Колхозонь эряф/1933/04/Тядясь
| М.Горький.
|
| „Мать“ романць. (Ушотксоц 1, 2 и 3 номерса). |
| Мокшокс йотафтозе И. Г. Черапкинць. |
Ськамонза илядомок, тядясь мольсь вальмять ваксс, арась инголенза, ванць вальмава. Вальмять омба ширеса якшамоль и шобдаль. Вармась налхксесь, уфсезе ловть йолма уды куттнень пряста, эрьхнесь стенати, и мезе-бди эрязта тошкась, прашенць мастору ды паньць ульця кувалма коське ловонь акша тучат...
— Шкабаваскяй, ваномасть! — тошназь мярьксь сон
Седисонза кепсесть сельмоветть ды, вень милавне лаца, афсодазь ды пелезь лажназь трнаць горянь учемась, сень, кона ланга сяшкава спокойнайста, надиязь-содазь корхтась цьорац. Сельминголенза арась такор, ловонь ровна паксясь. Якшамста и шуваняста вешкозь, якафты, сей-тов веляфни вармась, акшоть, нолдань шяярьсь А паксять кучкава ськамнянза моли, люкай, стирьнять шобдаса няеви йолма пондоняц. Вармась ляденцыне пильгонзон, кепсесы юбканянц, шамазонза йорай сялги лов пакшкат. Стака молемс, йолма пильгонянза пезондыхть ловти. Якшама и пелькс. Стирьнясь комаксць инголи ды — кода тишене мутнай паксять кучкаса, сьоксень вармать налхксемаса. Види ширесонза сонь, шяйса, шобда стенакс ащи вирь, тоса ризназь шумнахть шуване и крхтапа келуфне ды поюфне. Ичкозе, мек кати-коса, афпяк няемге цифтордыхть ошонь толнятне...
— Шкабавас — ваномасть! — тошказевсь тядясь, соньць пелемати трнатозевсь...
VII
Шитне кевярьсть фкефке мельгя, кода четкань ожнат, пурносевсть неделяс, ковс. Эрь йоткшине Павелоньди сашендольхть ялганза, кажной собраниясь ащесь шетямакс се кувака, цокла куцемаса, — сон вяць коза—бди ичкози, валомне куцфнезень ломаттьнень.
Эвондакшнесть лия ломатть Власофнень йолма комнаткасост уленць тесна и душна. Сашенкшнель Наташа, палфста, сизефста, но прокс пефтеме весяла ши марта и эрекста. Тядясь кодась теенза цюлкат и соньць щафтозень стирьть йолма пильгонязонза. Наташа васенда пеець, а тоса вдрук лоткась, думандазевсь ды салаване мярьксь:
— Монь няньказе ульсь — тожи пек пароль ломаньць! Диваньди, Пелагея Ниловня рабочай ломатьтне эряхть сяшкава стака, сяшкава обижазь эрямась, а вдь синь сяда лама маряй седисна, сяда лама пара тев тиихть, тонатнень коряс! — и яфодезе кяденц няфнееь коза—бди фшири, пек ичкози эсь-эстонза.
— Вона кодамат тон! — пшкяць Власовна. — Атятнень—аватнень юмафтыть и сембонь, — сон ашезь маштов корхтаманц аделама, куфксць ды лоткась корхтамда, а соньць ваны Наташань шамас, маряй седисонза кати—мезенкса стирьти пасибама. Тядясь ащесь стирьть инголе кияксса озада, а стирьсь думандазь пеець, соньць прянц комафтозе.
— Атяда—авада аердонь? — одунзазе сон. — Се — аш—мезевок. Алезе монь пяк кяжи, брадозевок тожи. И — пяк сими. Аказе пяк сюдуфшиса эряй... урьвакс тусь пяк эсьтедонза сире ломаненьди... Пек козя мирьдец, скучнай, жаднай. Тядязе — пяк ужяль! Сон монь простой ломань, кода ва тон. Йолмане стама, кода шеерне, станяк сиденяста аськоляй и сембода пели. Иляста — сяшкава мялезе няемс сонь...
