Колхозонь эряф/1932/15/Афлама вал мокшекс правильнайста сьормадомать кувалма

by Черапкин, Иосиф Григорьевич

 

И. Г. Черапкин.

---

Афлама  вал  мокшекс  правильнайста
сьормадомать  кувалма.	(Ушотксонц ванк 14 №са)

 

4.	Тельгофтеряй валсь ряднети, омбоцети йотафтомац.

Валть пакшень—пакш явоманцты мярьгихть слогоньслог явшема. Не валбакшнень эса эряй тифтень, кафтонь и сяда ламонь звук. Звукнень няфнемс тешнетяма букват. Звукнень пек няеви кафту явомасна; гласнай (вайгелю) ды согласнай (вайгелю ваксстонь) вайгельняс. Гласнахне: а,е,йо,о,у,ю,э,ы я, а илядыхне согласнахть.

Валса мзяра вайгелю-гласнай звукта, сняра пакшева сон и явови. Например: де-ле-гат-ка. Согласнай звукне, ванцак, видецка вайгелювонь ваксса ащихть. Валхт улихть фке слокса: каль, марь, седь, кафта слокста кочкафт: а-ва, ак-ша, пи-зел; уленьдихть сяда ламонь пакшста кочкафт: а-ла-ша, кол-хоз-ник, то-наф не ма, мо-раф не-кшне-ма. Афлама вал корхтамасонок тиеньдеви гласнай фтемонге: вдь, брь-врь!

Сьормадомста стама случайхть эрьсихть, што рядьнети валсь аф тельги. Эстя валсь пакшень—пакш явома, ды конац няда аф тельги, омбоде рядкети тештема. Теньди, кода йотафнемат омбоце рядняти валбакшне, улихть правилат. Самай эрявикснень ды сидеста васьфневихнень тяса минь лятфтасаськ.

1. Валса мзяра гласнай звукта, сняра слоктонга: кол-хоз-ник, ком-со-молец, пи-о-нер.

2. Тельгофтеряй рядьнети валсь, омбоцети сон можна йотафтомс аньцек слогонь—слог явоштозь.

3. Валста фке буквась, хоть сон и гласнай улеза, ингольдень рядьнетинге ашкода кадомс, омбоцетинге аф йотафневи. Сяс колма букваса валхне рядняда—рядняс ашот кода явошнемс. Например: ава, ате, але, лия, иле валхне.

4. Фкаста омбоце рядняти можнат йотафнемс аньцек стама валхне, конань-эса аф ниле буквада кржа, ды эстост кафць гланай звуконь няфтихть.

5. Слогонь-слок валть явомста, коста кафта гласнай йоткса кафта согласнахть, фкесь кадома ингольдень слокти, омбоцесь йотафтома омбоцети. Напрмер: кол-хоз-ник куш-мань.

6. Уленьдеряй кафта гласнай йоткса фкя согласнай, сон тештема меколи ащи слокти. Например: пи-о-нер, ком-со-мо-лец, де-ле-гат.

7. Валть слогонь слок явшемстонза ванома, штоба простой суффиксне: кс,-кш,-фт,-не,-се,-ве и лиятне омбоце ряднети валть йотафтомста тяст уль явфт. Например: пи-зелкс, сю-рокш, пи-ле-фте-ме вять-нень, рам-сень, кни-га-зе.

8. Но коста марс пуроптфт кафта, колма и сяда лама суффикс, эста валсь явошнема правилатнень коряс, стама случахтьке уленьдихть, коста валбакшне марс пурнавомок кой—кона вайгельняскнон юмафнесазь и ашкода синь сисемце правилать коряс явошнемс. Например: нуф-то-зе, тийф-тян, пиль-гон-за, кя денц.

9. Сложнай валонь сьормадомста, коста валхнень йоткса улема -ъ- или -ь- тештнетне, синьдеест молемс слокське — стане синь и явошнемат. Например: валъ-йожа, каль-юр, парь-бот-макс.

Мокшень корхтамаса улихть стама валхт - конань слоксна пек кувакат. Сяда аф пезерьдема, а эрявихть синь правилас коре сьорматкшнемс Например: сьормат кшнян, са-шон-довсь. Книгаванок, газетаванок ды журналганок те правилать ланкс почти йофси аф ваныхть. Азондыхть тяфтама туфтал: кда правилас коре вачкотьф валнекень новлямс, то пек лама шава вастта илядкшни, а газетаса, кле, столбец е тийненят. Те туфталсь правилафтома тешнемась, лувихнень ды тонафни шабатнень афграмотнайста сьормадома тонафнесыне Аш мезе сьопондомс, минь мокшень газетанеке ды журналнеке учебник лаца ащихть школаванок. Да те аф и осалоньди, а пароньди можна лувомс. Сяс газетатне журналхне эрявихть новлямс правильнайста сьормадозь вачкодезь.

Вачкотьф валнекень тевонза вяти ялгатненьди эрявихть осалхне работастост йотафтомс. Кадыть мокшетне тонафнихть лац сьормадома аф най учигельть мархта тонафнемста, но и газетань—журналонь лувомстонга. Те тевсь омбоце культурнай пятилеткать задачанзон йоткса, сон теинек тиема.

 

5.  Мес  коза   эряви    заглавнай
буква тештемс.

Алфавица, эк, улихть ушетксень или заглавнай букват, улихть ряденьнеть и тага, сьормадозь сьормадоманьди и вачкодезь вачкодемс букваса не явфне улихть Рядень букватнень эстиест правиласна, - коза и кодама буква сьормадома, а тяса корхтафцаськ заглавнай или ушоткс букватнень, коза эряви, сьорматкшнемаснон.

Минь литературанеке лисеньди рузоньнеста сявф алфавицта, или можна мярьгомс рузонь алфавица. Сяс кона—кона тостонь правилатне сувасть сьорматкшнемазонок. Станяк синь вельдест кармаме работама ушоткс буквань сермадомасонга. Азсаськ тяса не правиласта сяда сидеста васьфневихнень минь - сьормадомасонок.

1. Сембе корхтафкснень—предложениятнень сложнаень, простоень, кизефтемань и ивадемань — ушодомань васеньце буквась тешневи заглавнай букваса.

2. Корхтафксонь кучкаса или рядь кучкаса кафта точкада меле, коста лия азонфть инголи ковычка тештенят путневихт, например: коста сермадысь тешцыне корхтайть валонзон апак полафтт, лозунк тексть кучкас сермады или лия книгаста азонтф тешти.

3. Коста лиянь корхтаматне кажнайти эсь ряднень сявозь сьрматкшневихть тире знак инголест путневи, а корхтамась заглавнай букваса тешневи.

Корхтафксонь кучкаса заглавнай букваса тешневихть:

1. Ломанень лепне: Степа, Федор, Иван; мокшекс алень—авань лемса азомась: Михалань, Марень, Степань Миколаень, ды рузкс алелемса мярьгомась: Иваноч, Михалоч, фамилиятне ды продищатне: Нумолов, Сидоров, Бирьгасов.

2. Книгань лепне: „Од Эряфс“, „Мокшень кяльсь—валсь“, „Од Ударникть“ „Ленинизмась“ газетань лепне: „Од Веле“, „Правда“, „Мокшень Правда“, „Красная Мордовия“; журналонь лепне: „Колхозонь Эряф“, „Якстерь Тештене“.

3. Учреждениянь лепне, — центральнаеньнетне сембе заглавнайса ушеткшневихть; Ссвнарком, Наркомпрос, ЦИК, ВЦИК, ВКП(б), а лия организациянь ды учреждениянь лепнень заглавнай букваса ушоткшнесазь эста, коста тоза сермадыхть отношение или лия мезеньге тевонь ланга.

4. Заглавнай букваса—жа сьорматкшневихть кортафкс кучкаса савондеряхть тештемс: ошонь, велень, поселкань, колхозонь, совхозонь лепне. Например: Моску, Саранск, Иса-пря, Вирь—Ордаш, Анаю, Пойвеле, Од—Веле, „Красный Путиловец“, Сталинградский тракторный завод и лият. Коста велеть или ошть лемоц кафта разнай корянень валста ащи, эста синь фкас сотомаснон инкс путнесазь дефис тештенеть: Сире—Веле, Старое—Шайгово и лият.

5. Странань лепнень: Советский Союз, СССР, РСФСР, Мордовия, Англия, Америка, Франция, Германия, Польша, Китай.

6. Лужень, лотконь, лашмонь, пандонь, вирень—лепнень: Коське—лотка, Ардом—лашма, Врьгазонь—лотка, Федяжень порась, Ошка—панда, Уральскай панттне, Алтай, Тянь—Шань.

7. Шюди ведень, ащи ведень—прудонь эрьхконь лепне и шяень, болотань, торфонь вастонь, кевонь вастонь и лият. Наиример: Мокша, Исса, Сура, Алатырь, Навсем—эрьхке, Норонь—шяй, Сисем—ляйбря.

Нят основной правилатне, но сашондови тага сьормадыти иляста лувити няфтеманкса, рядень валда аерфтаманкса тешнемс заглавнай букваса валхт. Заглавнай буквань содазь путомать значенияц оцю. Сяфтама кепотьксоньди тяфтама пример: сьорматтама корхтафксть кучкас „коське лотка“ рядень букваса ушодозь. Кржа—ли коське лоткта, не ламоть эзда и абонды авторсь. Сьормадоньдерясаськ — „Коське—лотка“, заглавнай букваса ушодозь, тяста—ни няеви, што корхтамась моли фке стама вастонь кувалма конац содаф сьормадыти.

Не правилатнень йоткста тиеньдихть исключениятка. Например: ХТЗ — Харьковский тракторный завод, ванат аньцек васеньце валсь сявф заглавнай букваса, а илядыхне ряценьнеса. Те тожи содама. Но уленьдихть стама сьорматфт, коста эрявольхть кафцке или колмицьке валхне заглавнай букваса тештемс, а сьорматкшнесазь аньцек васеньце валть. Се аф пара. Например: Мокшень Правда, а кда тешцака „Мокшень правда“ омбоце валть рядень букваса се зря ули. Но тяфтама случаеньди эрявихть приметнемс газетава ды книгава сьорматф собственнай лепне и нень коряска тонафнемс лац сьормадома. Сембе аф азондовихть, те тевтинге тонафнема.

 

6.  Кодама  букваса    тешневихть—няфневихть  не  вайгельнетне, конань няфтемс букват аш.

Сьормадомстонок минь тешнетяма тяфтама букват: Аа, Бб, Вв, Гг, Дд, Ее, Жж, Зз, Ии, Кк, Лл, Мм, Нн, Оо, Пп, Рр, Сс, Тт, Уу, Фф, Хх, Цц, Чч, Шш, Щщ, ъ, ы, (,) ь, Ээ, Юю, Яя.

Вачкодезь вачкодемста няка букватнень тяфта тешнесазь: Аа, Бб, Вв, Гг, Дд, Ее, Йо, йо, Жж, Зз, Ии, Кк, Лл, Мм, Нн, Оо, Пп, Рр, Сс, Тт, Уу, Фф, Хх, Цц, Чч, Шш, Щщ, Ээ, Юю, Яя, ы, Ъ, (’)ь.

Содасасть, што минь алфавитонеке сявф рузонь кяльса сьормадомаста. Рузонь кяльса сьормадомстонга сембе звукненьди аф сатнихть букватне, а мокшекс сьормадомста пек лама тага знакта эряволь, сяс мес нень мархта минь корхтамастонок вайгельнетнень эзда ламось те алфавитть мархта аф няфневи. Мес мольни аф новлятама тага букват? Сяс, што лама буквась секе мзярдонга сембе вайгельнетнень няфтемс аф саты, а сьормадомать сталговцы. Кода—жа минь лия звукнень, конань няфтемс аш алфавица букват, лезнесаськ?

Коста букватне аф сатнихть эста звукть кафта или колма букваса няфнесаськ. Стане тиеньтяма аф най минь, а лия кяльса сьормадомстонга тяфтак тешнихть. Сяфтяма кепотьксоньди тяфтама пример. Саранскайса лисеньди литератураса — ё буква аш, а Москуса лисеньди книгава ули. Мес тяфта тевсь ащи? Сяс, што Саранскай типографияса — ё аш, а эземозонза тешневи: валть васень букваса ЙО, — йору, йотай йонь, а валкучкаса — Ьо: сьорма сьовонь, сьоконе. Тяфта лия случайсонга сьормадыхне азонцазь звукть кафта или колма букваса, кда сонь няфтемксонза аш фкас тештеви буква.

Звукне, содасасть, эк, явондовихть кафту: гласнахть ды согласнахть, стане явозь тясонга минь синь тешнемаснон кочкасаськ.

 

А. Кодама букваса тешневихть согласнайкс маряви звукне, конань няфтемс букват аш.

Карматама тевть кочкама алфавитонь ряца молезь.

Васенда летфтасаськ, што самбе согласнай звуконь няфти букватнень: б, в, г, д, ж, з, к, л, м, н, п, р, с, т, ф, х, ц, ч, ш, — ули тангоцта азомасна, (кода сьорматфт тяса) ули ляпста мярьгомасна. Коста синь ляпста азомат валбеса, сень няфнесаськ види ширезонза — Ь тештенеть путозь: нь, зь, ть и лият. Коста ляпомомац согласнайть няфтемс валкучкаса ваксозонза тешнетяма лепста азови гласнай звуконь няфти буква или йотированнай гласнай. Например; тят (тьат), сёрма (сьорма), сиволь, сюра, (сьура).

Те приметафкста меле кортафцаськ букватнень сьорматкшнемаснон алфавитть ряца.

Г—буквать мархта минь няфнетяма кафта фкефкенди похожай вайгельнят. Фке вайгельнесь, конац маряви: ага, ни гу-гу! — валга мокшекс пек шуроста азондови. Омбоце вайгельйожец маряви: тага, вага, ведьге, седьге, валга и почти сембова, коза — Г сьорматкшнетяма. Корхтамаса, разнай велева, сон К—лаца иляста маряви. Например: гавал, кавал; гальце, кальце. Тяфтама валонь лац сьормадоманьди сонь корянец вешема и кода тоса азондови звуксь, сень буквац и тештема.

Л—буквать и мярьгонцаськ и тешнесаськ кафта разнай няфнемаса. — Фкесь маряви: луван, луга, лашма, алаша и лия стама валга. — Омбоцесь (тошказь азовись) маряви тяфтама валга: алхт, палхт. Кода няеви не примерста, омбоце вайгельйоженц Л-ть минь тяшнесаськ кафта букваса: ка-лх-т. Коста ляпста ЛХ-сь няфтема, тешнесаськ колма букваса фке звукть: ка-льх-ть, сивольхть и лия валганга станяк. Москуса вачкодеманьди смекафоль те звукти эстиенза буква, но тени сон аф няеньдеви литературасонок.

Н—буквать тешнесаськ тожи кафта разнай вайгельнянь няфнемс. — Фкесь маряви: тона, сон, синь, минь и лия валга. — Омбоцесь хоть и Н—лаца тешневи, но азонцаськ лиякс. Сон маряви: тинге, пинге — валга, а ляпста маряви тож и лама валга, но сянь няфнесаськ аньцек тяфтама валга: миньге, тиньге, синьге.

Р—звукть, Л-ть лаца кафта азоманза. Фкеть мярьгонцаськ тяфтама валга: рамамс, сиредемс и лия тяфтама валга. Омбоцесь маряви тяфтама валга: корхтамс, мархта, сярхка. Тангоцта азомац кафта — рх — букваса няфневи. Лепста азомац колма букваса тешневи: карьхть, парьхть. Тяса — рьх — фке вайгельняса азома.

С и Т звукне башка фкефкада ащезь азондовихть стане-жа кода рузонь кяльса. Но коста синь серьцек ащихть сидеста мярьгонтяма вастозост — Ц. Например: совецкай (советскай), канца (кантса), ванца (вантса). Коста С-сь или Т-сь ляпть. — Ц-ське ляпста азови, станяк и тешневи: вець (ветьсь). Но те правиласта ули исключение: куватьс—валсь. Тештеньдерясак сонь — кувац — зря ули, куваць — тага аф лац. Тяфтак лисеньди, коста С-сь серьцех ащи Д-ть мархта куца (кудса), веца (ведьса).

Х-ть велень корхтамава колма шири веляфни вайгельйожец: молихть, молишть, молищть). Но серматхшнетяма сембе стама вастова — X: сокахть, молихть, симихть, ярхцахть.

