Колхозонь эряф/1940/01-2/Ленинскяй правдась
| Ленинскяй правдась |
| (Белорусскяй ёфкс) |
Велеса эрясть кафта братт. Модать сокаса карсекшнесть, лангозонза сельмеведь пяертькшнесть, копорьснон дугакс мянцекщнесть. Синь сёроснон и жуватаснон помещикне сявондезь, а тянкса питне эземс копорьс макссесть кулокт.
Браттне муцявсть аф киза, аф кафта, а сняра, што синцьке аф содасазь. Но и перьфпяльдень алятневок эрясть аф синдедост лац.
Мольсь браттнень мяльсновок лиянь лангс работамать эзда. Арьсезь синь тумс Россия-матушкать эзга правдать вешема. Тусть. Молихть ков, молихть киза. Няйсазь: ащи оцю веле. Велеть кучкаса — панскяй куд и вакссонза — кевонь церькав.
„Ареда суватама сей, — арьсихть братьятне, — кизефтьсаськ, коса эряй правдась“.
Молихть синь велеть эзга, а каршезост коляскаса арды помещик.
— Коволдоннетяда тинь, алянят, коста мольхтяда и мезе вешенттяда? — кизефнесыне синь помещиксь.
Тейнза браттне отвечасть:
— Эряме минь нищайшиса, горяса, тяфта тяда ламос эрямска аш кода. Мольхтяма правдать вешема. Тонафтомасть минь, помещик, коста сонь мумс.
— Ладна, — корхтай помещиксь, — мон тейнть няфтьса правдать, кда ули мяленте, аньцек тинь тянкса фкя киза тейне работада.
Браттне согласиндасть.
Работасть синь, работасть: паксять соксезь, сельме ведьса сонь валондозь. Йотась киза. Мольсть синь помещикти и корхтайхть:
— Тонафтомасть минь, помещик, правдать вешема.
— Ну, вов тейнть и правдась, — отвечай тейст помещиксь, — тинь вдь нефнеф и рдазу ломаттяда, тейнть эряви фалу работамс минь, помещикнень лангс!
Сельгсть браттне и тусть сяда тов.
Молихть ков, молихть киза. Пачкодсть велес. Каршезост моли поп.
Браттне тейнза.
— Тонафтомасть, бачка, коста мумс правдать.
[ 27 ]— Ладна, — корхтай попсь, — мон тейнть правдать озондозь анаса менелень оцязорть кядьста, а тинь тянкса тейне киза работада.
Согласиндасть браттне. Работасть синь, работасть: попти модать соксезь, сонь сельмеведьса валондозь. Йотась киза. Мольсть браттне попти, а сон тейст и корхтай:
— Работада цебярняста, шкабавазть лангс тяда пенянда, — вов тейнть и правда!
Сельгсть браттне, тусть сяда тов.
Мольсть синь купецть шири. Лиссь сон, козясь, эчксь, сон помещиктонга и поптонга эчке.
— Ладна, — корхтай купецсь, тонафттядязь мон тинь, коста мумс правдать, аньцек тинь работада фкя киза монь лангозон.
Браттне согласиндасть. Кармасть синь работама купецти, сюрокс синь мянцевсть. Тонафнезень синь купецсь, кода честнай народть васькафнемс, ашуфненди мерсемс сяда кржа. Нинге изь ёта кизовок, кода ёмла братсь и корхтай:
— Сяда ламоксть ковонга мон аф молян правдань вешема! Аш светть лангса мужицкяй правда!
И мрдась сон эсь велезост. А сембода оцю братсь настойчивай — изь ёра правдафтома куду самс. Ськамонза тусь фабрикантти.
Фабрикантсь пандонга, и поптонга, и купецьтонга козя. Оцю братсь ушедсь сонь ширесонза работама. А фабрикаса работайхть лама ломаньда.
Работасть синь лама кизот. Дугакс мянцевсть, а правдать ашезь мушенда. Весть братсь кульсь сетьме корхтама:
— Ули аньцек фкя ломань, конац содасы правдать. Ся ломанти мярьгихть Ленин, а эряй сон Питерса.
Мяляфтозе братсь сонь лемонц и тусь ся ломанть вешема. Мольсь лама шит, а можи и кофт. Пачкодсь Питеру. Няйсы — моли рабочай. Братсь сонь кизефтезе салаване:
— Коста Ленинонь тяса мумс?
А тонац тейнза нинге сяда салаване:
— Аде мельган, мон тонь пачфтте.
Вов мольсть синь обыкновеннай комнатас. Перьфпяле пяк лама разнай книгада. Лиссь тейст ломань, щаф каряф аф козяста, но чистайста. Лиссь и ласкавста корхтай:
— Шумбратада, ялгат, мезе цебярнясь астада?
Азондозе братсь, кода сон вешендезе правдать. Кувать синь мархтост корхтась Ленин фабрикаса порядкатнень колга, кизефнесь велень ашуфнень колга, а тоса кизефтезе:
— Правильна тон тиеть, што туть тон правдать вешема фабрикав, тоса сяда курок мусак, коса сон эряй—ащи. Тинь сонь кирдьсасть эсь кядьсонт.
И Ленинць азондозе братти, кодане эряви тюремс рабочай правдать инкса, штоба аф работамс аф помещикненди, аф купецненди, аф фабриканттненди, и кодане панемс синь и оцязортьке.
[ 28 ]Мрдась братсь фабрикав и ушедсь ялганзонды ленинскяй правдать азондома. Фкясь азонды — кемоттне кулхцондыхть, кемоттне азондыхть — сядось кулхцонды. И тусь ленинскяй правдась сембе светть ланга.
Лама кизот якась сон фабрикава и велева. Кепсезень рабочайхнень и крестьяттнень тюрема. А кемзисемгоце кизонь октябрьста лиссь ся правдась, кармась корхтама кайги вайгяльса, кармась марявма сембе мирти. Рабочайхне и крестьяттне кеподсть война помещикнень и фабриканттнень каршес. А вятезень синь Ленинць эсь инь цебярь лездыенц — Сталинонь мархта. И ленинскяй правдась сяськсь.
Сяда меле рабочайхне и крестьяттне сяда тов аф работайхть помещикнень и фабриканттнень лангс, копорьснон дугакс аф мянцесазь, модать сельмеведьса аф валондсазь, — тяни синць азорхт эсь фабрикаснон, эсь модаснон и эсь эряфснон лангса.