Ванине (2011)/13
[269]
| XIII |
Ютась, лыйкадсь ожо пацясонзо сёксесь, мельганзо тысмадевсь ваньксчинь вечкиця телесь. Таго, зяроцеде уш, сась лавшо кор, тюсонь полавтниця, лембе моронь вечкиця тундось.
Сезьганонь Ольгаень атякшозо мель а яви удомань таргсицятненень, а вечксынзе чевте таркасо чикуншкас кеверькшницятнень. Сыргозстиця гай моронзо ушоли ашолгадомадо икеле. Сят ветькак ледстни эседензэ. «Мо-он теса-ан!» — серьгеди, кона видьс пачкоди вайгелезэ. Лиясто кеменде ламоксть мельцек-мельцек рангсты, ды теньсэ седеяк виевгавтсы вень каштмолеманть ваньксчинзэ.
Азоравазояк, мерема, а учни, зярдо каяты Атяень вайгелезэ. Аволь сонзэ койсэ-лувсо ловокшномс зяроксть «саразонь инязорозо» яволявты эсь таркадонзо шабрапссгнснень. Ольгакай сырькаесь аволь велькс ало лужакалицятнеде. Стякшны — яла пели чинь тевензэ а прядовить, — якстере кирьга пувтыцянзо марто. Сти, тарканзо апак пурна юты кепе-штапо икелев, айгсынзе кавто ёнов лов тюс вальмань шаршавтнень ды, кенерепакарензэ вальмалангс нежедезь, зярыя шкань перть ваны суликатнень пачка ушов. Истя сон «искови», мезе полавтовсь вензэ перть, мезе моли ней: кие юты, ков, мезе учови верде, кодамо ёнкс кирдить пельтне, маней, нувара карми сыця чись, кепети-арась Инелеенть ды кувалманзо лайменть велькска таргавозь сэняжа-ашо сувось. Келя, кепедевиндеряй, учок пиземе, матры, срады моданть ёжова ды солы — учок маней.
Истя Ольгай васты лембе шкань малав эрьва чинть. Тонадсь. Аволь ие, аволь омбоцеяк эри те иланть топавтозь мокшнашка кудынесэнзэ. Тельня, мерема, седеяк, якшамо читнестэ, судот вальма сельментень а педявтсак, стувтсыть ванномат.
Текекс тейсь чоподава стякшныцясь течи валскеяк. Цяк кенерсь стямо — вальмантень. Васня вановтозо нолажтсь Пичепень кувалт чииця, асфальтсо вельтязь кинть видьс — ютыця-кандыця а неяви. Ламбамо онт, небось, ламот неить! «Эскельдясь» кинь раужо леханть трокс, ды вановтозо эртевсь лопавтомо, толсо палсезь-киртазь, содсо ваднезь чувттнэс. Сынь раужодост неявить тандавтниця келей-сэрей камбразокс. Ирдезэст эйстэ пелезеват. «Вай, вант-вант, мезе теевсь мартост?!» — зяроцеде уш ютась пряванзо. Раужочись седеяк сельмс эци перькаст сравтневезь пиже постонть. Аволь васоло раськси прянь [270] шныця келей-сэрей эрьбань тояра, перьканзо касы кумажань сэрьсэ тикше. Пиже, пиже...
.. .Ушосонть панжиковонь гай маней чи. Менельсэнть ансяк тия-тува вастневить састо, сутямозь уиця ашо, качамо-сэнь алкс пельнеть. Пуви, ветькак эзь лотксе, варма. Экше. Аштеме ве таркасо а мери. Апторгалемс, мерема, а мезть: панжиковсто, седеяк, васень пельксстэнзэ, якшамъёнксось истят эзэльдиця казнеть кучни аволь чуросто. Кучни мейлеяк. Виртне-паксятне те лангс пек а ваныть: эрязкалить, каить лангаст пиже велькст. Экшесь — аволь якшамо. Мекс а каямс? Кецнить, оймамо а содыть, нармунтнеяк — морыть-кенярдыть валскестэ чокшнес. Пувак, варма, наянгалек, ушосонть ялатеке тундо, седеяк — пулозо. Пелеве ёнксось те шкане, яла кортыть, вадяши экшесэ, чикуншка ёнксось — лембесэ.
Кинь мельс сакшнось, кие учось, истямо валдосо-экшесэ налксиця чистэ Кузвелесэ верьгеди седеень киртыця апаро?!