[ 23 ]— Сюдуф шиняй! — прянь люкафтозь, лажназь, мярьксь тядясь.
Стирьсь эрязда кеподезе прянц, яфодезе кяденц, пта мезе-бда аерфць эсьстонза.
— Ой, аф! Монь, иляста, стама кенярьдема сявсамань, стама поважчиян!
Стирьть лофташкоць шамац, ды вандолгоцть сенем сельмонза. Путозень тядять лафтуланкс кядензон потма вайгяльса сетьмоняста и тангоцта валонь азондозь мярьксь:
— Кда содалить тон... кда тон шарьхкоделить, конашкава оцю тев тихтяма минь!..
Мезе—бди сельмонь каямакс ащи токазе Власовонь седиенц. Кияксста стамбачк сон лажназь мярьксь:
— Сирян-ни мон се тевти, — сьормас аф содан...
... Павел кармась корхнеме сяда сидеста, сядонга лама, сяда кяжиста спорьсель и осалготкшнель. Тядяти няевсь пта, што коста сон корхталь Наташа мархта или ваноль стирьть ланкс — сонь строгай сельмонза вандолцть сяда ляпста, вайгялец марявсь сяда ласковайста, и соньцьке марнек арсель сяда простойста.
— Максоза шкабавазсь! — арьсель сон. И пеетьксталь.
Собранияса прокс, козк кеподель пяк спорямась, арсель кяжиста и пяк бурнайста, сниль хохолсь и, люкакоткшнесь, кода пайге кяль, кармаль корхтама эсь кайги, торай вайгяленц мархта мезе—бди простой и цебярь, сяс сембе лотксельхть шумнамда и тага арьсесть серьезнаста. Весовщиков прокс сембонь коза—бди эряскофтолезень, сон ды рыжайсь, конаньди мярьгольхть Самойлов, прокс споряматнень ушеткшнелезь Мархтост фкядь ланкс мольсь покарявбрясь, акшашяярьсь, пта щелокса штафсь, Иван Букин. Сомов Яку, гладкайсь и прокс уряднанесь, корхнесь кржа, сетьме и серьезнай вайгяленц мархта, сон ды оцю коня Мазин Федясь спорямста прокс мольсть Павелонь ды хохолть шири.
Иляста Наташань эземс ошоста сашенкшнель Николай Иванович, сельмованомаса ломань, акшонят, йолманят сакалонза, кати кодама ичкозьдень губерьняста саф ломань, — сон корхтась лия корхтаммса — о—ть таргалезе корхтамастонза. И марнек сон кати—кода пта ичкозьденьнель. Корхнель сон самай простой тевонь ланга — семейнай эрямать ланга идень кувалма, торгавамать, полициять, кшинь, сиволень питьнетнень ланга — сембонь колга, мезьса шида—шис ломатьтне эряхть. И сембоста сон мушенць васькафнемат, тевонь тапарямат, мезеньге пеедем вастт, иляста рахсемат, прокс ломатьтненьди осалста молемат. Тядяти арам, што сон сась коста—бди пек ичкозьде, лия царстваста, коса сембе эряхть честнай и теждене эрямаса, а тяса теенза сембе чужойхть, коданга сон афтонадови те эрямати, аф примави теенза те эрямась, кода эрявикс, аф туф сон мялезонза и кепси эстонза спокойнай и упрямай мяль сембонь одукс, эсь лацонза Шамац сонь тюжеазаль, сельмонзон перьфке шуване кинят кедьганза, вайгялец сетьмоне а кяденза прокс лямбонят. Власова мархта здоровондамста, сон люпшталезе тядять марнек кядь—лапканц эсь кеме суронзон мархта, и се кядень шумордамада меле седисонза таяскодоль, сетьмоль ризфсь.
Сашенкшнесть лия ломатьтке ошоста сембоде сидеста — сери, пара понда—ронга стирь, конанц лофтана осал шамасонза няевсть оцю сельмонза Теенза мярьгольхть Сашенька. Сонь якамасонза, и шарфнемасонза ульсь мезе—бди аляньне, сон кяжиста пуропнелезень сельмя кунонзон, а коста корхталь, — тяйняняне шалхка—варянза виде шалхксонза трнатольхть.
