźeji jo naźeja.
Lej, se kšasnje zeleniš,
wutšobu mě zwjaseliš;
aj, juž kłosack zjawijoš,
a se kradu wotzamknjoš
dopołna jo naźeja.