Чинь ютазь сондензэ мейле Сезьган Ольгайнень васол ошсто, эсензэ машинасо, сась варчамонзо цёразо. Тензэ ниленьгеменде ламо. Кода сеедьстэ эрси, шумбракстнематнеде-вайкстнематнеде, ярсамонь-симемань кирданть ютавтомадо мейле ушодовсть кевкстнемат: мезе полавтовсь, кие урьвакстсь, явсь, чачтась, кие кулось, кинь кундызь-озавтызь... Седеяк ламо раштакшныть кулятне ломаненть чуродо-весть сакшномсто. Васенцекс цёранть авазо кундась ёвтнеме каршо чистэнть Кузвелесэ оймеёжонь колыця теевикс зыяндонть:
— Озынь чикуншкане ярсамо. Ага. Та-кода истяк, собой варштавинь каршон вальмаванть. Ванан, асфальтканть луньк-луньк моли цёраломань. «Я, ды некак Ванине! Сонзэ, неяви, молевксэсь», — арсезевинь. Ага. Каракштне, цёрам, шождалгадомс кармасть. Секс тень сеске эзь содавояк. Молевксэсь, тагояк мерян, сонзэ. Неявсь, веленть ютызе, мукшнось зяро а зяро. Ага. Аламошка. Эскелясь аволь турт-тарт. Кись тензэ теинекс эзь маряво. Аволь кода сеедьстэ эрси. Ага. Сайсь, ванан, витев. «Улема, кудов — кивчк ютась пряван».
Панжия кельменькаенть. Таргинь кой-мезе ярсамс. Печксинь кши, озынь стувор экшс ды кундынь ярсамо. Ага. Вачо пеке — тонсь содат. Ярсан, невелян пейтеме кургсон. Ютась-эзь кияванть Дораень Кулянь цёразо — овсе стувтыя. «Ну ютась. Мейле мезе? Эно мезень кис кись?» — одс мекс-бути сась превзэнь мелесь.
[271] Прядыя ярсамонь цислам. Шлинь-нардынь, путнинь таркаваст пенчень-ваканон. Мезе, мерян, ушов? Тевтнень поладомо? Сынь, содат, учомат а вечкить. Лисинь. Кундынь пирень-эмежень мелявксозон. Кие, мондень башка, кунды эйзэст? Теке мода унжа, сокарян... Куш удсекак пандятнень ютксо. Ага. Веле, тонсь содат. Истяяк мереват: мезе теевлинь сынтемест? Чинек-венек сельметь полгарьгавтневлинь телевизоронть икеле? Шабратнень ланга лытавлинь?
Лисинь кардаз удало «паксязон». Карминь котьмамо. Тевезэть ваямсто, тонсь содат, шканть чиемазо а маряви. Ага. Кочкинь, ойники лиссть, морковом. Теинь куярнэнь пандя. Озавтнинь аламошка капстат. Тонсь содат, мезе а видят-путат-маштовить. Носкан, мель путан. Ага.
Апак учо, кода-бути сеске, икельганок ютыця кинть ёндо — пукшт, пукшт, пукшт! Вай, авакай, те мезе истя, Верепаз? Аволь «ойна»? Аволь палома? Кунсолан. Ага. Таго: пукшт, пукшт... Токимем кельме. Маряса, канжамон соракадсть. Кода илязо уле, талнозь-сорнозь лисинь вальмалов. Вай, авакай!
...Леднесь, лайсэ палсь Дораень кудост. Вана, цёрам, истямо ризкс лиссь. Вана теть куля. Ага. Толось — тол. Мельганзо, тонсь содат, кадовить ансяк тонолт ды кирьпець петь. Ага. Ютака тей, вальманть малас, тей-тей... Ага... Варштак. Сындест башка, -ванат? — толонь даволдонть Дораень юртонть эйстэ кадовсть оно сеть умарькс чувттнэ. Несыть? Оно-оно! Допрок киртазь! Раужот, раужот... «Стядо аштиця тонолт» — яла мон мерян. Ага.
Ольгай ды цёразо аштесть вальманть каршо ды чатьмонезь талай вансть кинть томбале урозокс неявиця зярыя чиде икеле шумбра, рацяня умарькстнэнь ды тарканть лангс. Вансть тов, косо ульнесь чувтонь покш кудо, косо эсь шкастонзо чольдердсть эйкакшонь вайгельть, ульнесть кенярдомат, сельведть, кувсемат, раксемат, косо эрясь эрямо... Вансть. Чатьмонсть.