Сашенька васенцекс марямга и тангоцта мярьксь:
— Минь социалисттама...
Кодак марязе тядясь те валть, пелезь афкаштордозь тетькозень сельмонзон стирьть шамас. Сон марьсезе, што социалисттне оцязорть шавозь. Се ульсь сонь од пинкстонза, эста корхнельхть, што помещикне, штоба квитямс оцязорти сень, мес нолдазень воляс крестьяттнень, макссть вал аф нарсемс щеярьснон се пинкс, мзярс аф шавсазь оцязорть, сянкса теест и мярьгольхть социалистт, и тени теенза эзь шарьхкотькшнев — мяс—жа социалист цьорац и сонь ялганза
Коста сембе тусть куду, тядясь кизефтезе Павелонь:
— Павлуша, рази тон социалистат?
— Да! — мярьксь сон, кода прокс, видеста и тангоцта инголенза ащезь. — А мес?
[ 24 ]Тядясь кувакаста куфксць ды; алу ваномбачк, кизефтезе:
— Стане—ли Павлуша! вдь синь — оцязорть каршес молихть, вдь синь фкеть шавозь—ни.
Павел йотась комнатава, судардазе щоканц кядьлапшса ды, пеетькстомок, мярьксь:
— Тейнек се аф эряви!
Цьорац ламос корхтась теенза мезе—бди сетьме и серьезнай вайгельса. Сон ванць шамазонза и думандась:
— Аф тии сон мезенга осал, — сонь седиец аф сай!
А Тяда меле страшнай валть кармасть мярьгоньдемонза сяда сидеста, оржа шиц нардавсь, и арась сон тонатф валкс тядяти, кодане и лия афшарьхкодем валхне аф фке кеменца лувондовихне Но Сашенька ашезь тушенда тядять мяльс, и коста сон саль, тядясь няелезе эсь прянц лишнаенди, афвасца ащиенди.
Весть тядясь мярьксь хохолти, а сияк трванзон афмяльвельде крмоштазень.
— Мес—бди пек—ни строгай Сашенькась. Най кошарды тевок теенть тиема, тонавок эряви...
Хохолсь рахазевсь;
— Видец приметаф! Тон, нянька, сельмос угадяйть! Павел, а? — И, тядяти сельмонзон чпрямста, мярьксь пеедема мархта:
— Дворянствась!
Павел коське валса пщкяць:
— Сон, ломаньць пара.
— Се виде! — согласиндась хохолсь, — Аньцек аф шарьхкоди, што шумусь — сон, а минь — хотим и тиеви тиейнек мезе эряви.
Синь кармасть споряма кати—мезень афшарьхкодевиень ланга.
Тядясь тага приметазе, што Сашенька сембонь коряс строгайста сяда корхтай, Павел мархта иляста нлтаи пяшкоды каршезонза, Павел, пеедевсь, афкорхтазь ванць стирьть шамас се ляпста варжакстоманц мархта, кодане инголи ваноль Наташань шамасе. Тевок тядять мяльс афтуфоль.
Иляста тядясь дивавдась се пек кенерьдемати, конац сявондезень сембонь. Се уленьць прокс не иляттнень, коста синь лувондольхть газетаса зяграничнай рабочай норотть тевонзон ланга. Эста сембонь сельмосна кенярьдезь вандолцть, сембе, шабакс кенярьдезь поважчихтельхть, пеетькшнесть весяласта, пара пеедемаса, кенярьдезь эрьхнельхть фкефкень лафту ланга.
— Молодецт немец—ялгатне! — пешкодоль кие-кие, пта иретьф эсь весяла шинц мархта.
— Шумбрат улест Италиянь рабочахне! — пешкоткшнесть иляста.
И кучсезь не пешкодематьнень коза-бди ичкози, дгаснонды—ялгаснонды, конат афолезь сода синь и афолезь шарьхкодь синь корхтамаснон, синь, пта надиясть, што афсодаф ломаттне, марясазь и шархкоцазь синь кенярькшнемаснон.
Хохолсь корхталь, пиньделдыхть сельмонза, пта сембонь кельгомс ванозь сяволезень:
— Пара улель теест сермадомс, а? Штоба содалезь синь, што Россияса эряхть синь кельгом ялгасна, конат мархтост фке шкаеньди озондыхть, эряхть фкакс ащи учемаса и кенярькшнихть синь пара тевснон марямок!
И сембе кармосельхть корхтама, пеедень шамаса, ламос корхтама француснень, англичаттнень, шветтнень ланга, кода эсь кельгом ялгасонть ланга.
Тесна комнатаняса шачель касоль марнек мастор лангонь рабочайхнень фкефкень роднякс лувома мяль. Се мяльсь фкас сембонь, пурналезень, кенярьфнелезе тядятьке, хотя теенза сон афоль шарьхкотькшнев, но видепнелезе эсь од виенц и кенярьдеманц, мархта пта иретфти и пяшксе надияма.
— Кодаптада тинь! — мярьксь весть тядясь хохолти — Сембе теенть ялгат — армяттне, еврехне, австриякневок, — сембонкса и кеняртьтяда и лажнатада.
— Сембонкса, ненькай, сембонкса! — пешкоць хохолось. — Тейнек аш нацият, аш плямат, а улихть аньцек ялгат, анцек вракт. Сембе рабочайхне — минь ялганеке, сембе козятьне, сембе правительстватне — минь врагнеке, Кда ванцак пара сельмоса масторланкть, коста няйсак, конашкава миньдедонок, рабочайда, лама, мзяра вий минь канттама — стама кенярьдема сявсы седицень, сяшка радость сувай мяштезт. И тяфтак, ненька, арьсихть францусне, немецьне, кодак синь варжакстыхть эрямать ланкс, тяфтак кенярькшни итальянецьське. Минь сембе — фке тядянь итьтяма, сембе фкатама арьсема некень мархта, што марнек [ 25 ]масторлангонь рабочахне братт фкефкеньди. Те эжнесамазь минь, сон шикс ащи пара арьсемань менельса, а се менельсь рабочайть седиса, и кие сон тяза уль, кода эсьтиенза афоль мярьге, социалисць — прокс минь браднеке седис коре, тени, прокс и пинкта-пинкс.
Те идень верась, но кеме верась, сембе сяда сидеста кепсель синь йотксост, сембе касоль и кеподель оцю виенц марта. И коста тядясь няелезе тень, то сон афэсьволе шарьхкоделезе, што видецка светти шачеь мезе бди стама оцю и валда, менельста шить кодяма, конань сон няенькшелезе.
Сидеста морсекшнельхть морот. Простой, сембоньди содаф моротнень морселезь весяласта и кайгиста, но иляста морсельхть кодама-бди од морот, лац ладяфт, но афвесялат, вайгяльсновок афсодафт. Нень морселезь пялевайгельса, серьезнайста, пта церькавонь морафтомат. Морахнень шамасна лофташкоткшнесть, и синь кайги валсост марявсь оцю вий.
Сембода пяк авать седиенц колселезе фке мора. Се мороса эзь маряфт седи ризф, стама, конац ськамонза катфокс якай обижафста лажнамань шобда киге, седи ризфса, нужаса паломась, педемада эводемась, шамань юмафтысь и афсодавись. И ашезь маряв сонь эсонза седи ризфса мяряви виень тоскавама, кона веши простор, лифти озорничандамань колендема, конац анок машфтомс и цебярьть и осалть. Эзь маряфт эстонза сокор обида и кяжень ардома, конаньди ашмезевок сембонь машфтомс мезевок аф тиеви теенза, — те мороса мезевок эзь маряф сиреста, урень эрям ащема.
