Wikisource

Колхозонь эряф/1939/10/М. Ю. Лермонтов/Поэманза. Романтическяй поэманза

< Колхозонь эряф | 1939 | 10 | М. Ю. Лермонтов
←
Лермонтовть творчествац. Лирикац
Колхозонь эряф (1939), № 10 Октябрь
edited by Чумаков И. Ф.
М. Ю. Лермонтов. Поэманза. Романтическяй поэманза
Драматическяй произведениянза
→
263763Колхозонь эряф (1939), № 10 Октябрь — М. Ю. Лермонтов. Поэманза. Романтическяй поэманза
 
[ 35 ]

ПОЭМАНЗА

Поэматне ащихть Лермонтовонди творчествань кельгома видкс. Юнкерскяй поэмада башка Михаил Юрьевич сьормадсь 24 поэма, конат можнат явомс колмова: 1) романтическяйхть, 2) реалистическяйхть и 3) народнай стильса поэмат.

РОМАНТИЧЕСКЯЙ ПОЭМАНЗА

Лермонтовонь романтическяй поэманзон эса марявихть Пушкинонь влияниянц следонза. Тя поэмати характернайкс ащихть тяфтама особенносттне:

1. Поэмать центраса ащи демоническяй личность, конац ащи кода титаническяй натура и пяк гордай, мрачнай настроенияц, разочарованнай. Геройсь аердаф ломаттнень эзда, лятф одиночествас и нравственнай страданияс, сидеста сонь эсонза эрси пяк оцю эгоизма.

[ 36 ]2. Поэмать эса макссеви лама лирически эсь мялень азомат, отступленият, лама эпитетт, метафорат, сравненият, гиперболат, сидеста использовандакшневи антитезань прием.

3. Действиять развитияса тиендеви кой-кодама хаотичность, азондомась мольфтеви сязендезь, вишкста йотни фкя явлениять эзда омбоцети: действиять развитияса аф педа-пес и аф валдста азонкшневихть детальхне, лама намекта — сембе тя панчси оцю простор лувить творческяй воображениянцты.

4. Обычна действиясь мольфтеви экзотическяй природать эса, конац каршек латцеви ломанти.

5. Поэмать геройц — европеец, конац васетькшни простой народть мархта или дикай племя мархта, конац марясы эсь связенц природать мархта и обычна сяда вяре ащи демоническяй личностть коряс.

Аф кода сонь предшественниконза, Лермонтов эсь романтическяй поэманзон эса старандай обраснень символизацияснонды и максси тонкай и крхка анализ геройть психологиянцты.

Лермонтовскяй романтическяй поэматнень сюжетснон колма разновидностьсна:

a) Геройсь панды кяж эсь народонц инкса, эсь роднянзон инкса или эсь инксонза. Тяфтапт „Аул Бастунджись“, „Измаил-Бейсь“, „Хаджи-Абрексь“.

б) Кельгихть фкя фкянь кафта существат, конатнень эзда фкясь — дух, омбоцесь — ломань. Тяфтамонди ащихть „Азраилсь“, „Ангел смерти“, „Демонць“.

в) Вии, волевой личностсь повонды люпштай обстановкас и няфни вии порыв свободати и ненависть рабскяй эрямати. Тяфтапт „Исповедсь“, „Боярин Орша“, „Мцыри“.

Романтическяй поэманзон эзда сембода выдающайкс ащихть „Демонць“ и „Мцырись“. „Демонть“ лангса Лермонтов сембе вийнь путозь работась 1829 кизоня ушедомок 1841 кизоть самс. Тя работать эса можна няемс ниле основной этапт. Ня этапнень эзда кажнайть ули сонцень соответствующай редакцияц, конац лиякс ащи лиятнень эзда. Васень редакциять эса героинять аш лемоц. Монахинять кельгоманц вельде духсь арьсесь мрдамс валдти и добрати. Кодак няезе ангелть, конац ащи героинять пря песа, злой духть эса сргозсь кунекстомась. Кунекстомась кошяресы геройть мезе тяза уль губондамс монашкать ваймонц.

