Донъя йәме

← Яҙым

Донъя йәме (Шиғыр) автор Лилиә Һаҡмар

Әкиәттәр генә үлмәһен →

Ижад итеү ваҡыты: 1994 йыл. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (53-сө бит) ISBN 5-295-03798-3

Донъя йәме

Эй мөғжизә!
Мөхәббәтме был мәл –
Йөрәгемдең сәскә атыуы!
Бар донъяны онотҡанда ғына
Донъя беҙгә шулай матурмы?

Был донъяны онотҡанда ғына,
Һинең барлығыңды тойғанда,
“Мин – һинеке!”, тиеп бышылдаусы
Маңлайыма ҡулын ҡуйғанда,
Бар мәшәҡәт, ығы-зығыларҙы
Онотҡанда ғына (ни хикмәт?)
Донъя матур!
Донъя түп-түңәрәк.
Ҡайғы-һағыштарға иҫ китмәй.

Билдәһеҙлек томандары кинәт
Ҡарашыңдан китә таралып,
Тын алыуы еңел, тирә-яғым,
Тормош, гүйә ожмах һарайы!

Эй мөғжизә!
Бары бер мәл генә
Һөйөүемдең сәскә атыуы!
Бар донъяны онотҡанда ғына
Тормош матур була, ахыры…
Бар донъяны онотҡанда ғына…

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар