Эрзянь ёвкст (М. Е. Евсевьев, 1928)/42
ВАРАКА МАРТО РИВЕСЬКЕ.
Ривеське артнесь, артнесь вирьга — мезе-як ярцамс эзь мук. Маць ки чирес и прянзо кулыкс теизе. Неизе варака, валксь лангозонзо сельмензэ таргамо. Ривеське каподизе варакань и мери тензэ: „Варака, монь пекем вачсь, сэвдян!”
Варака мери: „Илямак сэв, пачалкседе анттан”.
Ривеське мери: „Андумак, а сэвдян”.
— Адя, — мери варака, — ве ава паксяв канды мирьденьстэнь ярцамс пачалксеть, — мон маняса сонзэ.
Варака валксь аванть икелев ки ланкс ды ашти. Кода авась малазонзо пачкоди, сон таго аламонь тарка ливти икелев ды озы.
Авась арци: „Те варакась а ливтяви, мон кундаса сонзэ.”
Путыньзе ки чирес пачалксензэ ды кармась варакань кундамо.
Варакась аламонь тарка ливти, валги икелензэ, аламонь тарка ливти, валги икелензэ. Авась яла моли малазонзо, ансяк варакань кундамо, сон таго ливти икелев. Кода пачальксетьне кадовсть васов, мольсь ривеське ды сэвиньзе, варака тусь ливтязь.
Теде мейле ривеське мери вараканень: „Ней, варака, пекем пешкець, адя пеецтимак.”
[ 126 ]— Адя — мери варака, пеецтятан!
Тинге ланксо пивсы ве атине бабанзо марто. Варака „вар” валги бабанть пряс. Атясь аволды пивцумасо, — варака „вар” палмань пряс озы. А ривеське ваны забор варяви ды пееди.
Атясь аволясь, авалясь вараканть ланкс — састь, кежензэ ды мери: „Ужо, мон тонть теветь тейса!”
Варака таго „вар” валксь бабанзо пряс. Атя кода аволды вараканть ланкс пивцумасонть мезе вийсэнзэ. Цяр! бабань пря ланга пивцумасо вачкодизе. Варака тусь ливтязь, бабазо прась кунцт ды кулось.
Ривеське пееди, ривеське пееди, пекезэяк сести!
Мейле мери ривеське вараканень: „Ней, варака, тандавтумак!”
— Адя, — мери варака, — тандавттан. Мон валган сюпав эрзянь орта пряс, тон матть ортанть ланкс.
Мольсть. Варака валксь сюпав эрзянь орта пряс и давай ортастень стукамо: зэрь, зэрь. Ривеське маць ортанть ланкс и учи кода варака тандавцазо. Кода лисить сюпав эрзянь кискатьне и кода педить ривеськес!
Ривеське тандаць, седеензэяк сезизе и тусь ардозь вирев. Кискатне мельганзо. Арць, арць ривеське, мусь ундо и совась эзэзэнзэ. Кискатне кадовсть ундонть вакс.
Ривеське ундосонть кевксни сельмесэнзэ: „Тынь, сельть, ков ваныде монь кискатнень эйстэ оргодьме шкане?”
Сельтне мерить: „Минь яла ванынек тонеть ардомс виде ки.”
— Тынь, пильк, месть теиде?
— Минь яла капшинек, ардынек, кода-як тон кискатьненень аволеть сасавт!
— Тон, пуло месть тейнить?
— Мон яла пильге юткс понгонинь, ардомс тенть мешинь.
[ 127 ]— А! тон монь кисканень кундавтыксэлемек! Макстан ней тоньсить кискатьненень!
Ливтизе пулонзо унцто ушов ды мери: „Надо, кискат, сэвинк пулом!”
Кискатьне кундызь ривеськенть пулонзо, таргизь сонсинзэ-як унцтонть ды сэвизь.