Капитан ныл (Пушкин)/5
| ← IV люкетэз. Ваче жугиськон | Капитан ныл V люкетэз. Яратон Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
VI люкетэз. Пугачёвщина → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 33—40. |
Яратон
Ах, тон, ныл, чебер ныл!
Эн бызь, чебер, пинал ныл;
Юа тон, ныл, бубы-мумылэсь,
Бубы-мумылэсь, ӵыжы-выжылэсь;
Люка тон, ныл, тросгес визь,
Люка визь но кузьым-дӥсь.
Калык кырӟан
Мынэсьтым ӟечсэгес ке шедьтӥд, вунэтод;
Мынэсьтым уродзэ ке шедьтӥд, малпалод.
Калык кырӟан
Сазьтӥськем берам, мон кӧня ке ӵоже мар луэмзэ валатэк кылли. Мон тодмотэм горницаын, кровать вылын кыллисько, аслэсьтым зол лябомемме шӧдӥсько. Мон азьын, кияз кӧйтыл возьыса, Савельич сылэ. Кин ке туж лякытэн мӧляысьтым но пельпумъёсам бинем бинетэз сэрттылэ. Ичиен-ичиен мынам йырсазь сайкытгес кариське. Мон ваче жугиськеммес тодам вайи но раненой луэме сярысь валай. Со куспын ӧс ӟукыртӥз. «Кыӵе мар?» — лушкем куара кылӥськиз. Со куараез кылыса мон куалектӥ. «Ялан ог кадь, — пыдлось лулскыса, шуиз Савельич, — витетӥ сутказэ ини ассэ ачиз тодаз вайыны уг быгаты, йырсазьыз уг ужа на». Мон берытскыны малпасько вал но, ӧй быгаты. «Кытын мон? кинъёс татын?» — мырдэм вази мон. Марья Ивановна мынам кровать дорам лыктӥз но мон доры мыкырскиз. «Кыӵе-мар астэс шӧдӥськоды?» — шуиз со. «Инмарлы тау, — лябомем куараеным мон солы верасько. — Тӥ-а, Марья Ивановна? Вералэ али мыным…» Вераськонме пумаз вуттыны мынам кужыме ӧз ни сузьы, мон вераськемысь дугдӥ. Савельич шумпотэменыз «ах» гинэ шуыны быгатӥз на. Солэн шумпотэмез ымныр вылаз ик адске. «Сазьтӥськиз! Сазьтӥськиз! — шуэ со бӧрсьысь бӧрсе. — Инмарлы тау! Ну, батюшка, Пётр Андреич! туж ик кышкатӥд тон монэ! Витетӥ суткаез ини!..» Марья Ивановна солэсь вераськонзэ ӝыныё кариз. «Трос эн вераськы соин, Савельич, — шуиз со. — Со ляб на али». Висъетысь со потӥз но ӧсэз каллен гинэ пытсаз. Йырвизь мынам бугыръяське. Озьыен, мон комендантлэн корказ. Марья Ивановна мон доры пыраз. Савельичлэсь мон мар но со юаны малпасько вал но, нош пересь, пельёссэ ӵоксаса, йырзэ шонаны кутскиз. Мон, йыркур луыса, синъёсме кыни но ӝоген умме уси.
Иземысь сайкам берам, мон Савельичез ӧти но, со интые ас азьысьтым Марья Ивановнаез адӟи, солэн, ангеллэн кадь, куараез монэ ӟечбура. Соку дыръя сюлэмылэсь лякыт гажан мылкыдзэ мон нокызьы но вераны уг быгатӥськы. Мон солэсь кизэ кутӥ но, небыт мылкыдылэн синвуосыныз коттыса, чупаны кутски. Кизэ Маша уг тала, чупаны эрик сётэ… собере малпамтэ шорысь солэн ымдуръёсыз мынам бам бордам вуизы но, мон пӧсь чупамзэ шӧдӥ. Вылтыры мынам пӧсьвуам кадь луиз. «Ӟеч мылкыдо, гажано Марья Ивановна, — шуи мон солы, — луэ тӥ мыным кышно, монэ шудо карыны тупамдэс вералэ». Со сазьмиз кадь. «Я, эн пӧсекъялэ, буйгатске, — киысьтым ас кизэ кыскыса, вераз со. — Тӥляд тазалыкты кышкыт на, ранить карем ярады азомоз. Коть мон понна гинэ но астэс эскерысагес возе». Та кылъёссэ верамез бере, со кошкиз, монэ туж ӟеч шумпотон мылкыдын кельтӥз. Со шуд монэ чылкак улӟытӥз. Со мынам луоз! со монэ яратэ! Быдэс улонэ мынам таӵе малпанъёсын тырмемын.
