Ичкиздень масторхня/07
[ 34 ]
| 7.
|
Но кяшезя компазть пенгянь лапазонь чёрдаку, Пётькась изь ту Васькать вешендема, а тусь саду и тоса думондай сянь ланкса, мезя-ба сяда цебярьста васькафнемс.
Валда сон случай пинкста васькафнема машць, но тячи, кода назло, мезегя думондамс изь машт. Сон маштолба азондомс сянь колга, кода сон аф цебярьста ванонць Серёжкать меля, и аф лятфнемс аф палаткать, аф компазть колга.
Но сон марязя, што аф саты сонь терпенияц аф азондомс палаткать колга.
Кда аф азондомс, то Васькась сонць кодя нябуть кульсы эста кармай прянь шнафтома и аф ялгаксты:
«Эх тон, мезегя аф содат... Валда мон вася содаса» и стак тов.
И Петькась думондай, кда-ба аф компазсь и аф тя сюдоф пинесь, то сембя улель интереснай и сяда цёбярь. Эста сась теенза пяк тёждя и пяк цебярь ён: а мес-кда мольмос Васькати и азондомс теенза палаткать и компазть колга. Вдь компазть сон афкукс исця сала. Вдь сембонь эса виноват аньцек пинесь. Сявсазь синь Васькать мархта компазть, ласькондийхть палаткать тейс и пуцазь сонь вастозонза. А пинесь? Ну и мезя кда пинесь. Васеньцесь, ули кода сявомс мархтонок кшя суском или сиволень пакарь и ёрдамс теенза, штоба афоль ува. Омбоцесь, ули кода сявомс кархтонок байдект. Колмоцесь, кафонек аф тяфтама пелькс.
Сон тяфта и вешезя тиймода и вешсь тяникигя ласькомс Васькати, но тяса тердезь сонь абедама и сон тусь пяк ахотнайста, сяс мес якама пинкть ётмста сон пяк вачсь.
[ 35 ]Абетта меля няймос Васькать танга изь удала. Мамац тусь муськомонь оргяляма и кошардозя сонь куца аф оцю сестранянц Еленать ванма.
Кода валда, мзярда, мамаць тушонц и кадондозя сонь Еленкать мархта, сон навсесь теенза всякай лоскотт и цюрбаконят и мзярс сон налхксесь мархтост, спакойнаста тушенць ульцяв и кодак няйсы маманць, мрцесь Еленкать тейс, и кода-бта теестонза изь тушенд.
Но тячи Еленкась улсь аф пяк хорай и ордачнесь. И мзярда, навась тийсь теенза мацинь долга да круглай, кода мячь, модамарь, сон тусь кенкшть шири, Еленкась кепоць тяфтама пишкодма, што ётай куцнон ваккска сусед авасна, варжаксць вальмава и шукштась Петькати сурсонза, думондась, што сон тийсь сестранцти кодама-нябуть аф пара тев.
Куфкстась Петькась, озась Еленкать ваккс эчкя одияла ланкс, ацаф мастора, и горяв вайгяльса уйфць теенза морама весяла моронят.
Мзярда мрдась мамац шовдалгачнесь-ни, и мекпяли нолдаф Петькась ков кельги лиссь кенчксть эзда и кармась вяшкондема Васькать терьнема.
— Эх, тон! — сингордазь юваць Васькась ненгя ичкиздя. — И мес, Петька, мон тонь шинь перьф вешендийхтень и изийхтень му?
И исця учь, мзярда Петькась мезя-ня буть азы, Васькась курок азондозень сембя отнень мезя кульсь шинь перьф. А отта Васькать улсть лама. Клёк вася, раз’езть тейса кармайхть тийма завод. Омбоцесь, вирса ащи палатка, и ся палаткать эса эряйхть пяк цебярь ломатть, конатнень мархта сон, Васькась, содасыень-ни. Колмоцесь, Серёжкать аляц сязезя тячи Серёжкать, и Серёжкась парась сембя ульцять келес.
Но аф завоць, аф платинась, аф ся, што саць Серёжкати алянць эзда, мезкса сон из диванда и изь мутендав кода ся, што Васькась кати-кода содазя ся палаткать и клёк вася азонцы сонь колганза теенза Петькати.
— Коста тон содасак палаткать? — кизефтезя абижаф Петькас. — Мон брать, монць васенькавак сембонь содасаень, мархтонь тячи история лиссь.
[ 36 ]— История, история, — инголдазя сонь Васькась.