 

Б. Кодама букваса тешневихть гласнайкс маряви звукне, конань няфтемс букват аш.

Гласнай звуконь няфти букватнень содасасть: а, е, йо, и, о, у, ы, э, ю, я. Васенда азомс сави, што: йо, е, ю, я. — букватненьди мярьгихть йотированнахть. Тяфта мярьгихть теест сяс, мес синь — Й—звукть мархта лия звукста шовордафт; е (йэ), ё (йо), ю (йу), я (йа). Валкучкаса ащемстост синь эсост Й—звукть эземс маряви лепста азфокс ингольдень согласнайсь. Например: сьорма, сьакане (сякане) сьура (сюра). Но сьорматкшневихть: Я, Ю, Е, Ё (йо). Саранскайса вачкодеманьди мельденьнеть няфтемс — ЙО.

Корхтамасонок ули А-ть пяли похожай Э—звук. Сонь эземозонза минь литературасонок тяшнетяма — Я. Например: кядь, кяль, мяль. Тяфтама валда, коса те звуксь сашондови тешнемс, аф лама. Но литературасонок лишнахть тешнихть, даже коза афоль эряв.

Ули корхтамасонок — Э, Я-ть шири веляфты. Сон маряви — эщи (ящи), эщкс (ящькс) — валга. Но тяконь-жа кона кона велень корхтамаса Е-кс азонцазь: ещи, ещкс Тешнема: эщи, эщкс. Станяк тага — эвондась (явондась, евондась) валське и лият.

Москуса вачкотьф литератураса Ё, а Саранскайса нолдафса ЙО, а валкучкаса эземозонза — ЬО. Те лисеньди, кода ни азфоль инголи, сяс, мес москувонь типографияса ули — Ё, а саранскаеньнеса сон аш и полафнесазь стане, кода азф.

Фке валс кафта и сяда лама корянень пурнамста сашендови валхнень йоткс путнемс Ъ или сонь эземозонза (’) апостроф теш тенесь „вал‘ежа“ (валйожа) или тага, кда ингольдень корень валть пень звукоц ляпс: например, вайгельёжа (вайгельйожа). Но И—буквать — Ы букваса сложнай валонь тештемста аф полафнесазь, хоть и маряви — Ы: кудинголь, облисполком, а мярьктяма: кудынголь, облысполком.

Меколденьди летфтамс савихть куфкстозь азови гласной звукне, конаньди кодамовок букват аш, тештемасонок синь афи няфнесяськ. Синь азондовихть: а, и, о, у, э звукнень пели-похожайста, Сяфсаськ кепотьксеньди ’рдас (урдас) деи ’школдамс (ашколдамс валхнень коста сонь азсак, инголенза маряви куфкстозь азови Ы звукть шири веляфты звук. Карматама сонь тяса няфнемонза (’) апостроф тештенеть мархта. Сяда лац не звукнень различияснон няфцине вов, те, таблицась.

Тешнетяма тяфта:	Марафнесаськ тяфта:
А.  арт, архтк, алхт, алнень И.  ирьдес, ирецта, ила, ил. О.  орта, оржа, олга, олва. У.  урма, урьве, ула, ульме. Э.  эрь, эрьхке, эль, эльде.	‘архт, ‘архтк, ‘алхт, ‘алхнень ‘ирьдес, ‘ирецта, ‘ила, ‘ил ‘орхта, ‘оржа, ‘олга, ‘олва ‘урма, ‘урьве, ‘ула, ‘ульме ‘эрь, ‘эрьхке, ‘эль, ‘эльде.

Куфкстозь азондови звукне марьсевихть валкучкасонга: ш‘рьхкат, п’рьхкат, и лия валга. Куфкстотозь азови звукне валста лия звукненьге аф лам ода полофнисазь ваигельйожеснон, стане лама од звук тиендеви.

Тяса лятфтафт стама звукне, конат сьормадомста пек лац содамат, коза кодама тештема, но улихть тага нинге сяда аф пек прметневи звукт, конань лац шарьхкодемасна ды содамасна эряви сяда сетеньста сермадоманди.

 

В. Кафксть—колмоксть ряц фке звукть валса азондомац ды синь тешнемасна.

