Капитан ныл (Пушкин)/4
| ← III люкетэз. Крепость | Капитан ныл IV люкетэз. Ваче жугиськон Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
V люкетэз. Яратон → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 25—33. |
Ваче жугиськон
— Мугордэ веськыт карыса, азям султыны косӥсько.
Адӟод, кызьы мон тынэсьтыд мугордэ бышкалто!
Княжнин
Кӧня ке арня ортчыса, мынам Белогорской крепостьын улонэ, тупам гинэ ӧвӧл, яраны но кутскиз. Комендант дорын мон родня мурт кадь луи. Ачиз но, кышноез но соос туж умоесь адямиос вал. Иван Кузьмич салдат нылпиысь офицере потэм маке, дышетскем ласянь ляб вал, нош туж лякыт но шонер адями. Ачиз трос сюлмаськисьтэм мурт луэмен, солэн кышноез асэныз но кивалтэ. Служебной ужъёс шоры Василиса Егоровна ас хозяйственной ужъёсыз шоры кадь учке вал, со крепостен но, ас коркаеныз сямен ик, управлять каре вал. Марья Ивановна ӝоген монэ мурт каремысь дугдӥз. Ми соин умой-умой тодматскимы. Со визьмо но, сюлэмо нылмурт вылэм. Тӥни озьы, аслым шӧдонтэм, мон та лякыт семья борды герӟаськи. Озьы ик палсинмо гарнизонной поручикен, Иван Игнатьевичен, но кусыпмы герӟаськиз. Та поручиклэн Василиса Егоровнаен кусыпсы пыдло пыремын шуыса, Швабрин вераськылӥз ке но, сыӵе урод малпаса вераськемезлэн шонерез вужер кадь но ӧй вал. Нош Швабрин со сярысь ӧз сюлмаськылы.
Монэ офицере поттӥзы. Служба секыт ӧй вал. Та инмарлэн утён крепостяз нокыӵе смотръёс, дышетсконъёс но караулъёс ӧвӧл. Комендант гинэ ас мылпотэмезъя салдатъёсты куддыръя дышетылэ ик вал но, салдатъёсыз кудпалан бурпал, кудпалан паллян пал сое но ваньмыз валаса ӧз вуттэ на. Швабринлэн кӧня ке француз кылын гожъям книгаосыз вал. Мон соосты лыдӟыны кутски но мынам литература борды кутскон мылкыды ӝутскиз. Ӵукнаосын мон книга лыдӟылӥ, ӟуч кылэ берыктыны дышетскылӥ, дырын-дырын стих сочинять карыны но дышетскылӥ. Нуназе сиськонэз котьку ик комендант дорын ортчытылӥ, собере кылемзэ нуналэз отын ик ортчытӥсько вал. Отын куддыръя ӝытъёсын отец Герасим ас кышноеныз, Акулина Памфиловнаен, вуэ вал. Кышноез солэн быдэс околоткаын пӧртэм иворъёсты нырысь ик тодоз но вӧлмытоз вал. Алексей Иванычен Швабринэн нуналлы быдэ адскылӥ, нош куспамы вераськонмы мыным ялан ӧз яралля ни. Комендантлэн семьяез сярысь, тужгес ик Марья Ивановна сярысь, котьку сереме уськытыса вераськемъёсыз туж уг ярало мыным. Мукет общество крепостьын ӧй вал, мукетыз мыным кулэ но ӧй вал.
Башкиръёс сярысь вераськонъёс ӧз зэмалэ: соос уг бугыръясько. Милям крепость котырын чалмыт. Нош сыӵе улонэз, малпамтэ шорысь, ваче керетон сӧриз.
Литература бордын ужаме сярысь мон верай ини. Та уже мынам, соку дыръялы, умой гинэ вал. Кӧня ке аръёс ортчыса, Александр Петрович Сумароков но ушъялляз. Одӥг пол мон кырӟан гожтыны быгатӥ, гожъяме аслым туж кельшиз. Кылбурчиос ӵем дыръя ас кылбуръёссэс дунъян вылысь но мар, гожъямзэс кинлы ке лыдӟыны туртто. Озьы тӥни мон кылбурме, выльысь чебергес гожъяса, сое Швабрин доры нуи. Быдэс крепостьын со сяна кылбуръёсыз дунъяны быгатӥсь ӧвӧл. Ӧжыт вераськем бере, кисыысьтым тетрадьме поттыса, солы мон таӵе гожъям кылбурме лыдӟисько:
Яратон мылкыдме зӥбыса,
Чебер нылэз вунэтны тыршисько.