— Кодама тонь историяця? Тонь аф интереснай историяця, а монь интереснай. Мзярда тон юмать, то мон куваць тонь вешендийхтень. И тяса вешендийхтень и тоса вешендийхтень, и везде вешендийхтень. Молсь мялезя тонь вешендемот. Вов абедань мон и тунь кальхнень потмос илинь керьма. Ванан уторозон моли ломань. Сери, боксонза шнань сумка тяфтама, кодапт якстеря армеецнень командирснон. Кямонза кода ахотнеконь, но аньцек аф военнай и аф ахотник. Няймянь сон монь и корхтай: «Сака сей, цёраня». Тон думондат, што мон эводень? Аш. Вов шаштонь мон, а сон варжакссь лангозон и кизефнесамон: «Тон цёраня, тячи калхть кунцеть?» «Аш, — корхтан, — изень кунця. Мельган тя дурак Петькась изь сува. Вешсь сувамода, а сонць ков-бди юмась». — Да, — корхтай сон, — мон монцкя няйса, што аф тон. А ашыли тинь ненгя омбоця тафтама цераняндесть, аф ламода тондедот сери, и шееренза аф пяконя рыжайхть?» «Ули, — корхтан, — минь тяфтама, аньцек тя аф мон, а Серёжкась, конац минь нератанянеськонь салазя». — «Вов, вов, — корхтай сон, — сон аф ичкизя минь палатканеськонь эзда брутти сетканц ёрязя. А коса сон эряй?» — «Адя, — пышкядень мон. — Мон тейть, дяди, няфца, коса сон эряй».
Молхтям минь, а мон лумондан: «и мезенди тяфта теенза Серёжкась эрявкстомсь? Сяда цебярь улель кда-ба минь Петькать мархта эрявкстольмя».
Мзярс минь мольмя, сон теень сембя азонць. Синь кафоннесь палаткать эса. А палаткась Филькать шюдерьксонц коряс вяря. Синь, кафоннест нят, тяфтама ломатть — геолокт. Модать ванонцазь, кефнень, сёвонь вешендийхть и сембонь сёрмачнесазь, коса кефт, коса песок, коса сёвонь. Вов мон теенза и корхтан. «А мезя-кда минь Петькать мархта теезонт молхтям? Миньгя карматам вешендема минь тяса сембонь содасайнек. Минь ётай кизонда тяфтама якстеря кев мумя, што удивительна кодама якстеря. А Серёжкати, корхтан теенза, тон дяди лучи афолеть яка. Сон вреднай, тя Серёжкась. Аньцек ба теенза тюремс, да ломанень нерятанят усксемс». Ну самя минь. Сон куду сувась, а мон ульцяса лядонь. Ванан, лиссь, Серёжкать мамац и ювади: «Серёжка! Серёжка! Изийть няй-ли тон Серёжкать?» А мон пышкядень: «Аш изия няй. Няия, аньцек аф тяни, а тяни [ 37 ]изия няй». Тоса ся ломанцть — техниксь — лиссь, мон сонь илхтия вирть тейс, и сон мярькс, штоба минь тонь мархтот теезост молельмя. Вов сась Серёжкась. Сонь аляц и кизефнесы: «Тон кодама бди веща палаткаста сявондеть?» А Серёжкась атказай. Аньцек аляць изь веронда да и сязезя сонь. А Серёжкась кодак паразевсь! Станя теенза и эряви. Тяфта, Петька?
Сембя сяка Петькать исця кенянтьфть тяфтама азояфсь. Шамац Петькать улсь хмурай и пичедикс. Тяда меля кода сон содазя, салаф компазтькса сязезь-ни Серёжкать, сон, марясы эсь прянц пяк аф ловкаста. Тяни улсь-ни позна азондомс Васькати кода улсь тевсь. И осалста сатф, сон ащесь печальнай, эвотьф и исця сода, мезя сон кармай тяни корхтама и кода тяни кармай азондома Васькати сонь юмаманц колга. Но сонь выручандазя сонць Васькась. Шнафты пря эсь азондоманзон мархта, сон вешсь ульмода великодушнай.
— Тон мес нолдайть нярцень? Тейть обидна, што тон ашелеть? А тон афолеть орьгочня, Петька. Рас надияфтомя, тк надифтомя. Ну, да мезя кда, минь ванды марса мольхтам, мон-жа теенза азия: и мон саян, и монь ялгазя Петькась сай. Тон, кода няеви, тётацень шири кардону ласькондеть? Мон ванан: Петькась аш, калонь кунцематьня калдазост. Ну, думондан, сон тётанць шири тусь. Тон тоса улеть?
Но Петькась изь отвеця. Сон мезегя из корхта, куфкстась и кизефтезя, ванозь ков бди Васькать вакска:
— И кемоста Серёжкать аляць сязезя?
— Кода няеви, пяк, ряс Серёжкась тяфта парась, што ульцять келес марявсь.
— Рази можна шавмос? — угрюмайста кизефтезя Петькась. — Тяни аф сиря пингя, што-ба тюремс. А тон: «сязезя да сязезя». Кеняндеть. Кда-ба тонь аляця сязельнзя тон-ба кенянделеть?
— Тк вдь аф монь, а Серёжкать, — пшкяць Васькась, аф пяконя смущенай Петькать валонзон эзда. — И аф тяфтак, а тевонкса; местема сон ломанень палаткас яцесь? Ломатня работайхть, а сон инструмент салай. И мес тон, Петька, тячи чудноят. То шинь перьф усксевоть, то илядень перьф кяжият.
— Мон аф кяжиян, — аф вишкста пшкяць Петькась. — Вася пеензя сярятькстась, а тяни-ни пчкясь.
[ 38 ]— И курок лоткай? — участливайста кизефтезя Васькась.
— Курок. Мон, Васька пожалай куду туян. Мадондан, мадондан куца — сон и лоткай.