Кеме валонза мороть и сонь кайги вайгялец тушенцть тядять мяльс, но валхнень эшксса и морвайгяльть фтала марявсь кати мезе сяда оцю, сон лупшталезе вайгяльть и валхнень — эсь виенц марта и кеподель седиста мезень—бди паронь учема, мяльса аф фатявомшка паронь учема. Сень, аф содавить, сон няелезе морахнень шамаста, од ломатьтнень сельмоста, шарьхкоделезе синь мяшцтост и, морвийсь соньге сяволезе, валс—вайгяльс афтяльгись; те мороть тядясь прокс кулхцондолезе оцю мяльвельде, сяда седиень кеподезь лия моротнень коряс.
Те мороть морселезь лияда сетьмоста, но кайголь сон лия морода пяк и пурналезень фкас ломатьтнень, кода мартонь шись, васень сай тундань кожфкясь.
— Сась пинге тянь тейнек ульцяса морамс! — Угрюмайста мярьгоньдель Весовщиков
Коста сонь аляц тага мезе бди салась и сянкса озафтозь тюрмав, Николай спокойна мярьксь ялганзонды:
— Тени можна монь пялон пуромкшнемс...
Пцтай эрь илять работамда меле Павелонь ширеса ащесь мархтонза кивок ялгадонза, и синь морафнельхть, мезе-бди серматкшнельхть книгаста, синьць эряскоцть, шамаснонга афольхть кенерь штамс.
Ужанакншельхть ды обедакшнельхть кяцост книгаснон мархта и сядонга пяк афшарьхкодевикс тядяти арсесть синь корхтамасна.
— Тейнек эряви газета! — Сидеста корхнель Павел.
Эрямась арсель эряскодовиста и афпокойнаста, ломатьтне сяда сидеста йотнельхть фке книгаста лияс, кода мешсь фке панчфста омбоцети.
— Кармосихть корхтама ланганок? — мярксь весть Весовщиков. Курок тевнеке колави.
— Сянкса, йорське, штоба сеткати повомс; — Отвечась хохолсь.
Сон, кой ши сяда тушендоль тядять мяльс. Коста сон мярьголь тядяти „ненька“ — тя валсь пта судярезень сонь щоканзон идень ляпе кяца. Неделяшива, коста Павелоньди ашель йотка, сон лазонць пенгат, а весть лафтубрясонза канць доска ды сявозе узерьть, курок и ловкаста полафтозе креленьцянь наксада шетямать, оду тага афняемга петезе веляф перяфть. Работамста сон вешконьдель, и вешьконьдемац кода бди и пароль марямс и лажназь мольсь.
Весть тядясь мярьксь цьоранцты:
— Давай сявсаськ хохолть эсь пяленок эряма ярхцсеме? Тееньть кафцкеньди сяда пара ули — аф карматада фкефкеньди ласьконьдеме.
— Мезеньди минь карматама эсь прянекень тесниндама? — Кизефтезе Павел, а соньць лафтувонзон шуморясь.
— Ну, вона тага! Марнек эряфозень пелезь якань, моньць аф—содаса! мезенькса, — а пара ломаненкса можна [ 26 ]— Тиеда кода лад! — пшкяць цьорац. — Саньдеряй сон тейнек эряма, мон рад улян...
И йотась хохолсь пялост эряма.
VIII
Куронять песта йолма куднясь кармась ломатьтнень сельмос повондома: сонь стенанзон щупазь ни лама подозрительнай сельмоса. Сонь велксканза пистерцть—яфиесть корхтафтомать сермав пацянза, мельшакшнезь ломатьтне эвфтемс, лифтемс кати мезьть, конац таяскаць лотка трваста куднять стенанзон эшксс. Веть варжакснельхть вальмава, иляста кие бди канзерфнезень вальмятьнень ды эрязда пелезь фшири ласькозь ворготькшнесь.
Фке пинге Власовань ульцяса лоткафтозе Бегунцов — трактирщиксь урядна атясь, конац прокс каннель парьхциень равжа руцяна якстерь ды шаржу сялдазсонза, а мяшцонза эчке плюшевай равчт моли якстерьазаста архтф жилетка. Сонь, оржа и пиндолды шалхконц ланкса ащесть черепаховай сельме—варжамат, а сянкса теенза мярьгольхть — „Пакарень.“
Лоткафтозе сон Власовань, ды ваймонь апак тарксек, отведонь апак учт йорясь лангозонза цяторды и коське валхт.