Ах, мон Машалэсь палэнскыса,
Аслым эрик шедьтыны малпасько.
Чебересь синъёсыз вормизы,
Соос котьку мынам син азям.
Лулме со синъёс бугыртӥзы,
Басылэс мылкыдме суразы.
Мынэсьтым малпанме тодыса,
Жаля вал, Маша, монэ.
Яратон мылкыдме адӟыса,
Тод киулад шедемме.
— Кыӵе тон сямен? — Швабринлэсь юасько но ачим солэсь ушъямзэ витисько. Ушъямзэ витеме мынам токма луиз: огшоры дыръя Швабрин трос копаськись ӧй ке но вал, мынэсьтым гожъям кырӟан кылбурме урод гожъямын шуыса, меӵак вераз.
— Малы озьы? — юай мон солэсь, йыркурме ватыса.
— Соин, — шуэ со, — таӵе кылбуръёс мынам дышетӥселы Василий Кирилыч Тредьяковскийлы туж тупало, солэн гажан ныллы гожъям кылбуръёсыз кадь.
Тетрадкаме со киысьтым басьтӥз но, номре жалянэз валатэк, кажной стихсэ, кажной кылзэ критиковать карыса сэрттэ-пертче, маин ке бышкем сямен, монэ исамес каре. Чидамтэеным мон тетрадкаме солэн киысьтыз туркак кыскыса басьтӥ но, табере ноку но ас кылбуръёсме солы уг ни возьматы шуи. Мынам та кылъёсы сярысь Швабрин серекъяз гинэ. «Адӟом али, — шуиз со, — кылдэ кутыны быгатод меда: Иван Кузьмичлы сиськон азяз винаен графин кулэ луэм сямен ик, кылбурчиослы но гожъям кылбурзэс кылскись одно кулэ луэ. Нош кыӵе Маша сярысь тон сокем гажан мылкыддэ кылбурад кисьтӥськод? Марья Ивановна ӧвӧл-а?»
— Котькыӵе Маша мед луоз, тынад ужед ӧвӧл, — шуи мон йыркурен. — Мон тынэсьтыд малпамдэ но визькенештэ но уг юаськы.
— Ого! Ассэ ачиз яратӥсь кылбурчи но лякыт ныл гажась! — монэ ялан пӧсекъятыса, веранзэ нуйтэ Швабрин, — нош кылскы, мон тыныд эш мылкыдэн визькенеш сёто: гажанэдлэсь пайдазэ шедьтэмед ке потэ, кырӟанъёсын эн выр.
— Кызьы сое валано, сударь? Умойгес валамон вера ай мыным.
— Мылпотыса верало. Сое тазьы валано: Маша Мироновалэсь ӝыт ӝомытъёсын дорад ветлэмзэ витемед потэ ке, небыт кылъёсын гожъям кылбур интые, тон солы пельугы кузьма.
Мынам вире быректэм кадь луиз.
— Нош малы тон со сярысь озьы урод малпаськод? — йыркур луэмме мырдэм возьыны быгатыса, юасько.
— Соин, — серемес карыса, пумитам вера со, — мон ас ужъёсы вылысь солэсь сямъёссэ тодӥсько.
— Пӧяськод тон, мерзавец! — визьтэммыса кадь кеськи мон, — номре возьытэз валатэк пӧяськод тон.
Швабринлэн ымнырыз ик мукет луиз.
— Та кылъёсыд тынад озьы гинэ уз ортчы, — мынэсьтым киме вӧсь луымон зол кырмыса, шуиз со. — Тон мыным сатисфакция сётод.
— Ме, котьку но дась! — шумпотыса мон верасько. Соку мон сое оло шори ик кесьыны дась вал.