Омбоце редакциять эса героиняти макссевихть ломанень качестват. Демонть эса няфневи кяжияфши, кяжень пандома мяль, гордость и страстность.

Колмоце редакциять эса действиясь Испанияста йотафневи Кавказу. Монахинять эземс тихтетькшни грузинка Тамара. Прибавакшневи азондома свадьбанди анокламать и женихть куломанц колга. Демонть эса винякшни стремления пароти. Сяда [ 37 ]резкайста няфневи сонь натуранц противоречивостец и трагизмац.

Нилеце редакциять эса аф ламода лиякс няфневи Тамарать образоц. Страстностец йотафневи лия планц, няфневихть эсонза небеснай чертат: кристальнай чистота, невинность, доверчивость, наивность, состраданиянь искренность и лиянди паронь арьсема. Героинять судьбац няфневи лиякс. Ангелсь нельгондьсы героинять ваймонц Демонть кядьста и сявсы менельти.

„Демон“ поэмать основаса ащи идея сянь колга, што кельгомась может улемс ломанть возрождениянцты средствакс, кельгомась способнай сяськомс ломаттненди ненавистть и нльне эреклафтомс паронь и правдань мяльхть казяма, сембонь эзда аердаф, эгоистичнай ваймоть эса.

Кельгомать колга мотивсь кода возрождениянь средства васьфневи лама западно-европейскяй и русскяй писательхнень творчестваса.

Тяфта, кепотьксонди, Альфред де-Виньень „Элоа“ поэмасонза азондови кода ангелть сестрац Элоа кельгозе сатанать. Сатанась маштсь стирть седис эсь участенцты состраданиянь чувствань и мялень тиема сянь колга, штоба чистай кельгомать вельде шарфтомс сатанать од эряфти. Но сатанать ваймоса кяжсь и ненавистсь сяськсть, и сатанась губондазе эсь кельгоманц.

Томас Муронь „Любовь ангелов“ произведениясонза лама общай чертада Лермонтовонь поэманц мархта. Васень ангелсь кельгозе масторть лангса эряй Леа стирть ся пингста, мзярда ангелсь лиель масторть велькска. Тянь жа минь мушенттама „Демонть“ эздонга. Омбоце ангелсь, штоба келькфтемс пря Лилисть кядьста, сон стирти эвондай онцтонза, штоба крьвястемс сонь эзонза воображения и кельгомань мяль. Тянь лаца жа ситуация и Лермонтовть поэмасонга. Колмоце ангелсь кулезе Нама красавицать лютнаса чуднай мораманц. „Демонть“ васень редакциясонза духсь кульсы испанскяй лютнаса монахинять мораманц.

Кой-кодама общность Лермонтовть поэмаста можна няемс Байрононь „Каинонц“ мархта, Пушкинонь „Демононц“ и „Ангелонц“ мархта, Гётень „Фаустонц“ мархта. Тя общность азонкшневи аф сянь мархта, што фкя писательть лангс тись влияния омбоцесь, а ся источникть общностенц мархта, конань эзда сявондезь материалть писательхне. Тянди козя источникокс ащи устнай народнай творчествась.

„Демон“ поэмать основаса ащи кавказскяй легендась сянь колга, што злонь духсь может мрдамс паронь тиемати стирнять чистай возвышеннай кельгоманц вийнц вельде.

Кельгомать ашезь сата вийц парти Демонть мрдафтомс, конац максф кода символ мировой злоти. Но сембе сяка победась лядсь Тамарать мельге, конац кода бта ащи символкс пароти, [ 38 ]чистотати. Ся фактсь, што оцязоронь цензурась ашезь мярьгонде поэмать печатламдонза мянь 1860 кизоть самс, тейнек арам, аф случайнайль. „Демонть“ эзда няйсть аф отвлеченнайста решандакшневи философскяй кизефкс, а стама поэма, конац кода-бди няфнесы русскяй действительностть.

„Мцырись“ — русскяй литературать эса инь цебярь поэматнень эзда фкясь. Сон тихтедсь 1840 кизоня. Но тя поэмада инголе Лермонтов сьормадсь лама лия произведеният, конат эрявихть ванондомс кода анокламань этап. Тяза эрявихть васендакиге лувомс „Исповедть“ (1830) и „Боярин Оршать“ (1835). Сембе ня поэматнень центраса ащи од ломанень образ, кона пяшксе вийда и лаказь лакай энергияда, но повф жалкай эрямати душнай монастыри. „Исповедть“ эса няфтьф испанскяй од монах, конац маластонь омбоце монастырть эздонь монашкать преступна кельгоманкса пякстафоль тюрьмав. Казнендамдонза инголе монахсь мольсь исповедьс старецти.

„Боярин Оршать“ эса няфневи Иван Грознайнь эпохац. Бояринть воспитанникоц монахсь Арсений стиренц кельгоманкса оцюста наказандафоль: Бояринць Арсенийнь и эсь стиренц озафтозень темницав, коса стирсь и кулось.

Поэмать сьормадоманцты главнай толчококс Лермонтовти ащесь реальнай факт: Кавказса улемстонза поэтсь васедсь сире монах мархта, конац азондозе Михаил Юрьевиченди сонцень печальнай судьбанц. Идькс пингстонза тя горецть вихца путозь монастыри. Сон тоскавакшнесь эсь родной вастонзон колга, аф весть тяряфнесь ворьгодемс свободати. Весть ворьгодемстонза сон простудиндавсь и пяк урмаськодсь. Пчкамдонза меле сетьмось и мирендась судьбанц мархта. Лермонтовть геройц аф кирдемшка старандай лисемс свободати и пяшксе ненавистьта рабскяй эряфть каршес. Мцырить аф кирдемшка, страстнай порывоц свободати шоворькшни родинанцты седиень керомшка кельгомать мархта. Тя образть величияц ащи кеме убеждениять эса, што сяда цебярь куломс тюрезь, чем эрямс душнай обстановкаса рабонь положенияса.

Сонцень композициянц коряс „Мцыри“ поэмась явондови кафта пяльксова: Мцырить повествованияц и исповедец, конатнень эса няфневихть геройть сложнай психическяй переживаниянза. Повествовательнай вастть эса и азондови ся, кода русскяй генералсь усксь Тбилисить ланга кота кизоса идь. Цьоранясь урмаськодсь и максфоль монастыри. Монахне макссть тейнза лем Мцыри, лиякс мярьгомс — грузинскяй кяльста йотафтозь „послушник“. Монастырскяй эряфсь люпштазь люпштась Мцырить эса. Сон ворьгодсь. Колма шит сон якась, а нилеце шиня музь цють аф кулофста и тузь меки монастырти.

Геройть исповедьса Лермонтов оцю мастерстваса няфнесыне Мцырить сложнай душевнай переживаниянзон. Геройсь няйсь мучительнай сталмот неволяса и сась афазомшка оцю мялец [ 39 ]свободати. Сонь мялезонза лядендсть идькс пингонь аф лама золотой шинза. Ворьготькшнеманц пингста танцтиста марязе свободать бурнай радостенц, марязе природать мархта марс шовореманц. Грузинкань няемста сргозсь сонь эсонза потребностсь нежнайста и псиста кельгомати. Мцырись няезень вири эрьгодемань нужатнень, барсть мархта тюремань дикай наслаждениять. Геройсь кирдсь стама ломанень отчаяния, конань меки мрдафтозь тюрьмав, мзярда ломанць шарьхкодезе эсь вийфтемашинц и, меколи, опамкшни Мцырить эса крьвязсь мяль хоть куломс воляса.

Мцырись — тя символ сембе цебярти, одти, прогрессивнайти, мезе ульсь русскяй эряфть эса йотай веконь 30-це кизотнень пингста. Тя одть люпшнезь мрачнай эпохань монастырскяй стенатне, но сон ванфнезе эсь мяштьсонза свободать кельгоманц, сембе вийнь путозь старандась молемс каршезонза и юмсесь неравнай тюремаса, лядонкшнесь вернайкс мекольцеда ваймонц таргамс основной страстенцты — ненависть рабствать каршес и свободати, просторти эсь народонц благанц инкса плодотворнайста тюремать колга аф азомшка оцю мяльсь.