Со дырысен мон висёнэлэсь ялан капчияны кутски. Монэ полковой цирюльник эмъяз: мукет лекарьёс крепостьын ӧй вал. Инмарлы тау, цирюльник коть визьмыныз трос ӧз йӧнъяськы. Егит сӥльвир но инкуазь мыным ӝоген бурмыны юрттӥзы. Комендантлэн быдэс семьяез мон котырам бергазы. Мон дорысь Марья Ивановна ӧз но кошкылы. Вератэк но тодмо ини, нырысь умой дыр вадсаськыку ик мон яратон сярысь, кышно басьтон сярысь вератэк кельтэмъёссэ соку ик пумъяны кутски. Марья Ивановна мынэсьтым верамъёсме чидаса кылске. Со, чик йӧнъяськытэк, аслэсьтыз монэ гажан мылкыдзэ мыным вераз но, солэн бубыез-мумыез солэн та шудэзлы шумпотозы шуиз. «Нош ачид умойгес малпа на, — ватсаса вераз со мыным, — тынад бубыед-мумыед пумит уз-а луэ?»
Мон зэмзэ но малпаськонэ уси. Нэнэлэн небыт сюлэмезлы мон оскисько, нош бубылэсь сямъёссэ но малпамъёссэ тодыса, мынам нылэз гажан мылкыдэ солэн сюлмаз трос ик уз йӧт, мынам та уже шоры со, егит муртлэн шудэмез шоры кадь гинэ, учкоз. Номырзэ ватытэк, мон та малпаме сярысь Марья Ивановналы верай но бубыелы, чебергес кылбураса, благословленизэ курыса, гожтэт гожтыны кариськи. Гожъям гожтэтме мон Марья Ивановналы возьматӥ. Гожтэтме со умой, бубы-мумылэсь сюлэмзэс вырӟытымон гожъямен дунъяз но, гожтэтэлэн пайда луонэзлы ассэ ачиз оскытыса, егит даурезлэсь небыт сюлэмысьтыз гажан мылкыдзэ кисьтон борды кутскиз.
Швабринэн мон бурмемелэн нырысь нуналъёсаз ик уръяськи. Соин ваче жугиськеммы понна монэ куаретыкуз, Иван Кузьмич мыным тазьы шуиз: «Эк, Пётр Андреич! мыным тонэ под арест пуктыны кулэ вал но, тон сотэк но наказать каремын ини. Нош Алексей Иваныч мынам ю возён кеносам караул ки улын пуке, шпагазэ но солэсь Василиса Егоровна тунгонэн тунгонаса возе. Ойдо ӵок, ас куспаз со ӧжыт мед визьмаськоз но урод ужамзэ мед чаклалоз». Мон та дыре туж шудо вал, сыӵе дыръя сюлэмын йыркуръяськонэз возёд-а. Мон Швабринэз арест улысь мозмытыны курисько. Лякыт сямо комендант кышноеныз вераськиз но сое арест улысь мозмытӥз. Швабрин мон доры лыктӥз. Куспамы луэм ужъёс сярысь со туж мур жалямзэ вераз, ассэ ачиз котырак виноватэ уськытӥз но, ортчем ужъёсты вунэтыны кулэ шуыса, сюлвориз. Вордскем дырысеным лекез тодам возьыны быгатӥсьтэм адями мон куспамы куаретэммес но Швабринлэн киыныз ранить кариськемме но солы сюлмысь простить кари. Солэн яратон мылкыдэзлы пезьдэт сётэмен, аслэсьтыз сӥ-данзэ улэ уськытэмен лыдъяменыз, со токма кыл вераны шедьтӥз шуыса, мон малпай но шудтэм соперникме простить кари.
Ӝоген мон бурми но ас кунокаям кошки. Келям гожтэтэлы пумитаз чидатэк ответ витисько. Со гожтэтлэн ӟечезлы оскыны но уг дӥсьтӥськы, нош сыӵе урод малпанъёсме вунэтыса возьыны турттӥсько. Василиса Егоровнаен но, солэн кузпалэныз но мон номре ӧй на вераськы. Озьы ке но, нылзэс курамелы соос абдраны кулэ ӧвӧл кадь, малы ке шуоно, мон но Марья Ивановна но ас куспамы огмес огмы яратон мылкыдмес ватыса ум возиське. Соин ик, соос пумит уз кариське шуыса, ми азьло ик оскиськом вал.