Мон соку ик Иван Игнатьевич доры мынӥ. Мон пырыку, со, комендантшалэн косэмезъя, губиосты сӥньысэ сузяса, толалтэ азелы куасьтыны дасяса, пуке вал. «А, Пётр Андреич! — вазиз со, монэ адӟыса. — Кызьы тӥледыз татчы инмар вуттӥз? Мар ужен, юаны дӥсьтӥсько?» Алексей Иванычен куспамы даллашеммес мон солы ӝогак верай но, сое, Иван Игнатьичез, мынам секундантэ луыны курисько. Вераськемме Иван Игнатьич, берпум одӥг синзэ паськыт карыса, туж зол кылзӥськиз. «Тӥляд верамдыя, — мыным со шуэ, — тӥ Алексей Иванычез бышкалтыса быдтыны малпаськоды но, монэ со уждэс адӟись карыны малпаськоды? Озьы-а? — юаны дӥсьтӥсько».
— Озьы, озьы.
— Помилуйте, Пётр Андреич! Мар карыны тӥ малпаськоды! Тӥ Алексей Иванычен куспады даллашиды? Бадӟым беда со ӧвӧл! Даллашон со чыртые ошкыса уг ул. Со тӥледыз куаретӥз, тӥ сое куаретэ: со тӥляд ымнырады сётоз, тӥ солэн пельдораз, мукетаз, куиньметӥяз сётоды но, огды бордысь огды палэнскоды. Нош ми тӥледыз уръяськытом. А то аслэсьтыд матысь адямидэ бышкалтон уж — ӟеч уж-а со, юаны дӥсьтӥсько? Тӥ ке сое бышкалтысалды, оло умой гинэ луысал: бог с ним Алексей Иваныченыз, мон ачим но сое сокем уг яратӥськы. Нош со тӥледыз бышкалтыса пась кариз ке? Малы ярамон уж луоз со? Кин соку шузиен кылёз, юаме потэ?
Поручиклэн ӟеч мылкыдын вераськемез мынэсьтым малпамме ӧз вошты. Мон озьы ик ас малпаменым кыли. «Асьтэос тодӥськоды, — шуиз Иван Игнатьич, — кызьы ке валаськоды, озьы каре. Нош малы мыным отын адӟись луоно? Мар уже мынам? Калыкъёс куспазы жугисько ке — со адӟымтэ уж-а ма, юаны дӥсьтӥсько? Инмарлы тау, ветлӥ мон войнаен швед вылэ но, турок вылэ но котьмае адӟемын ини».
Мон кызьы но озьы секундантлэсь ужзэ солы валэктыны турттӥсько, нош Иван Игнатьич мынэсьтым валэктэмме нокызьы но валаны уг быгаты. «Асьтэос тодӥськоды, — шуиз со. — Уж куспады пырытэк кылеме нокызьы но мынам уг ке лу, мыныса Иван Кузьмичлы шат ивортоно. Асьме крепостьын урод ужъёс, казённой интереслы пумит луись ужъёс, луыны малпало шуыса верано. Оло господин комендант мар ке ужпум кутыны мылкыд кароз…»
Мон кышкай но, комендантлы медаз урттылӥськы шуыса, Иван Игнатьичез сюлворыны кутски. Сюлворыны мырдэм быгатӥ: уг урттылӥськы шуыса, со мыным кыл сётӥз но мон ӝоггес со бордысь палэнски.
Ӝытэз мон, котьку дыръя кадь ик, комендант дорын ортчытӥ. Номре медаз шӧдске но акыльтӥсь юалляськонъёс медаз луэ шуыса, мон асме капчи мылкыдогес возьыны турттӥсько. Нош таӵе уже пачкам калык ваньмыз ик нокыӵе луымтэенызы ушъясько ке но, мон асме соос кадь возьыны ӧй быгаты. Та ӝытэ мон кинэ ке гажасал, яратысал кадь. Марья Ивановна мыным али тужгес ик синмаськымон потӥз. Нош сое но оло берлозэ адӟисько на шуыса малпасько ке, синвуосы матэ вуымон ӝожомисько. Татчы ик Швабрин но вуиз, мон сое сьӧрлогес карыса, асьлэсьтым Иван Игнатьевичен вераськемме верай. «Малы асьмелы секундантъёс кулэ? — кӧс кылын со мыным вера, — соостэк но ужмес ортчытом». Ми соин крепость дорын сылӥсь кабанъёс сьӧры шпагаосын жугиськыны кенешим. Отчы ӵуказе сизьым час ӵукна лыктыны тупатским. Куспамы вераськонмы умой гинэ, лэся, ортчиз. Соин Иван Игнатьич, ас шумпотэмзэ возьыны быгатымтэеныз, ужмес шарае поттӥське вал.