Корхтамасонок валнекень мярьгомста конань-конань эса азонцаськ кафксть, колмоксть фке звукть, а тешнесаськ аф сембонь. Например: тешнетяма-ломаньть, мярьгоньтяма ломаньньть или ломаньтьть. Тешнетяма — ломатьнень, а мярьгоньтяма — ломатьть. Тяфта тешнемста минь сьормадомать нюрьхкалгофнесаськ.

Тяфтак тиеньтяма лама вал мархта, конань песа — С ды — К маряви. Например: тешнетяма = сускк, мярьгоньтяма — сусскк, или сусккк. Тага тештемать инкс валсь крьфтави.

Но гласной звукнень мархта тевсь лиякс арси. Коста синь эздост фкесь кафксть азомаль, минь весть сонь мярьксаськ. Например: сьорматтама — Семя-ате, азсаськ — Семате. Гласнай мархта случайса тешнеманеке сяда кувакаста, а корхтамась моли нюрькалгафтозь.

Пек нюрькалгафнесаськ корхтаманекень - О соединительной звуконь ниленьдезь. Например, тешнетяма: кудонзон, мярьгоньтяма - куд‘нз‘н. Те валса ванцак кафта 0-т нилезь азовихть.

Тяка йоткть эряви лятфтамс сьормадомать фкакс вятеманц инкс тага вов мезе Литературасонок инфинитифнень пес путнетяма МС; молемс, ваномс, якамс и с. т. А корхтамста марьсевихть тяфта мярьгоматка: вятьмос, мольмокс. Эряви фкакс серматкшнемс, — путнема-МС аньцек стама инфинитифнень пес.

Аделафксоньди теньди эряви азомс, што сембе звукнень тешнемс кодамовок живой кялень сьормаса тештенетне аф сатнихть. Сьормадомаса лама условиятьне Синь аф сяшкава шоряхть аньцек валонь вал, аф буквань-буква лувомста. Синь минь газетаса, журналса и книгаванга сьорматкшнетяма, што лувомс-морафтомс эряви валонь—вал. Сьормадомста меляфтома, штоба тештьфце лац шархкодеволь эститьке, лувитинге.

Тяфта литературнай кяльти буквань-звуконь нормат сувсихт. Тянь коряс няеви, што литературнай корхтамань тештемань тиемась аф фке ломанень тев, а тиеви сон аньцек марстонь мяльса, рабочахнень, колхозникнень ды тонафнихнень сьорматкшнемаса. Кяльть валса, кой сяда лама сьормады да, кой сяда лама лиси вачкотьф вал, сяда курок фке шири шарыхть звукнень вагельйожесна. Соньцке кяльсь кармай молеме лия келень мархта шоворема ширети.

 

7.  Лоткам   тештенетнень   вастоваст
сьорматкшнемасна.

Лоткам тештенетненъ или, кода теест рузкс мярьгихть - препинаниянь знакнень - содасасть. Оцю значенияса ащиста сявомок йолмас молезь синь тяфта ащихть: точка ( . ), кизефтемань тештене (?), ивадемань тештене (!), лама точкат (...), точка запятой мархта (;), кафта точкат (:), тире (—), запятой мархта тире (, — ), ковычкат („ “) запятая ( , ) ды дефис тештенесь (-), хотя те аф лоткам теште, а валонь сотома ды лия рядьняс валбакшень йотафтомань няфтема теште. Тяка ряца тештенетнень значенияснонга азондомс сявсаськ.

Тяса-жа эряви азомс севок, што лоткам тештьтнень вастоваст сьорматкшнемасна эряви аф най лац сьормадоманьди, но и цебярьста лувоманьди—морафтоманьди. Лоткамада башка синь тага азонцазь: мзярс кона тештенеть ланкс лоткамок ащема, кодама вайгельса азома тештеняда инголи ащи валсь или валбакшсь, кодама сотфкссна валхнень или корхтафкснень предложенияса.

Васенданьди, основной знаксь тештенесь - точкась. Сон путневи корхтафксть аделамок, а мельганза ащи буквась заглавнайста тешневи. Сонь ланксонза, корхтайсь или морафтысь, лия тештенеть коряс сяда ламос ащи. - кувакаста сяда ваймекожфонц таргасы. Соньдедонза инголи ащи валсь или кувака валонь валбакшсь, ряц корхтамать коряс сяда алгак вайгепьхть азондови. Например: Мон луван. Тон сьормадат. Марнек веленеке колхозу сувась.