Одӥг пол ӵукна Савельич мон доры кияз гожтэтэн пыриз. Мон кышкаса сое кутӥ. Адресэз бубылэн киыныз гожтэмын. Та бордысен мон зол малпаськыны кутски, мар ке но важной ужъёс сярысь гожъя дыр шуыса малпасько. Малы ке шуоно, огшоры гожтэтъёсты мыным котьку но нэнэе гожъя вал, буби пумаз гинэ кӧня ке чур гожъялляз. Гожтэтлэсь конвертсэ кема кесятэк вози, ялан гожъям адрессэ лыдӟыса возисько: «Мынам пиелы Пётр Андреевичлы, Оренбургской губерняе, Белогорской крепосте». Мон бубилэн гожъям тусэзъя, ӟечен-а уродэн-а гожъямез сярысь тодыны турттӥсько. Озьы улыса-улыса, конвертсэ дуртӥз кесьыса гожтэтсэ поттӥ но, нырысь чуръёссэ лыдӟыса ик ужелэсь к чорту куашкамзэ адӟи. Гожтэтэз солэн тазьы гожтэмын:
«Мынам пие Пётр! Марья Ивановнаен, Мироновлэн нылыныз, кышнояськыны малпаса милесьтым соглаш луонмес но благословения курыса гожтэм гожтэттэ ми та толэзе 15 числое басьтӥм. Благословения гинэ ӧвӧл, таин бакель луонме но мон тыныд сётыны уг малпаськы, со интые, мон дорад вутскылыны малпасько но тонэ урод ужъёсыд понна, пичи пиез музэн, тынад офицерской чинэд шоры учкытэк, умойгес дышетыны дасяськисько; малы ке шуоно, шпагаез нуллыны тон уд яраськы на шуыса, ачид возьматӥд. Шпага тыныд тон кадь ик сорванецъёсын ваче жугиськыны понна ӧвӧл сётэмын, отечествоез тушмонъёслэсь возьманы понна сётэмын. Али ик Андрей Карловичлы гожтэт гожто, Белогорской крепостьысь тонэ кытчы ке сьӧрло кыдёкегес мед келялоз шуыса куро, йырысьтыд шузияськонъёсыд ӧжыт мед кошкозы. Тынэсьтыд шпагаен жугиськемдэ но ранить луэмдэ тодыса, тынад мумид сюлмаськеменыз висьыны кутскиз но валесын кылле ни. Мар гинэ тынэсьтыд пӧрмоз меда? Инмарлэн ӟеч лэсьтон ужъёсызлы оскыны коть уг ке но дӥсьтӥськы, тон мед тупатскод шуыса, инмарлэсь курисько.
Тынад бубид А. Г.»
Та гожтэтэз лыдӟеме пӧртэм мылкыдъёсме бугыртӥз. Бубылэн лек кылъёсызлы вераны луонтэм йыркур луиз. Марья Ивановна сярысь, мар ке шудон-серекъян уж сярысь кадь, гожъямез мыным тужгес ик умойтэм йӧтӥз.
Белогорской крепостьысь монэ мукет азе келялозы шуыса малпасько ке, йырсиосы ик пештырско. Солэсь но трос нэнэлэн висемез сярысь ивор монэ зол сюлмаськытэ на. Шпагаосын жугиськеммы сярысь бубы-мумылы ивор одно ик Савельич вуттӥз дыр шуыса, мынам солы туж вожпотэ. Сюбег но люкыт висъетэтӥм олань-талань ветлон сяменым, мон Савельич азе дугдӥ но, со шоры учкыса, лек вази: «Тонэныд сэрен мон ранить каремын, тонэныд сэрен быдэс толэзь ӵоже коросэ учкыса кылли, нош тыныд видно со гинэ уг тырмы на: тон мынэсьтым нэнэме но сояз дуннее келяны малпаськод на». Савельич гудыриен ӵашъем мурт кадь луиз. «Помилуй, сударь, — шуиз со, бӧрдоно кадь луыса, — мар тон озьы вераськиськод? Тонэ ранить каремлы мон-а виноват луисько? Инмар адӟе, кызьы мон ас мӧляеным тонэ Алексей Ивановичлэн шпагаезлэсь сайуланы малпаса бызисько вал. Проклятой пересьмеме люкетӥз. Мар бен мон тынад матушкаедлы кари?» — «Мар тон карид? — верасько мон солы. — Кин тонэ мон вылэ урттылӥськыса гожтэт гожъяны косӥз? Мон борды тон шпионить карыны пуктэмын, шат?» — «Мон тон вылад урттылӥськыса гожтӥ? — синвуосыз ик потыса, пумитам вазиз Савельич. — Господи Царю Небесный! Озьы ке, ме али, лыдӟы мар гожтэ мыным барин: соку адӟод кызьы мон тон вылад урттылӥськи». Соку ик со кисыысьтыз гожтэтсэ поттӥз но, мон отысь тани мар лыдӟи:
«Возьыт ӧвӧл-а тыныд, пересь пуны, лек приказаниос тыныд сётэм бере но, тон мынам пие сярысь, Пётр Андреевич сярысь, ӧд иворты. Солэн урод ужъёсыз сярысь мыным мурт калык ивортоно луэ. Озьы-а господаосыдлэсь волязэс но ас службадэ нуиськод? Мон тонэ, пересь пуныез, егит муртлы воля сётэмед понна но, солэсь урод ужъёссэ ватыса воземед понна, парсьёсты возьманы ысто. Та гожтэтэз басьтэм берад, соку ик мыным берлань ивор ыстыны косӥсько. Висёнэз солэн бурмемын ини шуыса мыным гожъяло ке но, кыӵе мар солэн тазалыкез, мар интыяз со ранить каремын, ӟеч-а бурмытэмын — ваньзэ гожты».