* * *
...Кудо латонть алдо, потмарсто пелькстазь кирнявтнить ожо-якстере, качамо марто човор толкельть. Сынь бажить келейгавтомс лазкстнэнь-варятнень ды менемс оляв, верев. Псиденть бах-бах-бах, бух-бух ледни-тандавтни лазновиця шиферэсь. Пшти пси штельксэнзэ вешкезь ливтить эрьва ёнов. Эшкевиндеряй эйзэть!.. Урныця толонть марто латонть пачка менчевезь-чаразь лиси, кузи менелев сэнь-раужо тусто качамо. «Толгайге, [272] толгайге!» — каятотсть цяторксонть ды пукштяеманть пачка авань седеень раздиця пшти вайгель. «Толгайге! Пожар!» — рангстась мельганзо та-кие. Кувакасто, таргсезь-таргсезь, цийнесь, теке лайшесь, Кудонь-кавтонь ютазь пине. Сонензэ мезень ризкс?! Аламос аштезь, таго седеень кельмевтиця вайгель: у-у-и-и-и... Каятотсь тандавтозь атякшонь вайгель... Асфальтонь келей киванть кавто ёндо дубор-дубор чиить цёрат, ават, эйкакшт.
Таргочи. Ламот састь ошсто тетяст-аваст, покштяст ды сырьаваст содавтомо. Веенст — лездамо, лиятне — оймсеме. Кармавтсь а стувтомс чачома ёнкстнэнь шкаськак: пиретнень чупонемат, ойсевтемат-путнемат, модась чаво илязо кадово. Лия чистэ, содави, зняро апак лексе, кургонь автезь ваныцят авольть пурнаво. Седе тов, сёксестэ панжиковс, кадовить велентень ансяк «ванстыцят»: латяня, киж-пыж лексиця атят ды сынст кондят вайкстниця-укстниця сырьават. Ней вана...
...Толось гурнозь, эрязкалезь ды киньгак апак кевкстне «поризе» шиферэнь вельксэнть ды валгсь одс, седеяк кеждязь педясь пореме чапонть ушо ёндо. Нолсезь нолси коськедеяк коське пичень чочктнень! Яла виевгады. Капши. Теке пели кардасызь, а макссызь прядомс ушодозенть.
— Ванине, Ванине, секень вант, тосо, идинк, идинк! — серьгедсь, зяро виезэ, лужаня, седеень пачка ютыця вайгельсэ кие-бути аватнень эйстэ.
— Мезть стяко рангат! — каятотсь каршо, теке менельстэ, цёрань корсяня вайгель.
Тень лангс апак вано, кавто од одёр цёрат, видеяк, снартызь чиеме варманть мельга, седе пси илязо уле, седе малав, вальматнень ёнов. Мезеяк эзь лисе. Сеске мурдасть.
— Кодат идемат! — яволявтсь эйстэст вейкесь, сеедьстэ лексезь. Чамазо палозь палы, сонсь вадяши мештензэ, кельмевти истя панаронзо. — Псись — сеске невелят. Иля педсеяк.
— Паряк, сон арасяк тосо, а мезть эцнемс! — мерсь, превть макссь цёрантень та-кие.
— Аволь улеяк, саволь кодаяк!
— Валске марто неия автобусонь лотксема таркасто...
— Тосоль, тосоль...
— Бешоконь, ошов тусь.
— Кодат ошт! Косто сайсынзе ярмактнень...
— Сон чуросто совсесь кудозонзо...
— Совсесь лиясто...
— Тельня чалгавкскак эзь кадно.
— Се тельня...
— Чикуншкане, неия! Пурдакшнось кудонзо ёнов! Ага... — серьгедсь верьга вайгельть вейс пурнавозь, минекс-сюнокс оршнезь аватнень ютксто Сезьганонь Ольгай.
— Се чинь куншкава, ней...
— Мейле мезе — «ней».., — эсь мелензэ кирдсь Ольгай.
— Удось, паряк...
— Каня лия-мезе соды иредьстэсь?..
— Теке аволь иредьстэльгак! — одс гайгезевсь Ольгай сырькаенть човине, цийниця вайгелезэ, — мольсь апак чиремкшне. Ага.
Теевсь нурькине општ. Весе вансть азаргалиця, весень лангсо пеедькшниця толонть лангс.
Лып-лап, лып-лап чийсь та косто, келезэяк лиссь, Ванинень васень оязо — Чичавонь Палю. Цыганонь раужо, менчевезь черензэ апак судря, сакалонзо апак нара. Лангсонзо пуворязь, сэксэв, мейсэ понгсь ваднезь неень шкань ушманонь пиже-тюжа понкст-панарт. Ванинеяк истямо камуфляж кандтнесь. Кияк, маряви, эсь велень седеймарицятнеде истя ёролдынзе.
— Мезе вантадо, идема оям! — серьгедсь пиже-ожо вайгельсэ, кижнэзь, ды каявкшнось иредьстэ превсэнзэ толонть каршо. Эзь кенере тееме зяро-бути эскельксткак, сеске мурдась прянзо комавтозь, чаманзо ожапесэнзэ копачазь. Вайкстнезевсь:
— Вы-ы-й кодамо пси! Вый... — сонсь ёзась коморсонзо пекензэ, мештензэ, пансесь панарстонзо псинть.