«Кемалась озьы кулэ вал, — шуиз со мыным, шумпотыса, — лекъяськем бере тупаса улэм, ӟечен даллашонлэсь но умой, честной ке но ӧвӧл, со таза».
— Мар, мар шуид, Иван Игнатьич? Мон ӧйгес кылы, — сэрегын картаен тунаса пукись комендантша юа.
Солэсь вераськемзэ мылкыдамтэме адӟыса, номре куаретонтэм вылысь кыл сётэмзэ тодаз вайыса, Иван Игнатьич возьытэ вуиз но, мар вераны ёрмиз. Швабрин солы юрттыны вуиз.
— Иван Игнатьич, — шуиз со, — милесьтым куспамы уръяськеммес ушъя.
— Нош кинэн тон, батюшка, даллашид?
— Ми Пётр Андреичен куспамы зол гинэ даллашеммы вал.
— Мар понна озьы?
— Токма сярысь гинэ: кырӟан сярысь, Василиса Егоровна.
— Шедьтӥллям мар сярысь даллашыны! Кырӟан сярысь!.. Кызьы, бен, озьы со ужды луиз?
— Тани кызьы: кемалась ик ӧвӧл, Пётр Андреич кырӟан гожтэм но, туннэ сое мон азьын кырӟаз; мон нош аслэсьтым гажан кырӟанме кырӟай:
Капитанлэн нылыз
Эн ветлы юмшаса уйшоре.
Та бордысен керетон потӥз. Пётр Андреич йырзэ кур карем вал но; собере котькинлы, котьмар сярысь кырӟаны луэ шуыса, малпаз, лэся. Тӥни соин ужмы быриз.
Швабринлэн возьыттэмез монэ ӧжыт гинэ ӧз урмыты, нош солэсь котыръяськыса вераськемзэ мон сяна нокин но ӧз шӧды. Кырӟанъёс бордысен вераськонъёсмы кылбурчиос сярысь мыныны кутскиз. Ваньзы соос, кылбурчиос, беспутной калык, пьяницаос шуиз комендант. Кылбур гожъян уж бордысь монэ дугдытыны визькенеш сётӥз: со уж, пе, службалы пумит уж луэ, нокыӵе ӟече, пе, уз вутты.
Швабринлэн татын улэмез мынам сюлмам уг тэры. Мон, комендантэн но солэн семьяеныз проститься кариськыса, ӝоггес кунокаям кошки. Кунокае вуыса, шпагаме эскери, солэн пумысьтыз лэчытсэ учки но, Савельичлы ӵукна монэ сизьыметӥ часын сайкатыны косыса, изьыны выдӥ.
Ӵуказеяз ӵукна тупатскем вакытэ мон кабанъёс сьӧрын сылӥсько ини, аслэсьтым пумит луись адямиме витисько. Ӝоген со но вуиз. «Асьмемыз татысь шӧдозы, — шуиз со мыным, — дыртоногес луоз». Ми мундиръёсмес кылим но, дэрем полэс кариськыса, шпагаосмес пуртэсысьтызы поттӥм. Ӵапак со куспын кабан сьӧрысь Иван Игнатьич но вить кузя инвалидъёс потӥзы. Со милемыз комендант доры мыныны косӥз. Мылпотытэк ке но, ми кылсконо луим. Салдатъёс милемыз котыртӥзы но, ми Иван Игнатьич бӧрсьы вамышъяськом, со нош, вылтӥяськыса кадь, важно вамышъяса, милемыз нуэ.