Савельичлэн мон азьын виноват ӧвӧлэз адске ини, озьы бере мынам со вылэ малпаме но сое ултӥяме токма шорысь. Мон солэсь монэ простить карыны курисько, нош пересь уг буйгатскы. «Тӥни мар дорозь мон улонме вуттӥ, — шуэ со, — тӥни кыӵе саламъёссэс ас господаосылэсь мон заслужить кари! Мон пересь пуны, мон парсь возьмась но мон ик тынад ранаедлы но виноват луисько! Ӧвӧл, батюшка Пётр Андреич! мон ӧвӧл — проклятой мусьё вань ужлы виноват: со тонэ корт бодыосын, шпагаен сямен, бышкалляськыны но пыдъёсыныд топ карыны дышетӥз, оло топ карыса но бышкалляськыса урод муртлэсь палэнскыны быгатод шуыса, малпа лэся вал! Туж кулэ вал тӥледлы со мусьёез медъяса мултэс коньдон быдтыны!»
Нош кинлэн медам мынам ужъёсы сярысь бубыелы ивортыны курадӟемез потӥз? Генерал шат? Нош со мон сярысь трос ик ӧз сюлмаськы кадь. Иван Кузьмич нош милям жугиськеммы сярысь рапорт сётонэз кулэ ӧз кары. Кин вылэ малпаны ик абдрасько. Мынам малпанъёсы Швабрин вылэ дугдӥзы. Урттылӥськемлэсь пайдазэ со гинэ витьыны быгатэ. Урттылӥськем бере монэ крепостьысь но келялозы, комендантлэн семьяеныз но кусыпмы куашкалоз шуыса со малпаз, дыр. Вань та малпанъёсы сярысь вераськыны мон Марья Ивановна доры мынӥ. Со монэ корказьын ик пумитаз. «Мар сыӵе луиз? — монэ адӟыса, шуиз со. — Кыӵе тӥ кӧсэктӥллямды!» — «Быриз, ваньмыз быриз!» — шуи мон солы но бубылэсь гожтэтсэ сётӥ. Ас черодаз со но ӟаректӥз. Гожтэтэз лыдӟиз мараз но, куалекъясь киыныз сое мыным сётӥз но куалекъясь куараен тазьы вераз: «Адӟонэ мынам сыӵе, вылды… Бубы-мумыедлэн монэ ас семья пӧлазы пыртэмзы уг поты. Инмар ачиз тодэ ини мар карыны! Мар на, Пётр Андреич, коть тӥ шудо мед луоды…» — «Озьы уз лу со! — сое китӥз кутыса, кеськи мон, — тон монэ яратӥськод, мон котькыӵе ужлы дась. Ойдо мыном но, тынад бубы-мумыедлэн пыд вылазы йыбыртом; соос йӧнъяськись, вылтӥяськись калык ӧвӧл, небыт сюлмоесь… Асьмемыз соос благословить карозы, собере венчаться кариськом… отӥяз, кӧня ке дыр ортчыса, мынэсьтым бубыме но буйгатыны быгатом, мон солы оскисько. Нэнэе асьме пала дур ваёз; бубые простить кароз…» — «Ӧвӧл, Пётр Андреич, — Маша шуэ, — тынад бубы-мумыедлэн благословенизытэк мон тыныд уг бызьы. Соослэн благословенизытэк тыныд шуд уз лу. Кинэ ке мукетсэ аслыд кышнолы шедьтӥд ке, мукетсэ яратӥд ке, инмар мед утялтоз, Пётр Андреич; нош мон тӥ понна, кыкнады понна ик…» Со бӧрдыса мон дорысьтым кошкиз. Мон сьӧраз мыныса висъетаз пырыны малпасько вал но асме киям возьыны уг быгаты шуыса, гуртам бертӥ.