— Идик? — «пупизе» кие-бути цёратнеде, неявсь, ошонь, прянь шныця Палюнь.
— Эряволь седе икеле! — кирдсь эсензэ ёнкс Палю, сонсь полгарьгавтозь сельмсэ вансь гурныця толонть лангс.
— Эно косолить те шкас...
— Ды, теня... — кундатотсь «идицянть» келезэ.
Ваныцятнеде пурнавсть байтяк. Ваныть кургонь автезь.
Кой-кить кортамстост мекс-бути ахолить кедьсэст, нерьгстнить сурсост толонть ёнов, пижнить.
Толось теке кецни тенень. Ваныцянзо ламо. Тыжны-невтни кежензэ, виензэ, ёрокчинзэ. А пели кидеяк ды мездеяк. «Ванодо, ванодо, кодамо кором!» У-у-ф, лондадсь сельме икеле, стакасто лекстясь кудонь латось. Вере тевензэ прядозь, толось верендясь нолсеме эчке пичень чочкосто чапозь чапонть. Тона сеске [274] якстерьгадсь. Теде мейле толкельтне кирнявтсть вакссонзо пижесэ копачазь умарькстнэс...
Зярыя цёрат, псинть кирдезь, ведрасо косто-бути кандтнить ведь. Валныть, пургсить, илязо ливтя толось эрицявтомо шабра кудонтень. Валныть сэрей кузтемпенть, киртыжтнэнь-вальма юткотнень. А вана верьксэсь, толонть лангс ваныцясь — сэньстэ артозь коняксось — кадовсь апак вансто. Каня, кузтема кедь малас эзь понго, каня мезде лиядо, тов кузицят-валныцят эзть муеве.
Цятор-цятор, у-у-у наянгали толось, капшазь моры аволь кувака куловтыця моронзо. Сонзэ кунсолозь, якстере чаманзо лангс ванозь, якстердить чамаст пурнавозтненьгак—ават, цёрат, эйкакшт... Ваныть — тарск а теить. Ванодо, паряк, омбоцеде неемскак истямо а сави?!
Шабра кудонть ды, ловт, веленть пензэ, Пичепенть, идесть аволь ведрасо цилькаицятне — вармась. Пувавольгак сон чивалгома ёндо ды виевстэ, кода ней, кинть-веленть кувалт, сельгеме аволить кенере, гувкадевельть велепень меельце кудотне-кардтнэ весе. Кадык вельтязьгак сынь вейкень пес шиферсэ, аволь кода икеле, ков а варштат — олгсо, ялатеке авольть идеве. Паловольть Оржаень, Дунаень, Пайчань, кадовольть куловт Бозань Люба-Любинень «пизэстэяк». Аламо мезе ливтевель таштазь уличитнестэ! А ярсамо-оршамопельть, а ракшат, а телевизорт-мезть. Сюкпря кельмень кандый якшамъёнксонтень! Марсевить, маряка, лангозонзо пеняцямоткак. «Вельть уш казямо, пенгть ламо сэви», — мельс а тукшны, мотордыть лиятат. Ней оно кода велявтсь. Ломанентень зярдояк а савтсак! Сюконякшномс тензэ эряволь! Якшамо, теке аволь талай тундоньгак вармась оймень апак полавтне, зыйсэ пувси куронть трокс. Сон, сон ванстызе Пичепень пенть!
Ёкол-ёкол, вить пильгензэ ускозь, пачкодсь косто-бути Чентяй Рудик, Рыжой. Ломантнень юткс аламнеде апак пачкоде, нежедсь мандонензэ-«ялганзо» лангс ды педявтызе вановтонзо киштиця, чочкотнень мельспаросо, нолсезь пориця толкельтнень кирнявтнемазост. Ваны, нулков сельмензэ лип а мерить. Ваномадонть, неезденть эли мезде-бути лиядо сорнозевсть сельмекерензэ, чирькставсть сакало потсо турванзо, ды сельмстэнзэ лиссь кснавшка сельведень байгине. Мельганзо перьгедсь омбоце, колмоце... Кодамо мель сюморгавтызе ёжонзо, мезде арсезевсь? Кодат ледстнемат калавтызь седеензэ? Паряк, эсь эрямо кинь прядомадонзо? Эзизе содавто Ванинекс ютавтозь [275] иетнеде ледстнемась? Содык азё... Ванине вана, секень вант, истямо тешкс путсь эрямо кинзэ пес. Толонь. Лиясь — лия. Кодамо карми сонзэ? Теяк, зэрьсэ палыця кудось ульнесь Рудикнень, седеяк меельце иетнестэ, васень валгонема-совсема таркакс. Куля патянзо куломадо мейле сеедьстэ, седеяк телень шкасто, мик удсеськак тесэ. Чуродо весть уштневсь. Яла эжнема тарка ульнесь. Вейсэ тесэ ярснесть, пурнавкшность кой-зярдо ялганек, а уш зяро бутылкат чамдсть — лездыцянзо марто идемевсентеньгак а лововить. Ней?
Ютась Рудик чиремк-чиремк кургонь автезь ваныцятнень ваксс.
— Снартнизе кияк таргамс? — пшкадсь апак кавтолдо, лемень апак ёвта эсь сэтьме, човине, прок авань, вайгельсэнзэ цёраломантненень. — Тельня Дроба Вовань калминек, кельмесь, лов потсто муекшнинек, ней вана...
— Тонськак а содат мезть болдордат, косто содат — тосо? — мерсь кие-бути цёратнеде машнетезь.
Рудик мезеяк эзь мере. Нилизе марязенть. Вансь. Мезе мерят? Кие а соды, мезе моли Кузвелесэ? Вейкесь лов потс прась ды эзь стяво, мельганзо, ковонь ютазь, допрок одсто Индял Миколень цёразо прянзо килькшс тонгизе. Ней вана... Учомс лията а мезе.
«Мезе тенек а сатны? Мекс минсь, эсь мельсэ тукшнотано те эрямостонть? — апак учо састь-совасть икелень моряконть удемезэнзэ кевкстематне. — Беряндензэ эли, паряк, вельть уш вадрядонзо? Эсень, эсень кодамо карми эрямо пингень пем?»
Меельце мелесь апак учо ципадизе Рудикень, теке кельме кедькоморсо, пиле ланга.
Рудикень ваксс бот-бот ютась Чичав Палю. Чатьмонезь макссь кедь. Шлёрькадсь судосонзо, ды кавонест сялгизь вановтост псиденть кувсиця, «тов» туиця кудонть лангс.
Вейкест-вейкест марто, вайгелест апак вансто, теке свадьбасо, кортыцятнень юткова чары-вели, яксевти, неяви, кодат-бути тевть Дунаень Шурик-Дипломат. Мезе вешни, мезе эряви, соды ансяк сонсь. Истямо уш корозо: ве таркасо а аштемс, эвтемс. Кода илязо уле, а ёми. Вешневиксэнть мусы. Арсесь-эзь сон Рудикекс моданть ланга якамонь прядома чидензэ? Кода, мейсэ керясы эрямонь карьксэнть? Пеельсэ, пикссэ, анксемасо, толсо, пейсэ?.. Ламо эйстэст, неть «керсицятнеде»! Арась, Дипломат теде эзь мелявто, истят кевкстнемат эзизь содавтне.
[276] Пельчасошкань ютазь, окойники, «кенерсь» кудошка мадстниця якстере машинаськак. Сон, урнозь-чиремкшнезь, стамбаро валгсь покш кистэнть вить пелев, ютась, зяро ютавсь, толпандянть малас. Эйсэнзэ сазь цёратне-мадстицятне капшазь-капшазь кундасть эсь тевезэст: эрязкалезь сравтнизь «сюлотнень» ды сеске, толонть ёнов эцезь, кундасть циляеме-валномо акирдевикс, иера обуця толонть, идеме сень, мезе кадовсь седе, конанень тунь а умок мерильть «кудо». Арась, толонть арасель мелезэ — учомс ведь мартотнень. Тевензэ, ловт, теизе.
Покш, стака машинанть марто састь эсест «бобиксэ» милициянь кодат-бути прявтт. Эно кода сынтемест? Эряви аволь ансяк мадстемс, содамс, теде башка, киде-мезде гувкадсь эрямо «паргось», муема тувталонть. Те ансяк маряви—тевесь прядови мадстемасо. Пандома а пандома страховка, кинень, зяро...
Мартост ускозь ведесь ютась эзь марявояк. Толось вешсь седе ламо. Савсь ардомс веленть песэ, кинть керш чиресэ, эрькень кондямонтень. Теевкшнесь сон кинть кепедемстэ. Паро, машинась ёнсто, зыянтомо валговсь келей покш кистэнть ды аравтовсь веденть малас. Курок, седе курок! Минутат, ды виев потякаезэ цёрсо пештизе ором цистернанть. Секс мурдасть куроксто. Састь ды одс, таркаст полавтнезь, кундасть палыця-ченгиця таркатнень валномо-цильцяеме.