Ми комендантлэн корказ пырим. Иван Игнатьич ӧсэз усьтӥз но, данъяськыса: «Вуттӥ!» — шуиз. Милемыз Василиса Егоровна пумитаз. «Ах, тӥ, батюшкаосы! Малы кельше та уж? кызьы? мар? Али ик таосты под арест пуктоно! Пётр Андреич! Алексей Иваныч! вае татчы шпагаостэс, вае, вае! Палашка, ме та шпагаосты чуланэ ну. Пётр Андреич! тынэсьтыд мон таӵе уждэ уг витиськы вал. Кызьы тынад возьытэд ӧвӧл! Алексей Иванычлы, шуом, тупа ик: со гвардиысь но йыр быдтэм ужез понна татчы келямын: со инмарлы но уг оскы; нош тон мар? отчы ик ношна чуртнаськиськод?»
Иван Кузьмич, кышноезлэн верамъёсызлы пумит кариськытэк, ачиз но ватсаса вера на: «Кылскы али тон, Василиса Егоровна шонер вера. Ваче жугиськон уж воинской артикулын но лэземын ӧвӧл». Со куспын Палашка милесьтым шпагаосмес басьтӥз но чуланэ нуиз. Мон нокызьы но серемме возьыны ӧй быгаты. Нош Швабрин ассэ ачиз важной тусэныз ик возиз. «Туж ик мон тӥледыз гажасько ке но, — номре луымтэ мурт сямен, со комендантшалы вера, — нош вератэк уг чидаськы: милемыз судить карыса, токма гинэ асьтэлы мултэс уж лэсьтӥськоды. Та сярысь Иван Кузьмичлы право сётоно: солэн со ужез». — «Ах, батюшка! — пумитаз комендантша вера, — кузпал но солэн кышноез одӥг лулысь, одӥг вирысь ӧвӧл-а ма? Иван Кузьмич! мар тон тяпайтӥськод? Али ик таосты пӧртэм нимаз сэрегъёсы ву но кӧс нянь вылын возьыны пуктоно, шузияськонзы мед быроз. Собере отец Герасим таос вылэ эпитемия мед поноз, сьӧлыксэс куштыны курыса, инмарлы мед вӧсяськозы, калык азьын но виноват луэмзэс мед возьматозы».
Иван Кузьмич мар карыны ёрмемын. Марья Ивановна кӧс кӧсэктэмын. Ичиен-почиен сильтӧл каньылаз, комендантша но куаретэмысь дугдӥз, милемыз огместы огмы чупаськыны косӥз. Палашка милемлы шпагаосмес вайиз. Ми комендант дорысь уръяськыса кадь потӥм. Иван Игнатьич милемыз келяса мынэ. «Кызьы тӥляд возьытты ӧвӧл, — воже потыса шуи мон солы, — та ужмы сярысь нокинлы но уг вера шуыса кыл сётэм бере, комендантлы чагиськиллямды?» — «Инмар понна мон Иван Кузьмичлы та сярысь номре но ӧй вера, — шуэ со, — Василиса Егоровна та ужез мынэсьтым юалляськыса тодыны быгатӥз. Комендантлэсь юатэк-вератэк, ачиз та ужез пумаз вуттӥз. Ӵок ойдо, инмарлы тау, умой ортчиз кадь». Озьы верам бераз, со кунока палаз кошкиз, ми Швабринэн ӵошен кылим. «Асьмелэсь ужмес тазьы гинэ быдтыны уг лу», — шуи мон солы. «Конечно, — шуэ Швабрин, — тон ас лякыттэм кылъёсыдлы ас виреныд дун тыроно луод; только асьмемыз эскерылозы дыр. Куспын ужмес кӧня ке нунал ӵоже шӧдытэк возёно луоз. Ӟеч лу!» Куспамы номре луымтэ муртъёс сямен, люкиським ми соин.
Комендант доры берытскем бере, мон, ас дышем сяменым, Марья Ивановнаен артэ пукси. Иван Кузьмич гуртаз ӧй вал. Василиса Егоровна хозяйство ужъёсыз котырын берга. Ми лушкемгес куспамы вераськиськом. Мынам Швабринэн даллашем уже соослы но мултэс сюлмаськон сётӥз шуыса, Марья Ивановна ненегъяськыса монэ куаретэм каре. «Куспады тӥ шпагаосын жугиськыны малпаськоды шуыса верамзэс кылӥ но лулы ик потӥське вал, — шуиз со. — Та пиосмуртъёс абдрано кадесь! Ог арня куспын вунэтымон одӥг кыл понна гинэ но куспазы кораськыны дасесь, ас улонзэс шуге-леке вуттэм гинэ ӧвӧл, мукетъёсызлэсь ӟеч улонзэс бугырто… Даллашондылэн кутскисез тӥ уд луиське шуыса, оскисько мон. Алексей Иваныч виноват, дыр».
