Колхозонь эряф/1936/01/Ашесть сяськя/7
VII.
Вирьгинць, Кяржань Пракась и Юргинц пякстама вастса сяка венякигс, кшни песа шупазь кияксть и ёрасть ворьгодемс. Но ялганзонды ашезь сав мянемс. Вирьгинтть лисема ёткова няезе ваны милиционерсь, колмоксть ляцьсь мельганза винтовкаста но, шовдаль ковфтома весь и сон ашезь сав. Ласькозь мельганза ашель кода тумс, ся ёткова нонатка лисельхть варява. А ласькозь Вирьгинць борзай пиненьдиге афоль сатов, кода ба сон афоль арда.
Розгинтть мархта марса щитьнень сон ётафнезень. кода повсь.
Веть салаваня, кода хорьхть, мала велень колхозникнень пирьфстост салсесть ярхцама няленьди сараст, мацихт — и эзда яксяркт, конатнень пинцезь Розгинтть содаф ломанензон пяльгя. Тяста-тоста врьгаз лаца тарксесть и учатка, салсесть сьоротка, конатьнень эзда мишеньдсть сяка содафснон вельде базаруга, а ярмакнень ланкс рамсесть винат и иля мезь аньцек эряви.
Лотксесть синь саламда аньцек васен тялоть, мзярда модась ацавсь шуван [ 94 ]акша ловняса, ёфси акша котфса, коза шарьхкодевиста пячатлакшневсть ломанень и зверень следтне. Но ловсь кнаркигя таштомсь, алу савсь равжа модась. Кувака пиксокс тарксевсть нурда китьне паксятьнень ланга веледа-велес и ня кафта пилькса зверьхне кепедсть танга меки пильге ланкс Синь мольсь мяльсна саразонь и учань салсемать эзда, ризнасть седисна, кода ба тиемс оцю ангоркс „Энгельс“ колхозти, мес сон пяк кеместа ащесь иля колхоснень коряс и макссесь кепетькс хозяйствань вятема тевса фталу иляды колхосненьди. Хуть и ульсть синь крга пингова топодьстот, а сембе сякокс вача вирьгазкс пореньдезь пейснон шава банява, и фталда кудонь пятналангонь потмаксова.
Фкя илядне ковсь ащесь тяйняня тарвазкс менельса и кальдьвста валдопнесь ушеть. Ня кафта пилькса зверьхненьди лянь тявок шорясь и кда можна улемель, фатялезы сонь менельста и ёрдалезь крхка лотка потмаксс ловти. Синь учсть аф лама пинге, менельсь илядсь ёфси ковфтома, ковсь кяшевсь и ня вракне кепедсть колама.
Лиссть синь вирьста. Оронь пинжакснон, плманжава валеньцяснон и малахай вазьснон мархта ашель мезевок теест тялонь якшама, пиди вармась. А шамасна ефси ашесть пель якшамть эзда, синь кяшфтельхть мациень и учань вайса и крфасть толу седькс, коса можнальхть ба косьфтамс начка карьхть-пракстат.
Молихть пасякигя. Шовда менельса ашезь няев фкявок тяштеня, мес сон таватфоль серай дуцяса, кода понань вельхксса. Аф ламода ульсь аньцек валда акша ловть эзда.
Марясазь кигя каршезост сай ардозь алаша, ичкездекиге кулевсь нуртть и алашать пильгалдонза ловть читорфоц.
— Кие тяза уль, валхтома, — пшкядьсь Розгинць Вирьгути.
Алашась нежедсь ёфси малазост. Вага илядсь ни кеменьшка метра.
— Сто-оо-й! руки вверх! — ивадсь аф эсь вайгяльсонза Розгинць. Алашастось кярозе мезе ули виец алашанц и тусь ардозь. Сон ёрась мянемс, но Вирьгусь кода тигра комотьсь алашать кргазонза и ардсь станяк мянь нилегеменьшка метра. Сяда ичкози сон алашати арфтомс ашезь сав, мес вожиятьне ульсть-ни Розгинтть кядьса, — сон тожа кенерьсь фатямс рогожань нурдти и наганцта нолдась фкя пуля айдяйть видеста шовонезонза.
Алашась лоткась. Розгинць каяфтозе шавфть ланкста тулупть. Вирьгусь шаворть кятьта ускозе кить эзда шири и вельхтязе ловса назем мар ваксс. Алашать шарфтозь меки сяка шири, коста сась, озасть нурду и шанчк тусть ардозь, аньцек вжнясь нурдсь и фталонза пихтьсь ловонь пульсь.
— Мон стак афолине шав, — корхтась Розгинць ардома ёткова — д содайне кодама сон ломаньць.
— А кода содайть? — кизефтезе Вирьгусь.
— А вага тянь няйсак, — няфтезе ваксстонза портфельть Розгинць. — Тянь коряс аф аньцек тон, а потяй шабаськя шарьхкодельхце, кодама ломань, — корхтась Вирьгинць.
— Эрь тят пеедь эсон. Теть ниньге наверна тонафтомс аф саван.
— Тяни монга аф саван тонафтомс. Аф ламода тоньдедот лама содан. Мзярда, няить тиян, план, фкявок вал аф сави эздонза ёрдамс, — корхтась Вирьгинць алашань айдяма ёткова.
Пачкодсть шачема велеснон малас. Алашать айдязь шяйалдонь кигя. Весь ульсь станяк шовда. Велеса тяса-тоса куттнень эзга цифтордсть толнят, нувазь кштирьдсть аватьне. Лоткафтозь алашать сьвакоттнень ёткс, сотозь столбаняс и куцсть синць куборнява видеста алашань картненьди. Вирьгусь мольсь колхозонь правлениять ваксс, галанкать ваксса таргама ёткова эженць алашатьнень ванысна, Фокась. „А тулупонц марххтонга музя арды вастонц якшамсь“, корхтась эстиенза Вирьгусь и тусь апак пельхть картть ваксс. „Кудса эженьди. А лисеньдяряй, марясаськ“ — пшкядьсь салаваня Розгинтти.
Синь лихтезь карманцтост красин сюлекаснон; валозь нилецьке карда кенькшнень, конат ащесть картть эрь бокованза и пеганза. Валф васттненьди токафтсть тифтень сардоня и фкя-фкянь [ 95 ]ётазь ласькозь валксть куборняста. Минутада меле синь ардсть-ни пиче вирьть шири, конань пачканза мольсь ки фкя велес, а синь кяшема вастсна ульсь ниньге ичкозе ся велеть тона ширесонза.
Фокась пяк палсь и ниньге трнатозь эжнесь кядензон-пильгензон галанкать ваксса.
Якстерь кялькс купсть толхне нилицьке карда кенкшнень кувалма. Вархцедсь Фокать седиец, мзярда варьжакстсь вальмава картть шири. Кудынгельдя лисемстонза эряскадомань пачк цяткофтозе конянц кенкшке касякти, но сярядьфсь афи марявсь. Кода аф сонць ласьксь картть ваксс! Апак мяляфтт ласькондьсь кенкшненьди, но толсь конанцка ашезе макс панжемс и кярмодьсь ни шужярень крышати.
Фокась ласьксь аф ичкезе ащи пожарнай лапазть алу и мезе ули виец ушедсь гайфтемонза пайкть. Эстакиге теенза марявсть вайгяльхть: „Па-а-ажар“, синь нежедсть фалу малати. Кеменьшка колхозник ласьксть фкя-фкянь мельге каймоснон мархта и ушедсть види ширеста кенкшти ловонь йоряма. Народсь курок кружазе картть види ширенц и кафьцькя пензон, аньцек ашель кода работамс кяржи ширесонза, мес тоза уфась вармась. Ловонь читордомась курок арась увфокс. Вжнязь лийсть лофне каймотьнень ланкста. Но ортаста и стенаста лофне курьгечнесть йоряма ётковакиге меки мастору и толсь содась эсь тевонц. Алашатьне кардса ушедсть дубордома — синь марязь толть нарфонц. Зойновсь ласьконьдсь вазьфтема, алга панарса-понксса, ташта валенцяса. „Ялгат, се сада!“ марявсь сонь вайгялец латалть ваксса. Ведьгеменьшка колхозникт ласьксть ваксозонза. „Фатьнеда олкт и синниентть куроконя карда кенкшнень“. — Кеменьшка кядь кярьмодсь эрь олкти и минутада меле карда кенкшне ульсть синнефт. Палсть-ни кенкш касякневок, но карду сувамс ниньге можналь, Фокась юпадьсь потму, Зойновське сувась омба пеге Микитать мархта, Фокась вишкста йорясь яслятьнень эзда каркскятьнень, алашатьне ардозь тушендсть кенкшнень шири и дуборфса лисеньдьсть ушу. Толсь кармась ни яцемя потму и кардсь пяшкодсь качамда. Крышаста кармасть пяяремя карда потму пуринат, но потмостотьненьди ужяльхтельхть кадомс алашатьне толти, синь сякокс вишкста работасть. „Вона гривац алашать палы! Вона пулоц кирьвязьсь! Тясть новля латалу!“ марявсть вайгяльхть наротть йоткса.
Картть потомста листть Зойновсь и Микитась, синь сидеста тарксесть ваймеснон и кядьса нарнесть качамть эзда лисьф сельме ведьснон. Ашель аньцек Фокась. Мекпяли лиссь танга фкя алаша кардста и ардсь видеста наротть ёткова, сонь писть, вднать, сельменза. Картть потмоса марявсь ломанень кайгиста ойкснемя вайгяль. Иван-атянь Васясь ёрдазе кядьстонза кайменц и ласькозь сувась бока кенкшка карду толонь-качамонь пачк. Сон эстакиге сяка кенкшева лихтьсь бяремасонза Фокать, конац ойкснесь кайги вайгяльса, снавкс кеверьсть шаманц ланга сельме веденза и лангозонза ваномок саль аварьдемаце. Сонь тапазе нолдамстонза ся мекпяли лиси пиф сельме алашась.
Сядошка кайме вишкста яфиесть толти лофт. Курок ушедсть работама пасосневок. Синь жаднайста симсть боцькятьнень эзда ветть и кенердазь валозь толть ланкс. Алятьне, конат састь кудста каймефтема, усксесть багорхнень мархта карда пряста олкнень и стенаста ниньге палы шочконятьнень а аватьне ширеса матнезь синь ловса.