Зяро мадстицятне эзть ливезькале, зяро мель эзть путо, толось тейсь ды теизе сень, мезе, нолдындерясызь оляс, тейни. «Орось-салыцясь куш стенат кады, толось сынсткак амзордасынзе» валмеревксэнть коряс. Алкукскак, кода эзть вално мартост ускозь ды мейле эрькестэ саезь ведьсэнть, кода эзть пургсе, кода цёратне эзть важоде, кадовсть стенатнень таркас ушкс-трокс пракшнозь ченярдыця, псинь-сувонь нолдыця тонолт. Те весе, мезе кадовсь чассто икеле апак чиреме, натой каштансто аштиця, кадык кияк мельганзо эзь ванояк, лембень кирдий покш кудодонть. Ульнесь — арась.
Чизэ валгомалангсо.
Вайкстниця-ойкстниця ваныця ошмось аламонь-аламонь срадсь. Вансть-вансть, сельмест пешкедсть. Эрьванть эсензэ мелявксонзо: кинень эрявить прядомс чокшнень тевензэ, кинь сась оймсема шказо, кинень ковгак молема... Кодамо тол-цярахман илязо лисе, тевтнень теемат: кудоютконь, кардазонь... Ансяк цёлак эли цябай ломань, кодамояк шаншил, кадны сынст товолов, вандынь валскес.
[277] Панжадо тол костояк уш эзь неяво, эзь типельде. Ансяк тестэ-тосто кувтань-кувтань лиссь сув марто човор сэнь качамо. Судос эцесь паломань чине. Якстере машинась тевензэ теизе. Оймсесь. Псись скимась. Секс милициятне апак эрязкале, апак эвте яксесть, чарасть-велясть тонол оровтонть перька, лотксесть, ванность ды сокарясть таркань-таркань кечказнэкс мендязь кшнинь мандосо куловтнень. Неявсь, мезе-бути мучкасть.
Уш сундерьгадома малава вешницятне муизь сень, мезе эрявсь муемс: ломанень мерькавозь, пицезь-палозь, кулов потсо асодавикс уловонть. Сэнь, якстере, раужо... Ломань ёнов малавгак эзь моле. Погононь кандтниця вейке алянть неезденть човорятотсь седеезэ, какстнезевсь, эль эзь уксново. Лепштизе судонзо. Уловдонть аволь васоло, тонолтнэнь ютксо, седь ды куловсо вельтязь, аштесь менчевезь-палозь сувтеме-сетка марто кшнинь коник.
...Допрок лия, Инелей ёндо, видьстэ-видьстэ лаймень луганть потмова ацор-уцор сась ды совась эсь тевест теицятнень юткс Чичавонь Палю. Чийнесь, превть эзь эряво яжамс, ламонь таркава. Вешнесь топавтомс чинь «норманзо». Тувталось... Мезть кортамс? Эрявсь мадстемс седейризксэнзэ — палсь ялгазо. Пачколесь «Усиявгак». Истя Кузвелесэ мерить аламнеде башка, седе Инелей ёнов путозь колмо-ниле кудотненень. Товгак вармась кандтнизе! Вешневиксэнть, редявсь, мукшнызе. Понгонесь зярыя. Кодак неизе ашо коцт лангс путозь ломаньстэнть кадовиксэнть, эзь нулгоде, эцесь малав ды уракадсь верьга вайгельть пижнеме: «Вай, Ванине, паро ялгине! Вай, кадымик мекс ськамнем... Мезе истя тон теить? Мекс шкадо икеле маштык прят? Мекс туить эйстэнек?..»
«Лайшицясь»-моткодицясь эзь тандадо неезденть, мик ландиксэль «ялганзо» ваксс. Мучкиця кавто милициятне кундызь судонзо а тов ацницянть кавто ёндо ды вийсэ рестедизь ве ёнов. Прась, тетькевсь тикшенть потс прок ватракш.
— Не мешай, вон отсюда! Какого х... мотаешься под ногами! — мендердясь «салов» вал кежень сазь вейке люкштядицясь.
— Ты что, тебя, черномазый, тоже тянет на такой подвиг? — пшкадсь омбоцесь апак ацирьгале, натой мизолдозь. Сон поладызе тевензэ: сёрмадомань, онкстнемань, ванномань.
Талай уш сась, учи санитаронь, якстере чекавкс марто ашо машинась. Мезе мерят, — эрьванть эсензэ мелявксонзо. Ашти милициянь «бобикенть» удало. Учи.
[278] Пилензэ Палюнь, теке штасо потомдынзе палый ведесь. Кортак-иля — а мари. Стясь ды одс эциксэль онкстницятнень, кумажа лангсо мезень-бути сёрмадыцянть малас. Пстылязевкшнесь.
— С дру-другом на-надо же...
— Пошел ты на х.., иль не понимаешь русского?! — таго серьгедсь васенцесь, — не понимаешь — заберем. Там научим. Марш отсюда!