Лермонтовонь реалистическяй поэманза характернайхть сянь пяльде, што синь эсост няфтьф ся пингонь действительностсь, яркайста няфтьфт обществать бытоц и обуцянза, повествовательнай и описательнай васттне ащихть васень планца. Поэматнень геройсна — конкретнай ломатть. Поэматнень эса ули юмористическяй и критическяй подход няфневи явлениятненди.

„Казначейша“ шуточнай поэмасонза (1837) остроумнайста и комичнайста арьсеф мотивсь сянь колга, кода уланскяй офицерсь Гарин картаса налхкозь сявозе тамбовскяй казначейть Бобковскяйнь рьванц. Тя поэманц ули кой-кодама общностенц Байрононь „Беппо“ произведениянц, мархта: венецианскяй корнавалть вастс Лермонтов няфнесы ся впечатлениять, конань тиезе тамбов эряйхнень лангс ошти саф уланскяй полксь. Беппо купецсь похожай Бобковскяй казначейть лангс. Беппоть кокетливай рьвац шары Авдотья Николаевнать шири, графсь — Гарин офицерть шири. Тя поэмась сьорматф знаменитай онегинскяй строфаса.

Лермонтов пяк вернайста и меткайста няфтезень провинциальнай дворянинть и чиновничествать пустой и пошлай эряфснон.

„Сашка“ и лия поэманзон эса (1836) провинциальнай и столичнай дворянствать эряфснон кели картинанц фонца няфтезень светскяй Дон-Жуанть — Сашкать кельгомань похождениянзон.

Лермонтовть апак аделак „Сказка для детей“ произведенияц должен ба улемс эсь форманц коряс кода стихса сьорматф роман, кода „Евгений Онегин“. Васень вастти авторсь йорась путомс стирнять-аристократкать Нинать образонц, конанди максфтольхть кой-кодама демоническяй чертат.

Пяк оцю ценностец и интересоц народнай стильса сьорматф [ 40 ]„Песня про царя Ивана Васильевича, молодого опричника и удалого купца Калашникова“ поэманц (1837). Тя поэманц сьормадомста Лермонтов пользовандась колма основной источникса:

а) использовандазе реальнай фактть, кона ульсь Москуса 1831 кизоня. Фкя гусар салазе замоскворецкяй купецть рьванц, конац саль церькуста. Мирдсь вииста пандсь кяж салайти. Тянкса купецть арестовандазь и, пякстафста улемста, юмафтсь пря эсь кядьта;

б) Лермонтов, кода и Пушкин, пяк кельголезе устнай народнай творчествать. Сон внимательна лувонкшнезень былинатнень, конат печатлафтольхть Кирша Даниловонь сборникса, тонафнезень народнай моротнень, сембода пяк Мастрюк Темрюковичень колга, коса азонкшневи лия масторонь силачть Мастрюконь клокса тюрендеманзон колга русскяй боецнень каршес Грознайнь оцязоркс улемань пингонзон эзда. Русскяй силачне сяськозь прянь шнафты противникснон. Михаил Юрьевич использовандазень стане жа русскяй народнай богатырьхнень и вражескяй вийхнень йоткса поединкатнень колга сьормадоматнень;

в) штоба сяда яркайста и правдива няфтемс Иван Грознайнь пингонц колоритонц, бытть, обуцятнень, нраватнень, „Песня про купца Калашникова“ поэмать автороц тонафнесь лама историческяй документ и работат, конат няфнезь XVI векть эзда эряфть.

Лермонтовть поэмац эсь идейнай содержаниянц коряс, композициянц коряс, художественно-изобразительнай средстванзон коряс ащи йофси народнай произведениякс. Обрасне няфтьфт яркайста и колоритнайста. Грознайнь эса няфтьфт мрачностень, подозрительностень, жестокостень, упрямостень и деспотизмань чертатне. Эсь валонц сон лувондсы законкс. Сон няфни самоуправствань и самодурствань чертат, пяк тушендыхть мялезонза клокса тюрематне.

Лихой опричниксь Кирибеевич — смелай, страстнай чувствац, конань инкса сон анок тиемс сембонь. Сонь поведениясонза няеви бесшабашнай удаль, прянь шнафтома, эгоистичность.

