Шундай сағым, эй, дуҫҡайым,
Башым сатнай ауыр уйҙан,
Йыуатырға теләй буғай –
Тәҙрә сиртә шаян турғай.
Эй, дуҫҡайым, һайра шулай,
Уйҙарымды таратайым…
Турғай түгел, инде үҙем
Эстән генә ҡабатлайым:
«Барыһы ла яҡшы булыр,
Төндө еңеп, ҡояш тыуыр,
Күңелемә йырҙар тулыр,
Барыһы ла яҡшы булыр!»
Икеләнеү, борослоуҙар,
Бошоноуҙар бушҡа ғына.
Шөкөр, тиеп, биргәненә
Йыр йырлайым дуҫтарыма:
«Барыһы ла яҡшы булыр,
Төндө еңеп, ҡояш тыуыр,
Күңелемә йырҙар тулыр,
Барыһы ла яҡшы булыр!»
Гел дә шулай ауыр саҡта,
Киләсәккә өмөт бағлап,
Арынамын һоро зарҙан.
Аҡ донъяны ҡарайтмайым,
Күҙ-йәш аша ҡабатлайым:
«Барыһы ла яҡшы булыр!
Барыһы ла яҡшы булыр!»