Цёратне кавто ёндо кепедизь ашо коцт лангс путозь кадовикстнэнь ды кандызь учиця санитаронь машинантень. Анок панжадо удало кенкшка путызь эйзэнзэ. Сеске жо милициятне, санитартнэ-кить ойсесть, ды машинатне, урнозь, валдост вельмевтезь, сыргасть мельцек-мельцек таркастост. Пандошка якстере тюс толонь мадстиця машинась тусь седе икеле.
... Эрьва кодат келят-кортамот злыдардсть велеванть. Лытасть сынь зярыя чинь перть. Седеяк Пичепева. Веенст кемевтсть: матедевсь Ванине апак мадсте цигарка марто ды теде кирвазсь алонзо ватань кендесь. Тень эйстэ, келя, «якстере атякшоськак» лиссь. Истя-аволь — кулятне содасть эсест. Эрьва кодат тамашань лавгамот азгондсть. Мезть иляст лакштордо лаужа кельтне, цигаркадо толонь лисемась — келень човсема. Ванине ветеце ие уш эзь тарга. Папирост-мезть зепсэнзэ эзть эрсе, чинентькак эзизе вечке. Эрси, вантая, истяяк! Кенгелемкакс лиссть валтнэ арсезь, мелень путозь кирвазстемадонтькак. Кудось лововсь ансяк Ванине мельга. Кияк сельмть лангозонзо эзь путне. Кулянь ниле сазоронзо умоктояк-умок срадсть масторонть келес ды те кудось тенст дух эзь эрявкшно. Эно кода сестэ чулгомс тувталонть? Кода муемс толонь вельмевтицянть? Мезестэ кивчкадсь сяткось? Сонсь Ванине, эсь мельсэ, арсезь эзизе тее те седеень пултыця апаронть? Истят мельтькак марсевсть. Вакскаст а ютат, а ахолдасыть.
Ванине аволь чаулатнедель. Аволь чалгавояк нолажа янонть лангс, лисевель эйстэнзэ ёрок азор, юртонь кирдий, аволь вейке эйкакшонь тетя. Сон чарькодсь, кодамо чаво, стяконь, сэпей-чапамо эрямосо ютавты Верде максозь эрямо пингензэ. Секс... Эрьва кодат мельть валгонесть пря удемезэнзэ.
Весть кода-бути, паломадонть ковшкадо икеле, видькстакшнось Сезьган Ольгайнень: «На-налкставсь тень, Ольга патяй, ку-кудовтомо пинень эрямось. Вана кува, кирьгава то-топодинь эйстэнзэ. Те-теке варма крандаз тикше. Течи тесан, ванды... Аволь эрян — тарнан. Ма-майсеван... А содан, а содан ме-[279]мезе теемскак! Саян весть кодаяк леднемкай ды — пилеюрс...» Сакшнось сестэ сон Ольгайнень лездамо, лазпестэ пирявкс кенкшкень тееме-путомо. Прядомадонзо мейле каванямстонзо, ёвтакшнынзеяк неть ризкс раштый, раужо, седеень наксавтыця валтнэнь.
Истя, лиси, тейськак.
* * *
...Омбоце чистэнть Кузвелень прявтонтень савсь яксевтемс ведькев чародояк покш, стака тевть. Истят сон, аволь аламо эрязь иензэ перть, зярдояк эзь топавтне. Эзть вастневе истямо мелявкс марто, секень вант, сондензэ икеле важодиця велень азортнэяк. Васняяк савсь муемс-серьгедемс Ванинень симагай оянзо. Эно кода сынтемест? Эрявсь чувомс калмо. Кие сындест башка тень тейсы? Кескавс каязь, содави, а нолдасыть латконтень пельспалозь ловажатнень. Авадря. Вейке ломанькс эрицянь кедьстэ мусь-рамась лазт ды теевтсь берякшке кандолазт. Лаксесть-пильсесть кодамо а кодамо кресткак. «Валютавтомо», кода мерить Кузвелесэ чаракавтыця ведтенть, а мезть човонь ёзамс, тевтнень а «чийневтьсыть». Кода эно лиякс? Кузвелень вейсэнь казназо а мерят сюпав. «Горобиянзо» целковойтнеде а чадыть. Секскак савсь кой-зяро путомс эсь зепстэяк.
...Чизэ Неенсенть кондямо. Менеленть ожо сельме азорозо налксезь налкси. Пуви исень кондямо, пелеве ёнксонь, пачкат ютыця, нузяксчинь пансиця варма. Румозь сэнь менельганть тия-тува вастневить сэвтнезь-кавшакавтнезь ашо пона ёнов молиця пелень пакшт. Сынь верьга-верьга, эль неяви, уить чикуншка ёнов, бажить, мереват, муемс ёнкст, косо лембе, сэтьме, косо арасть петерь-петерь чудиця сельведть.
