Эрзянь ёвкст (М. Е. Евсевьев, 1928)/10
АНДЯМО.
Тусь Андямо вирьга якамо. Мусь кудыне. Кудынесэнть тейтерь. Тейтерьсь кевстизе Андямонь: „Урьвакстозят эли апакат?”
Андямось мери: „Апакан. А тонть ули мирьдеть?” — Арась!
И кармасть вейсэ эрямо. Тейтерьсь максь Андямонено тавар и кучизе торгувамо. Туйместэ тейтерьсь мери тензэ: „Молиньдерят минек велес, минек велесэтнь лия ки-як а нолтни удомо, — совак миненек, ансяк ванок, шапкат зря иляк кадно, — аволезь нейть шапка поцто пацинеть. Нейсызьдеряй пациненть, — сыть, монь сайсамизь”.
Андямо мольсь сынест удомо. Шапканзо понгавтызе тулос, сонсь маць. Пацинензэ аватьне содызь и [ 40 ]ёвтасть мирьденстэст. Миртьне мольсть и Андямонь нинзэ салызь.
Андямо мольсь валське кудов, низэ арась кудосо. Яки вирьга, аварьди. Лись каршозонзо атя и кевксни эйсэнзэ: „Мейсь аварьдят?” Андямо мери: „Кода а-йавардян, покштяй, — ним ёмась”. Атясь мери: „Иль-аварьть, мон ёвтаса, косо нить: азё, косо удыть торгувамстот — веть нить лиси умарь-сатс. Ды ванок, иля мать: метедевиньдерят, тензэ а стявтуват”.
Андямо мольсь умарь сацтень и учи нинзэ эснэ. Марясазо — низэ сы аварьдезь. Андямонь пряс прась сад-умарь. Сон сэвизе садумаренть, и матедевсь. Низэ стявць, стявць эснэнзэ — эзь стявтовт тензэ, — тусь мекев аварьдезь. Ансяк низэ тусь, сыргойсь Андямо, и тусь чиезь таго атястень. Сонсь кува чии — аварьди. Муизе атянть и мери тензэ: „Покштяй, эзь саевть ним!”
Атясь мери: „Кода эзь саевть?”
„Мон сэвинь сад-умарь и матедевинь”. Атясь мери: „Меринь тенть — иля мать. Азё сы вестэ таго, ды ванок иля ярца сад-умарьде, а то таго матедиват”.
Андямо таго мольсь секе сацтень. Марясазо — низэ таго сы аварьдезь. Андямо вакс таго прась сад-умарь. Андямо сэвизе садумарсть и таго матедевсь. Мольсь низэ ваксозонзо, стявць, стявць — эзь стявтовт тензэ. Ансяк нись тусь, сыргойсь Андямо и таго атястень чиезь тусь. Сонсь кува чии — аварьди, мольсь атянтень и мери: „Покштяй, таго эзь саевть ним!”
Атясь мери: „Меринь тенть — иля ярца сад-умарьде”.
Атясь максь Андямонень суликине и мери: „Теде вене нить макссызь лиянень никс. Тон совак юткозост. Кандыть тенть вина — симть, мейле тонсь кант тенст эсь винадот, ды ванок — киньгак вакска иля юта, коть аламнень-аламнень — весеменень кант”. Макссь тензэ гуслят и мери: „Симмедест мейле кевсти — мерить, а мерить тенть гуслясо седямо. Мериндеряйть — не гуслятнесэ седяк”.
[ 41 ]Андямось саинзе суликанть и гуслятнень и мольсь тейтерьсть кудос, совась юткозост. Канцть тензэ вина. Сон сень симизе; ирець аламодо и мери тенст: „Моненьгак мереде тенк кандомодо, монь-гак ули симме-пелем”. Сетьне мерить тензэ: „Улиньдеряй, кант, симдянок!”
Андямось канць весеменень аламонь-аламонь и весе ирецть. Андямось мери тенст: „Ней мереде тень гуслясо седямо, — монь гуслян улить”. Сынь мерсть тензэ: „седяк”. Андямо кармась седямо, а сынь весе кармасть киштеме. Кийшсть, кийшсть — сизесть и весе матедевсть.
Андямо саизе нинзэ и арцесь атянть эйстэ оргодьме. Сон тусь лия киява. Атясь лись каршозонзо и мери тензэ: „Э, Андямо, нись ней улезэ вейсэнь”. Атясь саизе Андямонь нинзэ, ве пильгензэ чалгизе пильгензэ алов, омбоценть саизе кедезензэ ды шачк лазызе. Андямо кармась аварьдеме и мери: „Мейсь, покштяй, лазык?” Атясь мери Андямонень: „Иль аварьде, — мон нить вельмевца”. Путыньзе кавто пелькснэнь вейс и низэ вельмесь. Атясь мери Андямонень: „Азё, эряк ней мартонзо. Мон сонзэ секс лазокшныя: сон колмо иеде мейле ёзнэкс велявтоволь и тонть сэвевлензеть, а ней мон сонзэ вития”. Теде мейле атясь тусь вакстост вирьга, а сынь атят-бабат мольсть эсь кудозост и куломозост эрясть вейсэ.