— Нош малы тӥ, Марья Ивановна, озьы малпаськоды?
— Озьы ик… сыӵе со адямиез сереме уськытӥсь! Мон Алексей Иванычез уг яратӥськы. Солы мынам кӧты уг веська. Нош абдрано кадь: малы ке, со мон шоры озьы ик медаз учкы кадь потэ.
— Нош кызьы тӥ малпаськоды, Марья Ивановна? Тӥледлы со синмаське-а уг-а?
Марья Ивановна, веранзэ ӝыныё карыса, гордэктӥз.
— Мынам малпамея, — шуиз со, — мыным со синмаське.
— Малы нош тӥ озьы малпаськоды?
— Со монэ кышно кураз, соин озьы малпасько.
— Кышно кураз! Со тӥледыз кышно кураз? Ку озьы?
— Кылем арын. Тӥ лыктэмлэсь ог кык толэзь азьло.
— Нош тӥ ӧд бызе-а?
— Асьтэос адӟиськоды. Веранэз ӧвӧл, Алексей Иваныч, конечно, визьмо адями, ӟеч выжыысь, ваньбур ласянь но узыр гинэ. Нош венчать луон дыръя калык азьын соин чупаськоно луонэз тодам вайисько ке… Уг, уг! Котьмар ке но сётӥзы, кулэ ӧвӧл!
Марья Ивановналэн верамъёсыз мынэсьтым синъёсме усьтӥзы но мон троссэ валамтэ ужъёсты валаны кутски. Малы Швабрин сое сокем ӵушкаса, уродэ поттыса мон азьын вераське, сое но валай. Милесьтым куспамы Марья Ивановнаен умой улэммес шӧдӥз дыр но кусыпмес сӧрыны турттэ луоз. Сереме уськытон кылъёсыз Швабринлэн юри малпаса пӧялляськем кылъёс вылэм, соин мынам уката вожпотӥз. Сыӵе урод кылъёсты нуллӥсь муртэз наказать карон мылкыдэ мынам уката ӝутскиз; мон тупась дыр вуэмез чидатэк витьыны кутски.
Кема ӧй витьы. Ӵуказеяз мон элегия кылбур гожъяса пукисько, рифма утчаса пероме йырйисько. Со куспын укно улам Швабрин йыгаськиз. Мон, пероме куштыса, шпагаме кутӥ но со доры потӥ. «Малы берло азелы кельтод? — шуиз Швабрин, — асьмемыз нокин но уг эскеры. Шур дуре васьком. Отын асьмелы нокин но уз люкеты». Ми куспамы вераськытэк мынӥськом. Пыдын ветлон меӵ сюрес кузя ваським но, шур дуре ик вуыса, шпагаосмес пуртэсысьтызы поттӥм. Швабрин мынэсьтым устогес шпагаеныз ужа, мон нош солэсь кужмогес но дӥсьтӥсьгес. Мынам француз дышетӥсе, Бопре но куке-соку салдатын улэм мурт, фехтовать карон сярысь мыным кӧня ке урок возьматӥз. Табере солэн дышетэмез мыным туж яраз. Мынэсьтым сыӵе устолыкме, солы кышкыт луонме Швабрин уг чакла вал. Туж кема ми огмылы огмы номыре но вӧсь карыны ӧм быгатэ. Берпумаз Швабринлэсь лябомемзэ шӧдыса, мон со котыре золгес кутски но, сое шуре ик вуттӥ. Малпамтэ шорысь, туж зол черектыса верам ас нимме мон кылӥ. Берытскыса учки но гурезьысь сюрес кузя бызьыса васькись Савельичез адӟи… Со куспын ик мынам мӧляям, бурпал пельпум уллапалазгес, мар ке туж зол бышкалтӥз кадь но, мон пограй…