Шказо чикуншкадо мейлень. Ловт, чаво, вельтязь кандолазтнэнь шождасто кандыть, лавтов лангс кепедезь-саезь, Чичавонь Палю, Шурик-Дипломат, Солай Мика ды Пайчань Валера. Мельгаст, вить пильгензэ ускозь, эскели Чентяй Рудик, вакссонзо Индялонь Миколь, Ванинень, ловт, шабразо Бозань Люба-Любине, вишкине, теке тейтерне, Сезьган Ольгай сырькаесь, кукорьк-кукорьк путни пильгензэ допрок шержей пря Шорянь Агу, Кулянь умонь-умонь ялгазо фермасо важодема шкастост, ды та-кить лият.
Евгений Васильевич, умок пенсиясо тонавтыцясь, аштесь, учось кудонзо икельга путозь пирявкскенть икеле эземнесэнть. [280] Зярдо пачкодсть корязонзо майсемань кандыцятне ды калмазырев салава кортыця эскелицятне, стясь, саизе прястонзо картузонзо. Неезденть сювордызе седеензэ, совась кирьгапарезэнзэ, цяк тусь, потомкс, стакасто лекстясь. «Э-э-эх», — лиссь потстонзо.
Эрьва кодат мельть совсесть-лиснесть превзэнзэ.
«Чуман, монгак теньсэ чуман... Аламо вийть, мельть путынь — куш киртямс те куломань казиця, видьстэ калмазырьс пачтиця орманть. Теке марто... Мекс ансяк мон? Косот лиятне? Мекс ламодояк ламот чаво вановтсо ваныть сонзэ лангс? Те виевдеяк виев ятонть каршо стямаль весенень. Стицят арасть. Эрьвась бажи седе васов кекшемс, козоньгак а эцнемс, эрьвась вешни сэтьме тарка, эрьвантень вечкеви улемс «сокорокс». Самай секс калмамонь истят илатненень а неяви пе».
Ютыцятне ютасть.
Евгений Васильевич кувакасто лекстясь, путызе картузонзо, ды нурькинестэ, апак эрязкале эскелязь, ютась кузтемпе ёнов.
Лиснесь варштамо покш, Эрьмезьвелев ветиця кинть чирес, таркантень, косо вастовкшность Ванине марто, кува ней кандсть кандолазтнэнь, Алькань Натуяк. Экше. Лавтовонзо ланга каясь понань сёрмав тюс ковта. Прясонзо паця. Валдо тусто черензэ, кода свал, пурназь човоньс. Вансь, зярс эзь юта икельганзо сонсь пайстомочись. Калмазырев, пельвайгельпень ютко, эзь моле. Мурдась кудов. Ледсть мелезэнзэ аволь пек умонь эрьгела-нусманя нурькине читне-ветне, модамарень вейсэ таргамост, банясо шлямост, Ванинень пенгень лазномазо ды ниле чинь перть лия теезь паро тевензэ. Неть мельтнень марто Нату апак капша, прянь нолдазь, тусь эсь киванзо эсензэ пелев. Мезть ангорямс седеенть... Мезе ульнесь — ульнесь, мекев а велявтсак.
Истя ильтизь Дораень Ванинень гайтень а мариця, свал якшамо-чопода кудозонзо. Кузвелень калмазырест, кода лия веленсетненьгак, чувто потсо. Васолдо ванозь — вирьпуло. Те ней. Кодгеменьшка иеде икеле ульнесть пезнавтозь, ченярдсть колмо-ниле калень, килеень тарадкеть, ней — лопатнень пачка чинь налт а ютавить. Шкась мезе ансяк а теи... «Раба божья Вачаева У.С. 1927 — 2004». Овсе аволь умок Ванине пачколесь тей. Ды вана сась таго. Аванзо ваксс. Сась — зярдояк а явовомс. Тесэ, те «вирьпулосонть», аванзо-трицянзо вакссо, келей-рацяня каль ало ушодовсь Ванинень од, каштмолезь ды каштмолиця, сэтьмедеяк сэтьме масторсо эрямозо. Тесэ уш кияк цярка а канды, муевиндеряй кандыця, кияк музгордемеяк а карми.
[281] ...Ульнесь — арась. Пайстомо Ванинеде, исень чикор-лакор, эсь тештевтеме эрицядонть, ледстнемакс кадовсть мельтеме теезь, парсте апак лаксе-валакавтне калмонь марнэнть ве песэ тумонь крёсткесь ды икелень пиресэнзэ содсо артозь-копачазь ёжонь рипакавтыця колмо, теке патят-сазорт, умарькстнэ.