Yor ila xilvatni doim iltijo aylar ko‘ngil...
Yor ila xilvatni doim iltijo aylar ko‘ngil,
Bu na johildurki, da’voi xalo aylar ko‘ngil.
Sarvdek ra’no qadidin muddate ozod edim,
Yona sunbuldek sochig‘a mubtalo aylar ko‘ngil.
Har pari husnin tamannosida o‘zidin borib,
Bora-bora o‘zni kachko‘li gado aylar ko‘ngil.
Garchi ko‘nglumni ko‘rub la’lin qizil qon qildi ko‘z,
Emdi ko‘rmay orazin yuzin qaro aylar ko‘ngil.
Yiqmasun deb ko‘yida ko‘nglumni za’fu zorlig‘,
Qomati yodida ohimdin aso aylar ko‘ngil.
Eyki, yo‘lungda oqardi intizoringdin ko‘zum,
Kelki, xoki maqsadingni to‘tiyo aylar ko‘ngil.
Ey Xumuliy, chun kiroyi aql emas asbobi joh,
Emdi dunyo saydig‘a o‘zdin kiro aylar ko‘ngil.
|
This work was published before January 1, 1929, and is in the public domain worldwide because the author died at least 100 years ago. |