Мур малпаськыса пукон дыръям, Савельич малпанъёсме ӝыныё кариз. «Тани, сударь, — шуиз со гожъям бумага лисэз мыным сётыса, — учкы, аслам баринэ вылэ урттылӥськисько-а мон, бубыезлэсь пиеныз кусыпсэс сӧрыны турттӥсько-а?» Мон киысьтыз солэсь бумагазэ басьтӥ. Отын Савельич бубыелэсь басьтэм гожтэтэзлы ответ гожъям. Кылысь кылэ вераса, солэн гожтэтэз тазьы гожтэмын:
- «Государь Андрей Петрович,
- милемыз утялтӥсь бубымы!
- «Государь Андрей Петрович,
Тӥлесьтыд гожтэттэс мон басьтӥ. Со гожтэтады тӥ мон вылэ, асьтэлэн рабды вылэ йыркуръяськиськоды, господаослэсь косэмъёссэс ужен быдэстытэк кельтыны мыным возьыт шуиськоды. Нош мон пересь пуны ӧвӧл, тӥледлы сюлмысь ужась слуга луисько, господаослэсь косэмъёссэс санэ поныса улӥсько, тӥледлы котьку но мылысь-кыдысь служить карисько, йырсиосы пурысь луытозь улӥсько ини. Нош Пётр Андреичез ранить каремзы сярысь мон тӥледлы номре но ӧй гожъя, токма шорысь кышкалоды шуыса малпай. Сотэк но барынямы, асьмелэн мемимы, Авдотья Васильевнамы, кышкаменыз кылле ини шуыса ивор вуиз; солэн тазалыкез понна инмарлы вӧсясько. Пётр Андреичез бурпал пельпумаз, мӧляяз, самой лы улаз ранить каремзы вал, ранаезлэн мурдалаез вершок но ӝыны луоз. Кыллиз со комендантлэн корказ. Отчы ми сое шур дурысь вайим. Нош эмъянзэ сое татысь цирюльник Степан Парамонов эмъяз. Табере, инмарлы тау, Пётр Андреич бурмемын, таза, со сярысь ӟечез сяна номре но уродзэ гожъяны уг валаськы. Командиръёсыз но сое ушъяло шуыса кылӥське. Нош Василиса Егоровна сое, ас пизэ сямен, яратыса но утялтыса возе. Нош соин сыӵе оказия луэм сярысь ке верано, егит дыръя мар но уг луылы: валлэн пыдыз ньыль ке но, со но ӵемтылэ. Собере монэ парсьёсты возьманы ыстом шуыса тӥ гожъяськоды. Соизлы нош асьтэлэн барской воляды. Рабски йыбыртӥсько.
Тӥляд верной холопты
Архип Савельев».
Лякыт пересь муртлэсь та гожтэтсэ лыдӟыкум, мон олокӧня пол серекъян дыре вуылӥ. Бубыелы мынам аслам гожъяме уг лу. Нош нэнэме буйгатыны понна, Савельичлэн та гожтэтэныз но тырмоз шуыса мон чаклай.
Со дырысен мынам улэм-вылэм мукет луиз. Марья Ивановна монэным туж шер вераськылӥз, монэным пумиськылэмлэсь пеганы турттӥз. Комендантлэн коркаез мыным адӟем потонтэм луиз. Ичиен-пичиен мон гуртам огнам пукыны дыши. Василиса Егоровна со понна монэ нырысь куаретэ вал но, мынэсьтым ваменскемме адӟыса, отӥяз куаретэмысь но дугдӥз. Иван Кузьмичен мон служба ласянь гинэ адскылӥ. Швабринэн туж шер но мылпотытэк пумиськылӥ. Со ялан аслаз сюлмаз мыным йыркурзэ возе на кадь. Огъя вераса, мынам улон секыт луиз. Чылкак огнам но ужтэк улон сяменым мон шӧтэм чакласьконъёс улэ пачкай. Огнам улон сямен гажанэ мынам ялан ӝуатске, мылкыдэз зӥбе. Книга лыдӟыны но, кылбуран уж борды кутскыны но мылпотон ышиз. Мылкыд мынам чылкак куашказ. Мон, либо шузимо, либо урод ужъёс борды кутско шуыса, кышкасько вал. Малпамтэ шорысь луэм ужъёс мынэсьтым сюлэм пушме туж зол но ӟечлы понна бугыртӥзы. Со ужъёслэн бервылзы мынам улонам вань улытозямлы кылизы.