Кизефтеме тештенесь путневи стама корхтафксонь пес, коста минь кизефнезь корхтатама или луфтама. Соньдедонза меле валсь заглавнай букваса ушеткшневи. Корхтамста или лувомста соньдедонза инголи валсь или валбакшсь вергак вайгельхть азондови. Например: Колхозу сувать? Книга рамать? Журналонь рамайкс сьорматфтоть?

Ивадемань тештенесь путневи стама корхтафксонь аделамок, коста ломаньць: кирьди-кардай, кучи, терьди, анай, сюци, шнай, сюды шумбрат-пархкт азонды божиндай и лия стамакорхтафксонь пес. Корхтамста или лувомста соньдедонза инголи ащи кафта валхне или кафта валбакшне азондовихть тяфта: пень валбакшсь или валсь алгак вайгельхть, а соньдедонза ингольцесь вергак вайгельхть мярьгомат. Например: Сей сак! Лоткак! Аф-ломань! Пижеть тоба! Шумбратада!

Лама точка тештенеть сермадомста путнесазь эста, коста сьормадыть мялец няфтемс, што корхтафкссь апак аделак мес—бди шоряй ульсь корхтайти, афлад азомс педе-пес корхтафкссь или аш мезеньди азомска сяс, мес пта сон содаф сембоньди. Сонь ингольденза валсь или валбакшсь азондови стане, пта тага учема вал или валхт корхтафксть аделамс. Ланксонза ащема точкада ламос. Мокшекс мярьгомс, те тештенесь путневи валонь поремок, мялень азомать апак аделак корхтафксонь песа. Мельганза сидеста сьорматкшеви заглавнай буква, пек шуроста сашендови рядень буква тешнемс. Например: Кодак молень колхозу, ванан... кенерьць седиезе. Колхознике кассь, вииясь, козякоць, Мерьгат, тьнярс... А мезень пароцель сядинголень эрямать?

Сьормадомста, коста валсь афлад марнек тештемс. катф—йотаф букванзонь эземс, кажнайть лемс—васц путневи точка, но не знакне аф эрявихть шоворямс лама точкань знакть мархта. Шарьхкодевихть синь тяфта: лама точкань знакса колма тештенят, а коста сон путф кизефтемань или ивадемань знакта меле — кафта путнихть. А точкаса няфневи валонь эземс буквада может улемс кафта, колма и сяда лама, ды нинге иляста путнесазь стама валбень буквать, эста аф сави тапарякшнемска.

Точка запятой мархта тештеняда меле рядень букваса валсь ушеткшневи. Вайгельце мольфтема—лоткафтома сонь велькссонза стане, почти кода точкать ланкс. Те знаксь путневи кувака и лама корхтафксста кочкаф предложениянь потмос. Сон няфнесы, што корхтафксса лама лезкс предложенияда. Тага путневи эста, коста кафта предложениять сьормадысь фкас соты и эста, коста точкань путомась афламда лама, пек аерфтасыне фкефкада корхтафкснень. Например: Течи пизем; ванды собрание; аш работамс йотковок.

Кафта точка тештенесь путневи эста, коста корхтафксть лезксонзон тифтенень кочкасыне сьорматфсь; кочкамада инголе кафта точка тештенесь путома. Соньдедонза меле заглавнай буква аф серматкшнихть. Те знакт инголе вайгельце ряц лувомать мархта фкакс мольфтема и станяк лоткама. Например: Мокшэрзянь обласьца лама разнай зверьде: офтт, вирьгаст, шинепть, келасть, нумолхт, нерьгаст, мода-нумолхт, корьхть, горнастахть, ласкат и лият улихть.

Тире тештенесь путневи нолдаф—йотаф валонь эземс. Сонь вельксонза ащема почти снярс, мзярс точкать. Тага стама корхтафксса, конань пец ингольденьнети ланкса итогоньди ащи. Ингольденза валсь азондови таноцта и сяда верьгак вайгельхть, а мяльганзось сяда алгак вайгельхть. Сондедонза меле тешнихть прокс рядень буква. Мон колхозникан. Тон — пионерат. Течи фкесь сувась колхозу, ванды — омбоцесь. Ашуфне батракне, среднякне — сембе сувасть колхозу.