Поэмать эса центральнай персонажкс ущи Степан Парамонович Калашников. Удалой, смелай купець — вии, благороднай ломань, характероц кеме, стойкай, кшнинь кодяма.

Опричниксь колазе купецть семейнай павазонц, оцюста позорязе сонь обществац инголе. Личнай обидась ульсь стама путьксокс, конанц эзда лопадсь сонь терпенияц. Оцязоронь опричникнень разнузданнай гнетснон и самовольстваснон каршес люпштаф народнай гневсь сембе эсь вийнц няфтезе Калашниковть вельде. Калашников максф кода народть инкса ащи ломань, конац правдать инкса тюреманкса сознательна лиссь тюрема сянь содазь, што ули шавф, и тя героизманц мархта сргозьфтемс лиятненге эряма и тюрема.

[ 41 ]Клокса тюремста Кирибеевичень шавомда меле Калашников сьопозе кяжень пандомать истиннай причинанц, сяс мес сонь сознательнай поступкац ульсь аф аньцек эсь инксонза кяжень пандома тев, но и народнай протестонь стихйнай актокс опричнинань сембе системать каршес. Плахать лангс прянц путомста Калашников аф эняльди ваймонц кадоманц инкса, сяс мес тяфтама мужества мархта ломаттненди куломась сяда цебярь, чем эрямась позорса и рабскяй униженияса.

Поэмать композицияц ламода шары народнай былинатнень типичнай построенияснонды. Поэмать морасазь народнай певецне-гуслярхне. Былинань ушедомась, пирть традиционнайста няфтемац, обращениятне, Алена Дмитриевнать аф эряскодозь азондомац, былиннай концовкатне — сембось тя корхтай поэмать композицияса народностть колга. Эсь поэманцты сявонди художественно-изобразительнай средстват народнай устнай поэзиять чудеснай источниконц эзда. Тяса постояннай эпитетт: якстерь шиня, оржа сабля, золотой казна, вишке вармат и отрицательнай сравненият: аф пиндолды менельса якстерь шинясь, аф мзелткшнихть теест сенем туцянятне, тяфта золотой венецса эсь озама вастсонза ащи грознай оцязорсь Иван Васильевич.

Поэмать эса васьфневихть кафта лаца повтореният: анафорическяйхть, мзярда кафксть лятфневи валхне ащихть поэтическяй строкатнень ушетксса:

„Тяйть када афоцька иднятнень,
Тяк када эсь од рьвяцень“.

Али эрьси стык, мзярда поэтическяй строкась ушеткшни стама валса, кодамса аделакшневи тяда ингольдень строкась:

„Мезе серет прась кельме ловнять лангс,
Кельме ловнять лангс кода пиченясь,
Кода пиченясь пиче вирняса,
Модать вакскава сонне керозь ни“.

Тяса жа минь васьфнетяма психологическяй параллелизма, мзярда ряц арафневихть природать явлениянза ломанть душевнай переживаниянзон мархта: кепотьксонди, сьормадови югась и сяка пингть купецть бурно-тревожнай переживаниянза, конац учсесы эсь рьванц.

Устнай народнай творчествать влияниянц ала поэтсь ноляй тевс ритмико-синтаксическяй параллелизмат:

„Монь сельмведи сельмонень кавалсь сивсыне,
Монь пакарнень пиземсь штасыне“.

Меколи, васьфневихть звуковой и синонимическяй тавтологическяй повтореният: пир пиравамс, авардезь авардихть, дивнай дива или щамс-срхкафтомс, шовамс-оржаптомс и ст. тов.

„Песня про купца Калашникова“ поэмать художественнай достоинстванзонды оценкань максомста великай русскяй критиксь Белинский корхнесь: „Лермонтов поэмаса ащи опытнай, гениальнай архитекторкс“.

 
 

(примечание редактора вики-библиотеки) Ссылки на произведения, перечисленные в этой статье:

Retrieved from "https://wikisource.org/w/index.php?title=Колхозонь_эряф/1939/10/М._Ю._Лермонтов/Поэманза._Романтическяй_поэманза&oldid=855452"