— Пелагея Николавна кода эрят—ащат? Цьоранеце кода? Аф мяльце ли сонь урьвеяфтомс а? Одломаньце самай вийсонза урьвя мархта эряманьди. Цьорань рана урьвеяфтомась — атяньди—аваньди покой. Семьяса ломаньць лучи ванфтови сединек—ваймонек, семияса сон — кода парьса панга! Мон ба тонь васцот сонь урьвеяфтолине Пингонек минь анай строгайста ванома, ломаньть существанц мельге, кармосихть ломатьтне эсь мяльс коре эряма. Арьсемасна келес тусть, тевсновок сялдоманьди молихть. Шкаень церькавть од ломатьтне вакска йотнесазь, масторонь пуромкшнеме васттнень эзда ворьготькшнихть ды салава пуромкшнеме, уженява — тошксихть. Мезенкса тошксихть, азк тейне? Мес ломаньде ворготькшнихть. Сембонь, мезе ломанць ломань ингольде может азомс, — трактырса, наиример — мезе се стама улема? Салавань тефть — тайнат! А тайнатнень васцна минь святой равноапостольнай церкавнеське. А сембе лия тайнатне, — салавань тефне, уженяса тиеньдивихне — осал мяльста! Шумбрат — пархт арьсянь теть!
Хитрайста кядень мяньдезь валхтозе сон картузонц, яфодезе инголенза ды тусь, тядять афшарькодезь ащеме кадозе.
Власофнень шабрасна, Корсунова Марья кузьнецень удава торгавакшнесь фабрикань ортатнень ланкс ярхцам-пяль мархта васьфтезе тядять базарса тожи мярьксь:
— Ватт сяда Пелагея цьорацень мельге!
— Мезе мярьготь? — кизефтезе тядясь,
— Кулят марьсевихть! — тошказь аззе Марья. — Афпара кулят аваканей. Мярьгихть пта сон пуропни стама артель хлыстуттнень лаца. Секта мярьгихть стапненьди. Фкефкень илиса-локшеса кармахть пикссеме кода хлыстуттне...
— Лоткак, Марья, месть зря орадат!
— Аф се зря корхтай, кона орады, а се кона ашкоды! — мярьксь каршезонза торговкась.
Тядясь азонкшнезень цьоранцты сембе не корхтаматнень, сон аф—корхтазь кепсезень—новлязень лафтувонзон, а хохолсь пеетькшнесь эсь туста ляпе пеедеманц мархта:
— Стирьхневок тожи пек пеняцяхть лангозононтт! — корхтась тядясь. — Эрь стиреньди тинь женихне сельмонь каям вастокс ащетяда работнекневок цебярьхтяда афсимихтяда, а стирьхнень ланкс ваныкс аф тихтяда! Мярьгить пта сашендыхть теенть ошста барышнят, афлац эряхть...
— Ну сияк содаф! — пезярьдезь пшкяць Павел соньць шаманц сермазе
— Болотаса сембонь наксада шинесна! — куфкстозь мярьксь хохолсь. — А тон ба теест нянька азолить дурочкатненьди мезе стамсь урьваксь тумась, штоба афольхть эряскатт эсь пакарьснон синьнеме...
— Эх цьоракай! — мярьксь тядясь. — Синь горять няйсазь синь шарьхкодихть д вдь синь шотсна кяшема сяда башка.
— Кальдавста шарьхкодихть а то ба мулезь кить! — мярьксь Павел,
Тядясь варжаксць сонь строгай шаманц ланкс.
— А тинь — тонафтость синь! Терьделесть ба, конат сяда йонюфт, эсь ширезононт,.,
[ 27 ]— Аф лад се! — коськста отвечась цьорац
— А кда варжамс? — кизефтезе хохолсь
Павел афламос эзь кашторда, тоса отвечась:
— Кармахть кафтонь—кафтонь якафтома, а сяда меле конат—конат урьвеяхть—урьвеяхть — урьвакс тухть теке лиси!