Запятой мархта тиресь путневи стама вастова, коста кафта точка тештенесь афламда лама. Сньдедонза меле тешневи рядень буква. Путневи корхтафксть кучкас. Вайгельсь мольфтема кода тире тештенеть ланкса сьнярс и ащема вельксонза. Например: Састь колхозникне куду, ваныхть, — Иван куца—ни.

Ковычка тештенетне путневихть стама корхтафксонь инголи ды пети, конанц, сьормадысь стане ладясы пта корхтайста, сонь эсь лемстонза, валхнень азонцыне. Ковычкатне ащихть кафта запятойста: корхтафксть ушедомста синь ряднять алуце кинязонза тешневихть, а аделамоконза — ряднять верьде кинязонза. Например: Сон корхтай: „Мес аф работат паксяса?“

Ковычкатнень путнесазь, коста азондыхть тага кафта колма или сяда лама ломанень корхтама. Например: „Васе, ков молят?“ — Колхозу.“

Ломанень корхтамань сермадомста иляста ушоткшнесазь од рядьняста и кажной корхтайти рядьне ушодыхть. Эста ковычкатнень эземс рядень ушотксти путнихть тире. Напр.:

— Тон, ялгай, месеньдят?
— Понжафнян, чай нейсак.
— Мес пек кежият?
— Да, вармац веялкать пек кальдявста моли.

Ковычка потмос тага сявонцазь се валть, кона ланкс лувить мялензон сьормадысь хочет лоткафтомс. Например: Саранскайса лисеньди „Колхозонь Эряф“ журнал мокшень кяльса. Сон новляви ингольдень „Валда Ян“ журналть эземс.

Запятая тештенесь пек сашендови путнемс. Сяс пек лац содама, — коза сон путнема и мес эряви тешнемс. Путневи сонь корхтафс кучкас. Мельганза заглавнай буква аф тешнихть, аньцек, кда лия правила анай заглавнай букваса валонь ушодома, — эста и сьорматкшнихть. Вайгельце, соньдедонза ингольдень валса или валбакшса, вергак нолдама пта школдама. Путневи сон разнай случайса. Лятфтасаськ сяда эрявихнень.

Двоеточияда меле, коста тифтень ламоста сембе азондовихть: Например: Виреса касыхть тяфтама шуфтт: пиче, куз, тума, сели, марась, пеше, уштор, сирек и лият.

2. Запятойсь путневи сложнай корхтафксть предложениянзон явомс. Например: Алесь тусь вири, авась — паксяв, шабасна куду иляцть.

3. Коста сложнай корхтафксокс предложениятне сотневихть союз валне мархта, союзда инголи путневи запятой. Например: Сувась алясь колхозу, а церац ашезь моль мархтонза, сянкса сявст ды явсь. Но аф путнесазь запятойть И ИЛИ ДЫ союзда инголе.

4. Коста валхнень пеге ащи пеньди: га—ге, —ге, —ке, —ка, —вок валлезксне и синь путфт И союзть эземс, синьдедост меле запятой путневи. Например; Тонга, миньге, аваське — сембе ударниктяма. Аватневок, алятневок социализма строяхть.

Дефис тештенеть ланга корхтафоль—ни, коста кочкафт тефне лама коряньцта фке валонь тиамать кувалма ды валхнень слогонь—слок явомаснон ланга, сяс сонь тяса оду-васу аф корхтафцаськ.

Аделаманьди азомс эряви. Лац сьормадома тонадомась аф фке шинь тев. Иляста содасак правилатьке, а сьормадомаста эльбедят. Се лисеньди сяс, мес аш нинге тевс тонадомаце—практикаце. Штоба лац сьормадома тонадомс, эряви шарьхкодивиста лувомс, приметнемс кода кодама корхтафксне сьорматфт и сень лаца тоньцьке сьорматкшнек. Сьорматкшнемс эряви сяда лама, аньцек ламонь сермадозь тонадат лац тешнемост лоткама тештенетненге и лия условностензон лац сьормадомать кармат содамост.