Тядясь думандазевсь. Монахокс эряфть ланкс цьоранц ваномац колазе сонь седиенц. Сон няезе, што цьоранц советонзон кулхцонцазь дажи не ялганза, конат кода хохолсь — кизос сяда сиреть корязонза, но теенза пта шарьхкодевсь, што сембе пелихть эздодонза и кивок сонь аф кельксы сянкса.
Кода—бди весть коста сон маць удома, а цьорац ды хохолсь нинге морафнельхть тейнене перяфкеть пачка сон марязень синь салавань корхтамаснон.
— Тусь мялезон Наташа содасак? — вдрук сетьмоняста кизефтезе цьоранц хохолсь.
— Содаса! — афэряста пшкядезь отвечась Павел.
Марявсь тядяти кода хохолсь стясь васцтонза ды кармась якама.
— А птарфцы приметнесы сон сень шта?
Павел эзь кашторда.
— Кода тон арьсят? — сяда салава кизефтезе хохолсь.
— Птарфцы—приметнесы! — отвечась Павел! — Сяс и атказась минь тонафнемонок сей сашендомада.
— А кда мон азса теенза...
— Мезе?
— Сень, што мон ва... — кармась салава корхтама хохолсь.
— Мезеньди? — лоткафтозе Павел.
Тядясь марязе, што хохолсь лоткась и шарьхкодезе, што сон пеетькстась.
— Да мон, ванцак стане арьсян, кельгоньдерясак стирьть азома се теенза сяфтома мезенга толк аф ули!
Павел сяшкава хлопадезь пякстазе книгать, што тядятинге марявсь.
— А мезень толк тон учат?
Кафцке ламос эсть кашторда,
— Ну? — кизефтезе хохолсь.
— Эряви, Андрей, лац содамс сень мезе вешат, — шуроста корхтазевсь Павел — Мярьктяма сонга тонь кельктянза, — а мон сень ланга аф стане арьсян, но мярьктяма тевсь стане ащи. И тинь урьваксттада. Интереснай урьвакстомась — интеллигентка и рабочай! Шачихть итьть, теть ськамот сави работамс... и — лама. Эряманьте тинь арай кши—сускомонкса эрямакс, иденкса, фатеронкса: тевоньди — тинь аф ульхтяда. Кафцке ашотада.
Аш кашт моли. Тоса Павел корхтазевсь сяда лепста.
— Тон лучи катк кадыть нень сембонь Андрей! И тяк таяскафне сонь...
Сетьмость Лац маряви часттнень-маятникснон лькамац, конац пта кярси секундат.
Хохолсь пшкяць:
— Пялец седиезень — кельги пялец, няемда аф веши разве те седи а?
Кашторгоцть книга листтне — ванцак Павел тага кармась морафтома. Тядясь ащесь мадозь, кончазень сельмонзон, и пельсь шароманц. Теенза аварьдемшка ужелькс арась хохолсь но сядонга пек цьорац. Сон думандась кувалманза.
— Идьнезят лефкскезят...
Вдрук хохолсь кизефць:
— Стане мярьгат — афкаштордома?
— Те — честнайста лиси, — сетьмоняста мярьксь Павел
— Се киге и тутама! — пшкяць хохолсь. Афламос ащезь тага корхтась лажназь и сетьмоста:
— Стака теть ули Паша, коста тон тоньць вага тяфта.,.
— Тейне стака—ни...
Кутть стенава чожелць вармась. Кемоста лувозе йотай пинкть стенань частонь маятниксь.
— Тень ланкс — аф пеетькшневат! — шуроста аззе хохолсь.
Тядясь тонгозе прянц тодути и афмарямга аварьгаць.
Шобдава тядяти Андрей няевсь пта сяда алнянкста и арась сяда кельгевикс. А цьорац — кода прокс — осал, виде и афкорхтафкшу. Инголи тядясь мярьголь хохолти Андрей Онисимоч а течи апак стряндак мярьксь теенза:
— Теть, Андрюша, кямотьне петьфтемальхть, — тяфтак тон пилькнень кельмофцайть!
(Пец кармай молема)
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
